Biblian jiskʼa tʼaqanakapa Qullan Ajayutwa parli

Suyt'añamas utjascaraquiniwa, jan cuna ajjsarasaw jacasiraquïta, Diosan uñjataw jan cuna ajjsarasa ict'asiraquïta.

Aca orakenquir kamirinacarojj sañamawa: “Jan jach'a jach'a tucupjjamti” sasa, janiraqui kamir cancañaparus alcatasipjjpati, ucanacasti tucusiriquiwa. Ucat sipanjja jacquiri Diosaru catuyasipjjpan, qhititejj take cunsa jilarquir churquistu cusisit jacañasataqui ucaru.

Israel marca, Tatituruc suyt'am, jichhasa, wiñayasa.

Yupaychañäni Diosaru, Jesucristo Tatitun Awquiparu, jupasti jach'a qhuyapayasiñap laycuwa jiwasarojj machakat naciyistu, Jesucriston jiwatanac taypit jactatap toke. Ucasti jiwasanacarojj suyt'añanwa jacayaraquistu,

Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.

Tatay, jumaw nayan suyt'añajjätajja, wayna cancañajjatpach alcatañajjätasa.

Jichhasti, Tatay, ¿cuna suyt'añajjarac utjisti? Jumaquiw nayan suyt'añajjätajja.

Nayajj Dios sapanac samarañ jicjjatta, suyt'añajjajj jupat juti.

Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.

Almajjay, ¿cunatarac llacthapistasti?, ¿cunatarac ajjsarthaptasti? Diosaruc suyt'am, wasitat jach'añchjjäta: ¡Jupaw cusisiñajjasa, Diosajjasa!

Tatitusti iyawsirinacaparojj sum uñjasqui, qhuyapayasiñap suyt'irinacarojj imasquiwa,

ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.

Khespiyäwim suycasaw tucusiscta, arunacamaruw take chuymamp iyawsta.

Jan yäkat jaken amtäwinacapat larusipjje, ucampis Tatituw jupanacarojj imasqui.

Tatay, nayar khespiyañam suyt'ascta, arunacamarjamaw sarnakta.

Tatitur suyt'irinaca, ch'amañchasipjjam, jan ajjsarir chuymanïpjjaraquim.

Uca urunsti sataraquïniwa: “Acapi jïwasan Diosasajja, juparuw iyawstan, juparaquiw jiwasarojj khespiyistu, cusisipjjañäni, c'uchirtasipjjaraquiñäni, jupaw khespiyistu.”

Diosarojj maytwa jumanacar amuyt'ayañapataqui, cawquïri suyt'äwitaquitejj jawsquistu uc yatipjjañamataqui, cunja muspharcaña jach'a herenciatejj Diosajj churqui jupanquirinacaru uc yatipjjañamataquiraqui,

“¡Tata, khespiyasiñamwa suyt'ascta!

Ucataquiraquiw irnaktan, uqhamarac toketas t'akhesiwaytan, jacquiri Diosaru suyt'äwis uscutas laycu, cawquïritejj takenin Khespiyiripäqui, juc'ampis qhitinacatejj jupar iyawsapjje ucanacana.

Suyt'añanjja cusisitaquïpjjam; t'akhesiñanaca utjipanjja llamp'u chuymanïpjjaraquim. Janirac Diosat oracionan mayisiñjja armasipjjamti.

Tatituru jach'añchiri jakensti take chuyma jupar suyt'añaw utji, uqhamarac wawanacapas Tatitun imatäniwa.

Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.

Ucatpï nayan chuymajjajj cusisiñan phokt'atajja, ucatsti cusisiñ arunac parlaractjja. Ucataracwa janchejjas Diosar catuyat samarani.

Jiwasan Cristor suyt'añasatejj aca oraken jacañasataquiquïchejja, take jakenacat sipansa wali llaccañätanwa.

Israelan suyt'äwipa, jan walt'aña horasanacan nanacar khespiyiri, ¿cunatsa nanacataquejj mä jaya jakëcasmas uqham tucta, thaqui sarir jakejj mä jayp'u ict'awayi uqhama?

Nayasti yatiractwa cuna amtäwinacatejj jumanacataqui utjquitu ucanacjja, uca amtäwinacasti jumanacan asquinacamataquiwa, janiw jumanacan jan walt'apjjañanacamataquïquiti, uqhamat khepa urunacanjja wali suma jacasipjjañanacamataqui, suyt'añanacansa phokhantataraqui. Naya Tatituw ucjja arsta.

Jacobon Diosapan yanapat jakejj cusisiñaniwa, Tatitu Diosapar suyt'irejj cusisiñaniwa.

Jupaw alajjpach acapach luri, lamar kotarusa, take ucan utjirinacarusa. Jupajj arsutap phokhapuniwa.

