Lioka 22 - Baiboly Katolika

V. NY FIJALIAN’NY TOMPO Tetika hamelezana an’i Jesoa ary famadihan’i Jodasy

¹ Efa mby akaiky ny fetin’ny Azima atao hoe Paka,

² ary ny lohandohan’ny mpisorona sy ny mpanora-dalàna dia nikaroka izay hevitra hamonoana an’i Jesoa, fa natahotra ny vahoaka izy ireo.

³ Nidiran’i Satana kosa i Jodasy, ilay atao hoe IsKariota, anisan’ny roa ambin’ny folo lahy,

⁴ ka lasa izy nankany amin’ny lohandohan’ny mpisorona sy ny manam-pahefana niraharaha ny amin’izay hanolorany Azy amin’izy ireo.

⁵ Dia faly izy ireo ka nanaiky hanome vola azy.

⁶ Ary nanaiky izy ka nikendry izay fotoana tsy hisy olona, hanolorany Azy.

Fanomanana ny sakafo Paka

⁷ Dia tonga ny andron’ny Azima izay tsy maintsy hamonoana ny zanak’ondrin’ny Paka,

⁸ ka naniraka an’i Piera sy i Joany i Jesoa nanao hoe: «Mandehana manamboatra ny Paka hohanintsika.»

⁹ «Aiza no tianao hanamboaranay azy?» hoy ireo.

¹⁰ Dia hoy Izy taminy: «Indro, rehefa miditra ao an-tanàna ianareo, dia hifanena amin’ny lehilahy anankiray mitondra siny feno rano, ka manaraha azy any amin’izay trano hidirany,

¹¹ dia lazao amin’ny tompon-trano hoe: ‹Izao no asain’ny Mpampianatra lazaina aminao: Aiza ny efitrano hihinanako ny Paka miaraka amin’ny mpianatro?›

¹² Dia hotoroany efitrano malalaka àry fanaka ianareo, ka ao no amboary izay ilaina.»

¹³ Dia nandeha izy ireo ka nahita araka izay nolazainy taminy, ary nanamboatra ny Paka.

Ny sakafo Paka

¹⁴ Nony tonga ny fotoana, dia nipetraka hihinana Izy sy ny Apôstôly roa ambin’ny folo lahy.

¹⁵ Ary hoy Izy tamin’izy ireo: «Naniry dia naniry hiara-mihinana ity Paka ity aminareo Aho alohan’ny hijaliako,

¹⁶ fa lazaiko aminareo fa tsy mba hihinana azy intsony aho mandra-pahatanterany any amin’ny fanjakan’Andriamanitra.»

¹⁷ Dia nandray kalisy Izy ka nisaotra, ary nanao hoe: «Raiso ity, ka zarao aminareo;

¹⁸ fa lazaiko aminareo fa hatramin’izao dia tsy hisotro ny vokatry ny voaloboka intsony Aho mandra-pahatongan’ny fanjakan’Andriamanitra.»

Ny namoronana ny Eokaristia

¹⁹ Raha efa izany, dia nandray mofo Izy, ka nony efa nisaotra dia namaky azy, sy nanome azy ireo nanao hoe: «Vatako ity izay atolotra ho anareo; manaova izany ho fahatsiarovana Ahy.»

²⁰ Dia nataony toy izany koa ny kalisy rehefa avy nihinana, ka hoy izy: «Ity kalisy ity no fanekena vaovao amin’ny Rako, izay alatsaka ho anareo.»

Fanambaràna ny hamadihan’i Jodasy

²¹ «Kanefa indro ny tanan’izay mamadika Ahy efa mby eto amiko ambony latabatra.

²² Raha ny Zanak’olona, dia mandeha araka ny lahatra; fa loza no hanjò an’izay lehilahy hamadika Azy.»

²³ Dia nifanontany ny mpianatra hoe iza re no dia hahavita izany amin’izy ireo.

Iza no lehibe indrindra

²⁴ Ary velona koa ny ady hevitra tamin’izy ireo, momba ny hahalalany izay lehibe indrindra amin’izy ireo,

²⁵ ka hoy i Jesoa taminy: Amin’ny Jentily ny mpanjaka no mizaka azy rehetra, ary izay mandidy azy no atao hoe mpanao soa;

²⁶ fa aminareo kosa tsy mba toy izany, fa aoka izay lehibe aminareo no ho toy ny zandry, ary izay mandidy no ho toy ny mpanompo.

