150 Versíkulo ñaaprende hag̃ua jadepende Ñandejárare

Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.

Opaite mba’e ikatu chéve g̃uarã, Ha’e chemombaretégui.

Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Ovy’aite ningo uvei upe yvyarigua ojeroviáva Ñanderuete rehe. Ha’ete ku yvyráicha oñeñotỹva y rembe’ýpe, hi’y omohe’õ porãva hapokuéra, upévagui noñandumo’ãi avei mba’eve ivaíva og̃uahẽ ramojepe pe ára haku térã ndokyvéi ramojepe noñemyangekõiri, ha ndopytamo’ãi hi’a’ỹrehe.

Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme.

Opaite pende jepy’apykuéra peity hi’ári, Ha’e ningo oñangarekohína penderehe.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe. Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.

Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi. Ñanderuete rupivénte ahupity ñepytyvõ porã ha che rerakuã porã, Ñanderueténte che itaguasu ha che mo’ãhára. Opaite árape pejerovia hese, peẽ che retãyguakuéra, henondépe peguenohẽ pende py’apýpe oĩva guive, Ñanderuete ningo ñane mo’ãhára. Selah

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.

Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.

Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.

Ñanderuete che rerekua, Ha’e ome’ẽmba chéve aikotevẽva guive. Umi kapi’ipe kyrỹiha rupi chegueraha, umi y sakã rembe’ýpe chemombytu’u.

Iporãve jajerovia Ñanderuete rehe jajerovia rãngue yvyarigua rehe. Iporãve jajerovia Ñanderuete rehe jajerovia rãngue mburuvichakuéra rehe.

Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.

Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.

Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui.

Ñanderuete rape iporãite, ha ore Ruete ñe’ẽ ipotĩete. Ha’e voi omo’ã opaite hese ojeroviávape.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.

Ñanderuete ñanemo’ã ha ñanemombaretéta jajejopy vai jave,

Ñanderuete oñorãirõta ñanderehehápe ha peẽ peiméta py’aguapýpe.

Upévare umi oikuaáva nde réra ojerovia nderehe, Nde, ore Ruete, nderepoírigui umi nderekávagui.

Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Che ra’ykuéra ha che rajykuéra, peẽ ningo Ñanderuete reheguáva, ha peẽ pembopoguy umi proféta ijapúvape; ituichavégui pe oĩva pendepype, upe oĩva yvy apére.

Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe. Ipy’aguapy porã ha ndokyhyjemo’ãi, ohecha peve umi hese ija’e’ỹva oñehundipaha.

Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.

Peñeha’ã ha peñemombaretéke; ani pekyhyjétei, ha ani peñemondýi ichuguikuéra, Ñanderuete, Ñandejára, ohóta penendive; Ha’e ndopoimo’ãi pendehegui ha napenemotyre’ỹmo’ãi.

Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).

Che Ruete, ehechaukamína chéve nde rapekuéra, chembo’emína nde rapekuéra rehe aikuaa porãve hag̃ua. Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.

Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.

Ñane ánga toha’ãrõ Ñanderuete ojapóva rehe, Ha’e ñanepytyvõta ha Ha’e ñanemo’ãta. Upéicha Ñanderuete ñanembopy’arory jajerovia porãgui héra porãite rehe.

Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype.

Che ánga oñemboja nderehe, nde po akatúa chejoko porã.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Emoĩ Ñanderuete pópe ne rembiaporã ha osẽ porãva’erã.

Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

Mávapa pende apytépe okyhyje Ñanderuetégui, ha ohendu hembiguái ñe’ẽ. Ha nde reiko ramojepe pytũ guýpe térã nderehechái ramojepe pe arasakã, ejerovia Ñanderuete rehe, ha ejejoko nde Jára rehe.

Jaiko jajeroviágui, ndaha’éi ñande jahecháva rehe.

Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.

Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

Cheporiahuverekomína, Nde, che Ruete, eiporiahuverekomína, che ánga ojeroviágui nderehe ha añemo’ãta nde pepo guýpe ohasapa peve che jepy’apy vai. Nde poriahuvereko tuicha og̃uahẽ yvága guive, ha ne mborayhu ojepyso araíre. Reñemboyvate yvagakuéra ári, Nde, che Ruete, opa rupiete yvy ape ári toñemyasãi nde reko jajaipa. Amba’ejerure asy Ñanderuete Ipu’akaitévape, Ha’e chepytyvõ hag̃ua.

Jerovia ningo he’ise jahupitytaha katuete umi mba’e ñaha’ãrõvañaína, ha he’ise avei ndajahechái ramojepe mba’eve, nañandepy’a mokõiri, jaikuaa porãgui (umi mba’e Ha’e oprometemava’ekue, katuete oikotaha avei).

