JEREMIA 4 - ASII LAKDAP Bible (BSI)Mra Tiidii Ronglaq 1 Tatiwe raq ngutlo, “Israilnok lei, namshiq ka ngi pha na jang wan nong lungwii tlan jiila, iwokhong na nyap wan nong ronglaq. Namshiq ka ipuk na nyap wan lanta, iwokhong na tsapkapkap siwan han jiila, lantea ngi raq saisi tiikang sumla phra thun kra lambaiq han jiila, 2 kriishe klowan han jiila, namshiq raq imang chong lantea atiitum wan mimai. Kriishe ngu raüla, maiq phan tlotli raq ngi nang nga tsangshiq ma ramram kuqlaq nguta mingu. Kiimaq tsangshiq raq ngi mitiitsam kam.” 3 Tatiwe raq Juda mungti ma nai Jerusalemti ma akha ngutlo, “Namshiq wak phu maq thaihü thun kra athei ronglaq. Namshiq raq tsamlai ka shukrü mong na naq wan rongkiq. 4 Namshiq raq tongshong raükha ka ngi raili, Ngi namshiq Tatiwe raili thü ronglaq. Lanta namshiq Juda mungti nai Jerusalemti raq, namshiq khum asai kiimaq tiima tsantsii ka wiita ngi ma kiinong kuq lantli sironglaq. Kiimaq namshiq raq ara chongtiikang kra shamwan man riihanla, namshiq raq ngarai pahea klowan lan kriikha na, itsankhiq walü ka namshiq khuthaq na milü. Kriika mikhiim wan dongdii. Kra wa kriishe liiwan raüla, kra tiimatketi maiq ka jumin ahü she miraq.” Juda Mung Re Raq Milong Wan 5 Juda mung tlotli na lerong tsülaq! Tiihong laüta agi lülü maq riimlaq! Juda mungti nai Jerusalemti kiitelong maq trotam maq rukje chela thun kiina juronglaq nguta chonglaq. 6 Jajon nü na walam tiichhikuqlaq! Jutlo ronglaq! Naq tiijai jongkiq! Tatiwe raq phiiptsi chang thenjen tiikitlo kiimaq shekhu nü mung wa henghea tiithenkaiti saühotlo. 7 Hangsikaü rum na bomhai raüta akhe dongkitlaq ikha, maiq mung thun tiithenkaitiwe kitlo she. Apaiq ka Juda mung tiithenkai kitlo. Juda mung wa chela thun ka botkhulai rai mishotbaiq, kiimaq kriithun na maiq jumin simak she miraq. 8 Arningkhan wunthaü riinaü samtong samlanta agiliilii hoq ronglaq, jamkhano ngukla Tatiwe tsankhiq ka Juda mung khuthaq wa jang wan mak dea. 9 Tatiwe raq nguto, “Kra ranaiq hokhambi nai ajong alabi raq tsaiji wiita mitiidoq. Ramwebi ka phiipraq mitsai. Kiimaq shammibi ka akii anyiili she miraq.” 10 Kiijiishe ngi raq ngukang, “Ajong Pinthum Tatiwe lei, ümniiraq Jerusalemti ka tiibitaq laobaiq laü! Ümniinga mung na khusang miraq nguta ngulaü. Shatmaq tsangshiq jiipbaiq miitu tsang buq na nepjasai maq asebaiq miitu dan raq she.” 11 Jerusalemti ma rahai haike henghea maiq akhiim ka kumtsaiphii rumnyangkhi binjü wa haiwan raüta, Jerusalem nü na hai wantlo nguta chiiriim raüta chongke akhing ka saü wanto she. Kra rahai ka nintatase tsamchhii pan wan lamlamli ka riimak. 12 Tatiwe aming maq rahai saü wantlaq kriika kriithaq na henghea miraq! Jamkhano ngukla arka Tatiwe apaiq raq dongdii asenginok khuthaq na khapho rahai she tiisaühotlo. Juda Mungti Ka Re Raq Komwanto 13 Liironglaq, rewe ka phum pong wan tlaq ikha saü wantlo. Apaiq rekhat chang kumrang leng phong ka atro rathaiq ikha saü wantlo. Kiimaq apaiq kumrang kong thun ka liihawe kaütiim bitlaq nam miimin aphiq lin. Nashiq ha miqkai she! Nashiq ha michup thumkai she! 14 Jerusalem lei, ümtsan mong na abi kra hebaiqlaq. Kra riihaü jiiqtiq ümniika mitiichhiilot haü. Ashut ashai ngarai tsantsii ka ümtincho na saüli wa mithii haü? 15 Dan chela maq aki tsasoqtibi nai Ephraim wang kin tonglong hiq maq aki tsasoqtibi kong raq tsütsa abi ka tiitai kuqtlo. 