²⁷ Fa iza moa no lehibebe kokoa, ny mihinana amin’ny latabatra va sa ny manompo? Moa tsy ny mihinana amin’ny latabatra va? Ary Izaho anefa eto aminareo dia toy ny mpanompo.

Valisoa nampanantenaina ny Apôstôly

²⁸ Ianareo moa, naharitra nanaraka Ahy tamin’izay nanjò Ahy,

²⁹ Izaho kosa hanamboatra fanjakana ho anareo, tahaka ny nanamboaran’ny Raiko fanjakana ho Ahy,

³⁰ mba hihinananareo sy hisotroanareo eo amin’ny latabatro any amin’ny fanjakako, ary hipetrahanareo amin’ny seza fiandrianana hitsara ny foko roa ambin’ny folo amin’i Israely.

Fanambaràna ny hiverenan’i Piera sy ny handavany

³¹ Ary hoy ny Tompo: «Ry Simôna, ry Simôna, indro i Satana nitady hikororòka anareo tahaka ny vary,

³² fa Izaho nangataka ho anao, mba tsy ho lavo ny finoanao, ary rehefa mibebaka ianao dia hamafiso ny rahalahinao.»

³³ Ary hoy i Piera taminy: «Vonon-kanaraka Anao aho, Tompoko, na ho ao an-tranomaizina, na ho any amin’ny fahafatesana aza.»

³⁴ Fa hoy i Jesoa: «Lazaiko aminao, ry Piera, fa mbola tsy haneno ny akoho anio, dia handà intelo ho tsy mahalala Ahy ianao.»

Ny fotoanan’ny ady hahatapaka ny zavatra rehetra

³⁵ Ary hoy koa Izy tamin’ny mpianany: «Raha naniraka anareo tsy nitondra kitapom-bola na kitapom-batsy na kiraro Aho, moa orin-javatra va ianareo?»

³⁶ «Tsy orin’inon’inona izahay» hoy izy ireo. Dia hoy Izy taminy: «Fa amin’izao kosa izay manan-kitapom-bola aoka hitondra azy; toy izany koa izay manan-kitapom-batsy, ary izay tsy manan-tsabatra aoka hivarotra ny akanjony ka hividy iray;

³⁷ fa lazaiko aminareo fa ity teny voasoratra ity koa tsy maintsy ho tanteraka amiko, dia ilay hoe: Natao lasitra iray amin’ny ratsy fanahy Izy; fa efa ho tapitra daholo ny amiko.»

³⁸ Dia hoy izy ireo: «Tompoko, indreto misy sabatra roa» Dia hoy i Jesoa taminy: «Ampy izay.»

Tao an-tendrombohitr’ôliva

³⁹ Dia nivoaka nankany an-tendrombohitra Oliva araka ny fanaony Izy, ka nanaraka Azy koa ny mpianany.

⁴⁰ Nony tonga tany Izy dia nanao tamin’izy ireo hoe: «Mivavaha mba tsy ho azon’ny fakam-panahy ianareo.»

⁴¹ Dia nihataka tamin’izy ireo tokony ho tra-toraka Izy ka nandohalika, dia nivavaka,

⁴² nanao hoe: «Raiko ô! raha sitrakao, halaviro Ahy ity kapoaka ity; ny sitraponao anefa no aoka ho tanteraka, fa tsy ny Ahy.»

⁴³ Tamin’izay dia nisy Anjely anankiray avy tany an-danitra niseho taminy sy nankahery Azy. Dia voan’ny fiadiana aina Izy, fa vao mainka nivavaka mafimafy kokoa.

⁴⁴ Ary nanjary toy ny ra ny hatsembohany sady nipotrapotraka tamin’ny tany.

⁴⁵ Nony nitsangana avy nivavaka Izy, dia nankeo amin’ny mpianany ka nahita azy matory noho ny alahelo,

⁴⁶ ary nilaza taminy hoe: «Nahoana no matory ianareo? Mifohaza, ka mivavaha mba tsy ho azon’ny fakam-panahy ianareo.»

Ny nisamborana an’i Jesoa

⁴⁷ Raha mbola niteny Izy, dia indro nisy andian’olona maromaro nitranga, ka ilay atao hoe Jodasy, anankiray tamin’ny roa ambin’ny folo lahy, no loha lalana, ary nanatona an’i Jesoa ilay io mba hanoroka Azy.

