NEHEMIA 13 - ASII LAKDAP Bible (BSI)

Pongmung Maiqse Ka Pong Na Raibaiqto

¹ Kra akhing na, Mosheq Thungtri ka, mungmaiqse ma tiihong raüta phat kuq wanto. Kra phat kuq wan tlaq akhing na, lakdam kom na, Ammonnok nai Mobnok ka, Shiikeawe sengi phungtu na tiishang dam maimak, kiimaq noqku na tlom wandam maimak, nguta aming khathütaq lakjaq kriishe phat kuqto.

² Riita arjaq tsangshiq nok nai ri khuthaq na akha tri waiqthütaq arka, Ammonnok nai Mobnok raq, Israilnok ka Ejip mung maq manglaü wantaq akhing na, lam maq, tsangshiq noknai wiita raq, Israilnok ma phaqsea khamnyang kuq phaq siq mak hai hüto. Tsangshiq raq Israilnok ka akhrumke wan rü na khoti, shammiwe Balaam ma kampho kuq raüta, Israilnok khuthaq na manson laq nguta raikao tatto. Shatmaq nashiq Shiikeawe raq apaiq manson ka ramram ma khoti wiiqbaiqto.

³ Riita, Israilnok raq ara chongtiikai tri raütu phat kuq wantaq kra taiwi raütiishe, tsangshiqnok rai pongmung maiqse ümchuwa sitlaq kra, tsangtu mong wa ashleq riibaiqto.

Nehemia Raq Tri Tru Tiiqto

⁴ Riita, ramwe Eliashib ka Shiikeawe Shomjam na hupsam thü chang khok thun kra liiwanti chere ma ashong riito. Apaiq ka Tabia rai akhing luhea she kongshi siwantiwe.

⁵ Apaiq raq Shomjam mong na khok ajong pinthum ashi, kra khok kriika, honglu kuq wantlaq tü atsam, kiimaq homseng, kiimaq Shomjam na lang chang huk nai sam ja nai piq thun, ramwebi ma akuq honglu thun, kiimaq aroqkhu wa akuq honglu piiwong, spiqtai, kiimaq Lewinok ma akuq olip petsi tai thun, kiimaq Shomjam na ashi ange wanti ma akuq honglu, kiimaq Shomjam kheti hokranok miitu akuq honglu thun kra saiq sam chang khok kriika Tobia raq lang miitu kuq baiqto.

⁶ Riita ara chongtiikai ashut klo wan tlaq akhing bala na, ngi ka Jerusalem na ahü riikang. Jamkhano ngukla, ngi ka hokhamwe Artajarses raq Bebilon mung lang wan li maq, rawii wiiroqtsam ri wiinai ngoja na, Juda mung na mung jaqsham wan tiikang kra tsütsa ka tiitai kuq wala nguta, apaiq rai riihum wa, Bebilon mung na wawan kang. Riita, ngi ka Bebilon mung na ashaqpuq siwa jai miishe, apaiq raq ngi ka Jerusalem na jangho nong miitu aming kuqto.

⁷ Krai mren, ngi ka Jerusalem na jangho nong kang. Ngi ka kiijaq saükai jaishe, Shomjam mong wa khok ashi ka Eliashib raq Tobia raq lang wan miitu kuq baiqto nguta sap lata, ngi ka pinthum ahang rai riikang.

⁸ Kra chhilata, ngi ka amokdung dung she khiq wan kang. Kiimaq Tobia hupsam thun kra khok mong wa wiita kinphai na rutbaiq kang.

⁹ Lata, ngi raq khok thun tiishe wantaq kra tiisii wan miitu, phumram kham maq bat rong laq ngutiishe, aming kuq kang. Kra tiisii hetse lot jai shetiq, Shiikeawe jam na lang wan chang, takchung pinchiim thun, rai awong honglu thun, kiimaq honglu homseng shan thun kra, Shomjam khok mong niishe hali tiisaiqsam wan nong kang.

¹⁰ Kiimaq, Lewinok dunghea wan chang honglu ka mungmaiqse raq samhea kuq wan mak shishe baiq kha maq, Shomjam maq noqku akhing na, Shiikeawe shomnoq wan, nokwe shunshea wantibi, Lewinok nai ashi ange wanti kong kriika, tsangshiq maiqmiimii hiqshong rap na, wak jaqsham sea wa she hali jang wan wito nguta bom ka ngi raq tai kang.

