JEPHANIA 1 - ASII LAKDAP Bible (BSI)

¹ Arka Tatiwe tsütsa, Jephania ma akuq, Amon se Josia ka Juda mung na hokham jatlaq pat na. (Jephania ka Hokhamwe Hejekia lai, Amaria lümaq, Gadalia lümaq, kiimaq Kushi lümaq).

Tatiwe Raq Juda Mung Kha Mipho

² Tatiwe raq nguto, “Ngi raq mangjong hiq wa, phanrap tlotli mitiithen baiqha.

³ Maiqse angu, kiimaq ngamsaü ngiqse, wushi thun kiimaq ngiq thun, wiita mitiithenbaiqha. Ngi raq abi ati maiqse ka, mitiimiq baiqha. Ngi raq maiqse angu wiita mitiithen baiqha. Atra ashi min tiichong mak miraq; Arka ngi Tatiwe raq ngutiikang.

⁴ “Ngi raq Jerusalemti ma mo mitiihoha. Kiimaq Juda mungti tlotli. Kiiwa Baal phra shomnoq chang thun kra, wiita hiq maq hutse mitiithenbaiqha. Kiimaq apaiq shomnoqti, thatsang maiqse ramwebi mang, jurmin tiitsang mak she miraq.

⁵ Ngi raq wukhu na wa raüta, jurwa rashe, jipi, raiqsaiq thun kra, noqti ka wiita mitsat baiqha. Kiimaq imang chong raüta ngi shomnoqti, kiimaq iwokhong na siti nguta tiitumtati, shatmaq Molekh phra mang na, tumkham nyangti ka, wiita mishthenbaiqha.

⁶ Iwokhong wa juho raüta, ümtiikiimin ngi ritwa makti thun, mitiithum baiqha. Ngi rai riibom wan mak she, hon atsii waiso mak sheti kiimin, wiita mitsat baiqha.”

⁷ Tatiwe khapho ranaiq ka, saüwantlo she ajeli she. Kra ningkhan apaiq man na sanglili nga ronglaq. Tatiwe raq asenginok ka, honglu na take ma tiijetlo. Krai mren chiqse rewenok ka, Juda mung runbaiq miitu, tiihea kito she.

⁸ Tatiwe raq ngutlo, “Kra maiqjiipbaiq ranaiq, ngi raq ajong alabi, hokhamwe setiim, kiimaq pongmungti thunglai langtibi thun, kriima imo mitiihoha.

⁹ Ngi raq thatsang maiqse raq, shomnoqtlaq ikha shomnoqtibi, ahuk jati, kiimaq maiqtseati, raüta tsangtijongwe jam ka, ahuk arot tsiiq tum maq tiima wantibi ka, wiita mitiichamchaoha.

¹⁰ Tatiwe raq ngutlo, “Kra ranaiq namshiq raq, Jerusalem na Ngiq Kilamchong na, agi asii maiqho trang mitai han. Kiimaq namshiq raq anye atei han, chela ba kiijaq, maiqhotrang mitai han. Kiimaq kin thun kiijaq atham wan trang, jonghea mitai han.

¹¹ Ara taihan jiila, maaho manyi hoqtrang ronglaq, namshiq chela mai na siti, jamkhano ngukla, laopanbi thun wiita atsaikai kun she miraq!

¹² “Kra akhing na, ngi raq lemtem sham lata, Jerusalem mirit kiha. Ngi raq ongkangshe nguta siwantibi, kiimaq kamto maq sitibi ma mo mitiihoha. Tsangshiq raq maiqmii nai maiqmii akha tiingotlo, ‘Tatiwe riika ahea min ngumak abi min ngumak tiina.’

¹³ Tsangtsiiq tsang-nyam tum thun, wiita mirun wan; tsangshiq jam thun kiimin, wiita mitiithen baiq; tsangshiq raq jamhai tlaq kiijiimin, silumak miraq. Kiimaq spiqro chhi tlaq kiimin, spiqtai nyanglu mak miraq.”

Tatiwe Khapho Ajong Ranaiq

¹⁴ Tatiwe ranaiq jonghea ka ajeli she, napto she, aje niishe jaqlolo she saü wantlo! Kra ranaiq ka khaphea ranaiq miraq, srea nolajongbi kiimin, aho anyi riichanchan jamkha ijasiq miraq!

¹⁵ Kra ranaiq ka tsankhiq heng ranaiq, pitlang pitthea riihum ranaiq miraq. Athen ajen wan nai athum wan ranaiq miraq. Rathaiq ranyaq ranaiq, ranyaq tangtang ranaiq, kiimaq phumthup ranyaq ranaiq miraq.

¹⁶ Kra ranaiq ka chiqchap rechap ranaiq, lerong tsü wan trang li she miraq. Rechap wan ma rewe giwa trang, re raq chela peruk thun run baiq ranaiq, rekhe kongmong chong thun, daqbaiq ranaiq miraq.

¹⁷ Tatiwe raq ngutlo, “Ngi raq maiqse khuthaq na, achong lot mai then wan mitiisaüha, maiqse angu wiita makchukwe ikha, phang rang phiim ra miraq. Tsangshiq raq i man na ngarai tangto. Kriikha na ümchaü tsangshiq tiijai ka, kham araü ikha miraü, Kiimaq tsangmaa phong ka hiq na, küramliira minam wan.”

¹⁸ Tatiwe raq apaiq tsankhiq tiichhi tlaq akhing na, tsangshiq chaq nai kampho riimin, tsangshiq tiiwongkuq lot mak miraq. Apaiq tsankhiq wa raq, mangjong hiq raikhü ka, wiita wa raq mikhiimbaiq. Apaiq raq mungmaiqse wiita, tiihanghiiq miili mitiithumbaiq, mangjong hiq na siti wiita mitiithumbaiq.