Hebreus 11:8 - Kaxinawá Bíblia (BR) Ha inũ, Abraãonẽ Deus ikũwãkĩ txibãkubainaiwẽ taea Deus habe haria yubakakatsi ikĩ Deusũ kena hawa hẽ iyamama ikũwaĩwẽ taea hawẽ mae henei tashnikaini hani kai unãmabia ha mai pakea betsa anu Deusũ inãshanai anu kanikiaki. Kashinawa : Diosun Jesúswen taexun yuba bena yiniki Ja inun, Abrahamnen Dios ikunwankin chibankubainaiwen taea Dios jabe jadia yubakakatsi ikin Diosun kena jawa jen iyamama ikunwainwen taea jawen mae jenei taxnikaini jani kai unanmabia ja mai pakea betsa anu Diosun inanxanai anu kanikiaki. |
Hanushũ Tera Abrão inũ hawẽ aĩ Sarai inũ hawẽ berẽ Ló iyui Caldéia mai pakea anua hawẽ mae Ur kaĩkaĩkĩ henebaini Canaãkiri kakũkaini atimas mae pepa betsa natiã hawẽ kena Harã anu hikitã hawẽ bake debuniwẽ taeshũ mae kenakĩ: “Harãki”, atã hanu hiweaibũ
Senhor Deusũ Abrão nitxiã kashiã yuikĩ: “Na mai pakea hirabi minabu pakubainaibu ibu wamakĩ ẽ hatu inanũbariaii”, aka ma hanu ana haki nukuawẽ taeshũ Abrão Senhor Deus kẽwanũ, iwanã, mishki txi tapu wakĩ mishki itxawakĩ maspu watã hanu txiwẽ kuakĩ txashuwã bake bene pepa teshteshũ himi haba watã hanushũ menukĩ keyukĩ Senhor Deus kẽwanikiaki.
ana tashnimabaĩ hemaĩtĩ Abrão iyushũ Senhor Deusũ yuikĩ: —Nai beiskĩ bishi tanawe. Mĩ tana keyutirumaki. Habiatiri minabu pakubaini haskanũbarikanikiki— aka
Canaã na hanu mĩ ikarã, mai pakea hirabi hanu mĩ hiwearã, habiari mia inũ minabu ẽ hatu ibu wamashanaii, inãkĩ yunukibi yunukinã. Mĩ mawakẽ ẽ hatũ mekenika Deus ipakeshanaii, hatu merabewanũ ikarã— iwanã,
Ha dikabi ẽ epã enabu anua Deusũ ea iweaya ẽ aĩ yuikĩ: “Ea duawakĩ ea mekekĩ hanira betsabu anu hikishũ hatu yuikĩ: ‘Ẽ puiki’, akĩ hatu ea yuishũshãwẽ”, ẽ waniki— ikaya
Ẽ mia yunushina mĩ ea ashũshuwẽ taeshũ minabu katushũ hatuwẽ nawa betsa betsapa mae hirabi anu ẽ hatu duawakubaĩshanaii”, akĩ Senhor Deusũ ea mia yuimashuki— aka
Bari huaikiria ha shanẽ ibuhaira Cirõ nawa shukuabu tibi maemakubaĩmisrã, tsuã yunumakĩ amakubaĩmismẽ? Ha nawa shukuabu tibi hatũ shanẽ ibu babu watã hatu tsuma wamakubaĩmisrã, tsuã amakubaĩyamamẽ? Hatũ matxatu txaipa inũ hatũ kanũ piayabis tekekĩ mesi watã petxux sa akawakinã, tsuã hatu amakubaĩyamamẽ?
Mai pakea betsa betsapa anu nawabu tibi anu matu iyunibu anua matu ana ikĩ itxawashũ matũ mai pakea anu ẽ ana matu txĩtũmashanaii, hanu mã ana hiwei bushanũbunã.