⁴⁸ Ary hoy i Jesoa taminy: «Ry Jodasy, dia fanorohana lahy no amadihanao ny Zanak’olona?»

⁴⁹ Nony hitan-dry zareo teo amin’i Jesoa izay hanjò, dia hoy izy taminy: «Tompoko, mba hamely amin’ny sabatra va izahay?»

⁵⁰ Dia nasian’ny anankiray taminy tokoa ny mpanompon’ny lehiben’ny mpisorona, ka afaka terỳ ny sofiny ankavanana.

⁵¹ Fa hoy i Jesoa: «Aoka izay» Dia nanendry ny sofin-dralehilahy Izy, ka nahasitrana azy.

⁵² Ary hoy i Jesoa tamin’ny lohandohan’ny mpisorona sy ny mpandraharaha amin’ny Tempoly ary ny loholona izay tonga teo handray Azy: «Mova tsy ny hisambotra jiolahy izato fiavinareo, mitondra sabatra sy langilangy!

⁵³ Teo aminareo isan’andro tao an-Tempoly Aho, nefa tsy nikasi-tanana Ahy akory ianareo; fa izao tonga ny fotoanareo sy ny herin’ny maizina.»

Ny fandavan’i Piera

⁵⁴ Dia nisambotra Azy izy ireo ka nitondra Azy tany an-tranon’ny lehiben’ny mpisorona. I Piera izany nanaraka teny lavidavitra eny ihany.

⁵⁵ Ary nampirehitra afo teo afovoan’ny tokotany ny olona, dia nipetraka nanodidina, ka mba niara-nipetraka taminy teo koa i Piera.

⁵⁶ Nisy ankizivavy anankiray kosa nahita azy nipetraka tao akaikin’ny afo, ka nijery azy, dia nanao hoe: «Ity koa niaraka taminy.»

⁵⁷ Fa nandà i Piera nanao hoe: «Ravehivavy, tsy mahalala Azy akory aho.»

⁵⁸ Nony afaka kelikely dia nisy lehilahy anankiray koa nahita azy ka nanao hoe: «Ianao koa lahy naman’irony olona irony.» Fa hoy i Piera: «Ry sakaiza, tsy namany akory aho.»

⁵⁹ Ora iray taorian’izany, dia nisy hafa nilaza tamim-pitokiana hoe: «Tena marina raha tsy namany koa ralehilahy ity, satria Galileanina izy.»

⁶⁰ Dia hoy i Piera: «Ry sakaiza, tsy fantatro izay lazainao.» Niaraka tamin’izay raha mbola niteny izy, dia naneno ny akoho.

⁶¹ Ary nitodika nijery an’i Piera ny Tompo, ka tsaroan’i Piera ilay tenin’ny Tompo nanao hoe: Alohan’ny maneno akoho anio, dia handà Ahy intelo ianao;

⁶² dia nivoaka tany ivelany izy ka nitomany fatratra.

Ireo faniratsirana voalohany

⁶³ Dia nataon’ireo olona nitana Azy fihomehezana i Jesoa sady nokapohiny,

⁶⁴ notampenany ny masony, notehafiny ny tavany, dia hoy izy taminy: «Vinanio hoe izay namely Anao?»

⁶⁵ Ary maro ny teny ratsy hafa nanaratsiany Azy.

I Jesoa eo anatrehan’ny Sanedrìna

⁶⁶ Nony vao maraina ny andro, dia nivory ny loholona sy ny lohandohan’ny mpisorona ary ny mpanora-dalàna, ka nentiny tao amin’ny Sanedrìna i Jesoa, ary hoy izy taminy: «Raha Ianao no i Kristy, dia lazao aminay.»

⁶⁷ Fa hoy Izy taminy: «Na hilaza aminareo aza Aho, tsy hinoanareo akory;

⁶⁸ ary raha hanontany anareo aza Aho, tsy hovalianareo na halefanareo akory.

⁶⁹ Fa hatramin’izao ny Zanak’olona dia hipetraka eo ankavanan’ny herin’Andriamanitra.»

⁷⁰ Dia hoy izy rehetra: «Zanak’Andriamanitra izany Ianao?» Ary hoy Izy taminy: «Voalazanareo, izy Aho.»

⁷¹ Ka hoy izy ireo: «Inona indray no ilàntsika vavolombelona? Tenantsika no nandre tamin’ny vavany.»