1 Samuel 17 - Bibl Koad 21: Ar Bibl e Brezhoneg evit ar Vretoned

Pennad 17

¹ Ar Filistined a zastumas o armeoù evit ar brezel, hag en em zastumjont e Soko, a zo e Juda, hag e kampjont etre Soko hag Azeka en Efes-Dammim.

² Saül ivez ha tud Israel en em zastumas hag a gampas e traonienn an dervenn; hag en em renkjont evit ar brezel a-enep ar Filistined.

³ Ar Filistined a oa war ur menez eus un tu, an Israeliz a oa war ur menez eus an tu all, hag edo an draonienn etrezo.

⁴ Neuze e teuas er-maez eus kamp ar Filistined un den en em ziskouezas etre an daou lu hag a oa anvet Goliad; eus Gad e oa. E uhelder a oa c'hwec'h ilinad hag ur palvad.

⁵ Un tokarn arem a oa war e benn, hag e oa gwisket gant un hobregon skantek. Pouez an hobregon-se a oa pemp mil sikl arem.

⁶ Morzhedennoù arem en doa war e zivhar, hag ur speg arem war e zivskoaz.

⁷ Koad e c'hoaf a oa evel ur granenn eus ur stern-gwiader, ha beg e c'hoaf a boueze c'hwec'h kant sikl houarn. An hini a zouge e skoed a gerzhe dirazañ.

⁸ En em zerc'hel a reas eta, hag e krias da vagadoù renket Israel o lavarout: Perak e teufec'h er-maez, renket evit an emgann? Ha n'on ket ur Filistin, ha c'hwi servijerien Saül? Dibabit eta un den, ha ra ziskenno a-enep din.

⁹ Mar gell en em gannañ ganin ha va lazhañ, neuze e vimp dindanoc'h, met mard on trec'h warnañ hag e lazhan, c'hwi a vo didanomp hag e servijot ac'hanomp.

¹⁰ Ar Filistin a lavaras: Dismegañset em eus hiziv bagadoù renket Israel! Roit din un den, hag en em gannimp etrezomp.

¹¹ Saül hag an holl Israeliz a glevas komzoù ar Filistin, hag e voent spouronet hag o doe un aon bras.

¹² Hogen bez' e oa David, mab un Efratiad eus Betlehem Juda anvet Jese, hag en doa eizh mab. An den-se, en amzer Saül, a oa kozh, war an oad e-touez an dud.

¹³ Tri mab brasañ Jese a oa aet hag o doa heuliet Saül er brezel. Anvioù e dri mab aet d'ar brezel a oa: ar c'hentañ-ganet Eliab, an eil Abinadab, an trede Shamma.

¹⁴ David a oa an hini yaouankañ, an tri c'hoshañ a oa aet war-lerc'h Saül.

¹⁵ David a yae hag a zistroe digant Saül da vêsa deñved e dad e Betlehem.

¹⁶ Ar Filistin a dostae diouzh ar mintin ha d'abardaez, hag en em ziskouezas daou-ugent devezh.

¹⁷ Jese a lavaras da Zavid e vab: Kemer evit da vreudeur un efa gwinizh rostet-mañ hag an dek baraenn-mañ, hag o c'has d'ar c'hamp da'z preudeur.

¹⁸ Kas a ri ivez an dek fourmaj-mañ da benn o milier, hag e weli da vreudeur evit gouzout hag ez int yac'h, hag e tegasi keloù din.

¹⁹ Saül hag int hag holl dud Israel a oa e traonienn an dervenn, oc'h ober brezel a-enep ar Filistined.

²⁰ David a savas eta mintin mat, a lezas an deñved gant ur mêsaer, a gemeras e samm, hag a yeas evel m'en doa gourc'hemennet dezhañ Jese. Erruout a reas er c'hamp, an arme a yae hag en em renke evit an emgann, hag e laoskjont youc'hoù brezel.

²¹ Israel hag ar Filistined o doa renket arme a-enep arme.