Cunapachatejj Tatitojj jach'a arupa Sión kolluna, uqhamarac Jerusalenan ist'asiyi ucqhajja, alajjpachas, acapachas qhathatiwa. Ucampis Tatitojj israelitanacan arjjatiripawa, jupanacajj marcapäpjjatap laycu.

Nayasti sasiractwa: “Nayataquejj Tatituquiw take cunajja; ucatpï juparu iyawsaractjja” sasa.

Almajjay, ¿cunatarac llacthapistasti?, ¿cunatarac ajjsarthaptasti? Diosaruc suyt'am, wasitat jach'añchjjäta: ¡Jupaw khespiyirejjasa, Diosajjasa!

Dios Tatay, jumaruquiw nayajj suyt'sma, jumaquiy nayarojj ist'ita;

Jiwasanacajj Ajayu toke, uqhamarac iyawsañ toketaracwa, Diosan nayrakatapan catokatäña suyt'äwisajj utjistu.

khantatiw arojjarojj ist'tajja, willjtaw llaquejj yatiyasinsma, nayasti ist'añam suyascta.

Uqhamasti, Israel marca Diosamar cuttanjjam; chekpach chuymamampi asquimpiraqui sarnakam, ucatsti Diosamarupuni iyawsaraquim.

Iyawsañajja: “Catokäwa” sas take chuymampi suyt'ctans ucawa, uqhamarac chekpachapuni iyawsañasa cuntejj jan uñjtan ucajj chekätapa.

Take qhititejj acanac Jesucristotjja suyt'qui ucajja, jupa pachpawa k'omachasi cunjämatejj Tatit Jesucristojj k'omäqui uqhama.

Nayasti jumaruquiw suyt'ascäma, juc'amp jach'aruw aptäma;

Nayajj Tatituruw takpach chuymajjamp suyt'äyäta: jupasti naya toker alt'anisin arnakasitajjar ist'i;

Ucampis nayajj Tatituruquiw suyt'ä, khespiyiri Diosajjaruquiw take confiansajja uscusiraquï, jupasti nayarojj ist'itaniwa uca laycu.

¡Jumanacasti, suyt'äwinacam jan chhaktayasiri preso, cutt'jjapjjam sayt'asiñ chekanacamaru! Sapjjsmawa nayasti bendición churapjjäma pä ucqhampi t'akhesitanacamata.

Tatay, jumaruw art'asinsma, jumaruw saracsma: “Jumätaw nayan imantasiñajjajja; jumaquiw aca jacañ oraken take cunajjätasa” sasa.

Takpach almajjampiw Tatitur suyt'ascta, takpach chuymajjampiw arunacapar iyawsaracta.

ucatsti tucuyamajj sumäniwa, suyt'äwimasa janiw t'unatäcaniti.

Janiraquiw ucaquïquiti, jan ucasti t'akhesiñansa cusisiractanwa, uqhamatwa yatiractanjja t'akhesiñajj llamp'u chuymanïña yatichatapa.

Uqham llamp'u chuymanïñasti mä sumaruw jiwasarojj mistuyistu, uqham sumar mistuyatäsinsti suyt'añaw utjistu.

Uca suyt'äwinsti janiw cuna mayjt'añas utjquiti, Diosasti jiwasan chuymanacasarojj munasiñapwa phokhantistu Kollan Ajayu churquist uca toke.

Ucampisa nayajj mayatwa amtasiñ munta, ucaruw suyt'aña munaracta.

Tatitun munasiñapasti, qhuyapayasiñapasa jan tucusquiriraquiwa.

Sapärmanthiw machakar tucuraqui, ¡cunja jach'as Tatitun chekapätapajja!

Jupanacaruw Diosajj aca imantatjja uñacht'ayaraqui, cuna kamir cancañatejj Diosan utjqui jan judiöpquis uca jakenacaru. Imantäwisti Jesucristojj jumanacancqui ucawa, juparaquiwa cuntejj catokapcäta uca suyt'äwisa.

Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,

Tatiturupun iyawsapjjam, jupaw jiwasan wiñay arjjatirisajja.

Tatitusti iyawsirinacaparojj sum uñjasqui, qhuyapayasiñap suyt'irinacarojj imasquiwa,

jiwan amparapat jupanacar khespiyañataqui, mach'a pachanacan chuymachañataqui.

Tatiturojj arpamp chic yuspagarapjjam, sutipar k'ochupjjaraquim;

Jiwasanacajj Tatituruw take chuymamp iyawsapjjtan: jupaw arjjatirisajja, jarc'akerisasa.

Jupampiw chuymanacasajj cusisi, kollan sutiparuw take chuymamp iyawsapjjtan.

