2Samoela 1 - Baiboly Katolika

I Davida nandre ny nahafatesan’i Saola

¹ Nony maty i Saola dia niverina avy nandresy ny Amalesita kosa i Davida ka hatramin’ny andro roa i Davida no nipetraka tao Sikelega.

² Tamin’ny andro fahatelo, inty nisy lehilahy anankiray, avy tany an-toby, avy tany amin’i Saola, ary ny akanjony rovitra, ny lohany norarahan-tany, ary nony mby teo amin’i Davida izy dia nidaboka tamin’ny tany, ka niankohoka.

³ Hoy i Davida taminy: «Avy aiza ianao?» Ary hoy ny navaliny azy: «Nandositra avy tany an-tobin’i Israely aho».

⁴ Dia hoy i Davida taminy: «Ka nanao ahoana avy? Tantarao amiko kely hoe». Ary hoy izy: «Nandositra tamin’ny ady ny vahoaka, ka be no nitsingidina sy maty tamin’ny vahoaka, ary maty koa aza i Saola sy i Jônatasy zanany».

⁵ Hoy i Davida tamin’ity zatovo, nilaza izany zava-baovao izany taminy: «Ahoana no ahafantaranao fa maty i Saola sy i Jônatasy?»

⁶ Ary izao no navalin’ilay zatovo nilaza ny vaovao taminy: «Sendra tany an-tendrombohitra Jelbôe aho, no inty i Saola nitehina tamin’ny lefony teo, efa saika tratry ny kalesy sy mpitaingin-tsoavaly mihitsy;

⁷ niherika izy ka nahatazana ahy dia niantso ahy, sy nolazaiko hoe: ‹Inty aho.›

⁸ Ary hoy izy tamiko: ‹Iza moa ianao?› Ka hoy aho namaly azy: ‹Amalesita aho.›

⁹ Dia hoy izy tamiko: ‹Avia atỳ akaikiko ary vonoy ho faty aho; fa efa fanina aho ity, nefa ny aiko manontolo mbola ato amiko.›

¹⁰ Dia nanatona azy aho, ka namono azy satria fantatro fa tsy ho velona intsony izy rehefa resy. Koa nalaiko ny satrok’andriana teny an-dohany sy ny fehin-tanana teny amin’ny sandriny, dia indreto nentiko nankatỳ amin’ny tompoko.»

¹¹ Dia noraisin’i Davida ny fitafiany, ka notriariny ary nanao toy izany koa ny olona rehetra teo aminy.

¹² Nanao ny fombam-pisaonana azy ireo izy, nitomany sy nifady hanina mandra-paharivan’ny andro, nisaona an’i Saola sy i Jônatasy zanany ary ny olon’i Iaveh sy ny tranon’i Israely, satria lavon-tsabatra izy ireo.

¹³ Ary hoy i Davida tamin’ity zatovo nilaza ny vaovao taminy: «Avy aiza no tany fiavianao?» Hoy ny navaliny azy: «Izaho dia zanaky ny olona hafa firenena, dia olona Amalesita.»

¹⁴ Ary hoy i Davida taminy: «Nahoana ianao no dia tsy natahotra ny haninji-tanana hamono ny voahosotr’i Iaveh?»

¹⁵ Sady niantso ny anankiray tamin’ny tovolahy i Davida ka nanao hoe: «Avia, vonoy io.» Dia nasiany, ka maty.

¹⁶ Ary hoy i Davida taminy: «Aoka ny ranao ho eo an-dohanao, satria vavanao ihany no niampanga anao, fony ianao nanao hoe: ‹Izaho no namono ny voahosotr’i Iaveh.› »

Sentosenton’i Davida malahelo an’i Saola sy i Jônatasy

¹⁷ Noventesin’i Davida ity hira fisaonana an’i Saola sy i Jônatasy zanany ity,

¹⁸ ka nasainy nampianarina ny zanak’i Jodà izany. Io ilay hira hoe: Tsipìka. Indro fa voasoratra ao amin’ny Bokin’ny Marina izany:

¹⁹ Moa levona teny amin’ny tamponao va ny famirapiratr’i Israely? Ahoana no nahalavoan’ny mahery?

²⁰ Aza ambaranareo any Geta izany, na torinareo any amin’ny araben’i Askalôna, fandrao mifaly amin’izany ny zanaka vavin’i Filistinina, fandrao mibita-kafaliana ny zanaka vavin’ny tsy mifora.

²¹ Ianareo tendrombohitra Jelbôe, aza misy ando aman’orana intsony eo aminareo na saha fisantaram-bokatra! Fa teo no nahararaka an-tany ny ampingan’ny mahery.

²² Ny ampingan’i Saola tsy mba diloilo no nahosotra azy fa ny ran’ny maratra sy ny tavin’ny mahery; ny tsipìkan’i Jônatasy tsy lasa nihemotra na oviana na oviana ary ny sabatr’i Saola tsy nody maina.

²³ Malala sy mahatehotia i Saola sy i Jônatasy, fony fahavelony, ary teo am-pahafatesany dia tsy tafasaraka. Mailaka noho ny voromahery izy, mahery noho ny liona.

²⁴ Mitomania an’i Saola, ry zanaka vavin’i Israely, fa notafiany jaky tao anatin’ny fahafinaretana ianareo; noravahany volamena ny fitafianareo!

²⁵ Ahoana no nahalavoan’ny mahery tany an’ady? Voagorobaka teo amin’ny havoanao i Jônatasy!

²⁶ Trotraky ny alahelo anao aho, ry Jônatasy rahalahiko! Fa ianao ihany no fahafinaretako tanteraka; mamiko noho ny fitiavan’ny vehivavy ny fitiavanao.

²⁷ Ahoana no nahalavoan’ny mahery? Ahoana no nahafatesan’ny mpiady?