Masalimo 64 - Buku Lopatulika

Davide apempha Mulungu amtchinjirize pa omlalira

Kwa Mkulu wa Nyimbo. Salimo la Davide.

¹ Imvani Mulungu, mau anga, m'kudandaula kwanga; sungani moyo wanga angandiopse mdani.

² Ndibiseni pa upo wachinsinsi wa ochita zoipa; pa phokoso la ochita zopanda pake.

³ Amene anola lilime lao ngati lupanga, napiringidza mivi yao, ndiyo mau akuwawitsa;

⁴ kuponyera wangwiro mobisika: Amponyera modzidzimutsa, osaopa.

⁵ Alimbikitsana m'chinthu choipa; apangana za kutchera misampha mobisika; akuti, Adzaiona ndani?

⁶ Afunafuna zosalungama; kusanthula, asanthuladi mpaka kutha; chingakhale cha m'kati mwake mwa munthu, ndi mtima wozama.

⁷ Koma Mulungu adzawaponyera muvi; adzalaswa modzidzimutsa.

⁸ Adzawakhumudwitsa, lilime lao lidzawatsutsa; onse akuwaona adzawathawa.

⁹ Ndipo anthu onse adzachita mantha; nadzabukitsa chochita Mulungu, nadzasamalira ntchito yake.

¹⁰ Wolungama adzakondwera mwa Yehova, nadzakhulupirira Iye; ndipo oongoka mtima onse adzalemekeza.