Tatay, qhuyapayasiñamajj nanacjjar purinpan, camisatejj jumat suyapcsma uqhämarjama.

Tatitur takpach chuymamp iyawsam, ch'amañchasim, jan ajjsaramti, ¡Tatitur takpach chuymamp iyawsam!

uqhamarac wiñay jacañ suyt'äwirusa. Uca jacañ churañataquejj Diosajj janïr aca orake kalltasquipanwa phokhañataqui arsuwayi, Diosasti uc arsusajj janiw c'arisquiti.

Ucatwa janipuni nanacajj mayjt'asipcti: Janchinacajjajj sapürusa aynacharus sarjjchi ucasa, ajayunacajjajj sapürutjamaraquiw machakar tucusqui.

Cuntejj aca oraken t'akhesipctan ucanacajj janiw cunäquisa, tucusiriquiwa. Ucat sipan mä jach'a asqui jilarquirir wiñay cusisiñwa apaniraquejja.

Janiraquiw jiwasajj cuntejj uñjctan ucar chuymjja churctanti, jan ucasti cuntejj jan uñjctan ucaruwa catuyasipjjtanjja. Cunatejj uñjasqui ucanacasti tucusiriquiwa, ucampis jan uñjasqui ucanacasti janiw tucusirïquiti jan ucasti wiñayataquiwa.

Ucampis jiwasanacajj urunquirjamajja, amuyasiñasapuniwa. Jarc'akasiñasawa iyawsañampi, uqhamarac munasiñampi, khespiyasiñataqui suyt'añajj mä cascjamawa p'ekesaru imantañapajja.

Jan wali yatiyäwinacarojj janiw ajjsarquiti, chuymapajj Tatituncasajj wali thurt'atawa.

Jumaw arjjatirejjätajja, imantasiñajjätasa, jumaw khespiyirejjätasa, Diosajjätasa, nayar imantir karkajjätasa, imir jarc'akasiñajjätasa, khespiyir ch'amajjätasa, wali amstanquir imantasiñajjätasa.

Uca tiempojj jumanacajj jan Cristonïsipcäyätawa, Israel marcatsti jayanraqui, Diosan arust'äwinacap jan uñt'asina, aca orakenjja jan cuna suyt'añani, jan Diosaniraquiw jacasipcäyätajja.

Ucampis jichhajj Cristo Jesusampejj mayaquëjjapjjtawa. Nayrajj jayancapjjäyätawa, jichhajj Criston jiwatap laycuw jac'ancjjapjjtajja.

Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.

Nayranacajjampiw kollunac uñatatta: “¿cawquitarac yanapast nayatac jutani?” sasa.

Yanapajj Tatitut nayatac jutani, alajjpach acapach lurir Tatituta.

Takpacha marcanacaraquiw juparojj iyawsas suyt'apjjani.”

Tatitur takpach chuymamp iyawsirinacajj jan onjjtcayäpjjewa; Sión kollur uñtatäpjjewa, wiñayataquiw sayt'asipjje.

Takenin nayranacapaw jumarojj uñch'uquisipctam, jumaw waquisitarjam mank'añ jupanacar churtajja.

Jumaw amparam lokatattajja, take jaquirinacarusti asquinac jilarquir churtajja.

Uqham suyt'äwi laycuquiwa khespiyatätanjja, ucampisa maynitejj uñt'chi cuntejj suyasqui ucjja, ucasti janiw suyt'añäcjjeti, jupan uc uñj-jjatap laycu.

Ucampis cuntejj suyapctan ucjja janiw uñjctanti, ucampis llamp'u chuymampiw suyt'apjjañasa.

Uca suyt'äwiw sum catjjäsistu uqhamarac almasa uñjaraqui, cunjämatejj anclajj mä barcorojj catjjäsejja uqhama. Jiwasan utjquistu uca suyt'äwejj alajjpach templon cortinap khepäjjan suma acht'ayatawa,

Uqhama misq'jamäniwa jumataquejja yatiñ cancañasa, uñt'añasa; jumatejj ucanac jicjjatäta ucajja, suma tucuyäwi jicjjatäta, ucatsti suyt'äwimajja janipuniw tucjatäcaniti.

Nayajj Tatituruw takpach chuymajjamp suyt'äyäta: jupasti naya toker alt'anisin arnakasitajjar ist'i;

Asqui cancañamat arsuñjja, janiw chuymajjar imantcti, arsutam phokherïtamampita, khespiyäwimampit yatiyta, jach'a tantachasïw taypinsti, janipuniw qhuyapayasiñamampita, asqui cancañamampit amuct'cti.

