AJONJÜ 1 - ASII LAKDAP Bible (BSI)

Jerusalem Chelati Miitu Hoqtlo

¹ Jerusalem chela ka man na asengi raq ama riito! Mangjong maiqse wiita raq kai ra tsa ikha tsa wanto. Shatmaq ümchaü san mantinyung ikhiishe; Chela rümti aki miikiimbi thun re raq jiip baiqto. Rewe jaqkhon mong na shumwi kong miishe tiija wanto.

² Jerusalem mantinyung ikha waruwaru jonjütlo, amakphai sa atheaphi na rajun ikha. Kongtichü weshi ra riimin, apaiq tiijaiq wamak she. Pongmung hokhambi reraüshiti raq tiishaübaiqto, Kiithun wiita ümchaü apaiq ngengti siisaq.

³ Juda mungti ümchaü maiqdi maiqmakong she, tsangmung wa pongmung na tsuq wanto, Tsangshiq pongmung niishe sitlo, Tsangshiq hiqhü rahü she, Tsangshiq komtam chiqse rewe phong li she, Ajuchang lam ahü she.

⁴ Ümchaü san asii ranaiq niimin, Noqku jam na jumin wamak she, Kiijaq shishunti jechakse re chamchaotlo. Ramwebi ümchaü hannyitlo. Tsangshiq kilamchong keathung kaiqshak kaiqshishe, Jajon chela ümchaü aho ajü.

⁵ Rewe raq apaiq khat raüta tangto, Rewe raq apaiq jaqkhon mong na khonshat, Tatiwe raq apaiq ngarai pahea kha na, Apaiq tiichamchao wanto. Asetiim ka re raq lap wanto, raüta tsuq wanto.

⁶ Man wa Jerusalem phung angao thumwato, Apaiq rümti phukhu welabi, phaqsea lapmak chhingi ningkun ahü aramtsi ikha, ngamritti raq ngamjo tlaq ikha, ajo min lot mak she.

⁷ Jerusalem ka apaiq laqlaqse hiqmiq changkhü she, man niiwa jonglu kra tiimatlo, apaiq re jaq na saütaq akhing na, apaiq khrumti jumin ahü she, Ajaqtinok raq apaiq then jen ka, sunghea she slailiito.

⁸ Apaiq shreng manto thumto she, Apaiq ümchaü naiqhü ma she. Maiq thoda na chetlo. Angam agu amitsi ma hanynyi tlo, Jeasitsi ma atok hiq na kushat. Jerusalem raq akhum ka achong lot mai, ashut ashai ngarai klo raüta sheshi wanto.

⁹ Apaiq raq ngarai tangtaq kriika, ra na tiichhi ra-shra. Apaiq dea wan chang ngarai kho, apaiq raq chhimak riito. Kriikha na tsailam riihumto, Ajaqtinok raq khat raüta tangto, apaiq ümchaü Tatiwe man na, tiipaiqnea hoq tlo.

¹⁰ Ajaqtinok raq atsiiq tum thun wiita tsuq wanto; Apaiq raq tsangshiq ka asii Shomjam mong na nyap wan chhito, Kiijaq Tatiwe raq pongmunti tiiwamak riito.

¹¹ Asenginok ramlü ramshii haü wanto, Raipo wonglo jamin ahüshe riito. Tsangshiq tsiiq chong nyamchong, tsitsü riichüm miitu phaqsea maq klaito, “Tatiwe lei, ngi ara liilaq, ngi akit ajom riihum kang,” nguta chelati hoqtrang tlo.

¹² “Ngi ara liilaq,” nguta kriinyung hoqtlo, maiq wanleati achhichhi, “Ngi ma atinkhan chamchao tiisung kuqto, Arka maiq ahinti ju miimin tiisaü mak dea, Arka Tatiwe raq ngi ma, atsankhiq tsi ma tiisaüto.

¹³ “Apaiq raq ra wa watu tiikito, kra ikhum na nyaitlo, Apaiq raq ngi tiimin chang chhü tsanto, Ngi ka apaiq chhü na tiipatto, Raüta apaiq raq ngi ka, atsi agi asii tiishaü baiqto.

¹⁴ “Apaiq raq ingarai ma thun wiita raüpot weaje thüto. Raüta adam na tushi kha raüta thüto. Raüta kra ngaraitu ka idangkong na paqkuto. Ngi ka kra ngarai ma holai raq, pitlang pitthea tsaiwan kang. Tatiwe raq ngi ka, rejaq na tiishaübaiqto, ngi ka rewe jaqkhon na, kaidi wan kang.

¹⁵ “Tatiwe raq iphenlabi srea nolajong thun, chuphit nüphit slailiito. Apaiq raq rewe phong tiiki raüta, ijerobi thun tiithenbaiqto, Apaiq raq isenginok ka, spiqtsi thaüchang tham na ikha tiikit baiqto.

¹⁶ “Ngi ka arkha na hoqjü tiikang, imakphai sawa raq makhü jaqhü. Ngi ma tsaido jidoketi jumin ahü, ngi ma ningkun shoqketi jumin ahü. Rewe raq ngi ka longto she, raüta tangto. Isenginok jaq na jammin ahü siipe.

¹⁷ “Ngi khrumkuq wa rong ra, nguta hoqtiikang, shatmaq ngi khrumti jumin ahü. Tatiwe raq ngi ngengti chiqse rewe, mangrap mangrii hea wanto. Tsangshiq tarü raq ngi ka, ashe ashi apiichang kheatam ikhlishe liitlo.

¹⁸ “Shatmaq, Tatiwe ka tingting, jamkhano ngukla ngi raq apaiq aming jin kang. Mangjong maiqse tarü raq, ibomchong ara tiitsang rong laq, ijonjü tsi tlaq ka liirong laq, Isengi jetu jerobi re raq pongmung na, shumwi ma tsuq wanto.

¹⁹ “Ngi rai reraüshiti mung thun tiihea kang, shatmaq tsangshiq raq ngi laobaiqto. Ramwebi nai shiilangbi, tsang ramtsi ma chela mong na, phaqsea rit lam maq atsitsü thumto.

²⁰ “Tatiwe lei, tiitsang liilaq, ngi chamchao riihum kang ara, pitlang pitthea ngi! Itsan ka buntoshe ngarai maho tsi raq. Chiihea wea na maiq riijiipwa li she, jam mong niimin, maiq maa phongli she.

²¹ “Ngi hannyi tailaq, ngi khrumti jumin ahüshe. Ümniiraq ngi ma waqkhükham tiinyang laü, irewe thun ka chochikhiq she. Ümniiraq khamkuq laü ranaiq ira tiisaü laq, ijaqtinok kiimin ngi akhiisii michamchao laq.

²² “Tsangshiq ka tiishutbaiq laq, tsangshiq raq abi klotaq thun kha na, ngi ma mo tiiho laü ikha tiiholaq, tsangshiq ngarai thun miitu mo tiiholaq. Ngi ka chamchao tsi ma hanyitiikang, itsan mong na amitsihea sitiikang.”