Gênesis 15 - Kaxinawá Bíblia (BR)

Deus Abrãobe yubakanikiaki, na hãtxarã

¹ Haska waimakẽ ana usha nama keskawẽ Senhor Deusũ hãtxa wakĩ Abrão yuikĩ: —Abrão, dateyamawe. Ẽ mĩ mekenãtũ benimawakĩ ẽ mia duawakĩ ewapa washanaii— aka

² Abrãori yuikĩ: —Senhor Deusuũ, ea merabewakĩ hawa mĩ ea inãtirumẽ, ea benimawakinã? Ẽ aĩ kayabi anua huni bake mĩ ea inaĩsma ẽ hawa hayamaki. Haskakenã, ẽ tsumabu mekenika Eliézer hawẽ mae Damasco anua enabumabiatũ ẽ mawakẽ ena dasibi ibu washaniraka, shanẽ ibukinã— iwanã,

³ ana yuikĩ: —Uĩwẽ. Ẽ aĩ kayabiki mĩ ea huni bake inãmakẽ ẽ tsuma ẽ hiwe anua kainitũ ẽ hamapai dasibi ibu washanikiki, shanẽ ibukinã— aka

⁴ ana Senhor Deusũ kemakĩ: —Haskamaki. Mariastũ mĩ hamapai ibu wama ishanikiki. Hakia huni bake mĩ bawa kaiã ewatã hatũ dasibi ibuai shanẽ ibushanikiki— iwanã,

⁵ ana tashnimabaĩ hemaĩtĩ Abrão iyushũ Senhor Deusũ yuikĩ: —Nai beiskĩ bishi tanawe. Mĩ tana keyutirumaki. Habiatiri minabu pakubaini haskanũbarikanikiki— aka

⁶ Abrão Senhor Deusũ hãtxa nĩkakĩ ikuaĩwẽ taeshũ Senhor Deusũ hakiri shinãkĩ yuikĩ: “Abrão huni txakabuma pepaki”, itã

⁷ ana yuikĩ: —Earã, ẽ Senhor Deuski. Na mai mĩ bĩshanũ mia inãkatsi ikĩ mĩ mae Ur Caldéia mai pakea anua ẽ mia iweniki— aka

⁸ —Senhor Deusuũ, na mai ẽ ibu washanairã, mĩ ea hawawẽ unãti wamakĩ mestẽwãmai ẽ hawẽ unanunã?— aka

⁹ Deusũ ana yunukĩ yuikĩ: —Ina awa yushã babupa 3 ano haya inũ, cabra yushã 3 ano haya inũ, txashuwã bene 3 ano haya inũ, deiwã inũ dei kuru katutã ea beshũwẽ— aka

¹⁰ haska yunua ashũkĩ Abrão Deus kẽwãkĩ inãkatsi katutã yuinaka beshũ tesẽtã habu tibi namakis bais abaĩbaĩshũ kekũbaĩkĩ ukeri hanakĩ ukeri hanakĩ namakis bai tapĩtã hanua peiyabu bais akama tẽyẽshke bestishũ mãtxĩshuna

¹¹ ishmĩ bunikĩ pinũ ika butuaibũ hanushũ Abrão hatu bamaya

¹² hanua bari ma hiki txashakaini meshuaya Deusũ Abrão ushãtxakayama namakĩ uiãyã meshũ atxibirana datehairaya

¹³ Senhor Deusũ Abrão ana yuikĩ: —Minabu eskai hiweshanaibu bebũkiri ẽ mia unãmai nĩkawe. Nawabũ mai pakea betsa anu buabu harishũ hatũ bakebu escravo washãkanikiki. Hatu haska watã harishũ hatu itxakawakĩ 400 ano minabu hatu dayamashãkanikiki.

¹⁴ Hatu haska waibu uĩtã eãri hatu unãti watã ẽ hatu kupishũshanaii. Habũ hatu itxakawaibu nawabu ẽ hatu kupishunaya minabu kaĩbaini pashashãkanikiki, hatũ mabu itxapa bibaini buirã.

¹⁵ Hamẽ mia ikirã, haskariabuma unanuma hiwea anibuhairai mĩ mawa mia maiwabu minabuki mĩ hatuki nukushanaii.

¹⁶ Hakia ha mai pakea anu minabu hikitã hatũ ibuwẽ 4 shenipabu pakea tibi hiwekubainaibutiã habũ bakewakubainaibu ewatã habiatiãri 400 ano binukainaya minabu hari hiwea hatu itxakawabu ẽ hatu pashawa minabu Canaã anu nenu habianuri ana hiwei txĩtũbirani benũbarikanikiki. Hanua Amorreu nawabu na nenu hiweaburã, hatũ txakabu pikuhairariabumakẽ ẽ hatu kupinũbariai ẽ manayukubaĩshanaii— aka

¹⁷ ma bari ka meshuhairaya ina yuinaka detea bais ashũ mãtxĩbaina namakis txi here keska kuĩhaira tashnitã here hi hi itxakayamai binu binu ikaya

^18-21 habiatiãri Senhor Deusũ Abrão yubakĩ yuikĩ: —Egito anu pashkuwẽ pakea inũ hene ewapa hawẽ kena Eufrates namakis na mai hirabi minabu ẽ hatu inãkĩ ibu wamanũbariaii. Queneu nawabu inũ, Quenezeu nawabu inũ, Cadmoneu nawabu inũ, Heteu nawabu inũ, Ferezeu nawabu inũ, Refain nawabu inũ, Amorreu nawabu inũ, Canaã nawabu inũ, Girgaseu nawabu inũ, Jebuseu nawaburã, habu hiwebiabũ hatu kaĩmakĩ mebĩtã minabu hanu ha mai ẽ hatu ibu wamashanaii— anikiaki.