²² David en em zisammas diouzh e vec'h, a lezas etre daouarn an hini a ziwalle ar pakadoù, hag e redas etrezek renkoù an arme. Dont a reas hag e c'houlennas digant e vreudeur hag e oant yac'h.

²³ Evel ma komze ganto, setu, an den anvet Goliad, ar Filistin eus Gad, en em lakaas etre an daou lu, en ur bignat er-maez eus renkoù ar Filistined. Hag e lavaras an hevelep komzoù, ha David a glevas anezho.

²⁴ Hag holl dud Israel, pa welent an den-se, a dec'he dirazañ hag o doe ur spont bras.

²⁵ Ha tud Israel a lavare: Ha gwelet hoc'h eus an den-se a bign aze? Evit dismegañsiñ Israel eo pignet. Met mar lazh unan bennak anezhañ, ar roue en kargo a vadoù, reiñ a raio dezhañ e verc'h, ha frankizet a dailhoù e vo ti e dad en Israel.

²⁶ David a gomzas gant an dud a oa gantañ hag a lavaras: Petra vo graet d'an den a lazho ar Filistin-se hag a lamo an dismegañs diwar Israel? Rak piv eo ar Filistin-se, an diamdroc'h-se, evit dismegañsiñ armeoù an Doue bev?

²⁷ Hag ar bobl a adlavaras dezhañ an hevelep komzoù o lavarout: Kement-se a vo graet d'an den en devo e lazhet.

²⁸ Ha pa glevas Eliab e vreur henañ e komze d'an dud-se, kounnar Eliab a entanas a-enep David, hag e lavaras: Perak ez out diskennet? Gant piv ec'h eus lezet an nebeud deñved-se er gouelec'h? Anavezout a ran da lorc'h ha drougiezh da galon. Diskennet out evit gwelout an emgann.

²⁹ David a respontas: Petra am eus graet bremañ? Komzet em eus, ha setu tout.

³⁰ Hag e lezas anezhañ hag ez eas da gavout unan all, evit lavarout an hevelep traoù. Hag ar bobl a respontas dezhañ evel ar wech kentañ.

³¹ Ar c'homzoù a lavare David a voe klevet. Kontet e voent da Saül, hag e lakaas anezhañ da zont.

³² David a lavaras da Saül: Ra ne gollo den kalon en abeg d'an den-se. Da servijer a yelo hag en em ganno gant ar Filistin-se.

³³ Met Saül a lavaras da Zavid: Ne c'hellez ket mont a-enep ar Filistin-se evit en em gannañ gantañ, n'out nemet un den yaouank, hag eñ eo un den a vrezel abaoe e yaouankiz.

³⁴ David a lavaras da Saül: Pa vêsae da servijer deñved e dad, e teue ul leon pe un arzh a gemere un dañvad eus an tropell.

³⁵ Hag ez aen war e lerc'h, e skoen warnañ, hag e tennen an dañvad eus e c'henoù. Ha pa save em enep, e krogen en e javed, e skoen warnañ hag e lazhen anezhañ.

³⁶ Da servijer en deus lazhet hag al leon hag an arzh, hag ar Filistin-se, an diamdroc'h-se, a vo evel unan anezho, rak dismegañset en deus armeoù an Doue bev.

³⁷ David a lavaras c'hoazh: An AOTROU hag en deus va dieubet eus pav al leon hag eus pav an arzh, am dieubo eus dorn ar Filistin-se. Neuze Saül a lavaras da Zavid: Kae, ha ra vo an AOTROU ganit.

³⁸ Saül a wiskas David gant e zilhad, un tokarn arem a lakaas war e benn, hag un hobregon a wiskas anezhañ.

³⁹ Goude David a c'hourizas e gleze war e zilhad, hag en em lakaas da gerzhout, rak n'en doa ket esaeet. David a lavaras da Saül: Ne c'hellan ket kerzhout, rak n'on ket boas. Ha David o lamas diwarnañ.