¹¹ Kra tai lata, ngi raq Shomjam thaq na aliiwanti welabi ka, Shomjam wa jaqsham ka tsapkap mak kha na, tsangshiq ka asea nai ason riikang. Lata, ngi raq ashi wanti nai Lewinok kra, tsangshiq maiqmii hiqshong wa, tiihea wa nong lata, Shomjam na tsangshiq jaqsham kra sham wan nong miitu arang kuq nong kang.

¹² Kra riikang tiishetiq, Israilnok wiita raq Shomjam na rai awong, spiqtai, kiimaq olip tai kra honglu na kuq wan nongto. Raüta, honglu thüchang khok thun kiijaq thüto.

¹³ Krai mren, ngi raq honglu thü chang khok thun kra liiwanti cherewetiim shong wan nong kang. Tsangtsam ka arwetiim ara: ramwe Shelemia; Thungtri taksuwe Jadok; kiimaq, Lewiwe Pedaia. Kiimaq, tsangshiq khrum miitu ka, Jakkur se Hanan, Mathania ma asaü kra shongkang. Ngi raq, arwetiim ka, tsangshiq kongti ma, phaq nai sea kra aheawiq maq miphea kuq wan lot, nguta kam tiikang. Kra ningkhan, jaqsham ka tsangshiq ma kiinong kuq kang.

¹⁴ Shiikeawe lei, ngi raq üm Shomjam miitu nai noqku miitu arthun jaqsham tiikang ara ümtsan na tiitsang thü laq.

¹⁵ Ngi raq kra akhing na, Juda wang na siti Israilnok raq, Asii Niitiitsak Ranaiq ranaiq na spiqtsi tsai ka tiikit nyat tlo chhikang. Kiimaq mungmaiqse abiti riika, püwong, che, spiqtsi, phupmuptsi, kiimaq laihin huk asam thun kra, tsangshiq kumtoq kaütiim raikhü na miirea chhikang. Raüta tsangshiq raq kra hupsam thun ka, Jerusalem na hoho tlo chhikang. Kra chhilatiishe, ngi raq tsangshiq ka kiq atsin maq ason riikang. Kiimaq Asii Niitiitsak Ranaiq ranaiq na jamlai phan min ari athii shata raamak nguta aming kuqkang.

¹⁶ Tajar chela wa aki, maiq wiijamti laopanbi ka Jerusalem na siraüta piikiiti asi riito. Tsangshiq raq ngiq, kiimaq laihin hupsam phanphan kra, Jerusalem na hoholili raüta, naishiqnok ma Asii Niitiitsak Ranaiq ranaiq na shakuqho tlo.

¹⁷ Kra ningkhan, ngi raq Jehudinok welabi ka ason riikang. Lata tsü ka akha chongkuqkang, “Liirong laq, namshiq raq, ara abi ngarai tang tlan! Namshiq raq asii Asii Niitiitsak Ranaiq ranaiq ka ashe ma tiija baiqholan.

¹⁸ Akha ashut ngarai tang wan kha na, Shiikeawe raq namtitiim ma sintsang tiihokuqto, raüta ara chela ka shiithen baiqto. Kra taümaq dongdii min, namshiq raq, Asiihai Ranaiq ka tiishe shi wan lanta, Shiikeawe tsankhiq ka Israilnok ma misaüho nong laq nguta ngarai tang wan nong tlan,” nguta sonkang.

¹⁹ Arkha niishe, ngi raq Asii Niitiitsak Ranaiq ranaiq pha wan tlaq, raji rashe nyap wan tlaq akhing na, Jerusalem chela kilamchong thun kilü ka, wiita shaqbaiq raa tlo. Raüta Asii Niitiitsak Ranaiq ranaiq mithum shaq wiiwii, kilü thun ka dike raamak, nguta aming she tat kang. Lata, Asii Niitiitsak Ranaiq ranaiq na jurmin kinphai wa chela mong na hupho samho, nyapwa mak chang miitu, kilam chong thun kiijaq kilü kheti sontri tsongti maiq thükang.

²⁰ Lakshi shea laknai wiika, laopanbi ka, phanrap hupsam shata wanti, liipan rabiingi angu rawa na, Jerusalem chela kin phai kiijaq japto.

²¹ Kra chhilatiishe, ngi raq tsangshiq ma, “Namshiq ka hupsam shata kham ma, chela ruk phai na anap ra miwiiho shaq nguta atu na naq khe rongkiq. Namshiq raq ibom tai man tlea han jiila, namshiq raq imo she miho han,” nguta tsangshiq ka tiihai sonkang. Kra sonkang kriimiiphat she, tsangshiq ka Asii Niitiitsak Ranaiq ranaiq na jangki nongmak she riito.

