1 Timoteyo 2 - Buku Lopatulika

Pemphero la kwa anthu onse

¹ Ndidandaulira tsono, poyambayamba, kuti achitike mapembedzo, mapemphero, mapembedzero, mayamiko, chifukwa cha anthu onse;

² chifukwa cha mafumu ndi onse akuchita ulamuliro; kuti m'moyo mwathu tikakhale odika mtima ndi achete m'kulemekeza Mulungu, ndi m'kulemekezeka monse.

³ Pakuti ichi nchokoma ndi cholandirika pamaso pa Mulungu Mpulumutsi wathu;

⁴ amene afuna anthu onse apulumuke, nafike pozindikira choonadi.

⁵ Pakuti pali Mulungu mmodzi, ndi Mtetezi mmodzi pakati pa Mulungu ndi anthu, ndiye munthu, Khristu Yesu,

⁶ amene anadzipereka yekha chiombolo m'malo mwa onse; umboni m'nyengo zake;

⁷ umene anandiika ine mlaliki wake ndi mtumwi (ndinena zoona, wosanama ine), mphunzitsi wa amitundu m'chikhulupiriro ndi choonadi.

⁸ Chifukwa chake ndifuna kuti amunawo apemphere pamalo ponse, ndi kukweza manja oyera, opanda mkwiyo ndi makani.

Zoyenera akazi

⁹ Momwemonso, akazi adziveke okha ndi chovala choyenera, ndi manyazi, ndi chidziletso; osati ndi tsitsi lake loluka, ndi golide kapena ngale, kapena malaya a mtengo wake wapatali;

¹⁰ komatu (umo mokomera akazi akuvomereza kulemekeza Mulungu), mwa ntchito zabwino.

¹¹ Mkazi aphunzire akhale wachete m'kumvera konse.

¹² Koma sindilola ine kuti mkazi aphunzitse, kapena kulamulira mwamuna; komatu akhale chete.

¹³ Pakuti Adamu anayamba kulengedwa, pamenepo Heva;

¹⁴ ndipo Adamu sananyengedwe, koma mkaziyo ponyengedwa analowa m'kulakwa;

¹⁵ koma adzapulumutsidwa mwa kubala mwana, ngati akhala m'chikhulupiriro ndi chikondi ndi chiyeretso pamodzi ndi chidziletso.