Masalimo 61 - Buku Lopatulika

Poopsedwa Davide athamangira Mulungu

Kwa Mkulu wa Nyimbo: pa Neginoto. Salimo la Davide.

¹ Imvani mfuu wanga, Mulungu; mverani pemphero langa.

² Ku malekezero a dziko lapansi ndidzafuulira kwa Inu, pomizika mtima wanga. Nditsogolereni kuthanthwe londiposa ine m'kutalika kwake.

³ Pakuti munakhala pothawirapo panga; nsanja yolimba pothawa mdani ine.

⁴ Ndidzagoneragonerabe m'chihema mwanu; ndidzathawira mobisalamo m'mapiko anu.

⁵ Pakuti Inu, Mulungu, mudamva zowinda zanga; munandipatsa cholowa cha iwo akuopa dzina lanu.

⁶ Mudzatalikitsa moyo wa mfumu. Zaka zake zidzafikira mibadwomibadwo.

⁷ Adzakhala nthawi zonse pamaso pa Mulungu; mumpatse chifundo ndi choonadi zimsunge.

⁸ Potero ndidzaimba zolemekeza dzina lanu kunthawi zonse, kuti ndichite zowinda zanga tsiku ndi tsiku.