²² Krai mren, ngi raq Lewinok ma tsangshiq khum ka phumram kham maq tiisii bat raüta, Asii Niitiitsak Ranaiq ranaiq ka asii maq thü wan miitu, tsangshiq raq kilamchong thun kilü ka sontri tsong raüta teptep khe miitu aming kuqkang. O, Shiikeawe lei, ngi raq arthun jaqsham tiikang ara miitu, ümmang chan tsii rüm tlaü kriimaq, ngi ara tiikhup wongkuq laq

²³ Kra akhing na hali ngi raq, Jehudinok phong wa maiqwere pahea raq, Ashdoknok sheare, Ammon nok sheare, kiimaq Mobnok sheare lam wan raüta sitlo nguta tho ka lapkang.

²⁴ Tsangsetiim phong wa khoko riika, Ashdoknok bom kli bomtlo. Riimak la, maiqnok maiqhiq nokhin phan bom miili riibom tlo. Tsangshiq raq nashiqnok, Jehudinok bom ka tsin mak.

²⁵ Kra ningkhan, ngi raq tsangshiq awere thun ka, phanrap ma tsat son kang. Lata, tsangshiq khuthaq na manson kiqsü she riikang. Lata sintsang maq tsat kang, kiimaq tsangkhushü maq hit-hihi hitkang. Latiishe, ngi raq, tsangshiq ka Shiikeawe mang na, tsangshiq riilo, riimak la, tsangsetiim jiimin, pongmung maiqse rai khesea riija klo wan maimak she nguta, tsangshiq ma tumkham tiinyang kang.

²⁶ Ngi raq tsangshiq ma, “Hokhamwe Solomon ngarai lam na sheahoti ka pongmung sheare raq riimak sha. Apaiq ka maiq mung ahinti hokhambi thaq na ajong pinthum riito. Shiikeawe raq apaiq ka kai lungwii raüta, Israil mung khuthaq na hokham ma shongto. Kiitin ajong alu we taü maq dongdii min, apaiq raq ara chongtiikai pongmung sheare lam wan ngarai tangto.

²⁷ Riita, ümchaü min, naishiq mungmaiqse raq, namshiq raq Shiikeawe tri jin lanta, pongmung sheare lam tlan, kra ngarai lam kriisha miphan wan dam hai?”

²⁸ Riita, tiinanpot ajiq pinthum she ka, Joiada ka Ramwe Ajong Pinthumwe Eliashib se riito. Shatmaq, Joiada setiim phong wa weshi riika, Beth Horon chela na siti welawe, Sanballat se kra lamto. Kriikha niishe, ngi raq Joiada ka Jerusalem wa jobaiq kang.

²⁹ O, Shiikeawe lei, tsangshiq raq asii ramwebi ngachang ngacho, kiimaq ümniiraq ramwebi nai Lewinok rai asii tongshong kham shong wan laü ramkhamkok ka, wiita sheshi baiqto. Tsangshiq raq arthun ashut klo wantaq kra ümtsan na tiitsang laq.

³⁰ Arthun ara kha niishe, ngi raq mungmaiqse ka pongmung maiqse hon atsii rong arai jamlai wa sitlaq, krii thun ashe ashi kiiwa, wiita asii phumram kham maq bat lata, tsangshiq khum ka tiisii hekuq kang. Lata, ramwebi nai Lewinok raq maiqmiimii jaqsham ka, khaqkhaq, jam kojo min ahü maq sham wan miitu, tsangshiq ma tri raü ka, samhea tiipha khakuq nong kang.

³¹ Kiimaq, honglu kuq tlaq kra, chaq chang chin raa tlaq kra, akhing khaq khaq na Shomjam na chomke wan miitu, jaqsham ka aphea riikuq kang. Kiimaq mungmaiqse raq, raipo wonglo tsikhu wa tsamnye jut tlaq kiiwa kuq tlaq kra, kiimaq petsi wiqtsam tsikhu wa honglu na kuq tlaq kra tsapkapkap maq, akhing khaqkhaq na kewan raa nguta jaqsham ka aphea riikuq kang. O, Shiikeawe lei, ngi raq arthun jaqsham wan tiikang ara, ümtsan na tiitsang shat riilaq. Laüta, ngi ma ana tokuq laq.