Gênesis 17 - Kaxinawá Bíblia (BR)

Abrão enabu hawẽ unãti wakĩ hatũ hina kubitxi hau meshtenũbũ Deusũ yununikiaki, na hãtxarã

¹ Hanua Abrão 99 bariya hiwekẽ Senhor Deus haki nukutã uĩmakĩ ana yuikĩ: —Earã, ẽ mekenika kayabi Deus kushipahairaki, dasibi binũ keyuarã. Haskakẽ ẽ berubi ẽ mia uiãyã mianã, ẽ hãtxa txibãkubaini pepas aki hiwekũkaĩwẽ, txakabu meamarã— atã

² Deusũ ana hãtxa wakĩ: —Uatiã ẽ mia haska yubani mĩ bababu wakĩ mirimawakĩ ẽ mia hatu pahaira wamashũshanaii— aka

^3-4 Abrão Deus kẽhairawai hawẽ beyawẽ taea maĩ beua beti ika dakakẽ Deus ana habe hãtxakũkaĩkĩ yuikĩ: —Nĩkawe, ẽ mibe yubakairã. Eanã, ẽ mia yubaii. Miwẽ taeshũ minabu shukua betsa betsapabu itxapahaira ẽ hatu pahairawashanaii. Hanua miarã, mĩ hatũ shenipabu inũbariaii.

⁵ Haskakẽ mĩ kena Abrão mia ana hawẽ kenabumaki. Minabu shukua betsa betsapabu ẽ mia bawama mĩ hatũ shenipabu ishanaiwẽ taea mĩ kena betsa bena wakĩ: “Abraãoki”, akĩ mia kenashãkanikiki.

⁶ Minabu pa wakinã, mirimahaira hatu wakĩ hatu pashkakubaĩkĩ shukua betsa betsapabu ẽ mia hatu bawamashanaii, hatiri shanẽ ibu kushipabu wakinã.

⁷ Mia inũ mĩ bakebu inũ mĩ bababu inũ dasibu minabus ipakeshanaibu ẽ hatukiri yubakariaii, niti ikamarã. Ikis ẽ mĩ mekenika Deuski. Mĩ ma mawakẽ txipu ẽ habũ Deus iriashanaii, hatu merabewakubainirã.

⁸ Canaã na hanu mĩ ikarã, mai pakea hirabi hanu mĩ hiwearã, habiari mia inũ minabu ẽ hatu ibu wamashanaii, inãkĩ yunukibi yunukinã. Mĩ mawakẽ ẽ hatũ mekenika Deus ipakeshanaii, hatu merabewanũ ikarã— iwanã,

⁹ Deusũ Abraão ana yuikĩ: —Mianã, nĩkawe. Haska ẽ mia yuiai txibãpaketi nĩkawe, mia inũ minabus, hau apakeshanũbũwẽ, kaneama niti ikamarã.

¹⁰ Eska ẽ matu yubaii, ha txibãkĩ mã apakeshanũbunã. Huni tibi hawẽ hina kubitxi nupewẽ bikĩ hau meshtekubaĩshanũbũwẽ. Mĩ hatu haska waiwẽ taeshũ minabũri txibãkĩ hau apakeriashanũbũwẽ.

¹¹ Mia dukũ mĩ hina kubitxi hau mia meshtenũbũwẽ, bikinã. Mã haska waiwẽ taeshũ ẽ hãtxa mã txibãkatsis ikai ẽ unãshanaii, hawẽ matu unãti wai ẽ matube ketashamearã. Haska wapakeshãkãwẽ.

^12-13 Na habiatiã unuri mã hiwekainaitianã, matũ huni bake kaiã manakĩ ma 8 shaba kakẽ hau hawẽ hina kubitxi meshtekĩ bikubainũbarinũbũwẽ, minabũ bakebu inũ matũ dayarubu escravõ bakeburi habiaskari wakinã. Ha inũ, ikis matũ dayarubu haya inũ txipu nawa betsa anua peiwẽ taeshũ mã bia matũ dayaru escravo haburi hau hawẽ hina kubitxi meshtekĩ biriakubaĩshanũbũwẽ. Hatũ hina kubitxi biaibuwẽ taeshũ haska ẽ mia hatube yubashu minabu ẽ unãti wai shinãriakubaĩshãkanikiki, niti ikamarã. Ẽ mibe haskai hiwekũkaĩshanai hawẽ unãti wati ẽ mia yubashuki.

¹⁴ Hanua tsuara matube hiwea hunĩ hawẽ hina kubitxi meshtekĩ biamakẽ hau hanu matube hiweyamanũbũ hatu nitxĩshãkãwẽ, ẽ matube yubakani akĩ txibãmakenã— atã

¹⁵ —Mĩ aĩ Sarairã, ana hawẽ kenawẽ kenayamawe. Na habiatiã taewakĩ hawẽ kena bena watã kenakinã, Sara wakĩ kenakubaĩwẽ.

¹⁶ Sara duawakĩ ẽ pepawashanaii. Haki ẽ mia huni bake inãshanaii. Hanushũ duawakĩ Sarã bakewẽ shukua betsa betsapabu hawenabu wakĩ ẽ hatu washanaii, shanẽ ibu itxapabu kushipa wakinã— aka

¹⁷ Abraão nĩkatã maĩ beua beti ishũ ikũwãma huĩti merãs usã tenea dakashũ shinãkĩ: “Huni 100 bariyatũ ana bake ẽ bawatirumẽ? Hanua Sara 90 bariyatũ bake biriatirumẽ? Haskatã nũ haskatimaki”, itã

¹⁸ hawẽ bake Ismaelkiri shinãkĩ Deus yuikĩ: —Haskakẽ ẽ bake Ismaelkiri mĩ yubatiruki, hiwekaĩkĩ mĩ pepa hau txibanunã— aka

¹⁹ Deusũ ana yuikĩ: —Haskakiri mĩ shinaĩkiri ẽ hãtxamaki. Mĩ aĩ Sara kayabitũ bake bishanikiki. Bake bia huni bake kaĩshanikiki. Hanushũ kenakĩ: “Isaqueki”, ashãwẽ. Habe besti ẽ yubakashanaii. Hawenabu pakubainaibu hatu merabewapakeshanũ ika Isaquebe besti yubakakĩ ẽ kanetimawashanaii.

²⁰ Ismaelkiri mĩ ea yuiai ẽ nĩkashurã, uĩwẽ. Ismaelrã, ẽ tari duawariashanaii. Hawenabũ bakebu hatu pawakĩ itxapahaira hatu wariakĩ 12 shanẽ ibubu kushipa iriashãkanikiki, hawẽ taea hawenabu itxapa kushipa tari hayariairã.

²¹ Hakia mĩ aĩ Saraki mĩ bake waima bari betsã huni bake kaianã, Isaque bestibe ẽ yubakariashanaii— akĩ

²² hãtxa keyutã Deus Abraão anua kaĩkainaya

²³ habias shabatiã Deusũ Abraão yubashu Ismael inũ, huni dasibi hatube hiwea huni bake kaĩmisbu inũ, peiwẽ hatu bitã hatu escravo wani Abraão hatu itxawashũ hatubetã hatũ hina kubitxi meshtekĩ itxapa hatu bipakenikiaki, haska Deusũ yunushina txibãkinã.

²⁴ Hanua Abraão 99 bariya inũ,

²⁵ Ismael 13 bari hayakenã,

^26-27 hanushũ habiatiãri Abraão inũ hawẽ huni bake Ismael hatũ hina kubitxi bitã huni dasibi Abraãobe hiweaburi hatũ hina kubitxi meshtekĩ hatu birianibukiaki.