Masalimo 60 - Buku Lopatulika Buku Lopatulika
Masalimo 60

¹ Mwatitaya Mulungu, mwatipasula; mwakwiya; tibwezereni.

² Mwagwedeza dziko, mwaling'amba. Konzani ming'alu yake; pakuti ligwedezeka.

³ Mwaonetsa anthu anu zowawa, mwatimwetsa vinyo wotinjenjemeretsa.

⁴ Koma mwapatsa mbendera akuopa Inu, aikweze chifukwa cha choonadi.

⁵ Kuti okondedwa anu alanditsidwe, pulumutsani ndi dzanja lanu lamanja, ndipo mutivomereze.

⁶ Mulungu walankhula m'chiyero chake; ndidzakondwerera, ndidzagawa Sekemu, ndidzayesa muyeso chigwa cha Sukoti.

⁷ Giliyadi ndi wanga, Manasenso ndi wanga; ndipo Efuremu ndi mphamvu ya mutu wanga; Yuda ndiye wolamulira wanga.

⁸ Mowabu ndiye mkhate wanga; pa Edomu ndidzaponya nsapato yanga. Filistiya, fuulatu chifukwa cha ine.

⁹ Adzandifikitsa ndani m'mzinda wa m'linga? Adzanditsogolera ndani ku Edomu?

¹⁰ Si ndinu, Mulungu, amene mwatitaya? Osatuluka nao makamu athu, Mulungu.

¹¹ Tithandizeni kunsautso; kuti chipulumutso cha munthu ndi chabe.

¹² Mwa Mulungu tidzachita molimbika mtima, ndipo Iye adzapondereza otisautsa.