150 Diosan arsutapat parlir jiskʼa tʼaqanaka

Ch'amañcht'asipjjam, sayt'asipjjaraquim, jan ajjsarapjjamti ni sustjasipjjamsa jupanacampi nuwasiñataquejja, Tatitu Diosamaw jumanacampïsqui uca laycu, janiraquiwa jaytapcätamti ni apanucupcätamsa.”

Nayasti sismawa: Ch'amani sayt'asim, jan ajjsaramti, janirac mayjt'asimsa. Naya Tatitu Diosamaw jumampïscä cawqharutï sarcäta ucqhanacana” sasa.

Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.

Yatichapjjaraquim take cuntejj nayajj jumanacar yatichapcsma ucanaca phokhaña. Amtasipjjapunim, nayajj sapürupuniw jumanacampïscta acapachan tucusiñapcama.”

Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.

Uqhamajj jichhajja, take iyawsañampiw arssnajja: “Tatituw yanapt'irejjajja; janiw cuntejj jakejj lurquitaspa ucjj ajjsarcäti” sasa.

Ajjsarcay lajja ch'amac chekawja sarcasasa, janiw cunarus ajjsarcäti, nayamp chic saratam laycu: lawamasa, thujrumasa, ch'am churitani.

Diosaw imantasiñasajja, ch'amañchirisasa, jupaw chijinacan arjjatirisajja.

Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa,

ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.

Tatitojj janiw marcaparojj apanuccaniti, janiraquiw jupanquirinacarus jaytanuccaniti.

“Janiw wajcha jaytapcämäti, nayajj cutt'anïwa jumanacampïscañataqui.

Awquejjas, taycajjas apanucchitanejja, Tatituw nayarojj uywasquitani.

Tatituw take jan walt'añanacat imasctam; jupaw jacañam imasqui;

Tatituw mistutamsa, mantatamsa uñjascani, jichhürut wiñaycama.

Umanjam maqhatañamächejja, nayaw jumampïscäjja, jawiranac maqhatañamächejja, janiw jalantasin jiwcätati; ninanjam pasañamächejja, janiw naqhantcätati, ninas janiw jumanjja naccaniti.

Tatay, sutim yatirinacajj jumaruw iyawsapjjtam, jumar thakerinacarojj janipuniw apanucctati.

Acjj sapjjsmawa jumanacajj samarañ jicjjatapjjañamataqui nayaru iyawsatanacam laycu. Acapachanjja jumanacajj t'akhesipjjätawa, ucampis ch'am catjjatapjjam, nayajj acapacharojj atipjtwa —sasa.

Jan walt'añanacajj take toket muyuntapcchitu ucqhasa, janipuniw atipjayasipcti, llaquisiñanacas wal utjcchejja, janipuniw k'ala aynacht'atäpcti.

Uñisiñampis arcnakapcchitu ucasa, janipuniw sapa irpanucutäpcti, orakerus taquisipcchitu ucasa, janipuniw tucjatäpctsa.

Diosar llaquinacam catuyam, jupasti ch'aman tucuyätam, Diosar jaysirin aynacht'añapjja, janipuniw jupajj muncaniti.

Nayasti jumamp chicapuniw utjasïyäta, jumaw cupi amparajjat wayjjarustajja,

amtatamarjamaw irpistajja, khapak chekawjaruw puriyaraquitätajja.

Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim.

Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.

Jach'a kollunacajj yakha chekarusay sartasipcpan, kollunacas aynacharusay jutasipcpan, ucampis munasiñajjajj jumataquejj janipuniw tucuscaniti, uqhamaraqui sumar mantäwi arust'äwejjajj janiw t'unjatäcaniti.” Uqham siwa jumar qhuyapayiri Tatitojja.

Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.

Tatitojj llaquimp aynacht'atanacan jac'apancasquiwa, jupanacar khespiyañataqui, aynacht'at chuymanacap waytañataqui.

Dios sapanac ajayojjajj samarañ jicjjati, khespiyasiñajjajj jupat juti.

Ch'ajjwañanacarojj jan wayusipjjamti; janirac lunthatasiñar chuym catuyasipjjamti; kamiris tucusipcätajja, kollker jan alcatapjjamti.

Diosan arsutap ist'ta, jupan arsut arup yatta: “Diosajj ch'amaniwa, ch'amasa, munasiñas jupanquiwa, jupaw sapa maynirojj lurataparjam wajjt'i” sasa.

