Matthew 11 - ASII LAKDAP Bible (BSI)

Khamlamketiwe Johan Tsasoqti

¹ Jesuq raq ajaqshisetiim roqshi ri wenai ma arthun tsii chongke bomtsi ara chongkuq lot raütiishe, apaiq ka kra hiqshong tro na chela ahin asi, kiina trahoke kai nai Shiikeawe bomtsi kra shrinkekai nguta kihoto.

² Khamlamketi we Johan raq, phaqtek mong maq, Khristo raq jaqsham wan tlaq tsütsa thun kra tai raüta, apaiq raq ajaqshisetiim wa wiijamti ka Jesuq phana bom tiitsang waikai nguta tiikito.

³ Tsangshiq ka kiraüta, “Naishiq ma chong laq, ümnaq ardea sha Johan raq, ‘Maiqwe ashi saüho tlo,’ nguta chong kuq tiiwe kra, sha nashiq Jehudinok mung raq, kriiwe ka ümchaü min misaüho shaqli nguta kheruq li khe chang wa miraq?” nguta tsangshiq raq apaiq ma bom ka waito.

⁴ Kiijiishe, Jesuq raq treto, “Namshiq ka jangho ronglaq. Lanta namshiq maiqmii mak maq jamlai phan jaqsham wa chhi tai tlan, kra thun ka Johan ma chongho rong laq.

⁵ Makchukti riimin chhi tlo she, hokkü jaqküti thun kiimin khumtlo she, kiimaq thupbi thati raq akaq ashong ashe mitsi rai tlaqti thun kriimin tiisii kuq wanto she, nibii biilati thun riimin taitlo she, maiq ka ama wiimin tiijang wantlo she, kiimaq Tsütsa Ahea kra miitsan miijan maiqse thun ma tiitai kuq wanto she.

⁶ Kechu jonghea jurwa ngi ma kamwan tsantsii ka tiijam mak maq siwan ruq siwan tlaq!”

⁷ Johan jaqshisetiim ka atiido wan awa wan she kiijaq, Jesuq raq kiijaq mungmaiqse phong thungrai tlaq kriima, Johan shomrasea wan bomtsi ka akha shomra bomto: “Namshiq raq Johan traho bomchong taikai nguta kumtsaiphii binjü na kilan akhing na, apaiq ka jamkhii we michhiki rong i ngutiiwa tiima lan? Tingjang dong ka rahai raq baiqrat tlaq ikha, tiibai miinge sha chhiki lan? Riimak.

⁸ Riita, namshiq ka jamlai phan liikai wa kilan? Apaiq ka miirii apan alan shomroq roq raüta wujong wuriise panjan bisiq tlaq ikhiisha chhiki lan? Riimak. Akha tiimiikhiiqti maiqse ka honyung hokhambi jam niili siwan tlo!

⁹ Riita, chongrong liita, namshiq ka jamkhii we liikai wa kilan? Shammi we liikai nguta? O kriika tengto; shatmaq shammi we thaq niimin ajong lin we chhiki lan ngu manta.

¹⁰ Asii bomtsi na Shiikeawe raq Johan miitu akha chongtlo: ‘Ngi raq ümniima sinkhu na milon weshi mitiikili ha, apaiq raq ümkai chang lam ka atan mirkuqho!’

¹¹ Ngi raq chongtiikang arka tengteng. Khamlamketi we Johan ka ümchaü niitaq maiq ümchu wa siwantaq, kra wiita thaq na ajong pinthum. Shatmaq ümchaü Shiikeawe sengi phong wa juwa aran pinthum nguta siwan tlaq, kriiti ka Johan thaq na ajong.

¹² Khamlamketi we Johan raq Ramungtan Tsütsa trahokuq wantaq kiimaq pha wan raüta, ümchaü ranaiq niitaq saüli, Ramungtan sham akai ka pinthum chiq are raq along aliiq li tiichamchao wanto.

¹³ Johan pat na saüli Shiikeawe shammibi nai Mosheq Thungtri raq Shiikeawe Mungtan miitu chongkuq wanto.

¹⁴ Kiimaq namshiq raq tsangshiq traho bomchong ma kamwan tlan jiika, Johan kata tsangshiq raq shammi we Elija miki nguta tiithai chongkuq thü tiiwe kra.

¹⁵ Juwa ni asi, kriiti raq tiitsang tai ronglaq!”

¹⁶ “Riita, ümchaü pat wa maiqse arka jamlai phan mo mithap thi wan ha? Tsangshiq arka nosere kong atiitsa lam maq, kejat thung na tiibo raü raüta, kongshiti raq kongshiti rai akha nguta riigi rüm trang rai wan tlaq ahata.

