DUNGWVNC 23 - ASII LAKDAP Bible (BSI)

Tarü Miitu Kappe Ka Ashili Langlaq

¹ “Arot shapshaü naq tiipakiq. Kiimaq ajiqwe miitu arot saqse kuq laüta naq khrumkiq.

² Maiq apako raq ajiq klo raüla, tsangshiq rai naq pong damkiq. Riimakla ümtiikiiwa tsangshiq raq saqse kuq raüta ashut tri maq photlaq kiijaq naq pong damkiq.

³ Miitsan maiqse ka rung na tiichaptlaq akhing na naq tseatsiiqkiq.

⁴ “Ümjaqtiwe minsaü kaü riimakla kumtoq kaü ka raükha tiidiiki raüta ahaisea chhi haüla, kra hit wan laüta apaiq ma jangkuq wakiq.

⁵ Kiimaq apaiq kumtoq kaü ka aholai raq pat rai raüta holot mak hiq na bumki raüla, kra atiido laüta tiiwa nonglaq. Kriika lam na baiqthü laüta naq lea wankiq.

⁶ “Miitsan maiqse rung na chaptlaq akhing na, akha ka riikhaqli phokuqlaq. Naq tiishaüjikiq.

⁷ Khahü na maiq ma kha naq nyankiq. Kiimaq maiqsangti ka tiishut laüta phaqsi na naq tiikikiq. Jamkhano ngukla jurwa akha ajiq photlaq raüta ashut klotlaq, kriiti ka Ngi raq mitiishut baiqha.

⁸ Tsiiqlap naq siqkiq. Tsiiqlap seatibi ka makchuk ma jakitlo. Raüta riikhaqli tri ka sham makshe riitlo. Raüta maiqsangti thun kha ka ahea maq pho kuq mak she tiijiq baiqtlo.

⁹ “Wanshawe ka naq haihiikiq. Ümniika Ejip mung na wanshawe silaü na, wanshawe rilung chamchao ka ümniiraq sap wan laü.

Wiimiishi Rawii Nai Ramiishi Ranaiq

¹⁰ “Wiitrok na saüli ümwak ka shamsiqlaq. Laüta wak na jamlai phan wa chhi jangtlaü kra jut laüta phaqsiqlaq.

¹¹ Shatmaq wiimiishi she angu na kra wak ka naq shamsiq kiq. Kiikhiili thülaq. Kra rawii ka kiijaq jamlai wa dong mantlaq kriimin naq jut siq kiq. Miitsan maiqse raq mijut siqlaq. Kra bung tiichongtlaq kriika rum nyamse raq miphaq siqlaq. Üm spiqtsi ro nai olip tsiro kiimin kiikhiisii thülaq.

¹² “Liipan shi wa ratrok na saüli min ka shiiqlaq. Shatmaq ramiishi ranaiq niika minshiiqkai maimak. Kra rii haütiq ümdise kong kiimaq pong mungti ümjaqshamti kra nai ümnyamse kong raq niitiitsak ahai miraq.

¹³ “Ngi, Tatiwe raq ümniima tsii ümchuwa chongkuq kang kra tiitsang tailaq. Laihin phra kong jaq wa achu naq jaüki. Tsangshiq mang thun kiimin achong maimak.

Poi Ajong Pinthum Atsam

¹⁴ “Wiishi na jangtsam poi klo lanta Ngi shreng ronglaq.

¹⁵ Abib jipi lü na, ümniiraq Ejip mung wa laü wan laü jipi lü na, Pi Maq shohü winsii phaq poi kra langlaq. Kriika Ngi raq aming kuqkang kra phan phan langlaq. Ara poi klotlan ramiishi liipan na pi maq asho winsii ka nü na thii maimak. Kiimaq Ngi shomnoq wa watlan na honglu kechang ahü jaqmii maq wa maimak.

¹⁶ “Ümtsam jut phaho tlaü akhing na Lamrii Poi ka klolaq. “Kiimaq Lamjaptiip Poi ka liidongji na ümniiraq spiqtsi nai petsiro wa petsi pansiq tlaü choji na klolaq.

¹⁷ Wrawiitek ara poi atsam klotlan akhing na namshiq maiqwere thun kunli ka, Ngi, Tatiwe, namshiq Shiikeawe ka shomnoq wan ratlo.

¹⁸ “Ümniiraq Ngi ma nyamse honglu takuq tlaü na winsii ka pi maq shoje wa honglu na kewan raamak. Ara poi atsam akhing na nyamse honglu na ataakuq kiiwa ngampü ka anap ranap na saüli thü raamak.