⁴⁰ Kemer a reas e vazh en e zorn, hag e tibabas er froud pemp maen kompez, hag o lakaas en e sac'h-mêsaer hag en e c'hodell. Hag, e vatalm en e zorn, e tostaas ouzh ar Filistin.

⁴¹ Ar Filistin a zeuas ivez, hag a dostaas ouzh David. An den a zouge e skoed a gerzhe dirazañ.

⁴² Ar Filistin a sellas hag a welas David, hag e tisprizas anezhañ, dre ma oa un den yaouank melegan gant un dremm vrav.

⁴³ Ar Filistin a lavaras da Zavid: Hag ez on ur c'hi, ma teuez da'm c'havout gant bizhier? Hag ar Filistin a villigas David dre e zoueoù.

⁴⁴ Ar Filistin a lavaras c'hoazh da Zavid: Deus da'm c'havout, hag e roin da gig da laboused an neñv ha da loened ar parkeier.

⁴⁵ David a lavaras d'ar Filistin: Dont a rez a-enep din gant ar c'hleze, ar goaf hag ar skoed, met me a zeu a-enep dit en anv AOTROU an armeoù, Doue armeoù Israel, ac'h eus dismegañset.

⁴⁶ Hiziv an AOTROU a lakaio ac'hanout etre va daouarn, da lazhañ a rin, da benn a lamin diwarnout, korfoù marv kamp ar Filistined a roin hiziv da laboused an neñv ha da loened ar parkeier, hag an douar holl a ouezo ez eus un Doue en Israel.

⁴⁷ Hag an holl engroez-mañ a ouezo na zieub ket an AOTROU dre ar c'hleze ha dre ar goaf, rak an emgann a zo d'an AOTROU , hag ho lakaat a raio etre hon daouarn.

⁴⁸ Evel ma savas ar Filistin, ha ma teuas ha tostaas ouzh David, David a hastas hag a redas etrezek linenn an emgann a-ziarbenn d'ar Filistin.

⁴⁹ Neuze David a lakaas e zorn en e sac'h, a gemeras ur maen dioutañ, e daolas gant e vatalm, hag a skoas gant ar Filistin en e dal, hag ar maen a yeas don en e dal. Hag e kouezhas war e zremm d'an douar.

⁵⁰ Evel-se David, gant ur vatalm hag ur maen, a voe kreñvoc'h eget ar Filistin, hag e skoas gant ar Filistin, hag en lakaas d'ar marv. David n'en doa kleze ebet en e zorn.

⁵¹ David a redas, en em daolas war ar Filistin, a gemeras e gleze a dennas eus e c'houin, en lazhas, hag a droc'has dezhañ e benn. Pa welas ar Filistined e oa marv o den kreñv, e tec'hjont.

⁵² Tud Israel ha Juda a savas, a laoskas kriadennoù a levenez, hag a redas war-lerc'h ar Filistined betek digor an draonienn ha betek dorioù Ekron. Hag ar Filistined gloazet d'ar marv a gouezhas war hent Shaaraim betek Gad ha betek Ekron.

⁵³ Mibien Israel a zistroas eus redek war-lerc'h ar Filistined, hag e preizhataas o c'hamp.

⁵⁴ David a gemeras penn ar Filistined hag e gasas da Jeruzalem, hag e lakaas e armoù en e deltenn.

⁵⁵ Pa welas Saül David o vont a-ziarbenn d'ar Filistin, e lavaras da Abner penn e arme: Abner, da biv eo mab an den yaouank-se? Hag Abner a respontas: Ken gwir ha ma vev da ene, o roue, n'ouzon ket.

⁵⁶ Ar roue a lavaras: Goulenn eus piv eo mab ar paotr-se.

⁵⁷ Pa zistroas David eus lazhañ ar Filistin, Abner en kemeras hag en kasas da Saül, gant penn ar Filistin en e zorn.

⁵⁸ Saül a lavaras: Den yaouank, da biv out mab? David a respontas: Me a zo mab da'z servijer Jese eus Betlehem.