DANIEL 2 - Bukuit Ne Tilil

Karwotitoetap Nebukadnezar

¹ Eng' kenyiitap aeng' ne po laitornatetap Nebukadnezar, korwotyi Nebukadnezar karwotitaosyek che ki yai koimak muguleldonyi ak kobeetyi rwondo.

² Ki ng'at anyun laitoryat keguur piik che ng'oomen, che ng'oorsei, ng'amotigap kecheik, pooniik ak Kaldeik si komwachi laitoryat karwotitaosyekyik. Ki pwa anyun ko ak kotononso eng' taitap laitoryat.

³ Ki leenji `laitoryat icheek, “Koarwotyi karwotitoet ak iimaat saboondanyu komachei konai agobo karwotitaonooto.”

⁴ Ki ng'alaalji anyun `Kaldeik laitoryat eng' kutitap Syria koleenji, “Ee, laitoryandani, iwe keny! Mwaiwech acheek otwogiguk agobo karwotitaonooto asi ki arorun kaguyennyi.”

⁵ Kowolji `laitoryat Kaldeik koleenji, “Po iman ng'olyoot ne kaatil ale ngot ko moboorwo karwotitaonooto ak kaarorennyi, ketonatonok, ak koek kooriikwok karaatwek!

⁶ Ago ngot oboorwo karwotitoet ak kaarorennyi, onyooru eng' anee konunoik ak melekwek ak teegisto ne oo. Oboorwo anyun karwotitoet ak kaarorennyi.”

⁷ Kowolji ne po aeng' koleenji, “Ingomwaiwech `laitoryat acheek otwogikyik karwotitaonooto, si kibooru kaaroret.”

⁸ Kowol laitoryat kole, “Angen komyee ale omache onyooru poroindo, amu po iman ng'olyoondoniito kaatil:

⁹ ale ngot ko moboorwo karwotitoet, komi ng'atuutyet agenge ne nyoljinok. Koochop lembechek ak ng'aleek che yaacheen omwa eng' tainnyu kot kowalak peetuusyek. Omwaiwo anyun karwotitaonooto, si anai ale omuuchi oboorwo kaarorennyi.”

¹⁰ Kowol Kaldeik eng' taitap laitoryat kole, “Ma mi chii ng'wony ne imuuchi koboor ng'olyoondonooto po laitoryat! Ma mi laitorya, agot nda oo anan ko kiim ne kiga koteebei kiy ne uu nooto chii age tugul ne ng'oom, ne ng'oorsei anan ng'amotyotap kecheik anan Kaldeindet.

¹¹ Ni ka teep laitoryat ko kiit ne ma po kotugul, ama mi age ne imuuchi koboorchi laitoryat kobatee kamuktaik che meng'otennywa koma menyei ak piik.”

¹² Ki nereech anyun miising' laitoryat eng' nereegek che ng'woneen ak kong'at kebar ng'amotigap Babilon tugul.

¹³ Ki wo anyun ng'atuutyet keele kebar piik che utaatiin, ak ki kicheeng' Daniel ak choronokyik keele kebar.

Keng'ang'jin Daniel Karwotitoet

¹⁴ Ki wol anyun Daniel eng' naet ak ng'omnateet, kowolji Ariok, kiptaiyatap riibiigap laitoryat ne ki kawo kole kobar piik che ng'oomen che po Babilon.

¹⁵ Ki wolji `Daniel Ariok kiptaiyatap laitoryat koleenji, “Amu nee si kogoromit ko uu ni ng'atuutyoni punu laitoryat?” Ki mwachi Ariok anyun Daniel agobo ng'olyoondonooto.

¹⁶ Ak ki wo Daniel ko oriit ak kosoom laitoryat kole keng'atyi peetuut si koboorchi laitoryat kaaroret.

¹⁷ Ki wo anyun Daniel kaa ak koboorchi ng'olyoondonooto choronokyik Hananiah, Mishael ak Azariah,

¹⁸ si kosoom rireenosyegap Kamuktaindetap kipsengwet agobo ung'ootyoni kole si ma ki par Daniel ak choronokyik kobooto piik alak che ng'oomen che po Babilon.