¹⁷ ‘Naishiq raq junlam poi peo paimin toro tsü ngii wan phaita, namshiq ka naishiq rai wiinum nea dam man dea! Kiimaq naishiq ka maaho manyi shiri rai phai tiimin, namshiq ka naishiq rai majo wan dam man dea!’

¹⁸ Johan ka saüho raüta, amang maq achu jaü wan raütli siwanto. Kiimaq che-atsam min nyang mak riito. Kra chhi raüta maiqse wiitarü raq, ‘Apaiq arka aru angi tha raq rom wanto,’ nguta slailii ngu wanto!

¹⁹ Kiimahali Maiq Se ka saüho raüta, phaqsea khamnyang chamtraq maq siwanto. Kiimaq kra chhi raüta maiqse wiitarü raq, ‘Arwe kaü ara liirong laq! Apaiq arka shakaq kiimaq cherop nyiipthop we kaü! Phunta hiti nai ashleq arbaiq maiq anun phan kongti we!’ nguta tsaihai tlo. Shatmaq Shiikeawe taksma nyan jaqsham kaiwa kriika riikhaqli dea nguta jaqsham ka atsi ango maq tiichhi kuq wan tlo.”

Jesuq Ma Kam Makti Chela Thun

²⁰ Jesuq raq awang chang jaqsham apako ka chela wiijam niili sham wanto. Shatmaq kra chelati thun raq tsangshiq ngarai ka tiidii wan mak dea riito. Kriikha miishe Jesuq raq kra chela thun ka ason riiwanto.

²¹ “O, Khorajin chelati le! Namshiq ma phiiptsi chang asi jo! Kiimaq Bethsaida chelati le! Namshiq miimin phiiptsi chang asi jo! Ngi raq namshiq makki na ümchuwa awang chang jaqsham wankang thun kriika, Tajar nai Sidon mung na sham wan ha jiika, tsangshiq raq man niiphü thoila thum sam raüta, kiinyiikhiq maq makphai khüshang raüta, tsangshiq khakam na tapkhu maq nyat raüta, tsangshiq ngarai kra tiidii maaho manyi mihoqsiq wa!

²² Ngi raq chongtiikang arka tengteng. Phangthum Khapho Ranaiq na Shiikeawe raq namshiq nam ma Tajar nai Sidon chelati ma mangchan apa lin mitiichhi kuq!

²³ Kiimaq Kaparniam chelati le! Namshiq ka ra niishe dü wan rong i ngutiisha dan tlan ngu kai? Namshiq ka wamungtan niishe mitiidea baiq kiiphan! Namshiq hiq na ümchuwa awang chang jaqsham wantaq kra, Sodom chela na shamkuq wantaq ngu raü jiika, Sodom chela ka ümchaü min asi li riichang wa!

²⁴ Namshiq ka khekham maq siwan rong liijo. Phangthum Khapho Ranaiq na Shiikeawe raq namshiq nam ma Sodom chelati ma mangchan ka apa lin mitiichhi kuq!”

Jesuq Wokhong Na Ngati Nii Mitsak

²⁵ Kra akhing na Jesuq raq Awe rai akha riibomto, “I we le, ra nai hiq rümti Tati we le! Ngi raq ümniima pinthum kechu tum tiikang. Ümniiraq atsin ahonti kiimaq tsüwe tsitwe thun ma, jamlai wa apaü riibaiq laü, kra thun tengman tlaq bomtsi ka, jehin nore setiim, jam min saptsin makti thun ma tiichhikuq wan laü she.

²⁶ O i We le, ümniiraq akha mihong tha wan laq nguta dea tiihongtha kuq wan laü.”

²⁷ “I We raq i jaq na phanrap arang ake kun she. Ase ka jurmin sap mak. Awe raq saptlaq kli. Kiimaq Awe ka jurmin sapmak. Ase raq saptlaq kli. Kiimaq Ase raq ümriiti miiwa tiichhikuq tlaq kriiti riili saptlo.”

²⁸ “Namshiq homa lai raq patrai lanta hunnii rai tlanti thun tarü, ana i phana warong ra. Ngi raq namshiq niitsi kra mitiitsak kuq kang.

²⁹ Minsaü raq thaikii maq ni thu tlaq ikha, namshiq riimin i thaikii ara holanta sirong laq. Lanta i wokhong maq ngi raq namshiq ma shrinkuq tiikang bomtsi kra saptsin ronglaq. Ngi ka sobsob bombom maq nai tsan nin woknin maq siti. I wokhong na siti ka huntsak niitsak she mishong nga han.

³⁰ I thaikii namshiq ma tiiho tiikang kriika aho ma jeriiqriiq li. Kiimaq ngi raq namshiq ma homa tiihokuq tiikang kriika chiiphüphü seli.”