Jaona 11 - Baiboly Katolika

Ny namelomana an’i Lazara efa maty

¹ Nisy lehilahy anankiray narary, dia i Lazara avy any Betania, vohitr’i Maria sy Marta rahavaviny.

² I Maria dia ilay vehivavy nanosotra diloilo manitra ny Tompo sy namaoka ny tongony tamin’ny volon-dohany; ary i Lazara anadahiny no narary.

³ Dia naniraka tany amin’i Jesoa ireto anabaviny hilaza hoe: «Tompo, marary ilay tianao.»

⁴ Nony ren’i Jesoa izany dia hoy Izy: «Aretina tsy ho fahafatesana ity, fa ho voninahitr’Andriamanitra, sy hahazoan’ny Zanak’Andriamanitra voninahitra.»

⁵ Ary tian’i Jesoa i Marta sy i Maria rahavaviny ary i Lazara.

⁶ Nefa nony reny hoe marary i Lazara, dia mbola nitoetra indroa andro tamin’izay nitoerany ihany Izy.

⁷ Nony afaka izany vao hoy Izy tamin’ny mpianany: «Andeha isika ho any Jodea indray.»

⁸ Ka hoy ny mpianany taminy: «Raby ô, vao haingana teo no nitady hitora-bato Anao ny Jody, ka dia hankany indray ve Ianao?»

⁹ Dia hoy i Jesoa taminy: «Tsy roa ambin’ny folo ora va ny indray andro? Ka ny mandeha antoandro tsy mba tafintohina, satria mahita ny fahazavan’izao tontolo izao;

¹⁰ fa ny mandeha alina no tafintohina, satria tsy manam-pahazavana.»

¹¹ Nony voalazany izany dia nampiany hoe: «Matory i Lazara sakaizantsika, fa ndeha hamoha azy Aho.»

¹² Ka hoy ny mpianany: «Raha matory izy, Tompoko, dia ho sitrana.»

¹³ Ny nahafatesany no nolazain’i Jesoa, nefa torimaso tsotra izao kosa no nampoizin’izy ireo.

¹⁴ Izay i Jesoa vao nilaza tsotra tamin’izy ireo hoe: «Maty i Lazara,

¹⁵ ary noho ianareo dia faly Aho satria tsy tao, mba hinoanareo; koa andeha isika hankany aminy.»

¹⁶ Dia hoy i Tomà izay atao hoe Didimo tamin’ny mpianatra namany: «Andeha koa isika mba hiara-maty aminy.»

¹⁷ Nony tonga tany i Jesoa, dia hitany fa efa nilevina hefarana izy.

¹⁸ Ary i Betania dia tao akaikin’i Jerosalema tokony ho dimy ambin’ny folo stady,

¹⁹ ka maro tamin’ny Jody no tonga tao amin’i Marta sy i Maria mba hitsapa alahelo azy noho ny nahafatesan’ny anadahiny.

²⁰ Vantany vao ren’i Marta fa hoe tamy i Jesoa, dia nandeha nitsena Azy izy, fa i Maria no nijanona tao an-trano.

²¹ Dia hoy i Marta tamin’i Jesoa: «Raha tatỳ Ianao, Tompoko, dia tsy maty ny anadahiko.

²² Ary na dia izao aza, dia fantatro fa na inona na inona hangatahinao amin’Andriamanitra, dia homen’Andriamanitra Anao.»

²³ Hoy i Jesoa taminy: «Hitsangana ny anadahinao.»

²⁴ Fa hoy i Marta taminy: «Fantatro fa hitsangana izy amin’ny farandro fitsanganan’ny maty.»

²⁵ Hoy i Jesoa taminy: «Izaho no fananganana sy fiainana; izay mino Ahy, na dia maty aza, dia ho velona indray;

²⁶ ary izay rehetra velona ka mino Ahy, dia tsy ho faty mandrakizay. Mino izany va ianao?»

²⁷ «Eny, Tompoko, hoy izy taminy, mino aho fa Ianao no Kristy Zanak’Andriamanitra velona, Ilay hoe ho tonga amin’izao tontolo izao.»

²⁸ Ary rehefa nilaza izany Izy, dia lasa niantso mangingina an’i Maria rahavaviny nanao hoe: «Ao ny Tompo, ka miantso anao Izy.»

²⁹ Vao nandre izany kosa i Maria, dia nitsangana niaraka tamin’izay, ka nankao aminy.

³⁰ Fa mbola tsy tonga tao an-tanàna i Jesoa, fa mbola teo amin’izay nitsenan’i Marta Azy ihany.

³¹ Nony hitan’ny Jody izay tao amin’i Maria tao an-trano sy nitsapa alahelo azy fa nitsangana haingana izy ka nivoaka, dia nanaraka azy izy ireo, fa nihevitra hoe: «Lasa hitomany any amin’ny fasana izy.»

