1 Samuel 2 - Bibl Koad 21: Ar Bibl e Brezhoneg evit ar Vretoned

Pennad 2

¹ Neuze Anna a bedas hag a lavaras: Va c'halon a laouena en AOTROU , va c'horn a zo savet gant an AOTROU , va genoù a zigor a-enep va enebourien, dre ma'z on laouen ez silvidigezh.

² Nikun n'eo santel evel an AOTROU , n'eus hini all ebet nemedout, n'eus roc'h ebet evel hon Doue.

³ Na lavarit ket kement a gomzoù rok. Ra ne zeuio ket komzoù balc'h eus ho kenoù, rak an AOTROU eo un Doue a anavez pep tra, ha gantañ eo pouezet an oberoù.

⁴ Gwareg ar re c'halloudek a zo torret, hag ar re sempl a zo gourizet gant nerzh.

⁵ Ar re o doa o gwalc'h a zo feurmet evit bara, hag ar re o doa naon o deus paouezet. Ar vaouez gaonac’h zoken he deus ganet seizh, hag an hini he doa kalz mibien a zo diflaket.

⁶ An AOTROU a ra mervel hag a ra bevañ. Eñ a ra diskenn d'al lec'h ar marv hag a ra da zont er-maez.

⁷ An AOTROU a baoura hag a binvidika. Eñ a izela hag a uhela.

⁸ Adsevel a ra ar paour eus ar poultr, tennañ a ra an ezhommeg diwar an teil, evit e lakaat da azezañ gant ar briñsed, hag e ro dezo da hêrezh un tron a c'hloar. Rak peulioù an douar a zo d'an AOTROU , ha lakaet en deus warno ar bed.

⁹ Diwall a ra treid e re garet-mat, met ar re fall a zo dilavar en deñvalijenn, rak an den ne greñvaio ket gant e nerzh e-unan.

¹⁰ Enebourien an AOTROU a vo bruzunet, eus an neñvoù e ra kurunoù warno. An AOTROU a varno ar pennoù pellañ eus an douar, reiñ a raio nerzh d'e roue, hag e savo korn e olevad.

¹¹ Hag Elkana a yeas d'e di da Rama, met ar bugel a chomas e servij an AOTROU dirak Eli an aberzhour.

¹² Hogen mibien Eli a oa tud fall. N'anavezent ket an AOTROU .

¹³ Setu amañ giz an aberzhourien-se e-keñver ar bobl: Pa rae unan bennak un aberzh, servijer an aberzhour a zeue pa veze lakaet da verviñ ar c'hig, o kaout en e zorn ur fourchetez tri biz,

¹⁴ hag e pike e-barzh ar chaodouron, pe ar gaoter, pe ar pothouarn, pe ar pod. An aberzhour a gemere evitañ kement a save ar fourchetez. Evel-se e raent e-keñver holl re Israel a zeue di, da Silo.

¹⁵ Zoken a-raok ma veze lakaet al lard da leskiñ, servijer an aberzhour a zeue hag a lavare d'an den a aberzhe: Ro kig da rostañ evit an aberzhour, rak ne gemero ket diganit kig bervet, met kig kriz.

¹⁶ Mar lavare dezhañ an den: Ra vo lakaet al lard da leskiñ, ha goude-se e kemeri ar pezh a fello dit, neuze e lavare: Nann! Reiñ a ri bremañ, anez me a gemero dre nerzh.

¹⁷ Ha pec'hed an dud yaouank-se a voe gwall-vras dirak an AOTROU , rak disprizañ a raent prof an AOTROU .

¹⁸ Samuel a servije dirak an AOTROU , ar bugel a oa gourizet gant un efod lin.

¹⁹ E vamm a rae dezhañ ur vantell vihan a zegase dezhañ bep bloaz, pa bigne gant he gwaz evit kinnig an aberzh-bloaz.

²⁰ Eli a vennigas Elkana hag e wreg o lavarout: Ra roio an AOTROU dit bugale eus ar wreg-mañ, evit ar prest he deus graet d'an AOTROU . Hag e tistrojont d'o c'hêr.

²¹ An AOTROU a weladennas Anna, a goñsevas hag a c'hanas tri mab ha div verc'h. Ha Samuel yaouank a greske e-kichen an AOTROU .

²² Eli a oa gwall gozh, hag e klevas kement holl a rae e vibien da holl Israel, ha penaos e kouskent gant ar maouezed en em zastume ouzh dor teltenn an engalv.

²³ Hag e lavaras dezho: Perak e rit traoù evel-se? Rak klevout a ran, a-berzh an holl bobl, hoc'h oberoù fall.

²⁴ Na rit ket an traoù-se, va mibien. Ar vrud a glevan n'eo ket mat, lakaat a rit da bec'hiñ pobl an AOTROU .

²⁵ Mar pec'h un den a-enep un den all, Doue en barno; met mar pec'h unan bennak a-enep an AOTROU , piv a bedo evitañ? Met ne sentjont ket ouzh mouezh o zad, rak an AOTROU a felle dezhañ o lakaat d'ar marv.

²⁶ Ha Samuel yaouank a greske hag a blije d'an AOTROU ha d'an dud.

²⁷ Un den Doue a zeuas da gavout Eli hag e lavaras dezhañ: Evel-henn e komz an AOTROU: Ha ne'm boa ket en em ziskuliet da di da dad pa oant en Ejipt e ti Faraon?

²⁸ E zibabet em eus a-douez holl veuriadoù Israel, evit bezañ va aberzhour, evit kinnig war va aoter, evit lakaat da vogediñ ezañs, evit dougen an efod dirazon, hag em eus roet da di da dad an holl brofoù graet dre an tan eus mibien Israel.

²⁹ Perak hoc'h eus pellaet gant taolioù-treid va aberzh ha va donezon am eus gourc'hemennet d'ober em chomlec'h? Hag ec'h eus enoret da vibien muioc'h egedon, evit en em lardañ gant ar gwellañ eus donezonoù Israel va fobl?

³⁰ Setu perak e lavar an AOTROU Doue Israel: Disklêriet em eus e kerzhje da di ha ti da dad dirazon da viken. Met bremañ e lavar an AOTROU: Pell diouzhin! Rak enoriñ a rin ar re a enor ac'hanon, met ar re am dispriz a vo disprizet.

³¹ Setu e teu an deizioù ma troc'hin da vrec'h ha brec'h ti da dad, en doare ma ne vo den kozh ebet ez ti.

³² Hag e weli un enebour em chomlec'h, e-pad ma kaso Doue pep seurt madoù da Israel, ha ne vo biken den kozh ez ti.

³³ An hini eus da re na'm bo ket lamet eus kichen va aoter, a vo evit glac'hariñ da zaoulagad hag enkreziñ da ene, hag holl vibien da di a varvo en oad-gour.

³⁴ Hag ar pezh a c'hoarvezo gant da zaou vab, Hofni ha Fineaz, a servijo da arouez dit: mervel a raint o-daou d'an hevelep deiz.

³⁵ Me a lakaio din un aberzhour feal, unan hag a raio hervez va c'halon ha va ene. Hag e savin dezhañ un ti padus, hag e kerzho dirak va olevad da viken.

³⁶ Ha piv bennek a vo manet eus da di a zeuio da stouiñ dirazañ, evit kaout ur pezh arc'hant hag un tamm bara, hag e lavaro dezhañ: Laka ac'hanon, me az ped, da vont en unan eus kargoù ar velegiezh, evit debriñ un tamm bara.