Biblia Todo Logo
La Biblia Online
- Anuncios -


JEREMIA 9 - ASII LAKDAP Bible (BSI)

1 Ngi raq tiimasea kla ikhupo arka khappong chum, kiimaq imakpo wiinai ka makphai khamdü nguraüjaq ahea riichang, kra nguraü ka ranaiq rawa mihoqsiqha wa, Inok ibin jiipbaiqtaq kra miitu.

2 Itsan mong na riiweasea kla kumtsaiphii rumnyangkhi na ngi sichang hiq bashi asi nguraüjaq ahea riichang, kiijaq inok ita makki wa alu na akihoha chang wa. Tsangshiq ka tsapkap mak pinthum, iwokhong na simak mung siiqbaiq tiikong,

3 Tsangshiq ka wranaiqshe arot akiq chongtikong; mung na tingting chong rii na ajok aliiq kli chongtlo. Tatiwe raq ngutlo, “Isenginok raq phanshi abi klojai maq abi phanshi maq tiipatlo, kiimaq tsangshiq raq ngi ka tsang Shiikeawe nguta sap mak.”

4 Maiq loweatek raq aphunowe ma honkam shatmaq sichang, Juwe riimin akongtiwe miika kamtsantsii thülot mak; jamkhano ngukla phunaino ümchu wa sitlaq ka Jakob ikha laopha maiqse siisaq, kiimaq maiq loweatek raq aphunowe chongsiqtlo.

5-6 Tsangshiq tarü ka kongti laoliiti siisaq, kiimaq jurmin tengteng bomtsi chongmak; tsangshiq tilika arot bomchong miitu atiingam reawishe, kiimaq tsangshiq raq ngarai tang ka tsaq mak phan. Tsangshiq riika mat atsa ka ashi tanghoholi riitlo, kiimaq maiq ka bashi wa laohoho li she sitlo. Tatiwe nga asenginok raq apaiq ka shishe baiqto she ngutlo.

7 Arthun arkha na Ajong Pinthum Tatiwe raq ngutlo, “Ngi raq isenginok ka jin ikha wa na shulata michenha, lata tsangshiq ka mimaitai wanha. Isenginok raq abi klowanto; ngi raq tsangshiq ka jamkhiishe wa mirha?

8 Tsangtili thun ka liqsinkii ikha sihea siisaq; tsangshiq raq wranaiqtek arotli chongtlo. Maiq khumtek raq chiiti ma kongshiti ikha bomtlo; shatmaq riikhaqli miika arewe tiidea chang thiikho thutlo.

9 Tsangshiq raq atinkhan ashut klotlaq arkha na, Ngi raq tsangshiq ma mo tiiho mangli shea mirha? Akhnok mungti khuthaq na iphuk lam mang li shea misiha? Arka, Ngi, Tatiwe raq ngutiikang.”

10 Ngi raq ngukang, “Ngi raq pum thun miitu majo mihoqha kiimaq nyamse rümchang nyiimlung rii miitu mihoqha, jamkhano ngukla kriithun ka wiitashe shinkito, kiimaq kriithun lam maq maiq jumin khummak she. Nyamse kong trang ka ahü she; wushi thun nai rumnyamse thun wiitashe pinwanto.”

11 Tatiwe raq ngutlo, “Ngi raq Jerusalem ka bunlak mishthenbaiqha, miikakoi kong haisea chang miishe mija wan; Juda mung wa chela thun ka wiita kumtsaiphii rumnyangkhi miishe mijaki, maiqse sichang riimak she mijaki.”

12 Ngi raq waikang, “Tatiwe, riita armung arka jamlairo rumnyangkhi kumtsaiphii ma jakita? Krai mren arlam maq maiq jumin khum mak she? Ara takti taksu maiqse ka juwa? Ümniiraq jumo ara mra pintaq ara chongkuqlaü apaiq raq nanok ma chongkuqlotli chang?”

13 Kiijiishe Tatiwe raq treto, “Arthun thenjen wantaq arka isenginok raq ngi raq tsangshiq ma jamlai tri lamphan wa shrinkuq kang kra lang wan mak miimbaiq kha na thento. Tsangshiq raq ibom taimak tlea wanto. Kiimaq ngi raq jamlai jaqsham ronglaq ngutiiwa chongkang kra sham wan mak riito.

14 Kra langwan la na, tsangshiq tsantsii ka wanshakshak siwanto. Raüta tsangwetiim raq ashrinkuq thü Baal phra sumla thun kli shomnoq wanto.