¹⁹ “Rawiitek ümniiraq bunwong jut pha shaq shaq jut tlaü kra Tatiwe üm Shiikeawe jam na kewan ratlo. “Skuse aran se riimakla chhechhise ka akaü nyakpü maq lumphaq maimak.

Kiqkham Raüpot Thun Nai Tsii Chongke

²⁰ “Ngi raq rase ashi ümniima sinkhu na mitiiwaliha, ümnaq laü wan tlaü na lam maq tiikhup wongke wan miitu. Kiimaq Ngi raq ümniika ümnaq miitu hiqshong tiijekang kiijaq mishea wanha.

²¹ Apaiq bom ka tiitsang tailaq. Laüta apaiq wokhong na silaq. Akiq ka naqkhiikiq. Jamkhano ngukla apaiq ka Ngi raq atiikiha. Kiimaq apaiq raq akiq khiiti ka tiijoq mak miraq.

²² Shatmaq ümniiraq apaiq bom tai haüla, laüta Ngi raq aming kuqkang thun kra phan phan klo haüla, Ngi raq ümjaqtinok thun ka wiita mikhat kuqha.

²³ Irase ka ümniima sinkhu na miwa. Raüta ümniika Amoraiqnok, Hitaiqnok, Perijaiqnok, Kanannok, Hiwaiqnok, kiimaq Jebusaiqnok sichang hiqshong thun kiina ümniika mishea wan. Kiimaq Ngi raq tsangshiqnok thun ka wiita mijiip baiqha.

²⁴ Tsangshiqnok phra kong khaki na naq bumkiq. Riimakla kriithun ka naq noqkiq. Kiimaq tsangshiqnok miikam miisham thunglai ka naq lang kiq. Tsangshiq phra kong ka wiita tiithenbaiqlaq. Laüta tsangshiq raq asii longkham thun ashong ka wiita tiibun baiqlaq.

²⁵ Kiimaq ümniiraq Ngi, Tatiwe, üm Shiikeawe ka shomnoq haüla, Ngi raq ümniika phaq nai sea chamtraq kiimaq khu akham chamtraq mishman kuqha. Kiimaq ümthatsi thun ka wiita alam mirbaiqha.

²⁶ Ümhiqshong na jechakre jurmin maase baiq mak miraq. Riimakla khanghü rahü nyung ka jumin ahü miraq. Ngi raq ümniima rilung luhea mikuqha.

²⁷ “Ümnaq ngengti maiq thun ka Ngi ma haisong tsii mitiithüha. Ümniiraq khat wan tlaünok tsii ka Ngi raq wiita abrak mirbaiqha. Kiimaq Ngi raq ümjaqtinok thun ka ümnaq chhi raüta wiita pongpin riipin mitiipin baiqha.

²⁸ Ngi raq ümjaqtinok ka phiip ma mitiitsaiha. Ngi raq Hiwaiqnok, kiimaq Kanannok, kiimaq Hitaiqnok thun ka ümnaq sinkhu na wawantlaü kra phan phan Ngi raq tsangshiq ka wiita mijobaiq wanha.

²⁹ Ngi raq tsangshiq ka wiishi liipan niili ka jobaiq mang. Kiikha riiha jiika, kra mung ka rumnyangkhi mung ma mijaki. Raüla rum ngam phong ka pahea mipu wan. Kriika ümniima ahawiq miraq.

³⁰ Kra rii na, Ngi raq tsangshiqnok ka phanshi shi maq mijobaiq wanha. Namshiq ka puwan lanta kra mung ka wiita jiiwanli chang she puwan hanti wiita mijobaiqha.

³¹ Ngi raq ümhiqshong trai ka Agaba khamjong Nongchum maq riita Mediterenian khamjong chum na saüli kiimaq kumtsaiphii rumnyangkhi wang maq riita Euphretis Rai na saüli mirai kuqha. Ngi raq ümniima armung na sitinok thun kra khat wan miitu ningkun mikuqha. Kiimaq ümniika sinkhu na wawantlaü kra phan phan tsangshiq ka mijobaiq wan haü.

³² Tsangshiq rai jamphan niimin naq pong damkiq. Riimakla tsangshiq phra thun rai min naq pong damkiq.

³³ Tsangshiqnok ka ümmung na naq tiishongkiq. Kra riihaüla, tsangshiq raq ümniika iman na ngarai mitiitang. Kiimaq ümniiraq tsangshiqnok phra thun kra shomnoq haüla, kriika üm miisaq thum chang thiikho ma mijaki.”