Jeremia 36 - Baiboly Katolika

4. FIJALIAN’I JEREMIA Horonan-taratasy tamin’ny taona 605-604

¹ Tamin’ny taona fahefatra, nanjakan’i Jôakima zanak’i Josiasa mpanjakan’i Jodà, dia izao no teny avy any amin’i Iaveh, tonga tamin’i Jeremia:

² Mangalà horonan-taratasy ianao, ka soraty ao avokoa ny teny nolazaiko taminao, mamely an’i Israely sy i Jodà ary ny firenena rehetra, hatramin’ny andro nitenenako taminao, hatramin’ny andron’i Josiasa ka mandraka androany.

³ Fa angamba dia hohenoin’ny taranak’i Jodà ny loza rehetra kasaiko hatao aminy, mba hiovany, hialany amin’ny lalan-dratsiny avy, ka hamelako ny helony amam-pahotany.

⁴ Dia niantso an’i Baròka zanak’i Nerià, i Jeremia, ka ny teny rehetra nolazain’i Iaveh tamin’i Jeremia, dia nosoratan’i Baròka tamin’ny horonan-taratasy araka ny nanononany azy.

⁵ Raha efa izany, nanome didy an’i Baròka i Jeremia, nanao hoe: «Izaho ity, voasakana, ka tsy afa-mankany an-tranon’i Iaveh.

⁶ Ka mandehana àry ianao, ary vakio ao amin’ny horonan-taratasy nosoratanao, araka izay nanononako azy, ny tenin’i Iaveh mba ho ren’ny vahoaka ao an-tranon’i Iaveh amin’ny andro fifadian-kanina; vakio izany ho ren’izay rehetra an’i Jodà izay tonga avy any an-tanànany.

⁷ Angamba ho tonga eo anatrehan’i Iaveh ny fifonany, ary hiova hiala amin’ny lalan-dratsiny avy izy; fa lehibe ny hatezerana amam-pahavinirana nolazain’i Iaveh hahatra amin’ity vahoaka ity.»

⁸ Dia nataon’i Baròka zanak’i Nerià avokoa, izay nandidian’i Jeremia mpaminany azy; novakiny tao an-tranon’i Iaveh, tao amin’ny horonan-taratasy ny tenin’i Iaveh.

⁹ Tamin’ny taona fahadimy nanjakan’i Jôakima zanak’i Josiasa mpanjakan’i Jodà, tamin’ny volana fahasivy, dia nisy fifadian-kanina nantsoina teo anatrehan’i Israely hataon’ny olona rehetra ao Jerosalema, sy ny olona rehetra tonga tao Jerosalema, avy any amin’ny tanànan’i Jodà.

¹⁰ Ary novakin’i Baròka tamin’izay, tao amin’ny boky ny tenin’i Iaveh, tao an-tranon’i Iaveh, amin’ny efitranon’i Gamariasa, zanak’i Safàna, mpanoratra, teo amin’ny kianja ambony, anoloan’ny vavahady Vaovao amin’ny tranon’i Iaveh, mba ho ren’ny vahoaka rehetra.

¹¹ Nandre ny tenin’i Iaveh rehetra, tao amin’ny boky, i Mikea zanak’i Gamariasa zanak’i Safàna;

¹² ka dia nidina nankany an-tranon’ny mpanjaka, tao amin’ny efitranon’ny mpanoratra; ka indro fa nipetraka tao avokoa ny lehibe, dia i Elisama mpanoratra, i Dalaiasa zanak’i Semeiàsa, i Elinatana zanak’i Akobôra, i Gamariasa zanak’i Safàna, i Sedekiasa zanak’i Hananiasa, mbamin’ny lehibe rehetra.

¹³ Ary nambaran’i Mikea tamin’izy ireo avokoa, ny teny reny tamin’ny namakian’i Baròka azy tao amin’ny boky ho ren’ny sofin’ny vahoaka.

¹⁴ Tamin’izay ireo lehibe rehetra, naniraka an’i Jodì zanak’i Nataniasa zanak’i Selemiasa zanak’i Kosi, ho any amin’i Baròka, hilaza aminy hoe: «Raiso ny horonan-taratasy izay namakianao teny teo an-tsofin’ny vahoaka, ary mankanesa atỳ ianao.» Dia noraisin’i Baròka zanak’i Nerià ilay horonan-taratasy ka nankany amin’izy ireo izy.

¹⁵ Ary hoy ireo taminy: «Mipetraha ianao ka vakio izany ho ren’ny sofinay.» Dia namaky izany teo an-tsofin’izy ireo i Baròka.

