Psalms 9 - Die Bybel 2020-vertaling Die Bybel 2020-vertaling
Psalms 9

¹ Vir die •musiekleier. Op “Dood van die seun”. 'n Psalm. Van Dawid.

² Ek wil die Here prys met my hele hart; ek wil van al u wonderdade vertel.

³ Ek wil bly wees en my in U verheug; ek wil u Naam besing, Allerhoogste.

⁴ Wanneer my vyande terugdeins, struikel hulle en kom hulle om vanweë u teenwoordigheid,

⁵ want U het my reg in my regsaak gehandhaaf. U het op die troon gesit as 'n regverdige regter.

⁶ U het die nasies tereggewys, die goddeloses vernietig; hulle naam het U vir altyd en ewig uitgewis.

⁷ Die vyand – hulle is tot niet, puinhope vir goed. Die stede het U ontwortel. Die herinneringe aan hulle, dit het verdwyn.

⁸ Die Here regeer vir ewig; Hy vestig sy troon vir die regspraak.

⁹ Hý oordeel die wêreld in •geregtigheid; oor die nasies spreek Hy reg met billikheid.

¹⁰ Die Here sal 'n toevlugsoord wees vir die onderdrukte, 'n toevlugsoord in tye van nood.

¹¹ Wie u Naam ken, kan op U vertrou, want U laat hulle wat U soek nie in die steek nie, Here.

¹² Besing die Here wat in Sion regeer; maak sy dade onder die volke bekend.

¹³ Want Hy wat bloedvergieting vergeld, dink aan die magteloses; Hy vergeet nie hulle hulpgeroep nie.

¹⁴ Wees my genadig, Here, kyk hoe my haters my verdruk – U wat my kan wegruk uit die poorte van die dood –

¹⁵ sodat ek van al u lofwaardige dade kan vertel in die poorte van die dogter van Sion. Ek wil juig oor die verlossing wat U bring.

¹⁶ Nasies het weggesink in die vangkuil wat hulle gemaak het; in daardie vangnet wat hulle gespan het, is hulle voete gevang.

¹⁷ Die Here het Homself bekend gemaak: Hy laat reg geskied; goddeloses raak in hulle eie handewerk verstrik. Higgajoon •Sela

¹⁸ Goddeloses draai om na die •doderyk, al die nasies wat God vergeet.

¹⁹ Maar die behoeftiges sal nie vir altyd vergeet word nie; die magteloses se hoop is nie vir altyd verlore nie.

²⁰ Staan op, Here, mense moet nie die oorhand kry nie; laat nasies voor U teregstaan.

²¹ Vervul hulle met vrees, Here; die nasies moet besef dat hulle net mense is. Sela