Jupaquiw khespiyitu, arjjataraquitu. Janiw pächascäti, jupaw imantasiñajjajja.

“Tatitur take chuymamampi catuyasim; juman ch'iqhi cancañamaruquejj jan alcatasimti.

Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.

Tatitun amparapar sarnakäwim catuyasim, jupar take chuymamp alcatam, jupasti yanapätamwa.

Take llaquisiñanacamsti Diosar jaytapjjaraquim, jupasti jumanacatjja llaquisiraquiwa.

“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.

Tatitur suyt'irinaca, ch'amañchasipjjam, jan ajjsarir chuymanïpjjaraquim.

Naya, juman Tatitu Diosamaw, jumarojj amparat wayjjarsma, irparacsma; nayaw saracsma: ‘Jan ajjsaramti, nayaw yanapascäma.’ ”

Tatitojj situwa: “Nayranacajjajj jumaruw uñch'uquisctam, nayaw yatichascäma, nayaw amuyt'ayascäma, nayaw sarañamäqui uca thac uñachayascäma.

Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.

Tatitu pachpaw juman nayram sarani, jumampiraquïniwa, janiraquiw jaytcätamti ni antutcaraquïtamsa, uqhamasti jan ajjsaramti, janirac lajllasimsa.”

Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,

Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.

Nayranacajjampiw kollunac uñatatta: “¿cawquitarac yanapast nayatac jutani?” sasa.

Yanapajj Tatitut nayatac jutani, alajjpach acapach lurir Tatituta.

Tatitun sutipajj imantasiña jach'a torrer uñtatawa, asqui jakenacajj jupan ucar imantasiñataqui jutapqui ucanacataquejja.

Ajjsarcay urun waytasita, nayajj jumaruquiw alcatsma.

Diosaruw takpach chuymamp iyawsta, arunacap jach'ar aptaracta; Diosaruw takpach chuymamp alcatta, janiw cunarus ajjsarcti: ¿Camächaraquitan jakesti?

Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”

Tatituw khanajjasa, khespiyasiñajjasa, ¿qhitirurac ajjsarästi? Tatituw jacañajjar arjjati, ¿cunarurac ajjsarästi?

Nayajj Tatitump chicapuniw sarnakascta, jupaw cupëjjajjanqui, janiw cunas tincuyquitaniti.

Jichhajj Diosajj jach'añchatäpan, jupajj ch'amaniwa cuntejj mayctan, lup'caractan ucanacata juc'ampi lurañataqui, ch'amap toke jiwasanac taypina luratapata.

¡Jach'añchatäpan Diosajja iglesia taypina Cristo Jesús toke, wiñayan wiñayapataqui! Uqhamäpan.

¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?

Tatitur takpach chuymamp iyawsirinacajj jan onjjtcayäpjjewa; Sión kollur uñtatäpjjewa, wiñayataquiw sayt'asipjje.

Camisatejj kollunacajj Jerusalenar muyuntejja, uqhamaw Tatitojj marcapar muyunti jichhasa, wiñayasa.

Alajjpachanquir Take atipirin imat sarnaker jakejja,

Chijejj janiw jac'achascätamti, usus janiraquiw utamar purincaniti,

Diosajj angelanacaparuw qhitanini, sarnakäwim imañataqui.

Amparapjjaruw apapjjätam, cayuman kalar jan lanctasiñapataqui;

catarinacarusa, asïrunacarus takjjatascaquïtawa, leonanac taypinsa, ajjsarcañ animalanac taypinsa, sarnakascaquïtawa.

“Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa.

Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä;

walja maranacaw jacayä, ¡khespiyäwejjampiw jupar cusisiyaraquï!”

Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.

Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.

Tata, nanacat qhuyapt'ayasipjjeta, nanacasti jumaruquiw suyt'apjjsma. Sapa alway nanacan arjjatirejjämjja jan walt'añ horasansti khespiyapjjaraquitaya.

Tatituw nayarojj yanapasquitu, ucatwa jaken jan wali arunacapajj jan chuyma ust'ayquituti, ucatracwa nayajj mä karkar uñtata suma sayt'astjja, yatiractwa nayajj janiw cuna p'enksa pascäti.

Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa.

Jupar arquirinacan munataparjamaw phokhe, arnakasitanacap ist'i, khespiyaraqui.

“Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa.

Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä;

Ucampis: “¿Mä taycajj wawanacaparojj armasiti, munasiñaps janiraquich churqui? Inas uca taycajj armaschispa, ucampis nayajj janipuniw armascäti.

Nayajj amparajjan kellkt'atpuni irpsma, perkanacamatsti amtasipuntwa.

Jakenacar ajjsarañajj sipitar uñtatawa, ucampis qhititejj Tatitur iyawsqui ucawa imatäni.

Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.

Tatituw t'akhesiyat jakenacarojj arjjatasqui, jupaw llaquisiñ pachanacan imasqui.

Diosajj janiw ajjsarañ ajayu churquistuti, jan ucasti ch'amani, munasiñani, chekapar amuyt'aña ajaywa churistu.

Criston ch'amapampejj take cunaruw saycatirista.

Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.

Tatitojj nayampïsquiwa: janiw ajjsarayascäti; ¿camächaraquitan jakesti?

Chuymajjan aynacht'atap laycojj orak tucuyatpach jumar art'asinsma: jan mistcay karka patjjaruy sayt'ayita,

jumaw nayan imantasiñajjätajja. Jumaw timasirejjat jarc'aker ch'aman pucarätajja.

Tatitojj asqui jakenacaruw imasqui, arnakasitanacaparusti ist'araquiwa.

Yatipjjam Dios Awquejj kawksa munasistu wawanacapat uñt'atäñasataqui, jïsa wawanacapapunïsctanwa. Ucatpï Diosar jan iyawsirinacajj jan uñt'quistutejja, Diosar jan uñt'apjjatap laycu.

Ucampis jichhajj Israel, Jacobon marcapa, jumar uywiri Tatitojj sistamwa: “Jan ajjsaramti, nayaw khespiysma, nayaw sutimat jawssma, jumajj nayanctawa.

Take yant'anactï jumanacajj t'akhesipcta ucanacajja, cunjämtï mayninacajj t'akhesipqui uqhamaraquiquiwa. Jumanacajj Diosaruw catuyasipjjañamajja, jupasti janiw jumanacarojj jach'a jan atipcaya yant'anacjja churapcätamti. Cunapachatï yant'ajj jutcani ucqhajja, Diosajj cunjämatsa uca yant'ar atipjañjja yanapapjjaraquïtamwa, uqhamatwa atipjapjjäta.

Chijinacar purcta ucapachajja, jumaw jacañajjar imtajja; ch'amamampiw timanacajjan amparapat khespiyistajja.

Tatituw nayarojj asquinacamp phokhantitani: Tatay, qhuyapayasiñamajj wiñayawa, amparamamp luratanacarojj janiquiy armanucumti.

Take cunatejj nayratpach Kellkatan uchatäcän ucanacajj jiwasanacaruw yatichistu, llamp'u chuyma toke suyt'añasataqui, ucanracwa mä samarañsa jicjjattanjja.

Jiwasanacajj Tatituruw take chuymamp iyawsapjjtan: jupaw arjjatirisajja, jarc'akerisasa.

Jupampiw chuymanacasajj cusisi, kollan sutiparuw take chuymamp iyawsapjjtan.

Jichhajj jilatanaca, ch'amañchasipjjam Tatitumpi, uqhamarac jach'a ch'amapampisa.

Jumaw nayan yanapirejjätajja, ¡amparamancasajj cusisitätwa!

Ajayojjajj jumamp chict'atawa, cupi amparamasti janiw antutnucquituti.

Ucatsti Davidajj Salomonarojj sänwa: “¡Ch'amañchasim, janirac mayjt'asimti, uqhamarac jichhajj lurañaru uscusim! ¡Janipun ch'am thayjtayasimti, ni ajjsaramsa, Tatitu Diosajjasti jumampïscatap laycu! Jupasti janiw jaytanuccätamti, ni apanuccätamsa, take lurañanacajj Tatitur sirviñataqui templona tucusiñapcama.

Nayar jutapjjam take karjatanaca jatjatanaca, nayaw samarayapjjäma.

Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta.

jisct'añataqui —¿Jumätati jutañapäquis uca Cristojja, jan ucajj yakharuch suyapjjäjja? —sasa.

Nayan yugojjasti jasa apañaquiwa, qhumojjasti sinti phisnaquiraquiwa.”

Tatay, niy lanctasiñampïscäyät ucapachaw, qhuyapayasiñamajj yanapt'itu.

Llaquinacajjajj walipun yapjjatascän ucapachaw chuymachäwimampejj cusisiyista.