¹⁶ Nony efa nandre izany teny rehetra izany izy ireo dia nifampijery tamin-tahotra, ka nanao tamin’i Baròka hoe: «Tsy maintsy ambaranay amin’ny mpanjaka avokoa izany teny rehetra izany.»

¹⁷ Ary nanontany an’i Baròka izy ireo, nanao hoe: «Lazao aminay izay nanoratanao izany teny rehetra izany avy tamin’ny vavany.»

¹⁸ Ka hoy i Baròka taminy: «Nanonona am-bava izany teny rehetra izany izy; ka nosoratako tao amin’ny boky tamin’ny ranomainty.»

¹⁹ Dia hoy ireto lehibe tamin’i Baròka: «Mandehana miery ianao sy i Jeremia, ka aoka tsy hisy olona hahalala izay misy anareo.»

²⁰ Raha efa izany, izy ireo namela ilay horonan-taratasy tao amin’ny efitranon’i Elisama mpanoratra, dia niditra tao amin’ny mpanjaka, tao amin’ny kianja, sy nilaza teo an-tsofin’ny mpanjaka io raharaha rehetra io.

²¹ Nirahin’ny mpanjaka i Jodì haka ilay horonan-taratasy, dia noraisiny tao amin’ny efitranon’i Elisama, mpanoratra, dia novakiny teo an-tsofin’ny mpanjaka sy teo an-tsofin’ny lehibe rehetra nitsangana teo anatrehan’ny mpanjaka.

²² Ny mpanjaka izany nipetraka tao an’efitrano ririnina tamin’ny volana fahasivy; ary voarehitra afo teo anoloany ny fatana.

²³ Vao toko telo na efatra no voavakin’i Jodì, dia notapahin’ny mpanjaka tamin’ny antsipìkan’ny mpanoratra, ilay taratasy, ka natsipiny tao anatin’ny afo tao am-patana, mandra-pahalevon’ny afo tao am-patana ny horonan-taratasy manontolo.

²⁴ Tsy mba natahotra na nandriatra ny fitafiana akory ny mpanjaka sy ireto mpanompony rehetra izay nandre izany teny rehetra izany.

²⁵ Efa nihanta mafy tamin’ny mpanjaka anefa i Elnatàna sy i Dalaiasa ary i Gamariasa, mba tsy handoro ilay horonan-taratasy; fa tsy nohenoiny izy ireo.

²⁶ Raha efa izany dia nodidian’ny mpanjaka i Jeremiely zanak’andriana, sy i Zaraiasa zanak’i Ezriely, ary i Selemiasa zanak’Abdeely, hisambotra an’i Baròka mpanoratra, sy i Jeremia mpaminany, nefa nafenin’i Iaveh izy ireo.

²⁷ Ary natao tamin’i Jeremia ny tenin’i Iaveh, taorian’ny nandoran’ny mpanjaka ny horonan-taratasy, mbamin’ny teny nosoratan’i Baròka araka ny nanononan’i Jeremia azy, dia toy izao:

²⁸ «Mandehana maka horonan-taratasy hafa indray ianao; ka soraty ao avokoa ireo teny voalohany, tao amin’ilay horonan-taratasy voalohany, nodoran’i Jôakima mpanjakan’i Jodà.

²⁹ Ary lazao amin’i Jôakima mpanjakan’i Jodà, hoe: Izao no lazain’i Iaveh: Ianao nandoro iny horonan-taratasy iny, sady nanao hoe: Ahoana no nanoratanao tamin’iny fa hoe ho avy tokoa ny mpanjakan’i Babilôna, ka handrava ity tany ity, ary hataony tsy hisy olona na biby intsony eto?

³⁰ Noho izany, izao no lazain’i Iaveh, ny amin’i Jôakima, mpanjakan’i Jodà: Tsy hisy amin’ny fianakaviany na iray aza hipetraka eo amin’ny seza fiandrianan’i Davida, sady hatsipy any ivelany ny fatiny hasian’ny hainandro, amin’ny antoandro, sy ny hatsiaka amin’ny alina.

³¹ Hafotitro hamely azy mbamin’ny taranany sy ny mpanompony rehetra, ny helony; ary hataoko mihatra aminy, sy amin’ny mponina ao Jerosalema, ary amin’ny olona amin’i Jodà, ny loza rehetra nolazaiko taminy, fa tsy nohenoiny Aho.»

³² Dia naka horonan-taratasy hafa indray i Jeremia, natolony an’i Baròka mpanoratra, zanak’i Nerià, ka nosoratan’i Baròka araka ny nanononan’i Jeremia azy ny teny rehetra tamin’ilay boky nodoran’i Jôakima mpanjakan’i Jodà tamin’ny afo; ary teny hafa maro tahaka ireny no niampy.