1Tantara 5 - DIEM PROTESTANTA

Ny taranak’i Reobena

¹ I Reobena no lahimatoan’i Jakôba, satria izy no voalohan-terany; kanefa tamin’ny nandotoan’i Reobena ny vadikelin-drainy, dia nomena an’i Jôsefa zanakalahin’i Jakôba ny fizokiany, ka tsy voasoratra ho zokiny tao amin’ny tetiarana intsony i Reobena.

² I Joda no nahery indrindra teo amin’izy mirahalahy avy, ka izy no nipoiran’ilay ho tonga mpanjakan’i Israely; nefa ny fizokiana dia an’i Jôsefa ihany.

³ Ny zanakalahin’i Reobena, lahimatoan’i Jakôba, dia i Hanôka sy i Palò ary i Hetsirôna sy i Karmỳ.

⁴ Taranak’i Jôela: i Semahià zanakalahin’i Jôela, i Gôga zanakalahin’i Semahià, i Simehỳ zanakalahin’i Gôga,

⁵ i Mikà zanakalahin’i Simehỳ, i Reaià zanakalahin’i Mikà, i Bahala zanakalahin’i Reaià,

⁶ ary i Beerà zanakalahin’i Bahala; io Beerà io, izay nentin’i Tiglato-Pilesera mpanjakan’i Asiria ho babo, no filohan’ny Reobenita.

⁷ Ny rahalahin’i Beerà, araka ny fianakaviany avy, dia voasoratra ao amin’ny bokin’ny taranany; ka ny voalohany dia i Jehiela, ny manaraka dia i Zakarià,

⁸ ny farany dia i Bela izay zanakalahin’i Hazaza sy zafin’i Semà ary zafiafin’i Jôela. Ny Reobenita dia nonina ny faritra hatreo Harôhera ka hatrany amin’ny tendrombohitra Nebao sy hatrany Bahala-Mehôna;

⁹ tany atsinanana dia nonina hatrany akaikin’ny taniefitra izay nampisaraka azy amin’ny ony Eofrata izy ireo, fa nihamaro be ny biby fiompy tao amin’ny faritany Gilehada.

¹⁰ Tamin’ny andron’i Saoly no niady tamin’ny Hagrita ny Reobenita ka nandresy azy; avy eo, dia nanorin-dasy manerana ny ilany atsinanana amin’i Gilehada.

Ny taranak’i Gada

¹¹ Ny taranak’i Gada dia nonina tandrifin’ny Reobenita tao amin’ny faritany Basàna ka hatrany Salkà:

¹² tao Basàna dia ry i Jôela no voalohany, ry i Safana no faharoa, ary ny manaraka dia ry i Jahenay sy ry i Safata.

¹³ Fito ny rahalahin’ireo, araka ny fianakaviany avy, dia Mikaela sy i Mesolama, i Seba sy i Jôray mbamin’i Jahikano sy i Zia ary i Hebera:

¹⁴ ireo no zanakalahin’i Abihaîla ilay zanakalahin’i Horỳ sy zafin’i Jarôa sy zafiafin’i Gilehada sy zafin-dohalik’i Mikaela sy zafin-kitrokelin’i Jesisay sy zafim-paladian’i Jehidao ary zafin-dorian’i Boza.

¹⁵ I Ahỳ zanakalahin’i Habdiela sy zafin’i Gonỳ no filohan’ireo fianakaviana ireo.

¹⁶ Ny taranak’i Gada dia nonina tao Gilehada sy Basàna mbamin’ny faritra miankina aminy sy ny kijàna rehetra any Siriôna mipaka hatrany amin’ny sisiny farany lavitra indrindra.

¹⁷ Ireo taranak’i Gada rehetra ireo dia voasoratra tanaty boky avokoa tamin’ny andron’i Jôtama mpanjakan’i Joda sy tamin’ny andron’i Jerobohama mpanjakan’i Israely.

¹⁸ Ny Reobenita sy ny Gadita ary ny antsasaky ny fokon’i Manase dia nisy lehilahy mahery, havanana mitana ampinga aman-tsabatra sy mandefa tsipîka sady zatra ady: 44.760 no isan’ireo vonon-kiantafika.