¡Nuwasir taman Tatitupajj jiwasanacampïsquiwa! ¡Arjjatirisajj Jacobon Diosapawa!

Tatitusti, Israelan kollan Diosapajj siwa: “Cuttanjjapjjam, samaratäquïpjjaraquim, khespitäsipcätawa. Samarañampin, iyawsañampina ch'amajj utji.” Ucampis jumanacajj janiw munapctati,

Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.

“Nayätwa uva alejja, jumanacasti layminacäpjjtawa. Qhititejj nayampi mayaquïchi, nayasti jupampi mayaquiraquïta, uquïrejj walwa achuraqui, uqhamasti jumanacajj jan nayampejj janiw cuns lurapcasmati.

Iyawsäwi laycuraquiw sarnakasctanjja, janiw uñjatas laycuti.

Jumaw imantasiñajjätajja: jan walt'añanacat khespiyista, atipjäwi k'ochunacampiw muyuntayaraquista.

“Nayaw juman nayrakatam sarä, jach'a alto perkanacjja tincuyä, broncet lurat puncunacsa t'unjäwa, hierrot lurat varanacsa jisc'a jisc'wa tucjä.

Munasiñamamp qhuyapayasiñamampejj sapürupuniw nayamp chicäsqui, Tatay, utamansti wiñayapuniw jacä.

Cunjämatejj mä taycajj wawaparojj chuymachejja, uqhamaraquiw nayajj jumanacarojj chuymachapjjäma, Jerusalenansti chuymachasiña jicjjatapjjaraquïta.”

Tatitusti sumwa uñjasqui take acapachana cunanacatejj lurasisqui ucanacjja, uqhamata ch'ama churañataqui qhitinacatejj chekpachana juparu iyawsasipqui ucanacaru. ¡Jumasti mä lokjamawa uqham lurtajja! ¡Jichhat ucsarusti juc'ampi guerranacawa jumataqui utjani!” sasa.

Tatitojj sapür jach'añchatäpan, Diosaw jan walt'añanacas apasqui, jupaw Diosasajja, khespiyasiñasasa.

jiwk'er uñtataw chhaktapjje, ninamp umatatayat liq'jamaw umatatapjje, ñankha lurir jakenacajj Diosan nayrakatapan tucusipjje.

Diosasajj khespiyir Diosawa, jupaw wiñay jiwañat khespiyistaspa.

Tatituru jach'añchiri jakensti take chuyma jupar suyt'añaw utji, uqhamarac wawanacapas Tatitun imatäniwa.

Nayajj wiñay jacañwa churta, janiw cunapachas jiwapcaraquiniti, ni qhitis amparajjatjja apakcaraquitaniti.

Cuntejj Awquejjajj churquitu ucasti, taket sipansa jach'araquiwa, janiraquiw qhitis amparapatjja apakañataqui ch'amanïquiti.

Uca quipca Ajayuraquiw jiwasan ajayusamp chica Diosan wawanacapätas khanañchi.

Wawanacapätas laycojja Diosatjja herencia catokaraquiñäni jupan arsutaparjama. Uca herenciajja Cristompiraquiw catokañäni, jiwasanacatejj jupamp chica take cunans t'akhesiñäni ucajja, ucat alajjpachan jupampiraquiñäni.

Jumat yanap maycäm ucapachajja, nayamp timasirinacajj jayar jaltjjapjjpan, uqhämat nayan Diosajjätam yatï.

Sapa mayni irnakeriw yanapasi, masiparus ch'amañcharaqui.

Jan qhitirus ajjsaramti, nayaw jumampi chict'atäscä jumar imañataqui. Naya Tatituw ucjja arsta” sasa.

Tatitojj llamp'u chuymaniwa, asquiraquiwa, Diosasajj qhuyapayasiriwa;

Tatitojj jan yäkat jakenacaruw imasqui: jan ch'amanïquiriruw khespiyitu.

Sumancañan Diosajj Jesucristorojj jiwatanac taypit jactayi. Uca Jesucristosti ovejanacan jach'a awatiripawa, wilapampiwa wiñay arust'äwipjja arsuwayi.

Diosasti jumanacarojj k'om tucuypan, sumaquiraqui take cunansa, munañapa lurasiñapataqui, jiwasampisti cuntejj lurañ munqui uc luristpan, Jesucristo toke. ¡Jesucristojj jach'achatäpan wiñayataqui! Uqhamäpan.

