Genesisy 46 - Baiboly Katolika

Ny nandehanan’i Jakôba tany Ejipta

¹ Dia niainga i Israely nitondra izay rehetra nananany. Nony tonga teo Bersabea izy, dia nanolotra sorona tamin’ny Andriamanitr’i Isaaka rainy.

² Ary Andriamanitra niteny tamin’i Israely tamin’ny fahitana nony alina, nanao hoe: «Ry Jakôba! Ry Jakôba!» Ka hoy ny navalin’i Israely: «Inty aho.»

³ Dia hoy Andriamanitra: «Izaho no Andriamanitra mahery, dia ny Andriamanitry ny rainao. Aza matahotra ny hidina any Ejipta, fa hataoko tonga firenena lehibe ianao any.»

⁴ Izaho hiara-midina aminao any Ejipta. Izaho ihany koa no hitondra anao hiakatra indray tokoa avy any, ary ny tanan’i Josefa no hanirina ny masonao.

⁵ Dia niainga i Jakôba ka niala tao Bersabea; ary ny zanak’i Israely nametraka an’i Jakôba rainy, mbamin’ny vadiny aman-janany, teo ambonin’ny sarety nalefan’i Faraôna hitondrana azy.

⁶ Nentiny koa ny biby fiompiny sy ny fananany noharîny tany amin’ny tany Kanaana. Dia nankany Ejipta i Jakôba mbamin’ny fianakaviany rehetra.

⁷ Nentiny nankany Ejipta niaraka taminy ny zanany aman-jafiny lahy, sy ny zanany aman-jafiny vavy, mbamin’ny ankohonany rehetra.

Fianakavian’i Jakôba

⁸ Izao no anaran’ny zanaka lahin’i Israely tonga tany Ejipta. I Jakôba sy ny zanany lahy:

⁹ Robena, lahimatoan’i Jakôba. Zanak-dRobena: i Henoka, i Falo, i Hersona ary i Karmì.

¹⁰ Zanak’i Simeôna: I Jamoela, i Jamina, i Ahoda, i Jasîhna, i Sôhara ary i Saola, zanak’ilay vehivavy Kananeanina.

¹¹ Zanak’i Levi: i Jersôna, i Kaata ary i Merarì.

¹² Zanak’i Jodà: i Hera, i Onàna, i Selà, i Faresa ary i Zarà; fa i Hera sy i Onàna maty teny Kanaana. Ny zanak’i Faresa dia i Hesrôna sy i Hamola.

¹³ Zanak’i Isakara: i Tola, i Foa, i Joba, ary i Semrôna.

¹⁴ Zanak’i Zabolôna: i Sareda, i Elôna, ary i Jahelela.

¹⁵ Ireo no zanakalahin’i Lià, naterany tamin’i Jakôba tany Padan-Arama, ary i Dinà no zanany vavy. Telo amby telopolo no isan’ny zanany lahy rehetra mbamin’ny zanany vavy.

¹⁶ Zanak’i Gada: i Sefiôna, i Hagy, i Soni, i Esbôna, i Hery, i Arôdy ary i Arely.

¹⁷ Zanak’i Asera; i Jamne, i Jesoà, i Jesoỳ, i Berià, ary i Sarà anabavin’ireo. Ny zanak’i Beria dia i Hebera sy i Melkiela.

¹⁸ Ireo no zanaka lahin’i Zelfah, ankizy vavy nomen’i Labàna an’i Lià, zanany vavy, ireo no naterany tamin’i Jakôba. Enina ambin’ny folo izy.

¹⁹ Zana-dRasela vadin’i Jakôba: i Josefa sy i Benjamina. Ny zanak’i Josefa tany amin’ny tany Ejipta,

²⁰ izay naterak’i Aseneta zanaka vavin’i Potifara, mpisorona ao Ona, dia i Manase sy i Efraima.

²¹ Zanak’i Benjamina: i Bela, i Bokora, i Asbela, i Jerà, i Naamàna, i Esỳ, i Rôsa, i Mofima, i Ofima, ary i Areda.

²² Ireo no zanakalahin-dRasela naterany tamin’i Jakôba. Efatra ambin’ny folo izy rehetra.

²³ Zanak’i Dana: i Hosima.

²⁴ Zanak’i Neftalì: i Jasiela, i Gony, i Jesera ary i Salema.

²⁵ Ireo no zanaka lahin’i Balà, ilay nomen’i Labàna an-dRasela zanany vavy, ireo no naterany tamin’i Jakôba. Fito izy rehetra.

²⁶ Ny isan’izy rehetra niaraka tamin’i Jakôba nankany Ejipta, afa-tsy ny vadin-janany lahy, fa ny naloaky ny kibony ihany, dia enina amby enimpolo.

²⁷ Ny zanak’i Josefa izay naterany tany Ejipta dia roa lahy. Ary ny tontalin’ny ankohonan’i Jakôba rehetra tonga tany Ejipta dia fitopolo.

Fandraisan’i Josefa

²⁸ Dia nalefan’i Jakôba i Jodà, hialoha azy ho any amin’i Josefa, hanomana ny hahatongavany any Gesena. Rehefa tonga tany Gesena i Jakôba sy ny ankohonany,

²⁹ dia nampamboatra ny kalesiny i Josefa ka nitaingina teo hitsena an’i Israely rainy any Gesena. Niseho taminy izy, dia niantoraka ka namihina ny vozony, sy nitomany ela teo amin’ny vozony.

³⁰ Ary hoy i Israely tamin’i Josefa: «Tsy mampaninona ahy intsony ny ho faty amin’izao, fa efa nahita tava anao aho, ary mbola velona ihany ianao.»

³¹ Ary hoy i Josefa tamin’ireo rahalahiny sy ny ankohonan-drainy: «Handeha hampandre an’i Faraôna aho, ary izao no holazaiko aminy: ‹Tonga aty amiko ny rahalahiko sy ny ankohonan’ikaky, izay tany amin’ny tany Kanaana.

³² Olona mpiandry ondry izy ireo, fa biby fiompy no fananany, ary efa nentiny avokoa ny ondry sy ny ombiny ary ny fananany rehetra.›

³³ Koa raha antsoin’i Faraôna ianareo, sy anontaniany hoe: ‹Inona no raharahanareo?›

³⁴ Dia valio hoe: ‹Biby fiompy no fanananay, izahay mpanomponao, hatramin’ny fahazazanay ka mandrak’ankehitriny; tahaka ny razanay koa.› Fa izany no hahazoanareo monina amin’ny tany Gesena, satria fahavetavetana amin’ny Ejiptianina ny mpiandry ondry rehetra.»