¹⁹ Dia niady tamin’ny Hagrîta sy tamin’ny taranak’i Jetora sy i Nafisa ary i Nôdaba ry zareo.

²⁰ Nitaraina tamin’Andriamanitra izy nandritra ny ady, ka nohenoin’Andriamanitra satria natoky Azy; dia novonjeny ary voatolotra ho eo an-tanany ny Hagrîta sy izay rehetra mpomba azy.

²¹ Nataony babo ny biby fiompiny (dia rameva 50 000, ondry aman’osy 250.000, boriky roa arivo) ary koa olona iray hetsy.

²² Marobe ny fahavalo maty niampatrampatra satria avy amin’Andriamanitra ny ady. Ary nipetraka nisolo toerana ny Hagrita ry zareo mandra-pahatongan’ny fahababoana.

Ny taranak’i Manase teny atsinanan’i Jôrdàna

²³ Ny antsasaky ny fokon’i Manase dia nonina ny faritra hatreo Basàna ka hatrany Bahala-Hermôna sy Senîra ary ny tendrombohitra Hermôna; nihamaro be izy ireo.

²⁴ Ny loham-pianakaviany dia i Hefera sy i Jisehỳ, i Eliela sy i Hazriela mbamin’i Jeremià sy i Hôdavià ary i Jahediela: lehilahy mahery sy olo-malaza ireo sady samy lohan’ny fianakaviany avy.

²⁵ Ny Reobenita sy ny Gadita ary ny antsasa-pokon’i Manase dia nivadika tamin’ilay Andriamanitry ny razany ka nanompo ny andriamani-kafan’ny firenena tompon-tany izay efa naringan’Andriamanitra teo anoloany.

²⁶ Dia nampirisihin’ilay Andriamanitr’i Israely i Pola sy i Tiglato-Pilesera samy mpanjakan’i Asiria, ka nobaboin’ireo ny Reobenita sy ny Gadîta ary ny antsasaky ny fokon’i Manase sady nentiny tany Halà sy Habôra sy Harà ary tany amoron’ny ony Gôzàna, ka mbola any ireo mandraka androany.

²⁷ Ny zanakalahin’i Levỳ dia i Gersôna sy i Kehata ary i Merarỳ.

²⁸ Ny zanakalahin’i Kehata dia i Hamrama sy i Jitsehara ary i Hebrôna sy i Hoziela.

²⁹ Ny zanakalahin’i Hamràma dia i Aharôna sy i Mosesy; ary ny zanakavaviny dia i Miriama. Ny zanakalahin’i Aharôna dia i Nadaba sy i Abihò ary i Elehazara sy i Itamara.

³⁰ I Elehazara no ray niteraka an’i Pinehasa; i Pinehasa, ray niteraka an’i Abisoa;

³¹ i Abisoa, ray niteraka an’i Bokỳ; i Bokỳ, ray niteraka an’i Hozỳ;

³² i Hozỳ, ray niteraka an’i Zerahià; i Zerahià, ray niteraka an’i Meraiôta;

³³ i Meraiôta, ray niteraka an’i Amarià; i Amzarià, ray niteraka an’i Ahitoba;

³⁴ i Ahitoba, ray niteraka an’i Tsadôka; i Tsadôka, ray niteraka an’i Ahimahatsa;

³⁵ i Ahimahatsa, ray niteraka an’i Hazarià; i Hazarià, ray niteraka an’i Johanàna;

³⁶ i Johanàna, ray niteraka an’i Hazarià (ity Hazarià ity no nanao fisoronana tao amin’ny tempoly izay naorin’i Salômôna tao Jerosalema);

³⁷ i Hazarià, ray niteraka an’i Amarià; i Amarià, ray niteraka an’i Ahitoba;

³⁸ i Ahitoba, ray niteraka an’i Tsadôka; i Tsadôka, ray niteraka an’i Saloma;

³⁹ i Saloma, ray niteraka an’i Hilkià; i Hilkià, ray niteraka an’i Hazarià;

⁴⁰ i Hazarià, ray niteraka an’i Seraià; i Seraià, ray niteraka an’i Jôtsadaky.

⁴¹ Ary i Jôtsadaky dia lasan-ko babo rehefa natolotry ny TOMPO ho babon’i Nebokadnetsara ny mponin’i Joda sy i Jerosalema.