Che ajerovia ne ñe’ẽ rehe, Nde chemo’ã ha reñangareko porã haguére cherehe.

Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.

Ore roñandúma roimeha Romaygua hag̃uáicha, péva katu ojehu ani hag̃ua rojerovia orejehe, rojerovia hag̃ua uvei Ñanderuete rehénte, omoingovéva umi omanova’ekuépe.

Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

Temiendy ningo ne ñe’ẽ che pykuérape g̃uarã, ha mba’e ohesapéva che rape.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Che ovechakuéra ohendu katuete che ñe’ẽ ha che aikuaa porã ichupekuéra, ha ha’ekuéra oñemboja che rendápe oho hag̃ua che rapykuéri Che ahasehápe. Ha Che ame’ẽ ichupekuéra tekove tapia g̃uarãva, ha noñehundimo’ãi máramo, ha avavete ndoipe’amo’ãi ichupekuéra che pógui.

Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia, ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza, ha pe esperánza Ñanderuete rehe nombotavymo’ãi avavépe, Ñanderuete mborayhu omyhenyhẽgui ñande py’apy imborayhúgui, ha opaite ko’ã mba’e oñeme’ẽ ñandéve Pytu Porãmbáva rupi.

Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

Ñanderuete ningo ipu’aka omboheta hag̃ua opaichagua temime’ẽ pende rekovépe, peẽ peguereko hag̃ua peikotevẽva guive ha peipytyvõkuaa hag̃ua pende rapichakuérape,

Che añeno ramo, ake porã ha apáy py’aguapýpe, che Ruete oñangareko porãgui cherehe. Ndakyhyjemo’ãi 10.000 soldádogui, oñembo’y ramojepe che jerekuévo.

Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.

Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Che pensamientokuéra ndaha’éi pene pensamiéntoicha ha pende rapekuéra ndaha’éi ku che rapéicha, he’i pende Ruete. Pe yvága ijyvateve háicha yvýgui, péicha hína che rapekuéra ijyvateve pende rapégui, ha che pensamiénto pene pensamiéntogui.

Ñanderuete ñanemo’ã porã ha kuarahýicha ñanderesape. Jeporiahuvereko ha terakuã porã Ñanderuete ome’ẽkuaa. Ha umi heko potĩvape Ha’e ohovasava’erã.

Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.

Che katu ajerovia nderehe, che Ruete, che ningo ha’e: Nde, che Jára. Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.

Ha oime ramo pende apytépe peteĩ iñarandu’ỹva, tojerure Ñanderuetépe, Ha’e katuete ome’ẽta arandu oimeraẽ ojerurévape, ha nombotovemo’ãi.

Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.

Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.

Ne ñe’ẽ chemoangapyhy ajepy’apy jave, ne ñe’ẽ chemoingove jevy.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Nderekyhyjemo’ãi pe jehasa asýgui, ni mba’evaiguasúgui oúva tekove iñañáva ári. Ñanderuete ningo oñangarekóta nderehe ha Ha’e ndohejamo’ãi re’a peteĩ ñuhãme.

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Ñanderuete, pe yvága Jára, chepytyvõtagui natĩmo’ãi, upévare che amohatã che rova ku itáicha ha aikuaa porã natĩmo’ãiha.

Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui. Umi hese oma’ẽva’ekue ojehesape’a, ha hovakuéra noñemotĩmo’ãi.

Ñanderuete mborayhu rupi peẽ pejesalva ha pejerovia Hesu Crísto rehe ndaha’éi katu pendejehegui, Ñanderuete me’ẽmby rupínte. Ndaha’éi yvyarigua rembiapo porã rupi, ani hag̃ua avave oñembotuicha.

Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.

Avy’a, Ñanderuete ohendu ramo che ñe’ẽ ha che mba’ejerure asy. Ajerovia gueteri, ha’e ramojepe: Ajepy’apy vaieteha. Che jepy’apy vaiete jave ha’éma: Ijapu ningo mayma kuimba’e ha kuñakuéra. Mba’éichapa amyengoviáne Ñanderuetépe opaite mba’eporã cherehe ojapova’ekue. Ajapyhýta pe váso tekove añete reheguáva, ha ahenóita Ñanderuete réra. Ko’ág̃a ajapóta opaite mba’e aprometeva’ekue Ñanderuetépe, opaite tetãyguakuéra renondépe. Hasy asy Ñanderuete resápe umi heko potĩva omano ramo. Nde, che Ruete, che añetehápe ne rembiguái, che ningo ne rembiguái membykuimba’e, Nde remondoho pe cadéna oñapytĩva che rekove rehe. Aikuave’ẽta ndéve kuave’ẽmby ñemomba’eguasu reheguáva, ha ahenóita nde réra, ore Ruete. Ajapóta che ñe’ẽ ame’ẽmava’ekue Ñanderuetépe mayma hetãyguakuéra renondépe. Ñanderuete róga korapýpe, Jerusalen mbytépe aikuave’ẽta. Alelúia, pemomba’eguasu Ñanderuetépe. Ha’e oñakãity omoĩgui ijapysa cherendu hag̃ua, che ahenói guive héra.

