VERSIÓN OÑEʼẼVA ÑEʼẼTEKUAA

Ñandejárare rejerovia ramo, umi mba’e ijetu’uetereva ñande rekovépe ojehupíramo jepe, ikatu reñemombarete. Jaikóramo guare ko yvy ape ári, heta mba’e py’ỹi ha jehasa’asy jahasa va’erã. Oĩ umi ndahasýiva ha oĩ avei umi ñandepy’ajopýva. Heta tapicha noñemomba’éi Ñandejárare ojerovia haguã, oimo’ãgui hembiapokuéra naiporãiha. “Angaipa ñanemomombyry Ñandejára mborayhúgui” ha katu ñapensáramo ijykére iporãvéva: “Ñandejára mborayhu ñanemomombyry angaipágui”. Upévare, ejerovia ha eñemboja Chupe.

Ikatu ñapensa Jesús rehe jerovia ñamoĩ rire, opa mba’e oĩ porãmaha. Ha añetehápe, peteĩ hendápe, upéicha. Ñane mba’e iñimportantevéva oĩma porã: ñande rekove opave’ỹva. ¡Jaikuaáma Jesús ndive jaikotaha opa árape guarã! Ha katu, ko’áğa gueteri jaiko ko yvy ape ári ha heta mba’e ijetu’u jahasáta gueteri. Ñandejára ndive ñaime jave ha ñe’ẽ jave Chupe ára ha ára, py’aguapy ha pytu’u jahupyty ñane ángape. Eñemboja Chupe ha eme’ẽ Chupe opa nde remikotevẽ.

Ñandejárare jerovia ndaha’éi ja’e’ỹha jahasataha mba’e py’ỹi térã mba’e ijetu’uetereva. Ha katu, ñanepytyvõ ñambohovái haguã kyhyje’ỹme ha jeroviápe. Ojeroviáva Ñandejárare oikuaa Ha’e ndohejamo’ãiha chupe ha nombohasamo’ãiha mba’e ogueropu’akavétavagui. Ejerovia Ñandejárare ha eñemopy’aguapy. Ko’ápe retopáta heta Ñandejára Ñe’ẽ nepytyvõtava rejeroviave haguã Chupe.

Añetehápe oujevyva’erã ndéve g̃uarã peteĩ ko’ẽ porã, ha nde jerovia noñembyaimo’ãi.

Ñaha’ãrõñaína pe tekove tapia g̃uarãva, Ñanderuete ndaikatúi ijapu, oprometeva’ekuégui umi ára atyguasu mboyve.

Ñanderuete ohayhuetégui opaite tetãyguakuérape Ha’e ome’ẽ Ita’ýra peteĩetévape, opaite ojeroviáva guive hese ani hag̃ua oñehundi, oguereko hag̃ua uvei pe tekove tapia g̃uarãva.

Pe angaipa repy ningo pe ñemano, Ñanderuete me’ẽmby rei katu pe tekove tapia g̃uarãva Ñandejára Hesu Crísto pendepype.

Ha pe tekove tapia g̃uarãva ningo kóva: Tandekuaa hikuái ndéve, Ndémante Ñanderuete añeteguáva, ha toikuaa avei pe Nde rembouva’ekue, Hesu Crísto.

Kóva ningo pe Ha’e oprometeva’ekue ñandéve: Pe tekove opa’ỹva.

Upémaramo Hesu he’i ichupekuéra: Che voi ningo pe pan oikovéva, oimeraẽva oúva guive che rendápe naiñembyahyimo’ãi araka’eve, ha ojeroviáva guive cherehe, máramo ndaijy’uheimo’ãvéi.

Che Ruete, che aha’ãrõ Nde cheguenohẽ hag̃ua che jejopy vaígui.

Ha ko’ág̃a, che Ruete, mba’épa aha’ãrõvekuaa, nderehénte ajerovia.

Che katu, ama’ẽta Ñanderuete rehe, che ajeroviáta che Jára, che pytyvõhára rehe, Ha’émante cherendúta.

Che areko pe esperánza umi omanova’ekue oikove jevytaha, taha’e heko potĩva térã iñañáva, opaite ko’ã mba’e ha’ekuéra orovia avei.

ñanemopotĩ ha ñanemoĩ porã hag̃ua Ñanderuete ndive imborayhu rupi ha jahupity hag̃ua pe tekove tapia g̃uarã ñaha’ãrõva.