Diosaw suma amtäwinac churapjjtam, jupa pachparaquiw yanapasipctamjja uca lurañanac phokhañanjja jupan munañaparjama.

Diosaw khespiyapjjetu, jichhas khespiyasipcaquituwa uca jach'a jiwañatjja. Juparu catuyasisaquiw suyt'asipcaracta, jichhas yanapasipcaquitaniwa,

Tatay, jumaw chuymajj uñantista, nayar uñt'araquista:

ch'eka amparamajj ucan jicjjatitaspa, cupi amparamasti janiw antutquitaspati.

Ch'amacamp imjjatayasiñtejj amtirista, jan ucajj, khana urun ch'amac arumar tucuñaptejj muniristjja,

ch'amacajj janiw jumat imantquitaspati, arum ch'amacajj urut sipan juc'ampiw khantaspa. ¡Ch'amacas urus jumataquejj pachpaquiwa!

Jumaw nayarojj irnokasista, taycajjan puracapan utjayasista.

Jumaruw yuspagarsma, muspharcañpun nayataquejj lurtajja, ¡ucsti sumpun yatista!

Janchejjan jiltatapajj juman uñjatänwa, jan qhitin uñjcat irnokatäcäyät ucchañcama, orak mankhan utjayatäcäyät ucchañcama.

Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana.

Diosajjay, juman amtatanacamajj jan amuycayawa, ucanacajj jan tucusquiriwa.

Ucanactejj jact'añ muniristjja, ch'allat sipan juc'ampïspawa; jaqhuñ tucuyirist ucasa, jumamp chicaquïsquiristwa.

Diosajjay, ñankha luririnacarojj tucusiyamaya, jake jiwayirinacarusti nayat jithektayam,

jumaw kont'atajjsa, sartatajjsa yattajja, lup'itanacajjarojj jayatpach amuytajja.

jumjjat jan wal parlir jakenacat jithektayita, juma contra sayt'ir jakenacat jarc'aketa.

Tatay, ¿janit jumar uñisirinacar uñisirïctjja? ¿Janit jumar kallasirinacar jisc'achirïctjja?

Jan t'acurcay uñisiñampiw jupanacar uñista, uñisirejjat jupanacarojj uñt'ta.

Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim,

nayatejj ñankha thaquin sarnakerïstjja, cheka thaquinjamay irpasita.

Jumaw sarnakatajjsa, samart'atajjsa yattajja, takpach sarnakäwinacajjajj juman uñt'atawa.

“Jan jumanacajj llaquisipjjamti. Iyawsapjjam Diosaru, nayarus iyawsapjjaraquita.

Arunacamajj sarnakäwejjatac khanawa, thaquejjan khantiriraquiwa.

Juparaquiw take llaquinacapatjja khespiyi. Janiw jupan mä qhitanitapati khespiyquejja; jan ucasti quipca Tatituw khespiyi. Qhuyapayasiñap laycu, munasiñap laycuraquiw jupajj khespiyi, jupaw wayti, amparat caturaqui. Uqhampunwa luri.

Ucatsti Tatitojj sänwa: —Nayawa jumampi chica sarascäjja, uqhamarac samarañsa churaraquïmawa —sasa.

Art'asinsma ucapachajj ist'istawa, almajjarusti ch'am yapjjatarapista.

Uqhamaraquiw Kollan Ajayojj t'uqha cancañasan yanapistu, janiw yatctanti cunjämatejj oración lurañajj waquisqui ucjja, ucampis Kollan Ajayuw Diosarojj achict'asqui jiwasatjja jan amuyt'caya aykoñanacampi.

“Acapï Tatit Diosasajja” sasa. Jupaw wiñay irpirisajja.

Samart'ascäta ucqhasti janiw ajjsarayascätati; iquintjjäta ucqhasa jan ajjsarasaw icjjaraquïta.

Jumamp arjjatayasiñ thakerinacajj cusisipjjpanaya, jupanacar imascatam laycojj, cusisiñat wiñayapun k'ochupjjpan. Jumar munasirinacajj jumïpan cusisipjji:

Tatay, jumaw iyawsir jakerojj asquinac churtajja, qhuyapayasiñamajj jarc'akasiñar uñtataw muyuntasqui.

