DUNGWVNC 3 - Hawa Naga Bible 2001

Tishox rueq Moshe Gvl tueq

¹ Raungnuiyq shiz nuex Moshe kuex Midian shomc waz vguz Jethro khelbuenx nuiyc khelkhix htenc kuex remc kuq yaq nuex, khelbuenx nuiyc khelkhix htenc kuex kumtsvy tvnx maq tvyanz goalx laq vtueq Sinai ngoz yaq vsawc kanx nuex httuiuc kaz tueq.

² Kvruex baung kvyuq Yehowa raungkamx waz kuex rumz vshiz mungx kvmaq wvrluic ikhoc dung kaz tueq. Rumz nuex wvrluic thuiyc yaq kuex Moshe rueq khiz tueq, yuq muinz rumz kuex khamc muq.

³ Piq rueq, “Vruex kuex pungx mvnauz, yvmx rvtueq lac rumz kuex khamc muq? Ngaz kvruex hep kvyuq kaz vtueq lawc khaungx,” ngoz tueq tvmaung tueq.

⁴ Moshe kuex kvruex hep nuex kaz koq tueq, Yehowa rueq khiz vtueq rumz mungx kvmaq, “Moshe! Moshe!” ngoz tueq gvl tueq. Moshe rueq, “Ayc, ngaz vyuq luez,” ngoz tueq tvralc tueq.

⁵ Tishox rueq, “Nyek hvlc nuex nauk kaz vkueq. M-yaz paungc kuex put shuiuz, yvmx khoc lac ngoz ruiux lec mnoz jvp vtuiux baung kuex vsawc rvtueq.

⁶ Ngaz kuex mjix m-waz tamx Tishox, Abraham, Esak, Yaku Tishox rvtauk,” ngoz tueq jungx tueq. Kvkhoc rvtueq Moshe rueq vhtvlx kuex puingc gay tueq, yvmx rvtueq lac ngoz ruiux lec piq kuex Tishox muex hiz vtueq lawc khvmc muq.

⁷ Kvruex yimaq Yehowa rueq, “Ngvy miqsaz htenc Ejip mungx nuex kuilc daz rvhumc yaq kuex ngaz rueq rvkhauk laz khiz tauk; tsuingshiq muex nvrc jix hez rueq guirguenz yaq kuex nanx lot muq ningkhvnc nuex tsuingshiq muex romc lawc kuy tvkoc guyc sez kvjaz kuex ngaz rueq tay tauk. Tsuingshiq rvhumc yaq htemc vrvmc lotlaz ngaz rueq tuiuz yaq,

⁸ kvkhoc rvtueq Ejip miqsaz yauk wawc tsuingshiq kuex palc wvnc vtueq, Ejip mungx maq tvdung wvnc ruiux, puix nuiyc nyaq ngurx dung yaq mungx nuex tsuingshiq kuex shvlc wvnc tvkoc ngaz svt kaz tauk. Kvruex mungx kvyuq Kanaan, Hitti, Amori, Perizi, Hiwit nuiyc Jebusi phvnx htenc majuiuc httax wuez yaq,

⁹ Ngvy miqsaz khoarc sez tvruingc kuex tay tauk, tsuingshiq kuex Ejip miqsaz rueq yvmx khoc lac guirguenz yaq nguinx kvmuinz ngaz rueq khiz tauk.

¹⁰ Majuiuc ngaz rueq mnoz kuex Ejip hokhvmx waz kox nuex tvkaz vphaungx, kvkhoc rvtueq mnoz rueq ngvy miqsaz htenc kuex piq mungtan wawc tvdung kaz kuiuz,” ngoz tueq jungx tueq.

¹¹ Yuq muinz Moshe rueq Tishox muex ngoc, “Ngaz kuex khuec guez miq, ngaz hokhvmx waz kox nuex kaz vtueq Israel miqsaz kuex Ejip mungx wawc yvmx khoc maq lac tvdung wvnc lot shaungx,” ngoz tueq jungx tueq.

¹² Tishox rueq, “Ngaz kuex mnoz rulc vdvmz httax taungx, mnoz rueq miq htenc kuex Ejip mungx wawc tvdung shvlx wvnc vtueq, vruex kanx vmaq ngaz muex nawk palx kuq phuinx. Vruex kuex ngaz rueq mnoz tvkaz phaungx lvmz hakhix rvtuex,” ngoz tueq jungx tueq.