Ha ãva ohóta pe jehavira (castígo) ijapyra’ỹvape, ha umi heko potĩva katu pe tekove ijapyra’ỹvape (Daniel 12,2).

Añetehápe, añetehápe, Che ha’e peẽme: Upe ohendúva ha ojeroviáva pe chembouva’ekue rehe, oguerekóma pe tekove tapia g̃uarãva, noñecondenamo’ãi, ohasámagui omanóva apytégui oikovéva apytépe g̃uarã.

Nde orembohováita milágrope ha nde justícia rupi, Nde, ore Ruete, ore pytyvõhára opaite yvy apýra paha guive yguasu rembe’y mombyryvéva peve oĩha umi ojeroviáva nderehe.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Ha roagradece pe esperánza peẽ peguerekóva ha oñeñongatúva peẽme g̃uarã yvágape, péva pehendumava’ekue oñemombe’úvo peẽme Ñanderuete salvacion añeteguáva.

Opavave ojeroviáva guive Hesu Crístore, Ijára ramo, ojesalváta katuete.

Pe ojeroviáva Hesu Crísto rehe oikove tapia g̃uarã, upe iñe’ẽrendu’ỹva Hesu Crístope katu ndohechamo’ãi pe tekove tapia g̃uarãva, Ñanderuete ñemyrõ ha ijehavirarã (icastigorã) ndojeimo’ãi ichugui.

Hesu he’i ichupe: Che ningo pe tape, pe añetegua ha pe tekovete, avave ndaikatúi og̃uahẽ che Ruete rendápe cherehe’ỹ. Cherupímante uvei ikatu oñeg̃uahẽ Ñanderuete rendápe.

Ñanderuete ningo che Jára, he’i che ánga, upévagui ajerovia hese.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.

Hesu Crísto rupi ñande jahupitýma Ñanderuete poriahuvereko jopói, jajeroviágui hese, ha ñaime hatã ipype, ha javy’a jahupitytaha rehe avei Ñanderuete reko jajaipa.

Pe oporojopýva ho’a iñaña reko rupi; ha pe heko potĩva katu oñemoangapyhy gueteri iñemanóme.

Upe hoy’úva pe y oporomoingovéva Che ame’ẽtavagui ndaijy’uheivéima araka’eve. Pe y Che ame’ẽtava oporomoingovégui tapia g̃uarã.

Upérõ Hesu he’i ichupe: Che ningo pe jeikove jevy ha pe tekovete. Oimeraẽ ojeroviáva guive cherehe, omano ramojepe, oikove jevyva’erã.

Ha opaite oikovéva ha ojeroviáva cherehe, nomanomo’ãi tapia g̃uarã. Regueroviápa ko’ã mba’e.

Peñeñongatu Ñanderuete mborayhupype, peha’ãrõ Ñandejára Hesu Crísto ou jevy peve iporiahuvereko reheve peiko hag̃ua hendive tapia g̃uarã.

Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.

Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.

Ñamombe’úrõ ñane rembiapo vaikue Ñanderuetépe, Ha’e ipy’aporã ha heko porãgui operdona ñane rembiapo vaikue ha ñanemopotĩ opaichagua mba’e heko pegua’ỹvagui.

Ko múndo (univérso) kóva oñehundiva’erã hembipota vai reheve; upe ojapóva Ñanderuete rembipota katu oikovéta ára atyguasukuérape g̃uarãme (tapia g̃uarã).

Ha heta umi omanómava yvy guýpe oñemombáyta, peteĩ atýra tekovépe g̃uarã ha ambue atýra ñemotĩ ha py’a tarova tapia g̃uarã.

Ko’ág̃a katu penesãsóma angaipa pu’aka poguýgui, peikógui Ñanderuete rembiguái ramo, ojehecha ambue a pende rekovépe, peñemboheko porã pehóvo ha hi’ári pehupitýta pe jeikove tapia g̃uarãva.

Pe ho’úva che ro’o ha omboy’úva che ruguy oguerekóma tekove tapia g̃uarãva; ha Che amoingove jevýta ichupe pe ára pahápe.

Umi mondaha ningo ou omonda ha oporohundi hag̃uánte, Che katu aju ame’ẽ hag̃ua pe tekove añeteguáva ha hemby hag̃ua gueteri.