¹⁹ Ki king'ong'ji anyun Daniel ung'ootyonooto eng' ng'ang'utyet ne po kemoi. Ki ilas anyun Daniel Kamuktaindetap kipsengwet,

²⁰ komwa kole, “Iberuurot kainetap Kamuktaindet koigeny ak koigeny, amu nenyi utaatyet ak kamuktaet.

²¹ Wolei peetuusyek ak kenyiisyek, istoi laitorinik, ak koeeti laitorinik; igoochin utaatyet che utaatiin, ak kogoochin naet icheek che ingen kaguiyet.

²² Ng'aanyei tuguuk che looen ak ko ung'ootiin. Ingen tuguuk che mi mesundeito, ak komenyei lapkeiyet kobooto ineendet.

²³ Aweegun kongoi ak alasun, ee inyee, Kamuktaindetap kwanisyekyuk, ne ki igoono utaatyet ak kamuget, ak kaiboorwon nguno kiit ne kogimagenen, amu kaiboorwech ng'olyootap laitoryat.”

Kaaroretap Daniel agobo karwotitoet

²⁴ Ki wo anyun Daniel ole mi Ariok, ne kiga kong'at laitoryat kole kobar piik che ng'oomen che po Babilon, ak komwachi kole, “Amat ibar piik che ng'oomen che po Babilon, imuta ole mi laitoryat, si aboorchi laitoryat kaaroret.”

²⁵ Ki imut anyun `Ariok Daniel kochaaktae kwo taitap laitoryat ak koleenji, “Kaanyooru chii eng' lagogap piik che ki kiluul che po Judah ne imuuchi koboorchi laitoryat kaaroret.”

²⁶ Ki teebe `laitoryat Daniel ne ki kiguuree kora Beltesaser koleenji, “Tos imuuchi iboorwo kiit ne ki ageer eng' karwotitoet, ak kaarorennyi?”

²⁷ Kowol Daniel eng' taitap laitoryat kole ung'ootyet ne kateep laitoryat koma imuuchi piik che ng'oomen, anan ng'amotigap kecheik, anan piik che ng'oomen che ng'oorsei, anan chepsogeinik, koboorchi laitoryat,

²⁸ ago mi Kamuktaindet kipsengwet ne ng'aanyei ung'ootik, ak kagoboorchi Laitoryat Nebukadnezar tuguuk che tuun piitu eng' peetuusyek che po let. Karwotitoeng'ung' ak ng'ang'utik che ki pwa meting'ung' eng' itogung'ung' ko chu:

²⁹ Inyee, ee laitoryat, ye ko imi eng' itogung'ung', ko ki pwonjin kabwaatutik agobo tuguuk che tuun piitu let; ak kagoboorun ineendet ne ng'aanyei ung'ootik, tuguuk che tuun piitu.

³⁰ Ago eng' anee, koma king'ang'wa ung'ootyoniito amu utaatyet age tugul ne atinye kosiir chii age tugul ne sabei, ago si kobiit kiboorchi laitoryat kaaroret, ak si kobiit inai kabwaatutigap muguleldang'ung'.

³¹ Koigeer inyee, ee laitoryat, kanamwet ne oo. Ki tonone taing'ung' kanamwonooto oo, ne ko karaaran miising' kakweng'ennyi ak komuisyei itondanyi.

³² Ko po thahabu ne karaaran metitap kanamwonooto, ko po fedha togeennyi ak eunekyik, ko po sugunwet, moennyi ak kubesaikyik

³³ ko po karnet, keelyekyik ko po karnet, kebebertap keldebesaikyik ko po meneet kebeberta age.

³⁴ Ye kota igeere, keep koita ne ma kiebe eunek, ak kokwer kanamwonooto eng' keelyekyik po karnet ak meneet kotonatonagis.

