DUNGWVNC 32 - ASII LAKDAP Bible (BSI)

Saüla Pongse Sumla

¹ Ümtiikiiwa mungmaiqse raq Mosheq ka pum wa satki mak she, rahiq ka luhea she kiijaq siraiho kiita, tsangshiq ka Aron tro na riitamto raüta, apaiq ma akha nguto, “Nashiq ka Ejip mungwa shea wantiwe Mosheq ka jamkhii she wa jakita nashiq ri sapmai. Kra ningkhan nashiq shun sheati phra kaü ashi hailaq.”

² Kiijiishe Aron raq tsangshiq ma nguto, “Chaq niti thun namchaktiim, namse maiqwe sere, kiimaq jechakse re ni na titlaq thun kra ana ngi ma lamkuq wan ronglaq.”

³ Krai mren mungmaiqse wiita raq tsangshiq chaq niti thun ka chhut raüta, kriithun ka Aron ma lam kuq wanto.

⁴ Kiimaq apaiq raq niti thun ka jaüto, raüta wa na tiijamto. Raüta chaq ka thang na loto. Raüta chaq maq saüla pongse sumla ashi loto. Kra chhi raüta mungmaiqse raq nguto, “Israilnok lei, ahata nashiq phra kaü, Ejip mung wa nashiq sheawanti!”

⁵ Kiijiishe Aron raq saüla pongse sumla khaki na berong-wacha ashi haito. Raüta mungmaiqse ma akha tiitaito, “Anap ranaiq Tatiwe shreng poi ashi miklo rong i.”

⁶ Anap ranaiq ranap chu maq tsangshiq raq honglu na take ma nyamse thun wiijam lam wanto. Kiimaq nyamse wiijam ka rintii-honglu na kuq raüta aphaq ma lam wanto. Raüta mungmaiqse ka poi dung kra phaqsea she ngakito. Raüta kra poi ka chechok tsampii butja she tiipongpii wanto. Raüta hikong ikha sethoqja she kiicham wanto.

⁷ Kiijiishe Tatiwe raq Mosheq ma nguto, “Jaqlo sat-hotlo laq. Jamkhano ngukla ümsenginok ümniiraq Ejip mung wa tsuq wan laü kriiraq ngarai tangto kiimaq Ngi ka no niishe tsuq baiqto.

⁸ Ngi raq tsangshiq ma aming kuq lata lamphan tiichhikuq kang kriika phan mak she miimbaiqto. Tsangshiq raq chaq maq saüla pongse ashi loto, raüta kriishe shomnoq hoto. Raüta kriima honglu thun takuqto. Tsangshiq raq arka tsangshiq phra kaü, tsangshiq ka Ejip mungwa shea wanti nguta ngutlo.

⁹ Ngi raq asapha arnok arka wanshakshak nilan pinthumnok.

¹⁰ Ümchaü, ümniiraq Ngi ka naq tiiwinkiq. Ngi ka tsangshiq ma itsan khiq she. Kra ningkhan Ngi raq tsangshiq ka mitiithen baiqha. Kra latiishe Ngi raq ümnaq nai ümsaü ümsetiim ka maiq mung ashi jonghea ma mitiijaha.”

¹¹ Shatmaq Mosheq raq Tatiwe apaiq Shiikeawe ma tiipaiq neato raüta akha nguto, “Tatiwe riita ümniika ümsenginok, ümniiraq Ejip mung wa üm ningkun henghea kiimaq arang jonghea maq tiichhii wan laü kra miika, atinkhan ümtsan ka jaram wa tiikhiqho laü?

¹² Ejip mungti ma ümniiraq ümsenginok ka Ejip mungwa tsuq wan laüta pum thun na tiisii rai jiipbaiq wan miitu tsuq wanto nguta jaram tiingo wa? Naqkhiq kiq tsaq liishe. Üm tiima ka klai laq. Kiimaq ara phiiptsi chang chongthum mra ka ümsenginok thaq na naq tiisaükiq.

¹³ Ümjaq shisetiim Abraham, Isak, kiimaq Jakob ka tsan na tiitsanglaq. Kiimaq ümniiraq tsangshiq ma tsangsaü tsangsetiim ka ra na raiqsaiq diimtlaq kiikha mitiipaha nguta ramram kongphiq kiqkham kuqlaü kra tiimalaq. Kiimaq tsangshiq saüsetiim ma mung ashi ka wiita pattup pat-sa miitu tsangshiq tachong hupsam ma mikuqha nguta kiqkham kuq laü kra tsan na tiitsanglaq.”

¹⁴ Krai mren Tatiwe raq apaiq tiima tsantsii ka klaito. Kiimaq apaiq raq asenginok khuthaq na phiiptsi chang mitiithen baiqha nguta tiiphiip bomtaq kriika tiisaü mak riito.

¹⁵ Raüta Mosheq ka pum maq longpen wiinai siimhap ri na aming thun waiqje kra pi raüta sat hoto.

¹⁶ Shiikeawe apaiq raq ajaq maq longpen wiinai ka soqto. Raüta aming thun ka kriithaq na khat waiqto.

¹⁷ Kiimaq Joshua raq mungmaiqse rüriiq trang ka taito. Raüta Mosheq ma akha nguto, “Ngi raq piitiip na re riikhat riiriiq trang taitiikang.”