Juyqhunacarusti jan uñt'at thaquinacanjamwa irparaquëjja. Jupanacan nayrakatapansti ch'amacjja khanaruw tucuyäjja, kollunacsti pampa orakeruw tucuyaraquëjja. Take ucanacsti lurapunïwa.

jupaw nayan asqui lurirejjajja, imantasiñ pucarajjasa, khespiñatac waquichat uyusa, jarc'akasiñajjasa, imantasiñajjasa, juparaquiw marcanacar nayamp apnakayirisa.

Ucatwa janipuni nanacajj mayjt'asipcti: Janchinacajjajj sapürusa aynacharus sarjjchi ucasa, ajayunacajjajj sapürutjamaraquiw machakar tucusqui.

Cuntejj aca oraken t'akhesipctan ucanacajj janiw cunäquisa, tucusiriquiwa. Ucat sipan mä jach'a asqui jilarquirir wiñay cusisiñwa apaniraquejja.

Janiraquiw jiwasajj cuntejj uñjctan ucar chuymjja churctanti, jan ucasti cuntejj jan uñjctan ucaruwa catuyasipjjtanjja. Cunatejj uñjasqui ucanacasti tucusiriquiwa, ucampis jan uñjasqui ucanacasti janiw tucusirïquiti jan ucasti wiñayataquiwa.

Tatitusti nayan imantasiñajjawa, imantasiñ karkajjajj Diosawa.

Take qhitinactejj Awquejj churquitu ucanacajja nayaruw juti; qhititejj nayaru jutqui ucarojja janiw ankaru alisnuccti.

Cunapachatejj jumanacajj Tatitun khespiyasiñ arunacap ist'apjjta ucqhajja, Cristorojj iyawsapjjtawa, juparuw mayachasjjapjjaractajja uqhamarac Diosanquirinacjamajj Kollan Ajayumpi sellatäjjapjjaractawa cawquïrtejj jupajj qhitaniñatac arsuwaycäna ucampi.

Kollan Ajayuwa jiwasanacan arjjatirisajja cawquïr wajjt'asïwtejj Diosajj churquistani uc catokañasataquejja. Ucsti catokañäniwa cunapachatejj jupanquirinacan khespiyasiñapajj phokhatäjjani ucqha, jupajj jach'a Diosätap laycu yupaychatäñapataqui.

Sapakata jupanacasti thayat imantasiñjama samaräwïniwa, jach'a mathapi thayatsti jupajj imaniwa, waña oraken uma irpañ k'awanacjama, wasaran mä jach'a kalan ch'iwipäniwa.

yanapajjajj janipuniw jupatac pist'caniti, ¡ch'amajjampiw jupar ch'amañchä!,

janiw timanacajj jupar jaljjatapcaniti, janiraquiw khoru jakenacas atipapcaniti.

Ucjjarojj, jilatanaca, lup'ipjjam cunatejj chekäqui, cunatejj maynïr asqui uñjañäqui, cunatejj wali sumäqui, cunatejj k'omäqui, cunatejj muncañäqui, cunatejj aytat luräwinacäqui. Lup'ipjjam, take cunatejj sumäqui yupaychañataquïqui ucanacata.

Cuntejj yatichapcsma ucanac lurapjjam, cuntejj ist'apctas uñjapcaraquistas uc lurapjjaraquim, sumancañ Diosasti jumanacampipunïniwa.

Janiw esclavo tucuyir ajayu catokapctati ajjsaratac sarnakascañataqui, jan ucasti catokapjjtawa Diosan wawapa tucuyquistu uca Ajayu, ucat jupajj arsuyistu: “Nayan Awquejja” sasa.

Ñankha lurir jakenacan munañan cancañapajj janiw wiñayatac asqui jakenacar apnakcaniti; asqui jakenacan ñankha jan lurasipcañapataqui.

Jumaw arjjatirejjätajja, imantasiñajjätasa, jumaw khespiyirejjätasa, Diosajjätasa, nayar imantir karkajjätasa, imir jarc'akasiñajjätasa, khespiyir ch'amajjätasa, wali amstanquir imantasiñajjätasa.

“Naya, naya quipcaw jumarojj ch'amachsma. ¿Qhitirus ajjsarta? ¿Jakenacaruti? ¿Jiwir jakenacaruti ajjsarta, qhitinacatejj korar uñtata tucusipjjani ucanacaru?