Nde reme’ẽ ichupe pu’aka opavave yvyariguakuéra rehe, Ha’e ome’ẽ hag̃ua ndérupi ichupekuéra pe tekove tapia g̃uarãva.

Añetehápe, añetehápe, ha’e peẽme: Pe ojeroviáva cherehe oguerekóma pe tekove tapia g̃uarãva.

Ha pe angaipa ombopoguy haguéicha tetãyguakuéra rekove, oguerúvo ichupekuéra pe ñemano, péicha ko’ág̃a Ñanderuete mborayhu ombopoguy pe ñemano pu’aka omboheko potĩ hag̃ua, ha ome’ẽ ñandéve jeikove tapia g̃uarãva, Ñandejára Hesu Crísto rupi.

Ndémante Israel esperánza, Ndémante reñangarekokuaa orerehe rojepy’apy vaiete aja. Mba’érehe piko reiko ku tetã ambueyguávaicha ko tetãpýpe, ha ku mbohupáicha ohasáva oke hag̃uante.

Che katu tapiaite ajerovia nderehe, ha ko’ýte ko’yteve romomba’eguasuve ahávo.

Che Ruete, nderehénte che ajejoko che mitã guive ha Nde reñangareko porã cherehe.

Ha Hesu ombohovái ichupe ha he’i: Upe cherayhúva katuete ojapo avei che rembipota, ha che Ruete ohayhuva’erã avei ichupe, ha rojuva’erã hendápe rombosako’i hag̃ua ore rekoha ipype.

Simon Pédro katu he’i ichupe: Ore Jára, máva rendápe piko rohóta. Ne ñe’ẽ ningo oporomoingovéva tapia g̃uarã,

Upévare Ha’e ikatu osalva avei tapia g̃uarã umi og̃uahẽvape, Ha’érupi, Ñanderuete rendápe. Hesu Crísto oikovégui tapia g̃uarã, ha’e oñembo’e iñermanokuéra rehe Ñanderuetépe.

Ambue rupi ndaipóri salvacion, ndaipórigui ambue téra ára guýpe ikatuva’erãva rehe jajesalva.

Ñanderuete ohayhúgui pe justícia, Ha’e ndopoimo’ãi heko potĩvagui. Tapia g̃uarã Ñanderuete oñangarekóta hesekuéra. Umi iñañáva ñemoñarenguéra katu oñehundipava’erã.

Peẽ peitypeka (peipyguara, peheka) Ñanderuete kuatiañe’ẽre, hi’ag̃ui peẽme pejohutaha ipype pe tekove tapia g̃uarãva, ha añetehápe Ñanderuete kuatiañe’ẽ che rechahare voi.

Upe ohayhúva hekove oñehundíta; ha upe ohundíva hekove che rayhupápe katuete ojohuva’erã pe tekovete.

Ha Hesu ombohovái ichupe: Añetehápe, Che ha’e ndéve, ko ára kóvape reiméta chendive paraísope.

Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Che aikuaa porã pe pensamiénto aguerekóva che py’apýpe penderehe, he’i pende Ruete, che akãme aguereko py’aguapy, ha ndaha’éi py’aro, ame’ẽ jevy hag̃ua peẽme umi mba’e peha’ãrõva ha peiko hag̃ua py’aguapýpe pene retãteépe.

ha pe esperánza Ñanderuete rehe nombotavymo’ãi avavépe, Ñanderuete mborayhu omyhenyhẽgui ñande py’apy imborayhúgui, ha opaite ko’ã mba’e oñeme’ẽ ñandéve Pytu Porãmbáva rupi.

Jerovia ningo he’ise jahupitytaha katuete umi mba’e ñaha’ãrõvañaína, ha he’ise avei ndajahechái ramojepe mba’eve, nañandepy’a mokõiri, jaikuaa porãgui (umi mba’e Ha’e oprometemava’ekue, katuete oikotaha avei).

Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe.

Umi mba’e ore rohasavaroína ivevúi, rohasa asy ramojepe, roikuaágui uperire roguerekotaha hetave teko mimbipa ha vy’a añeteguáva.

Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.

Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve,

Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.

Upeichavéramo jepe ajepy’amongeta ko’ã mba’ére, aha’ãrõta Nde chepytyvõ jevy hag̃ua.

