Josoa 8 - Baiboly Katolika

4. NY NAKANA AN’I HAIA Didy nomen’Andriamanitra an’i Jôsoe

¹ Ary hoy i Iaveh tamin’i Jôsoe: «Aza matahotra na manam-badi-po, fa ento miaraka aminao ny mpiantafika rehetra, dia mitsangàna ka miakara hamely an’i Haia. Jereo efa natolotro eo an-tananao ny mpanjakan’i Haia, mbamin’ny vahoakany sy ny tanànany ary ny taniny.

² Koa tahaka ny nanaovanao an’i Jerikô sy ny mpanjakany no hanaovanao an’i Haia sy ny mpanjakany koa; saingy ny babo avy aminy sy ny biby ompiny kosa no alao ho anareo. Asio otrika ao ivohon’ny tanàna.»

Fihetsehana nataon’i Jôsoe

³ Dia niainga i Jôsoe sy ny mpiantafika rehetra hiakatra hamely an’i Haia. Nifidy lehilahy mahery 30.000 i Jôsoe, nalefany tamin’ny alina,

⁴ ka izao no baiko nomeny azy: «Mahìna ianareo, dia aoka hanotrika ao ivohon’ny tanàna ianareo, ka aza manalavitra ny tanàna loatra ary samia mivonona hatrany.

⁵ Fa hanatona ny tanàna aho sy ny vahoaka rehetra izay miaraka amiko, ka nony mivoaka mitsena anay izy ireo toy ny tamin’ny teo, dia handositra eo anoloany izahay.

⁶ Ary hivoaka hanenjika anay izy ireo mandra-pahatarikay azy lavitra ny tanàna fa hanao hoe: Mandositra antsika toy ny teo izy. Ka dia handositra eo anoloany izahay.

⁷ Amin’izay kosa ianareo dia hivoaka avy ao amin’ny fanotrehanareo, ka haka ny tanàna; hatolotr’i Iaveh Andriamanitrareo eo an-tananareo izy.

⁸ Ary rehefa azonareo izy dia doroy, ataovy araka ny tenin’i Iaveh. Indro efa nomeko didy ianareo izao.»

⁹ Dia nalefan’i Jôsoe izy ireo ka lasa naka toerana hiotrika tao anelanelan’i Betela sy i Haia, tao andrefan’i Haia. Ary i Jôsoe kosa nitoetra teo amin’ny vahoaka ihany tamin’iny alina iny.

¹⁰ Dia nifoha maraina koa i Jôsoe, ka nony efa nijery ny toetry ny vahoaka, dia nandroso izy mbamin’ny loholon’i Israely, nitarika ny vahoaka hamely an’i Haia.

¹¹ Niakatra sy nanatona tao avokoa ny lehilahy mpiantafika rehetra teo aminy; nony tonga teo an-tandrifin’i Haia izy, dia nitoby teo avara-tanàna, ka ny lohasaha no nanelanelana azy sy i Haia.

¹² Dia naka lehilahy sahabo ho dimy arivo i Jôsoe, napetrany ho otrika eo anelanelan’i Betela sy i Haia, teo andrefan-tanàna.

¹³ Nony voalahatry ny vahoaka ny toby rehetra teo avara-tanàna, sy ny otrika teo andrefan-tanàna dia nandroso eo am-pamatonan-dohasaha iny alina iny ihany i Jôsoe.

Ady tao Haia

¹⁴ Vao nahita izany ny mpanjakan’i Haia dia nifoha maraina koa faingana ny lehilahy tao an-tanàna ka nivoaka hitsena an’i Israely. Nandroso niaraka tamin’ny vahoaka rehetra ny mpanjaka nankeo amin’ny toerana nifanekena tandrifin’ny lohasaha, fa tsy nahalala hoe misy otrika hamely azy ao ivohon’ny tanàna.

¹⁵ Nody resy teo anoloan’izy ireo i Jôsoe sy i Israely rehetra, ka nandositra tamin’ny lalana mankany an’efitra.

¹⁶ Tamin’izay ny vahoaka rehetra tao an-tanàna, nifamory hanenjika azy ireo. Dia nanenjika an’i Jôsoe izy ireo, ka dia voatarika lavitra ny tanàna.

¹⁷ Tsy nisy lehilahy sisa tao Haia sy tao Betela fa nivoaka nanenjika an’i Israely izy rehetra. Navelany nivoha ny tanàna, ka lasa nanenjika an’i Israely izy.

¹⁸ Ary hoy i Iaveh tamin’i Jôsoe: «Atsory mankany Haia ny lefona eny an-tananao, fa efa natolotro ho eo ambany fahefanao izy.» Dia natondron’i Jôsoe ny tanàna ny lefona teny an-tanany.