¹³ Yuq muinz Moshe rueq, “Ngaz kuex Israel miqsaz kox nuex kaz vtueq tsuingshiq muex ngoc, ‘Nuimshiq jix vwaz tamx Tishox rueq ngaz kuex nuimshiq kox nuex tvkaz phuex,’ ngoz tueq jungx ruiux yuq, tsuingshiq rueq, ‘Piq muingc kuex yvmx khoc lac?’ ngoz tueq wiz ruiux, ngaz rueq yvmx khoc lac jungx shaungx?” ngoz tueq tvralc tueq.

¹⁴ Tishox rueq, “Ngaz kuex Ngaz rvtauk. ‘Ngaz rvtauk ngoz tueq kvmuingc jix waz rueq nuimshiq kox nuex ngaz tvkaz phuex,’ ngoz tueq Israel miqsaz muex jungx kuq shuiuz.

¹⁵ Israel miqsaz muex jungx kuq shuiuz, tsuingshiq jix vwaz tamx Tishox, Abraham, Esak, Yaku Tishox, Ngaz Yehowa rueq mnoz kuex tsuingshiq kox nuex tvkaz vphaungx. Vruex muingc kuex pattup pat-sac yaungx tuex; yix maq miqphvnx lotlaz miqpat ruip rawx rueq ngaz kuex gvl wuez phuex.

¹⁶ Mnoz kaz vtueq Israel miqsaz walaungx bix kuex tvtuimx ruiux, tsuingshiq muex jungx shuiuz, tsuingshiq jix vwaz tamx Tishox, Abraham, Esak, Yaku Tishox, Ngaz Yehowa rueq mnoz kox nuex kvkhic kaz tueq lvmz tsuingshiq muex jungx shuiuz, ngaz tsuingshiq kox nuex kaz vtueq Ejip miqsaz rueq tsuingshiq muex ruez yaq kuex khiz tauk.

¹⁷ Ngaz rueq tsuingshiq kuex Ejip mungx wawc tvdungc shvlc wvnc tvkoc htvp htaz wuez shex, tsuingshiq guirguenz yaq kvwawc shvlx wvnc vtueq, puix nuiyc nyaq ngurx dung yaq mungx, Kanaan, Hitti, Amori, Perizi, Hiwi nuiyc Jebusi phvnx htenc httax yaq mungx nuex shvlx wvnc tvkoc htvp htaz tauk shex.

¹⁸ “Mnoz rueq jungx shuiux kvjaz kuex ngvy miqsaz rueq tay shuex. Kvruex yimaq mnoz kuex Israel walaungx bix rulc vdvmz Ejip hokhvmx waz kox nuex kaz vtueq, ‘Hebre miqsaz Yehowa Tishox kuex kvkhic phuex shex. Majuiuc nuiyshiq Yehowa Tishox muex shomc nawk kuy tvkoc nuiyq thuimx lvmx kumtsvy tvnx nuex kaz phix,’ ngoz tueq thoz shuinz.

¹⁹ Ejip hokhvmx waz kuex hung vtueq tvgap kawx ruec guez maq nuimshiq kuex tvkaz kv-phuinx rvmuq ngaz rueq tuiuz yaq.

²⁰ Yuq muinz ngvy luimc vkawc maq vhiz sungx juing htenc shuimx lvmz vtueq, Ejip mungx kuex murx tvgurc shaungx. Kvruex yimaq jix piq rueq nuimshiq kuex tvkaz shuex.

²¹ “Nuimshiq kvruex mungx maq kaz wvnc ruiux yuq, sawx poalx maq kaz wvnc muit tvkoc Ejip miqsaz rueq ngvy miqsaz htenc muex tvtsanc nganc tvkoc ngaz rueq ruez shaungx.

²² Israel nyuiuz rulx lotlaz rueq yuimx phic vphaungx wuinz Ejip miqsaz kox wawc nuiyc miqmac yuimx nuex httax naungx yaq Ejip shvlx rulx kox wawc khoz vkhvy, kuimshawx nuiyc kuimphox hup vsvmx htenc kuex thoz wuez shuinx. Israel miqsaz nuimshiq suiuz vsaz htenc muex kvruex maq tvmarc rarc kuq vtueq, Ejip miqsaz hup vsvmx htenc kuex lvmz laq wuez shuinx,” ngoz tueq jungx tueq.