¹⁸ Mosheq raq treto, “Kriika rekhat tang raüta rüriiq trang ka riimak. Kiimaq rekhat tang mak raüta hoqsii trang min riimak. Kriika ashi ange trang trangtlo.”

¹⁹ Ümtiikiiwa Mosheq ka piitiip tho na aje niishe saüho raüta liikiita kra saüla pongse sumla kra chhito. Kiimaq mungmaiqse ka kiijaq awiinum sea chhito. Kra chhi raüta apaiq ka pinthum amokdung dung she khiqto. Kiijaq pumji chong na apaiq raq pitlaq longpen wiinai ka hiq na riiwak baiqto. Raüta kra longpen wiinai ka tiibun baiqto.

²⁰ Raüta tsangshiq raq alo saüla pongse sumla kra apaiq raq dopot riito. Raüta wa na tiijo baiqto. Raüta awinsetiim ma tiija baiqto. Raüta kra win ka kham rai shotto. Raüta Israilnok mungmaiqse ma tiinyangto.

²¹ Raüta apaiq raq Aron ma nguto, “Arnok raq jamlai riikaq phaüto, ümniiraq tsangshiq ma atinkhan pinthum ashut ngarai ka tiitang laü?”

²² Kiijiishe Aron raq treto, “Ngi miika naq khiq kiq. Ümniiraq arnok ka abi kiimung miitu kai honghea ngutri asap haü.

²³ Tsangshiq raq ngi ma akha nguto, ‘Nashiq Ejip mungwa tsuq wantiwe Mosheq ka jamkhiishe wa jakita nashiq ri sapmai. Kra ningkhan naishiq shun sheati phra kaü ashi klolaq.’

²⁴ Kriikha na ngi raq tsangshiq ma tsangshiq chaq lak tum thun kra lam wan ronglaq nguta thaü kang. Kiimaq tsangshiq phong wa juju jaq niiwa asiti raq kriithun ka chhut raüta ngi ma kuqto. Kiimaq ngi raq kra laktum thun ka wa na chaq kangta kiiwa ara saüla pongse arshe dongkito!”

²⁵ Kiijiishe Mosheq raq Aron raq mungmaiqse ka penglot mak she thaqbaiqto nguta sapto. Raüta tsangshiq jaqtinok makki na angok anginok miishe jakito nguta sapto.

²⁶ Kra ningkhan she apaiq ka tsangshiqnok piitiip kilamchong na chapto. Raüta akha tiihong raüta riimto, “Juwa Tatiwe rai pongtibi loweatek ana warong ra!” Krai mren Lewinok thun ka kunli ka apaiq tro na riitamto.

²⁷ Kiimaq apaiq raq tsangshiq ma akha nguto, “Tatiwe Israilnok Shiikeawe raq namshiq tarü loweatek raq maiqmii nepja ka wirang ronglaq nguta aming kuqtlo. Lanta ara kilamchong armaq phaho lanta piitiip mong kiimaq konü siim piitiip kilamchong kiina saüli kironglaq. Lanta maiqmii phunainotiim ka, maiqmii kongtibi ka, kiimaq maiqmii jam thoti ka jiipbaiq ronglaq.”

²⁸ Kiimaq Lewinok raq aming ka taito. Raüta kra ranaiq na maiqwere kong hingtsam jiipbaiqto.

²⁹ Kiimaq Mosheq raq Lewinok ma nguto, “Ümchaü ranaiq namshiq raq maiqmii khum ka namsetiim kiimaq namphu namnotiim thun kra tsatbaiq lanta Tatiwe shiikumpan ramwebi jaqsham miitu kiinong kuqlan she. Kra ningkhan Tatiwe raq namshiq ma apaiq achu shiiman kuqto she.”

³⁰ Kriimaq anap ranaiq niishe, Mosheq raq mungmaiqse ma nguto, “Namshiq raq phiiptsi chang ngarai tang lan. Shatmaq ümchaü ngi ka thongshi ri hali pum na Tatiwe phana miwa nongha. Jursap ngi raq namshiq ngarai kra diike miitu lamlu lo humraü.”

³¹ Raütiishe Mosheq ka Tatiwe phana hali jang wan nongto. Raüta akha nguto, “Arnok raq phiiptsi chang ngarai tangto. Tsangshiq raq chaq maq sumla phra ashi loto. Raüta kra shomnoqto.

³² Mangchan laüta tsangshiq ngarai ka diikuqlaq. Shatmaq ümniiraq diikuq maü jiila, ümniiraq ümsenginok mang thun waiqlaü lakdap kiiwa imang ka alamli riibaiqlaq.”

³³ Kiijiishe Tatiwe raq treto, “Iman na ngarai tangtibi thun mang ka ilakdap mong wa Ngi raq milam baiqha.

³⁴ Ümchaü ümniika kilaq, laüta mungmaiqse ka Ngi raq ümriiba na shea wan chang ngutiiwa chong kang kiijaq shea wanlaq. Tsan na tiitsang shat riilaq, irase raq ümniika mishun shea wan. Shatmaq Ngi raq arnok arma tsangshiq ngarai kha na imo tiihoke akhing ka saü wantlo she.”

³⁵ Kra ningkhan, Tatiwe raq thatsi ashi mungmaiqse khuthaq na tiisaüto. Jamkhano ngukla tsangshiq raq Aron ma chaq saüla pongse sumla tloto.