Ñanderuete poriahuvereko ningo ndopái, iporiahuvereko araka’eve ndoguéi.

Iporiahuvereko oñembopyahu ko’ẽ ko’ẽre, ituichaite ningo imborayhu.

Ñanderuete ndivénte che ánga opytu’ukuaa, ichuguínte aha’ãrõ ñepytyvõ.

ha tohesape pende py’apy resa peikuaa hag̃ua mba’épa he’ise pe esperánza peẽ peguerekóva, Ha’e penerenóigui, pehechakuaa porã hag̃ua pe jopói tuichaitéva Ha’e ombosako’ímava Hesu Crísto reheguávape g̃uarã,

Ichupekuéra Ñanderuete oikuaaukase mba’épa ko mba’e ñemi he’ise: Heko jajaipa ituicha ha iporãitéva ningo Hesu Crísto voi tetãnguérape g̃uarã, ha Ha’e pende esperánza pehupity hag̃ua avei heko jajaipa.

Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

Nde poriahuvereko toĩ orendive, Nde, ore Ruete, ore rojeroviágui nderehe.

Che ánga oha’ãrõite Nde chepytyvõ hag̃ua, che ajeroviágui ne ñe’ẽ rehe.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

ha tetã ambueyguakuéra oha’ãrõ joava’erã Hesúpe, (Isaías 42,1-4).

Toñemomba’eguasu Ñanderuetépe! Che aikuaa porã ahechataha Ñanderuete poriahuvereko umi oikovéva retãme.

Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Ko esperánza kóva rupi Hesu Crísto ñandesalvava’ekue, pe esperánza ojehecháva ningo ndaha’éi esperánza. Máva piko oha’ãrõve gueteri, ohupity rire umi mba’e ha’e oipotáva.

Ha ñaha’ãrõ ramo ñaína umi mba’e jahecha’ỹva, he’ise ñaha’ãrõhañaína paciéncia reheve.

Che añorãirõmbáma pe ñorãirõ porã, añaníma che carréra, añongatúma hekópe che jerovia che py’apýpe ipaha árape g̃uarã.

Oñeñongatúma che renonderãme pe justícia jopói, Hesu Crísto, pe mbojovakehára heko peguáva, ome’ẽtava chéve, Ha’e ourõg̃uarã, ha ndachéve añói, ome’ẽva’erã katuete avei opaite umi oha’ãrõvape mborayhu reheve Ha’e ou jevyrõg̃uarã ára.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Ñande katu ára peguáva, upévare jaiko jaka’u’ỹre avei, ha ñamonde pe jerovia ha mborayhu añeteguáva, pe soldádo omonde háicha ipyti’a mo’ãha, ha jaiporu pe esperánza, pe soldádo oiporu háicha iñakã mo’ãha.

Ñanderuete ndahesaraimo’ãi tapia g̃uarã imboriahúvagui, ha umía noha’ãrõ reímo’ãi tapia g̃uarã.

Israel toha’ãrõ Ñanderuetépe, Ñanderuete ndivénte oĩ jeporiahuvereko, Ha’émante operdonakuaa,

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.

Hesu Crísto katu ojapo hekoitépe Ñanderuete rembipota ita’yratee ramo opaite Ñanderuete rogayguakuéra apytépe, ha pe óga Ñanderuete omopu’ãvahína ñande voi, jajerovia ramo vy’apópe hese ha ñaha’ãrõkuaa ramo umi mba’e ñambo’etevañaína ipaha peve.

Ñanderuete voi omokãta tetãyguakuéra resay. Ha pe ñemano ndaiporimo’ãvéi, pe jejahe’o soro omanóva rehe ha mba’asykuéra opava’erã; umi mba’e tenondeguare ndaiporivéima, (ohasapáguima).

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.

Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe.

Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe.

Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre.

Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua.

Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva.

Toñemotĩ ha toñemondyipa umi oñembohorýva cherehe, ha chehundiséva.

Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi.

Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui.

Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua.

Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.

Umi iñañáva oñehundipava’erã, ha umi ojeroviávape Ñanderuete rehe oñeme’ẽta ko yvy imba’etee ramo.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Ha’e katu oreguenohẽva’ekue ore ñemanorãgui ha Ha’e oreguenohẽ jevýta opaite jehasa asyrãgui, Ha’e ningo ore esperánza.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.

Ñembo’e Ñandejárape