³² I Maria kosa, nony tonga teo amin’izay nitoeran’i Jesoa ka nahita Azy, dia niankohoka tamin’ny tongony sy nanao taminy hoe: «Raha tatỳ Ianao, Tompoko, dia tsy maty ny anadahiko.»

³³ Nony nahita azy nitomany i Jesoa sy ireto Jody niara-nitomany taminy koa, dia nandevy ny fony ary nientana iray ihany ny tenany rehetra.

³⁴ «Aiza no nandevenanareo azy,» hoy Izy? Dia hoy ireo taminy: «Andeha Ianao hizaha, Tompoko.»

³⁵ Ary nitomany i Jesoa.

³⁶ Dia hoy ny Jody: «Akory ity haben’ny fitiavany azy!»

³⁷ Fa hoy kosa ny sasany tamin’izy ireo: «Tsy azony natao va re ny nisakana an-dralehilahy ity tsy ho faty, nefa ny mason’ilay teraka jamba nampahiratiny?»

³⁸ Dia niontana indray ny Fon’i Jesoa, ary lasa Izy nankeo amin’ny fasana, izay zohy norakofana vato.

³⁹ «Esory ny vato,» hoy Izy. Ka hoy i Marta anabavin’ny maty taminy: «Efa maimbo izy, Tompoko, fa efa hefarana izay.»

⁴⁰ Ary hoy i Jesoa taminy: «Tsy efa voalazako taminao va fa raha mino ianao, dia hahita ny voninahitr’Andriamanitra?»

⁴¹ Dia noesoriny ny vato, ka niandrandra i Jesoa sy nanao hoe: «Misaotra Anao Aho, Raiko, satria efa nihaino Ahy Ianao.

⁴² Raha Izaho, dia fantatro fa mihaino Ahy mandrakariva Ianao; fa noho ireto vahoaka manodidina Ahy kosa no nilazako izany mba hinoany fa Ianao no naniraka Ahy.»

⁴³ Rehefa nilaza izany Izy dia niantso tamin’ny feo mahery hoe: «Mivoaha, ry Lazara.»

⁴⁴ Ka niaraka tamin’izay dia nivoaka ny maty, ny tongotra aman-tanany nisy fehim-paty, ary ny tavany nisarona lamba. Dia hoy i Jesoa tamin’ny olona: «Vahao izy ka avelao handeha.»

Ireo filohan’ny Jody manapa-kevitra hampamono an’i Jesoa

⁴⁵ Ary maro tamin’ny Jody izay tonga tao amin’i Maria sy i Marta sy nahita ny nataon’i Jesoa no nino Azy.

⁴⁶ Fa ny sasany tamin’izy ireo kosa dia lasa nankany amin’ny Farisianina, ka nilaza taminy izay nataon’i Jesoa.

⁴⁷ Dia namory ny mpanolo-tsaina ny lehiben’ny mpisorona sy ny Farisianina ka nanao hoe: «Inona ity ataontsika, fa manao fahagagana maro iny Lehilahy iny?

⁴⁸ Raha avelantsika hanao ihany Izy, dia hino Azy ny olona rehetra, ka ho avy ny Rômanina dia haka ny tanànantsika sy ny firenentsika.»

⁴⁹ Dia hoy ny anankiray tamin’izy ireo atao hoe Kaifa, izay lehiben’ny mpisorona tamin’izany taona izany: «Tsy mahalala na inona na inona ianareo,

⁵⁰ na tsy mihevitra akory fa tsara ho anareo raha maty ho an’ny vahoaka ny Lehilahy anankiray, mba tsy ho rava ny firenena manontolo.»

⁵¹ Tsy avy aminy anefa no nitenenany an’izany, fa noho izy lehiben’ny mpisorona tamin’izay taona izay, dia naminany izy fa ho faty ho an’ny firenena i Jesoa;

⁵² ary tsy ho an’ny firenena ihany, fa mba hamory ny zanak’Andriamanitra izay efa niely koa, ho antokony iray.

⁵³ Hatramin’izany andro izany dia nikendry izay hahafaty Azy izy ireo.

⁵⁴ Koa tsy nandeha ampahibemaso tany amin’ny Jody intsony i Jesoa, fa niala teo nankany amin’ny tany akaikin’ny efitra, ho any an-tanàna atao hoe: Efrema, dia nitoetra tany Izy mbamin’ny mpianany.

VII. NY PAKA FARANY A. Talohan’ny nijalian’ny Tompo Efa akaiky ny Paka

⁵⁵ Efa akaiky ny Pakan’ny Jody tamin’izay, ka maro ny olona avy tamin’izany tany izany no niakatra tany Jerosalema alohan’ny Paka, mba handio tena.

⁵⁶ Dia nitady an’i Jesoa izy ireo ka nifampilaza tao anatin’ny Tempoly hoe: «Ahoana no hevitrareo, dia tsy ho avy hamonjy ny fety ve Izy?» Ny lehiben’ny mpisorona sy ny Farisianina tamin’izany efa nandidy fa izay mahita ny itoerany dia tsy maintsy milaza, mba hisamborany Azy.