Genesisy 23 - DIEM PROTESTANTA

Nividy fasana ho an’i Sarà i Abrahama

¹ Rehefa niaina 127 taona i Sarà,

² dia maty tao Kiriata-Arbà, izany hoe tao Hebrôna, any amin’ny tany Kanahàna. Dia tonga i Abrahama mba hisaona sy hitomany an’i Sarà.

³ Dia nitsangana niala teo amin’ny faty izy ary lasa niteny tamin’ny terak’i Heta hoe:

⁴ –Vahiny sy mpifindra monina ihany aho eto aminareo. Omeo toeram-pandevenana eto aminareo aho mba handevenako ny vadiko.

⁵ Dia namaly azy ny terak’i Heta hoe:

⁶ –Tompokolahy ô, mba mihainoa anay: filoha notahin’Andriamanitra ianao teto anivonay, koa aleveno ao amin’izay fasana tsara indrindra eto aminay ny vadinao. Tsy hisy aminay hisakana ny fasany tsy handevenana ny razana.

⁷ Nitsangana i Abrahama ka niankohoka teo anoloan’ny terak’i Heta, vahoaka tompon-tany,

⁸ ka niteny tamin’ireo hoe: –Raha ekenareo tokoa àry ny handevenana ny vadiko eto, dia anaovy fanelanelanana amin’i Hefrôna zanakalahin’i Tsôhara aho

⁹ mba hanomezany ahy ny lava-bato ao Makpelà amin’ny sisin’ny sahany. Aoka ho amin’ny tena vidiny no hanomezany azy ho ahy eto anatrehanareo ho toeram-pandevenana.

¹⁰ Ary i Hefrôna ilay Hetita tamin’izay dia nipetraka teo anivon’ny olona tafavory. Koa namaly an’i Abrahama izy mba ho ren’ny Hetita rehetra tonga teo am-bavahadin’ny tanàna, ka nanao hoe:

¹¹ –Tsia, tompokolahy, fa henoy aho! Ny saha dia omeko anao ary ny lava-bato izay eo aminy koa dia omeko anao; eto imason’ireto mpiray foko amiko no anomezako azy maimaim-poana; koa aleveno ao ny fatin’ny vadinao.

¹² Fa niankohoka teo anatrehan’ny vahoaka tompon-tany indray i Abrahama,

¹³ dia niteny tamin’i Hefrôna mba ho ren’ny besinimaro ka nanao hoe: –Raha marina fa hihaino ahy tokoa ianao, mba raiso avy amiko ny vidin’ny saha efa natolotro; dia haleviko ao tokoa ny fatin’ny vadiko.

¹⁴ Dia namaly an’i Abrahama indray i Hefrôna hoe:

¹⁵ –Tompokolahy ô, henoy aho! Izay tany lanjambidy efajato sekela volafotsy ve dia ho inona amiko sy aminao? Fa aleveno ny fatin’ny vadinao.

¹⁶ Dia nifanaraka tamin’i Hefrôna i Abrahama ka nandoa ny vola izay voalazany teo anatrehan’ireto Hetita, dia sekela volafotsy efajato fampiasa amin’ny mpivarotra.

¹⁷ Koa ny sahan’i Hefrôna izay tao Makpelà akaikin’i Mamre, izany hoe ny saha sy ilay lava-bato tao aminy mbamin’ny hazo rehetra tao anatin’ny faritra manodidina azy, dia natao varo-maty

¹⁸ tamin’i Abrahama mba ho fananany. Vavolombelon’izany ny Hetita rehetra tonga nivory teo am-bavahadin’ny tanàna.

¹⁹ Taorian’izany i Abrahama dia nandevina ny fatin’ny Sarà vadiny, tao amin’ilay lava-bato tao amin’ny saha Makpelà akaikin’i Mamre, izany hoe Hebrôna ao amin’ny tany Kanahàna.

²⁰ Koa ny saha sy ilay lava-bato ao aminy dia nataon’ny terak’i Heta varo-maty tamin’i Abrahama mba ho toeram-pandevenana.