³⁵ Ki tonogis anyun tugul; kariik, meneet, sugunwet, fedha, ak thahabu ak koigei meteteegap rwanyut ne kiboorsee ak koip usoonet kot ko mata kenyoorchi ui. Ki ek tulweet ne oo koyato kotuei kanamwet ak konyi emet komugul.

³⁶ Karwotitoet niito; ara nguno anyun kany kemwachini laitoryat kaarorennyi.

³⁷ Ee laitoryat, ii laitoryatap laitorinik, ne kogogoochi Kamuktaindetap kipsengwet pounateet, kamuget, kimnateet ak toroornatet;

³⁸ ak ki kogoonin `ineendet piik che menyei oldo tugul, tyong'igap timiin, toriitigap parak kobwa eung'ung' ak ki kogoonin ibou icheek tugul. Inyeendet metoto po thahabu.

³⁹ Ak ye tuun ma imi, kobiit pounateet age ne matenitu neng'ung'; yeityo kobiit pounateet age ne po somok, ne po sugunwet, ne tuun pou ng'wony komugul.

⁴⁰ Ak tuun piitu pounateet ne po ang'wan, ne kimitu ko uu karnet; amu tonatoni karnet tuguuk tugul ak koterteer. Ak ko uu ye nyinyiri karnet chuuto tugul, ko uu nooto tuisyei agine pounatonooto ak konyirnyiris.

⁴¹ Ak ko uu ye koigeer keldebesaik kobooto morik, ne kebebertap meneetap cheptereniot ak kebebertap karnet, ak koegu niito pounateet ne pcheoksei; ago mi oriitinnyi kebebertap kimnateetap karnet, ko uu ye koigeer karnet ko purugot ak meneet ne pooto ng'ung'unyek.

⁴² Ak ko uu ye ko po mooriigap keldebesaik kebebertap karnet ak kebebertap meneet, ko uu nooto pounatonooto, kimitu kebeberta age ak kobutok kebeberta age.

⁴³ Ak ko uu ye koigeer ko purugot karnet ak meneet ne pooto ng'ung'unyek, koburuchegei ak iyoteetap piik; ago ma namegei age ak age, ko uu ye ma puruchegei karnet ak meneet.

⁴⁴ Ak tuun lumdoi Kamuktaindetap kipsengwet eng' peetuusyegap laitorinichooto pounateet ne ma koi king'em, ama kigoochin laitornatanooto poror age. Tuun tuatui ak kogees pounatosyechuuto tugul, ak tononi koigeny,

⁴⁵ ko uu ye koigeer ile ko ki ep koita ne komi tulweet ama eng' eunek, ak kotuatui karnet, sugunwet, meneet, fedha, ak thahabu. Kagoboorchi `Kamuktaindet ne oo laitoryat tuguuk che tuun piitu let. Po iman karwotitoet ak kosuldoi kaarorennyi.

Katorooretap Daniel ak choronokyik

⁴⁶ Kobutyi ng'wony anyun Laitoryat Nebukadnezar ak kolas Daniel, ak kong'at kole kigoochi kagoochinet kobooto nyamdutik che anyiny.

⁴⁷ Kowolji `laitoryat Daniel koleenji, “Iman, Kamuktaindeng'wong' ko Kamuktaindet ne pou kamuktaik, ak ko Kiptaiyatap laitorinik ak ng'ang'indetap ung'ootik, amu kaimuuch ing'aany ung'ootyoni.”

⁴⁸ Ki eet anyun `laitoryat Daniel, ak kogoochi ineendet kagoochinoik che eecheen, ak kogoochi ineendet koboi emet komugul ne po Babilon, ak koek kirwoogindet ne oo ne pou piik tugul che ng'oomen che po Babilon.

⁴⁹ Ki soom `Daniel laitoryat konde Shadrak, Meshak ak Abed-nego koboi ng'aleegap emetap Babilon. Ago ki ng'et Daniel kotebee ormariichetap laitoryat.