¿Qhititejj alajjpachsa, acapachsa lurqui uca Tatitu Diosamatjja armasïtati, qhititejj alajjpacha janatati, oraksa utt'ayaraqui ucatjja? ¿Qhitinacatejj jumar tucjañataquejj jac'ancqui, wali colerata uñch'uquisctam ucanacataquejj qhathatiscaquïtati? Ucampis ¿cawquinquis colerasiñapajja?

Amparapjjaruw apapjjätam, cayuman kalar jan lanctasiñapataqui;

catarinacarusa, asïrunacarus takjjatascaquïtawa, leonanac taypinsa, ajjsarcañ animalanac taypinsa, sarnakascaquïtawa.

Tatitusti iyawsirinacaparojj sum uñjasqui, qhuyapayasiñap suyt'irinacarojj imasquiwa,

jiwan amparapat jupanacar khespiyañataqui, mach'a pachanacan chuymachañataqui.

Tatitojj uywatanacaparojj khespiyiwa, jupar iyawsirinacajj janiw juchañchatäpcaniti.

Jumanacarusti Diosajj jupar iyawsapjjatam laycojja, jach'a ch'amapampiw take cunatsa imasipcaractam, cuna khespiyasiñatejj jumanacataqui waquichatäqui uca catokapjjañamcama. Uca khespiyasiñsti khepa urunacaw jumanacajj catokasjjapjjäta.

Tatitojj jupar iyawsirinacarojj imiwa; jupan arsutanacapasti chekapawa.

Cawquïritejj jawsapctam ucajja phokheriwa, uqhamajj phokhaniw take acanacjja.

“Nayätwa suma awatirejja; ovejanacajjsti uñt'asiractwa, ovejanacajjasti nayarojj uñt'asiraquituwa.

Cunjämtejj Awquejjajj nayaru uñt'quitojja, uca pachparaquiw nayajj Awquirojj uñt'aracta; jacañajjsti ovejanacajj laycuw apt'asiracta.

Tatitusti sutipar munatap laycojja janiw apanucupcätamti, jupasti jumanacarojj marcapwa tucuyasiñ munapjjtam.

T'akhesiñancasinsti Tatitut art'asipjjäna, jupasti t'akhesïwit waysüna.

Jach'a thayarojj llamp'u thayaruquiw tucuyäna, lamar kota mathapinacasti llamp'uchataw uñjasïna.

marcanac taypit tantachthapitanaca, amsta toketa, aynach toketa, inti jalsu toketa, inti jalanta toketa.

Ojjenac t'acurir uñjasajj cusisipjjänwa, Diosasti cawqharutejj mistuñ munapcäna, ucaruw puriyäna.

Nayajj jumarojj irpascapunïmawa, wasaransti mank'añjja jilarquir churaraquïma, janchimarusti ch'amañcharaquïmawa, mä suma karpata pankar yapjamaw tucuraquïta, mä uma jalsur uñtataw tucüta, umamasti janiw tucuscaraquiniti.

Nayajj Dios sapanac samarañ jicjjatta, suyt'añajjajj jupat juti.

Jupaquiw khespiyitu, arjjataraquitu. Janiw tinccäti, jupaw imantasiñajjajja.

Tatitusti jumanacar jiltaypan, juc'ampi maynit maynicam munasiñanacamajj utjaracpan, cunjämtejj nanacajj jumanacar munasipjjsma uqhama.

Uqhamaraqui chuymanacamanjja ch'amañchatäpjjañamataqui, k'omachata jan cuna juchani Dios Awquisan nayrakatapana, cunapachatejj Tatit Jesusajj take jupanquirinacapampi jutcani ucapachajja.

Tatitur wakaychirinacataquisti munasiñapajj wiñayawa, asqui cancañapajj allchhin allchhipataquis utjascaquiwa:

arust'äwiparjam sarnakerinacataqui, arsutanacaparjam phokherinacataqui.

Amparamaruw ajayojj catuysma: Tatay, cheka Diosay, khespiyasiquitaya.

Kellkataraquiwa: “Take qhititejj Tatitun sutipa art'asqui ucajj khespiyatäniwa.”

Diosajjay, jumaw Diosajjätajja, jumar thakasaw khantatta, almajjajj jumatjam pharjatawa; janchejjajj jumatjam awtjatawa, jan umani, jan jacañan waña oraker uñtatawa.

