Masalimo 2 - Buku Lopatulika

Ufumu wa wodzozedwa wa Yehova

¹ Aphokoseranji amitundu, nalingiriranji anthu zopanda pake?

² Adzikhazikitsa mafumu a dziko lapansi, nachita upo akulu pamodzi, Kutsutsana naye Yehova, ndi Wodzozedwa wake, ndi kuti,

³ Tidule zomangira zao, titaye nsinga zao.

⁴ Wokhala m'mwambayo adzaseka; Ambuye adzawanyoza.

⁵ Pomwepo adzalankhula nao mu mkwiyo wake, nadzawaopsa mu ukali wake.

⁶ Koma Ine ndadzoza mfumu yanga Pa Ziyoni, phiri langa loyera.

⁷ Ndidzauza za chitsimikizo: Yehova ananena ndi Ine, Iwe ndiwe Mwana wanga; Ine lero ndakubala.

⁸ Undifunse, ndipo ndidzakupatsa amitundu akhale cholowa chako, ndi malekezero a dziko lapansi akhale akoako.

⁹ Udzawathyola ndi ndodo yachitsulo; udzawaphwanya monga mbiya ya woumba.

¹⁰ Tsono, mafumu inu, chitani mwanzeru; langikani, oweruza inu a dziko lapansi.

¹¹ Tumikirani Yehova ndi mantha, ndipo kondwerani ndi chinthenthe.

¹² Mpsompsoneni Mwanayo, kuti angakwiye, ndipo mungatayike m'njira ukayaka pang'ono pokha mkwiyo wake. Odala onse akumkhulupirira Iye.