Tatay, janiquiy chuymam nayatac jist'antasimti, qhuyapayasiñamamp asqui cancañamampejj imapunitpan,

jan jact'cay llaquinacaw muyuntitu, juchanacajjaw jatjjattitu, janiw ucanac jact'irjamäcti; pachpa juchanacajjaw catuntitu, juyqhur uñtataw jicjjatasta. P'eke ñic'utajjat sipan juc'amp jilawa, ch'amasti pist'araquituwa.

Tatay, nayar waytir jutaquimaya, Tatay, janc'aquiy nayar yanapt'irejj jutam;

nayar jiwayañatac thakerinacajj, p'enkpun atipjayasipjjpan; nayar ñankha lurañ amtirinacajj, mä p'enk jaltapjjpan;

nayat larusir jakenacajj, p'enkapat jaltjjapjjpan.

Jumar thakerinacasti cusisipjjpan, jumamp chic larusipjjpan; khespiyäwimar munirinacajj arsupjjapunpan: “Tatitojj jach'a ch'amanipuniwa” sasa.

Tatay, nayajj jan cunanïtwa, llaquitaraquïtwa, janiquiy nayat armasistati; jumaw nayan arjjatirejjätajja, khespiyasiñajjätasa: ¡Diosajjay, janc'aquiy jutam!

jiwañ p'iyat waysusitu, mic'ayar jalantquiriruw khespiyitu; karka patjjaruw cayunac tact'ayitu, tact'añajjaruw ch'amañchi.

Machak k'ochu lacajjar uchitu, Diosajjar yupaychañ k'ochu. Uc uñjasajj waljaniw chuym ch'alljjtayasipjje, Tatiturusti take chuymampiw iyawsapjje.

Takpach chuymajjampiw Tatitur jach'añchä, takpach chuymajjampiw kollan sutip jach'ar aptä.

Janiw jucha luratasarjam t'akhesiyquistuti, janiraquiw juchanacasatjam mutuyquistuti;

camisatejj alajjpachajj oraket jayanquejja, uqhämaw munasiñapajj arquirinacapataquejja;

camisatejj inti jalsut inti jalantcam wali jayajja, uqhäm jiwasanacat juchanacas jayarst'ayistu.

Cunjämatejj mä awquejj wawanacapat qhuyapayasquejja, uqhamaw Tatitojj iyawsirinacapat qhuyapayasi;

jupajj jiwasanacan lak'ätas yati, ñek'it luratäpjjatas yatiraqui.

Jaken jacañapajj korar uñtataquiw uñsti, pankarar uñtataquiw pankarsu:

ch'aman thayamp jalarayatajj chhaktjjewa, janiraquiw qhitis mayamp uñjcjjeti.

Tatitur wakaychirinacataquisti munasiñapajj wiñayawa, asqui cancañapajj allchhin allchhipataquis utjascaquiwa:

arust'äwiparjam sarnakerinacataqui, arsutanacaparjam phokherinacataqui.

Tatitojj alajjpachan reyi konuñap utt'ayasi, ch'aman cancañapajj alajjpach acapach apnake.

Takpach chuymajjampiw Tatitur jach'añchä, janiw qhuyapayasiñapat armascäti.

Tatitur jach'añchapjjam: angelanacapa, arsutanacap phokherinaca, arupar janc'ac jaysirinaca.

Tatitun alajjpach tamanacapa, jupar jach'añchapjjam, munañap phokher loktirinacapa, jach'ar aptapjjam.

Takpach luratanacapa, Tatitur jach'añchapjjam, jupan apnakat orakpachan jach'ar aptapjjam. ¡Takpach chuymajjampiw Tatitur jach'añchä!

Tatituw takpach juchanacajjat pampachitu, jupaw take usunacajjat c'umarachitu;

jupaw amay imäwit khespiyitu, juparaquiw munasiñamp qhuyapayasiñamp phokt'itu;

Tatituw asquinacamp cusisiyitu, pacar uñtat machakar tucuyaraquitu.

“Jan jumanacajj llaquisipjjamti. Iyawsapjjam Diosaru, nayarus iyawsapjjaraquita.

Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.

Jacobon Diosapan yanapat jakejj cusisiñaniwa, Tatitu Diosapar suyt'irejj cusisiñaniwa.

Ucatwa take acanacjja t'akhestjja. Ucampis acatjj janiw p'enkascti, nayajj yattwa qhitirutejj iyawscta uca, yatiractwa jupajj ch'amanïtapa qhä urucama nayaru cuntejj catuyquitu uc imañataquejja.

Utjistuwa Diosar iyawsañasajja, yatiractanwa cuntejj Diosarojj mayiñäni munañaparjama ucjja jupajj ist'istuwa.

Cunjämtï yattanjja Diosajj oracionanacasarojj ist'istuwa, uca pachparaquiw yattanjja cuntejj mayctanjja ucajj niyaw utj-jjestu.