¹⁹ Vao nanatsotra ny tanany izy, dia niroatra faingana avy eo amin’izay nitoerany ny otrika, ka nihazakazaka niditra ny tanàna sy naka azy, ka nodorany faingana ny tanàna.

Loza nanjò ireo mponina tao Haia

²⁰ Niherika kosa ny tompon-tanànan’i Haia ka nahita ny setroky ny tanàna nisavoana any an-danitra, ary izy ireo tsy afa-nandositra intsony, na ho aiza na ho aiza, fa ny vahoaka nandositra nankany an’efitra nifontina namely azy nanenjika.

²¹ Ary nony hitan’i Jôsoe sy i Israely rehetra ity tanàna efa azon’ny otrika, sy ny setroka nisavoana, dia nifotitra izy ka namely ny mponina tao Haia;

²² ry zareo kosa nivoaka tao an-tanàna hitsena azy ka tonga voalafatry ny Israelita ny mponina tao Haia, ny sasany avy ao andaniny iray, ny sasany koa avy ao ankilany iray; ka noresen’ny Israelita izy, ka tsy nasiany olona iray sisa velona na afa-nandositra.

²³ Nataony sambo-belona ny mpanjakan’i Haia, ka nentiny teo amin’i Jôsoe.

²⁴ Nony tapitra matin’i Israely ny mponina rehetra tao Haia, na teny an-tsaha, na tany an’efitra nanenjehany azy, ka efa lavon’ny lelan-tsabatra daholo hatramin’ny farany indrindra, dia niverina tao an-tanàna indray i Israely rehetra ka novonoiny tamin’ny lelan-tsabatra ny olona tao.

²⁵ Ary nisy 12.000 no totalin’ny maty tamin’izany andro izany, na lahy na vavy, samy mponina tao Haia avokoa.

Fanaovana anatema sy fandravana

²⁶ Tsy nahemotr’i Jôsoe ny tanany natsotrany sy ny lefona mandra-panaovany anatema ny mponina rehetra tao Haia.

²⁷ Ny biby fiompy sy ny zavatra babo tao an-tanàna ihany no nalain’ny Israelita, araka ny didin’i Iaveh, izay nandidiany an’i Jôsoe.

²⁸ Nodoran’i Jôsoe i Haia ary nofongorany nataony antontan-trano rava mandrakizay, izay mbola ao mandraka androany.

²⁹ Nasainy nahantona tamin’ny hazo anankiray ny mpanjakan’i Haia, ka navelany teo mandra-paharivan’ny andro. Nony maty ny masoandro dia nasain’i Jôsoe nesorina teo amin’ny hazo ny fatiny, ka natsipy tao am-bavahadin’ny tanàna, sy notsindriana antontam-bato lehibe izay mbola ao mandraka androany.

5. SORONA SY FAMAKIANA NY LALANA TAO AN-TENDROMBOHITRA HEBALA

³⁰ Tamin’izay i Jôsoe dia nanangana ôtely ho an’i Iaveh Andriamanitr’i Israely tao an-tendrombohitra Hebala,

³¹ araka ny didy nomen’i Môizy mpanompon’i Iaveh ny zanak’i Israely, araka izay voasoratra ao amin’ny bokin’ny lalànan’i Môizy, dia ôtely vato tsy voavoatra, izay tsy voavely vy. Ary nanolotra sorona dorana teo amboniny ho an’i Iaveh izy ireo sy nanao sorom-pihavanana koa.

Ilay ôtely natao tamin’ny vato tsy voavoatra

³² Nosoratan’i Jôsoe tamin’ny vato teo koa, ny dikan’ny lalàna efa nosoratan’i Môizy teo anatrehan’ny zanak’i Israely.

³³ Nitsangana teo an-daniny roa amin’ny fiaran’ny faneken’i Iaveh, i Israely rehetra, ny loholony, ny manamboninahiny, ny mpitsarany, na ny vahiny na ny zanak’i Israely, ny antsasany teo anilan’ny tendrombohitra Garizima, ny antsasany teo anilan’ny tendrombohitra Hebaka, araka ny didy nomen’i Môizy mpanompon’i Iaveh fahiny, mba hitso-drano ny vahoakan’i Israely.

³⁴ Raha efa izany novakin’i Jôsoe ny tenin’ny lalàna rehetra dia ny tso-drano sy ny fanozonana araka izay rehetra voasoratra ao amin’ny bokin’ny lalàna.

³⁵ Tamin’izay rehetra nandidian’i Môizy dia tsy nisy teny iray tsy novakin’i Jôsoe teo anatrehan’ny fiangonan’i Israely rehetra, ny vehivavy sy ny zaza ary ny vahiny nitoetra teo afovoany.