Haskawẽ taeshũ Jesus Cristo ẽ ikũwãniwẽ ea duawakĩ Jesusũ kuxipaya Deusũ ea wanikẽ yura betsa betsapa tibitũ hau habũri Jesus Cristo nĩkatã txibãkĩ kẽwãshanũbũ hawẽ daya ashũkĩ ẽ hatu tapĩmakubaunaii.
Haskabianikẽ Isaíasĩ yuikĩ: “Shanẽ Ibu Yavé Hiweatuũ, mirimabu mikiri nũ hatu yusĩa nukũ hãtxa nĩkatã danãkanikiki”, itã keneni keskai nukũri mirimabu Deusũ kakape Cristokiri nũ hatu yusĩa nĩkabiakĩ ikũwãbumariki.
Ha dukũ txakabũ matu tsumawakĩ taewaniki. Hanushũ Deusũ matu merabewaya nũ matu yusĩkubaina nĩka pewatã matũ huĩti hirabiwẽ matu yusĩaĩbu mã ikũwãniki. Natiã ana txakabu dayashunama hanua kaĩkaĩ Deus dayashũkĩ pe besti mã ashũkubainaii. Matu mã haskai nĩkai huĩti xinã txãkãkĩ Deus ẽ kẽhairawakubainaii.
Haska inũ, haska Deus danaĩ unãnepabũ xinãmis hawauma wakĩ Deus nũ hatu unãmakatsis ikaii, hatũ txakabu beshteketã xinã betsatã hau Cristo txibanũbunã.
Betsabũ Deus ikũwãkĩ shanẽ ibu betsabũ mae mebinibukiaki. Betsabũ Deus ikũwãkĩ hatũ mae anu shanẽ ibukĩ hatu pe hiwemakubainibukiaki. Betsabũ Deusũ yubaka hãtxa ikũwãkĩ Deusũ kuxipa bitã hatuna wakubainibukiaki. Betsabu inu pubẽbu anu yunukĩ hatu bitxiabu Deus ikũwaĩwẽ taeshũ hawẽ kuxipawẽ Deusũ hatu nemashuna habu piama inikiaki.
Haskai pepakũkaini hawẽ besti hiwekuĩa bi nũ hawẽ pashatirubu nuku ishuĩ ha besti bai ikibi iniki, nũ habũ ikũwãkĩ txibãshanaibu nuku ishuĩnã.
Haskai hiweabũ Henewã Eufrates kesha anu hiwebiakẽ matũ shenipabu Abraão besti katubirãkĩ iwenishũ Canaã nawabũ mai pakea anu hiwemakubaũkĩ hawenabu hau pahairashanũbũ hawẽ huni bake Isaque ẽ inãniki.
Mã ma haskawẽ taea natianã, Deusũ kakape Jesuskiri nĩkatã ha hãtxa txanima txibaĩ mã ma meribi pepabuki. Haskakubaĩkinã, ikũwaĩ betsabube abuname kayabikubaĩkãwẽ. Haskakĩ matũ huĩti hawa txakabu hayama inũ matũ kuxipa hirabiwẽ betsabu merabewai hatuwẽ nui abunamei hatube duanamepakekãwẽ.
Aĩbu beneyabuũ, maturi yuinũ nĩkairakãwẽ. Matũ benẽ matu yunua nĩkatã habebis yununamei hẽ iyamama ashũkubaĩkãwẽ. Haskakĩ hatiritũ matũ benẽ Deusũ hãtxa ikũwãriama duawai mã pepakũkainai matu uĩkubaĩmiswẽ taeshũ hãtxawẽsma mã pepawamiswẽ matũ bene bestibu Jesus mã ikũwãmatiruki,
Jesus Cristo ikũwaĩ nũ hawenabuwẽ taeshũ natiã bika betsa tibi memakĩ nuku tenemakubaĩkanikiki. Haska nũ tenebiamiskẽ Jesus ana huaya habũ Deusũ kakape danãmisburã, habu Deusũ kupiarã, haskarara Deusũ hatu kupiaitiã yumãkĩ tenetxakayamashãkanimẽkaĩ?