1 Pedro 3 - Kaxinawá Bíblia (BR)

Aĩyãbu inũ beneyabu haskai hiwetikiaki, na hãtxarã

¹ Aĩbu beneyabuũ, maturi yuinũ nĩkairakãwẽ. Matũ benẽ matu yunua nĩkatã habebis yununamei hẽ iyamama ashũkubaĩkãwẽ. Haskakĩ hatiritũ matũ benẽ Deusũ hãtxa ikũwãriama duawai mã pepakũkainai matu uĩkubaĩmiswẽ taeshũ hãtxawẽsma mã pepawamiswẽ matũ bene bestibu Jesus mã ikũwãmatiruki,

² Deuski mesei pe hiwekĩ mã hatu uĩmakubainaiwẽ taeshunã.

³ Haska inũ, eska bestiwẽ bemakis hawẽrua bestitã hatu uĩmakatsis iki bushtiwẽ buesheketã usũtinĩ usuakeakei ouro mane hawẽruawẽ dauwa batxi karuhaira sawe bestitã hatu uĩmai mapuyamakubaĩkãwẽ.

⁴ Hakia haskai bemakis bestima matũ huĩti uke merã matũ xinã duapa betsaisma haska matũ yushĩ ha pepa hawẽrua duapai huĩti pepaya mã kũyã ismakenã, haskawẽ hawẽruati Deusũ abumisrã, keyuismaki.

⁵ Habiaskariai ẽ shenipabu aĩbu pepabũ Deus ikũwãkĩ hatũ mabu hawẽrua saweawẽ hawẽruama hakia hatũ benẽ hãtxa nĩkai hawẽruapaunibukiaki.

⁶ Eska wakĩ Sarã hawẽ bene Abraão shanẽ ibu wakĩ hawẽ hãtxa nĩkatã txibãpaunikiaki. Maturã, tsuara mã Sarã bai tanakatsis ikairã, hawẽ baba keskakinã, hawaki dateama pepa bestikĩ matũ bene uĩmakubaĩkãwẽ.

⁷ Ha dikabi mã huni aĩyãbuũ, maturi yuinũ nĩkakãwẽ. Matũ aĩ matube hiwea habebis nĩkakanãkubaĩkãwẽ. Hatũ yura kuxipa beshmas mã unaiĩ. Haskabiakẽ Deusũ habe matu hiwekuĩa inãshanai keska haska Deusũ abuai keska matũ aĩri hatu uĩmakĩ duawariakubaĩkãwẽ. Mã haskamiswẽ taeshũ Deusbe hãtxakĩ mã yukai matu nĩkakubaĩshanikiki. Hamẽ haskama mã habe hiwetxakashũ Deus yukairã, matu hawa nĩkama ishanikiki.

Jesus ikũwã kayabi warã, bikabiakẽ tenekubaĩtikiaki, na hãtxarã

⁸ Haska tibi ẽ matuki txanishurã, haska bestiwẽ hiwekĩ Jesus ikũwaĩbu tibibube habias xinãwãtã hatuki dasia binunãnãma pepai babu keskatã keãma abunamekubaĩkãwẽ.

⁹ Ha inũ, matu txakabuwabu hatubebis ana txakabuama inũ matu itxabu hatubebis ana manakunaĩ itxakanãma ikubaĩkãwẽ. Hakia matu duawakatsi Deusũ matu katuniwẽ taeshũ matu itxakawabiaibũ ha xinãma pepakiri besti hatu yuikubaĩkãwẽ, hau Deusũ hatu merabewakĩ duawariakubainunã.

¹⁰ Haskakiri shanẽ ibu Davĩ hatu yuikĩ: “Tsuabura na mai anu bari itxapa unãnuma hiweyukatsi ikinã, hatũ keshawẽ hãtxa txakabukĩ txani yuikatsi ikamarã, hatũ hana hau mekekubainũbũwẽ.

¹¹ Hamapai txakabuki hari kemama haskai unãnumakĩ pe besti benakĩ haska txibãkubaĩkãwẽ.