Uqhamasti pä luräwiw jan trocasir utji, ucanacatjja Diosajj janiw c'ariscaspati; ucampejj Diosajj mä jan tucusquir chuymachäwi churistu, qhitinacatejj jupan imantasiñ thakapctan, uqhamarac catuyasiractan uca suyt'äwi churquistu ucana.

Uca suyt'äwiw sum catjjäsistu uqhamarac almasa uñjaraqui, cunjämatejj anclajj mä barcorojj catjjäsejja uqhama. Jiwasan utjquistu uca suyt'äwejj alajjpach templon cortinap khepäjjan suma acht'ayatawa,

Tatituw nayarojj asquinacamp phokhantitani: Tatay, qhuyapayasiñamajj wiñayawa, amparamamp luratanacarojj janiquiy armanucumti.

¿Janit jumast alajjpachan nayatac utjctasti? Jumamp chic utjasajj janiw cuns aca oraken muncti.

Chuymajjasa, janchejjas tucusisquiwa, ucampis Diosaw wiñay catokäwejjajja, jupaw chuymajjarojj catjjäsisqui.

“Jan kollkeni pobre jakenacajj umwa thakapjje, janiw jicjjatapcaraquiti. Lajjranacapas umatjamajja, k'ala wañantataw uñjasi ucampisa naya Tatituw jupanacarojj uñjascä, naya, Israelan Diosapasti janiw jupanacarojj antutcäti.

Nayaw jawir umanaca sartayä wasara kollunacana, vallenacansti uma jalsunacracwa utjayaraquï; wasara orakenacasti wali umani orakenacaruw tucuyaraquï, waña orakenacatsti umwa jalsuyaraquï.

Nayan marcajja, sartasim, ucatsti utamar mantam, ucatsti puncum jist'catasinim, imantasiraquim, Tatitun colerasiñapajj pasañapcama.

Asqui jakejj janipuniw cunapachas aynacht'caniti. Asqui jakejj aytatapunïniwa.

Jan wali yatiyäwinacarojj janiw ajjsarquiti, chuymapajj Tatituncasajj wali thurt'atawa.

Jupaquiw sipit känat khespiyätam, jupaquiw jiwañ usut jarc'akätam,

chhekhanacapampiw imjjatätam, chhekhanacap mankhäjjan imantasïta. Amparapajj jarc'acasiñar uñtataw imätam.

Jumajj pobrenacan arjjatiripätam laycu, qhititejj aynacht'atäqui ucarus arjjataractawa, jan walt'añanjja jumaw arjjattajja lupinsa jumaw ch'iwiñcht'aractajja. Khoru jakenacan samananacapasti thaya horasan jach'a thayar uñtatawa,

Wiñaya jaquir Diosaw imantasiñamajja, wiñayataqui ch'amapaw wayjjäsiscaractam, juparaquiwa juma nayräjjat uñisirimarus jaltayi, ucatsti jumaruwa t'unjañatac qhitaractam.

Jesucristojj pachpaquïsquiw wasürusa, jichhürusa, wiñayasa.

Tatitur iyawsapjjam, ch'amapar alcatapjjam, jan karjasis ajanup thakapjjam.

Ucampis jumanacajj ajllit jakenacäpjjtawa, reyir sirviri tucuyat sacerdotenacäpjjaractawa; mä k'oma marcäpjjtawa; Diosan ajllisit marcapäpjjaractawa. Acasti lurasiwa, jumanacajj Diosan muspharcañ luräwinacap yatiyapjjañamataqui. Uca Diosaraquiw jumanacarojj ch'amacat irpsusinjjapjjtam, suma muspharcañ khanapar mantjjapjjañamataqui.

Jerusalén, mä c'ajquir khanampi llawuntata sartasim, khanamasti purinjjewa, Tatitun c'ajquir khapak cancañapasti jumjjan khani.

“Jumanacatejj nayampi mayaquïsipcätajja, janirac yatichäwinacajj armapcäta ucajja, mayipjjam cuntejj munapcäta uca, ucatsti churatäpjjätawa.

Tatitur thakhapjjam, ch'amapa thakhapjjam, take horasansa Tatitur thakhapjjam.

Chuymapajj ch'amañchatawa, janiw ajjsarquiti, timasirinacaparojj sawcasiñampiquiw uñti.

Diosajj jumanacarojj take casta bendicionanacwa jilarquir churapjjeristamjja, uqhamat jumanacajj take cunampis phokt'atäpjjañamataqui, ucat take asqui luräwinacan yanapt'asipjjañamataqui.