Gênesis 11 - Kaxinawá Bíblia (BR)

Babel anushũ hiwe keyatapahaira waibu Deusũ hatu kupikĩ hatu pashkanikiaki, na hãtxarã

¹ Hanua eskatiã mai hirabi anu pashkariabumahaira yura dasibi hanus hiweabutiã hatũ hãtxa habiãwẽs hãtxapaunibukiaki.

² Bari huaikiri bukubaĩkĩ atimas Sinar anu mai pepaki nukutã bai wati pepa anu hanu maewaima anu pashkariama hiwea

³ yuinamekĩ shinãkĩ: “Ha hiwe wati na mai bawanãwẽ, txi itxapawẽ bawakĩ kushi wakinã”, ishũ hiwe wati mishki yamakẽ mishki keska wakĩ hiwe wati mai bawa mirimawashũ bui txashkawẽ tsamakubaĩkĩ

⁴ ana yuinamekĩ: “Mae ewapa wanãkãwẽ. Hanushũ mae namakis anu hanushũ uĩti hiwe tapaitiya wabaĩkĩ keyatapahaira wakĩ tsamakubaĩkĩ nai merã hikiti wanãkãwẽ, haskawẽ taeshũ dasibitũ hau nukũ uĩti hiwe hawẽrua hau shinãkubaĩshanũbunã. Haskai hiwei mai hirabi anu nũ pashkama ishanaii”, ishũ

⁵ dayakĩ nai anu hikiti keyatapa mai bawa tsamabaĩkĩ taewabainaibũ Senhor Deusũ hatũ daya uĩkĩ

⁶ yuikĩ: “Uiã, dasibi habias yuraburã, hatũ hãtxa habiaski. Ibubis unanepakĩ haska daya taewashũ hamapai sharabu shinãkĩ atirubuki, pepa inũ txakaburã”, iwanã,

⁷ ana yuikĩ: “Hatu anu butushũ hatũ hãtxa pashkanãwẽ, hãtxa betsa betsapaya wakinã. Haskawẽ taea hau ana hãtxai ana nĩkakanãyamanũbunã”, itã

⁸ hatu hãtxa pashkakĩ betsa betsapa wa mai hirabi anu hau pashkanũbũ Senhor Deusũ hatu betsa wa mae ewapa wabiai hatũ daya henebainibukiaki.

⁹ Hanushũ Senhor Deusũ hatũ hãtxa nĩkatima wakĩ itimaska wa shuku tibibaini pashkabainibukiaki. Ha mae anushũ hatu haska wawẽ taeshũ hatũ mae kenakĩ: “Babelki”, anibukiaki, nukũ hãtxawẽ yuiarã: “Hãtxa Betsa Betsapa Hunea Nĩkatimarã”, akinã. Hanushũ Babel mae hirabi anua Deusũ hatu pashkakĩ nitxiã akeakenikiaki, Noé enabu pawakinã.

Semnẽ enabu hatu tanakubainibukiaki, na hãtxarã

¹⁰ Semnẽ enabu pai eska hiwenibu yuiaki. Hiri henẽ hatu atxini ma netsui keyunikẽ 2 ano ka ana binutã Sem 100 bariyatũ huni bake bawaima kaiã kenakĩ: “Arfaxadeki”, ayama

¹¹ hanushũ huni inũ aĩbu bakebu ana hatu bawakubaini 600 ano binua mawanikiaki.

¹² Hanua Arfaxade 35 bariyatũ huni bake bawaima kaiã kenakĩ: “Saláki”, ayama

¹³ ana 403 ano hiwekũkaĩkĩ huni inũ aĩbu bakebu ana hatu bawakubaini 438 ano haya mawanikiaki.

^14-15 Hanua Salá 30 bariyatũ huni bake bawaima kaiã kenakĩ: “Éberki”, ayama ana 403 ano hiwekĩ huni inũ aĩbu bakebu ana hatu bawakubaini 433 ano haya mawanikiaki.

^16-17 Éber 34 bariyatũ huni bake bawaima kaiã kenakĩ: “Pelegueki”, ayama ana 430 ano hiwekĩ huni inũ aĩbu bakebu ana hatu bawakubaini 464 ano haya mawanikiaki.

^18-19 Hanua Pelegue 30 bariyatũ huni bake bawaima kaiã kenakĩ: “Reúki”, ayama ana 209 ano hiwekĩ huni inũ aĩbu bakebu ana hatu bawakubaini 239 ano haya mawanikiaki.

^20-21 Hanua Reú 32 bariyatũ huni bake bawaima kaiã kenakĩ: “Serugueki”, ayama ana 207 ano hiwekĩ huni inũ aĩbu bakebu ana hatu bawakubaini 239 ano haya mawanikiaki.

^22-23 Hanua Serugue 30 bariyatũ huni bake bawaima kaiã kenakĩ: “Naorki”, ayama ana 200 ano hiwekĩ huni inũ aĩbu bakebu ana hatu bawakubaini 230 ano haya mawanikiaki.

^24-25 Hanua Naor 29 bariyatũ huni bake bawaima kaiã kenakĩ: “Teraki”, ayama ana 119 ano hiwekĩ huni inũ aĩbu bakebu ana hatu bawakubaini 148 ano haya mawanikiaki.

²⁶ Hanua Tera 70 bariya huni bake dabe inũ bestitxai hayanikiaki, hatũ kena Abrão inũ, Naor inũ, Harãnã.

Tera enabu eska tananibukiaki, na hãtxarã

^27-28 Tera huni bakebu hati ipaunibukiaki, Abrão inũ, Naor inũ, Harãnã. Harãnẽ huni bake bawaima kaiã kenakĩ: “Lóki”, ani hanua hawẽ epa Tera mawariamakẽ Caldéia mai pakea anua hawẽ mae Ur anua habia kaini anuari ha dukũ Harã mawanikiaki.

²⁹ Harãnẽ ana bake dabe bima aĩbu bake Milca inũ huni bake betsa Iscá inikiaki. Hanua Abrão inũ Naor aĩyãkĩ Abrão Sarai biaya Naorĩ Milca hanubi binikiaki, hawẽ betsa Harãnẽ bakerã.

³⁰ Abrão Sarai mekĩ txutabiakubaina bake biama shãkĩ txakabu ikũkainikiaki.

³¹ Hanushũ Tera Abrão inũ hawẽ aĩ Sarai inũ hawẽ berẽ Ló iyui Caldéia mai pakea anua hawẽ mae Ur kaĩkaĩkĩ henebaini Canaãkiri kakũkaini atimas mae pepa betsa natiã hawẽ kena Harã anu hikitã hawẽ bake debuniwẽ taeshũ mae kenakĩ: “Harãki”, atã hanu hiweaibũ

³² hanua Tera ha mae kenani anua 205 ano haya mawanikiaki.