¹² Pepabu mekekubaĩkĩ hawara yukaibu merabewakatsi iki Deus pashtishũ hatu nĩkamiski. Hakia habũ txakabuwaibu uĩ hatuki Deus sinatai hatukiri petximiski”, hatu watã keneniki.

¹³ Hanushũ mã hawa txakabuwama pe besti ikubainaibu haska watã tsuã matu hawawẽ taeshũ txakabuwatirumaki.

¹⁴ Hakia Jesus ikũwaĩ haska pepawẽ dayai mã hiwebiakẽ matu itxakawabiabu mã nuitapabiaya Deusũ matu duawakubainai xinaĩ huĩtinĩ benimakubaĩkãwẽ, e iki hatuwẽ hawa dakeamarã.

¹⁵ Hamẽ Cristo matũ Shanẽ Ibu ashũkinã, matũ hiwea inãkĩ kẽwãkubaĩkãwẽ. Matũ hiwea mã ma pewakẽ tsuãra haska mã Cristokiri kakape ikũwaĩ matu yukaibu mã hatukiri pe shabakabi txanikĩ mã hatu kematiruki,

¹⁶ babutã keãma hatu pewẽ hãtxa wakinã. Hawa matũ hiweakiri xinaĩ mã bika teneamakẽ haska mã Cristo ikũwaĩ xinã txakabuma matu unãtã ha habũ hãtxa txakabuwẽ matu yuaĩ hãtxa txakabumisbu ibubis hatũ hãtxawẽ daketirubuki.

¹⁷ Hamẽ mã txakabuwaya matu kupiaibu matũ txakabuwẽ taea tenekãwẽ. Hakia Jesus ikũwãkĩ hawara pepa mã abiaya hawẽ taeshũ matu itxakawaibu Deusũ hatu nemama mã yumainã, txakabumaki.

¹⁸ Hakia Cristo pepabia nũ txakabuwẽ taea nukuwẽ nui nukũ txakabu buanũ ika bestiwai ana mawatimai nuku mawashuniki. Cristo hawa txakabuwamabia Deus yurabu mekemanũ ika nukũ txakabuwẽ nukuwẽ taea nuitapaniki. Hawẽ yura babu mawabiatã habias hawẽ yuraya ana mawatirumai hawẽ yushĩ besteni hiwekũkainikiki.

¹⁹ Yushĩ itxapabu Deusũ nitxĩkĩ bitxini kini anu Jesusũ yushĩ hari kashũ hatu hãtxa wakĩ haska Satanás maematã hawẽ hiweakiri hatu yusĩtanikiaki.

²⁰ Hamẽ nukũ shenipabu Noẽ hawẽ nunuti waya habias habu yushĩ patapanibu nitxĩriama hau Deusũ hãtxa nĩkanũbũ hĩ hĩ, iwanã, hawaira hatu kupikatsi ikama Deusũ hatu manayuaya hawẽ hãtxa danãnibukiaki. Ha inũ, ui heneama hene ewa wakĩ yura betsa betsapabu hatũ txakabuwẽ taeshũ ha henewẽ hatu kupikĩ Deusũ dasibi yamawanikiaki. Hanushũ yura eskarabes oito besti nunuti merã Deusũ hatu kupiama Noéwẽ besti pashai mekenibukiaki.

²¹ Hanushũ natiã Jesus mã ikũwãyã ha henewẽ Deusũ hatu kupini mã xinãyã habũ matu naximakĩ matũ yura detsis txukaisbumaki. Hakia nukũ txakabu Deusũ buatã nukũ xinã hau nuku pewashũkubainũ nuku imamisbuki. Hakia nukubu pashairã, Jesus Cristo besteni ha besti txibãkubaini nũ ishãkanaii.

²² Hanua Jesus mawa ana besteã nai anu ka hawẽ Epa Deusũ yusiuri tsauwa Deusũ nai tsumabu inũ shanẽ ibu kuxipa dasibibu Deusũ Jesus yununi Jesus shanẽ ibukĩ dasibibu hatu mekekubainikiki.