15 Arningkhan, tiitsang tailaq, Ngi Ajong Pinthum Tatiwe, Israilnok Shiikeawe raq jamlai jaq wa misham wanha kra tailaq. Ngi raq isenginok ma pechong khap dokdok phan thun kriishe mitiiphaq wanha. Kiimaq maiqchok raq chang phan kham kriishe mitiinyang wanha.

16 Ngi raq tsangshiq ka maiq pong mungti thun mung luhea na, tsangshiq riimin sapmak kiimaq tsangtitiim riimin sap mak, mangtang ramangnok mung niishe munglu shumwikong ma mitiitsuq wanha. Lata ngi raq tsangshiq ka tiithumpak mitiithen baiqha shaq wiiwii, chiqse rewe pahea tiiki lata tsangshiq ka mitiikhat wanha.”


Jerusalemti Khrumjaü Hoq Trangto

17 Ajong Pinthum Tatiwe raq nguto, “Jamlai mra she wa pinjin wantlaq kra tiima rong liita! Maahoti thun kra tiiheawa rongkiq, jechakre majo shinge atsin tsinti kra.”

18 Kiijiishe mungmaiqse raq nguto, “Tsangshiq ma chong ronglaq jaqlo kiraüta nashiq ma majo shi mishi kuqlaq, nashiq makpo thun ka makphai raq mima shaq wiiwii, kiimaq nashiq makkhii thun ka ahotsi raq makphai raq jobaibai mipiim shaq wiiwii majo mishingelaq.”

19 Taironglaq Jajon chela na maaho trang kra, “Nashiq thenkai she! Nashiq ka miqchup jea ngaükai she! Nashiq raq na mung ka miimthü chang she; nashiq jam thun wiitashe runbaiqto.”

20 Ngi raq ngukang, “Tatiwe bom tai ronglaq, jechakre lei, lantea apaiq bomtsi tiitsang taironglaq. Lantea namsetiim jechaksere ma maajo shi shrinkuq ronglaq, kiimaq namkongtitiim ma maajo shi shrinkuq ronglaq.

21 Tsailam ka nashiq kitanpu thun maq nyap wato raüta nashiq hokham jamthun na nyap wato. Tsailam raq nosere kong chiiheawea lamthun wa jiipbaiqto kiimaq jerobi thun ka kejat thung wa tsatbaiqto.

22 Maiq maa phong ka barap binrii na riinyin riishin riiphongtlo, wak ram na minsaü daiq phong tlaq ikha, wak na khaolümtei thun tsamhanti jai na tiiphongtlaq ikha, tsam ka maiq ajutti ahü kha maq abaiqthü ikha riiphongtlo. Tatiwe raq ngi ma akha chongkuqlaq nguto.”

23 Tatiwe raq ngutlo, “Taksu maiqse raq tsangshiq taksu tsü miitu shiikong raamak, kiimaq sreajongbi raq tsangshiq ningkun jong miitu shiikong raamak, kiimaq chiithe maiqse raq tsangshiq tsiiq tum miitu shiikong raamak.

24 Shatmaq maiq ashi ra raq tiitsakisea rotlaq jiila, apaiq raq ngi ka asap kiimaq ngi ka juwa kra asap she nguta kra miituli mitiitsakilaq, jamkhano ngukla ngi lungwiitsii ka tiipit mang phan, kiimaq ngi riika tingting kappe maq tri ka shin tiikang. Arthun arkata ngi tiichochi chang jaqsham. Arka, Ngi, Tatiwe raq ngutiikang.”

25-26 Tatiwe raq ngutlo, “Ngi raq Ejip mungti, Juda mungti, Edom mungti, Ammon mungti, Mob mungti kiimaq rumnyangkhi kumtsaiphii binjü na siti maiq thun ma mo tiiho miitu akhing ka saüwantlo she. Tsangshiq raq tsangshiq khu ka atoqse maq tap sito. Armung thun arka atho hanje siisaq. Shatmaq tsangshiq raq athohan tongshong liichum ka sapmak. Arthun mungti raq kiimaq Israilnok raq ngi raq akuqha itongshong tri ka langmak riito.”

Tangsa Naga Bible - ASII LAKDAP

Copyright © 2015 by The Bible Society of India

Used by permission. All rights reserved worldwide.

Bible Society of India
Síguenos en:



Anuncios


¡Síguenos en WhatsApp! Síguenos