16 Tsangshiq ka maiq mung thun kiimaq Jerusalem ma re kong thun ka maiq mung luhea wa aki saühotlo nguta honkam tsasoqkai saükito. Arthun re kong saühotlaq ariiraq Juda mung na chela thun kra bokwan miitu migitrang wan. 17 Kiimaq tsangshiq raq Jerusalem ka trotam maq wakkheti raq khetlaq ikha mikom wan. Jamkhano ngukla Jerusalem chelati raq Tatiwe kiq khiiwanto. Arka Tatiwe raq ngutlo. 18 Juda lei, arka ümniiraq ümkhu thaq na, ümrilung na ümchap ümnga maq kiimaq ümjaq sham ümkai wa maq niq wan laü ahata. Ümngarai ma phong kra tham she ara chamchao ara saü wanto. Ümchaü sanha jasai maq üm mongpo na tiiphok ra she shokto. Jeremia Ka Anok Miitu Hoqsiqtlo 19 Atsi! Ngi raq atsi ka ninlot mang she! Imongjii le! Imongjii wiita bun wanto! Ngi ka kaiqshak ngalot mang; Ngi raq nüchhong lerong thun tsü trang kiimaq reriikhat rüriiq trang taikang. 20 Phanshi then wan jai, phanshi mithen wan; mung ka hiq maq hutse tiithenbaiqto she. Tiidongchhaq miili nashiq tombutiip thun ka tiithenbaiqto; khetuk chang thun ka bunlak buncha chaibaiqto. 21 Ümtincho na saüli wa ngi raq redong ara miliisiqha kiimaq nüchhong lerong thun tsütrang phoktlaq kra mitaisiq hata? 22 Tatiwe raq ngutlo, “Isenginok ka maiqjiq angikong; tsangshiq raq ngi sap mak. Tsangshiq ka nosere maiqjiqse kong ikha; tsangshiq raq takmak. Tsangshiq ka abi kiimung lam na siimakong, shatmaq jaqsham ahea phan sham ka sapmak.” Jeremia Raq Mungthen Riisham Makchhi 23 Ngi raq hiqraikhü na liikang, shaqmii maiqsi chang riimak; ra nü na liikang, rawiili ahü riito. 24 Ngi raq pumthun kiina liikang, kriithun ka atiikhai raitlo, kiimaq kin thun ka kona riijo kona riijo tiimetlo. 25 Ngi raq maiq ka kiijaq ahü chhikang; wushi kong min wiita apin riiwanto. 26 Hiqpo hiqwin mung ka kumtsaiphii phong miishe jakito; kra mung wa chela thun ka wiita athenkai kun she, Tatiwe tsankhiq henghea kha na. 27 (Tatiwe raq nguto, mangjong hiq tlotli ka, rumnyangkhi kumtsaiphii ma mijaki. Shatmaq apaiq raq klang maq tiimiqchup langlang kla tiithenbaiq mak miraq.) 28 Hiq raq majo mihoq; ra ka anyaq mirki. Tatiwe raq nguto, kiimaq apaiq raq atsantsii ka klaimak. Apaiq raq athapthi wan kun she kiimaq thongshi jai na jang mak. 29 Kumrang thaq na chaoti phenlabi, nai liq witinok thun saksok laqsaq trang kra tai raüta maiq thun wiita apin ajin mijutrang. Maiq wiijam ka rum na miju, wiijam ka long raqkhong na mitiipaü ju. Chela thun wiita maiq ahü siirai miraq, kiimaq kra chela thun na maiq ka jumin siwa nong mak she miraq. 30 Jerusalem lei, ümniika miqlaü she! Jam nguto kheashii miirii maq tiimiikhiiq tlaü? Jam nguto longseng laktum lak tlaü, laüta ümmak na rong maq nyat tlaü? Ümkhum tiitsomrom rattlaü ka atuli! Ümkongtiwetiim raq ümniika miimbaiqto she, kiimaq tsangshiq raq ümniika atseabaiq tantlo. 31 Ngi raq maiq nyung no wüchhitsi ma hantlaq ikha aho taikang, ase chhikhu do akhing na siiraitlaq ikha. Kriika Jerusalem hotlo, atsitsü pit wan kiita ajaq wiinai ka ra na tiipii raüta ngutlo, “Ngi ha miqkang she! tsangshiq ka ngi tsea wa watlo!” |
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
Bible Society of India