Upémaramo Hesu he’i ichupekuéra: Che voi ningo pe pan oikovéva, oimeraẽva oúva guive che rendápe naiñembyahyimo’ãi araka’eve, ha ojeroviáva guive cherehe, máramo ndaijy’uheimo’ãvéi.

Jaikovérõ, jaikove Ñanderuetépe g̃uarã; ha ñamanórõ, ñamano avei Ñanderuetépe g̃uarã. Upéicha ningo jaikovérõ térã ñamanórõ, ñande ningo Ñanderuete mba’e voi.

Ore Ruete, oreporiahuvereko, nderehe rojerovia; Nde voi ningo ore jyva mbarete meme pyhareve, upévare oreguenohẽ ore jepy’apy vaígui og̃uahẽ vove.

Ñanderuete oguerohory umi ichugui okyhyjévape, ha umi ojeroviávape imborayhu rehe.

Peñemokyre’ỹke Ñanderuete pu’akaguasu rupi, peẽ penembarete hag̃ua.

Ha justíciagui heñóita tapia g̃uarã py’aguapy, angapyhy ha kyhyje’ỹ.

Che katu ajerovia’aína nde poriahuvereko rehe, ha che py’a horyetéta Nde cheguenohẽ ramo che jejopy vaietégui. Apurahéita Ñanderuetépe, chepytyvõ porã haguérehe.

Hesu Crísto ningo naiñambuéi, peteĩchánte kuehe, ko ára ha ára atyguasurãme g̃uarã (por los síglos).

ani hag̃ua peẽ pemopu’ã pende jerovia kuimba’e arandu ári, Ñanderuete pu’aka árinte uvei.

Che katu añemboja ramo Ñanderuete ypýpe avy’aitéta, che ajeroviágui Ñanderuete rehe, amombe’u hag̃ua hembiapo tuichaitéva.

Che aikuaa porã pe pensamiénto aguerekóva che py’apýpe penderehe, he’i pende Ruete, che akãme aguereko py’aguapy, ha ndaha’éi py’aro, ame’ẽ jevy hag̃ua peẽme umi mba’e peha’ãrõva ha peiko hag̃ua py’aguapýpe pene retãteépe.

Hesu Crísto ndopoimo’ãi iñe’ẽ ome’ẽva’ekuégui, Ha’e voi penemombarete ha oñangarekohína penderehe mba’epochýgui.

Ñanderuete katu oñemomba’eguasuva’erã iñembojovake hekoite pegua rupi, ha Ñanderuete justícia rupi ohechaukáta heko iporãha.

Pema’ẽnte yryvukuéra rehe, ndaikokuéi oñotỹ térã omono’õ hag̃ua, nahendag̃uái oñongatu hag̃ua hembi’u, ha upeichavéramo jepe Ñanderuete omongaru ichupekuéra. Peẽ ningo pevaleve umi guyrágui.

Nde katu, che Ruete, che Jára oporoporiahuverekóva ha ipy’a porãva, nembegue ndepochy hag̃ua, ha nde poriahuvereko ha nde py’aporã katu ituichaite.

Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme. Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.

Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.

Oĩ umi ojeroviáva icarrokuéra rehe ha ambuekuéra ikavajukuéra rehe, ore katu rojerovia ore Jára réra rehe.

Ñande, yvy arigua pu’aka rupi ndajahupitymo’ãi ko’ã mba’e ko’ãva, Ñanderuete pu’aka rupínte uvei.

Ñanderuete tapia oĩ che resa renondépe; ha Ha’e oĩgui che akatúape nda’amo’ãi.

Ha’e omombarete ikane’õvape ha omokyre’ỹ avei ikangypávape.

Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.

Ñanderuete ipy’aporã ha ñanderayhúgui, upévare ohechauka avei umi ojavývape hape porã. Upévagui Nde voi ehekombo’e ichupekuéra oguata hag̃ua hekoitépe nde rape rupi, Nde voi rehechaukamava’ekue ichupekuéra.

ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.

Toñemboete ore Jára, ore Ruetépe, Ha’e ñandereraha ijapére, Ñanderuete voínte ñanepytyvõta ñane rembiapópe. Selah

Heta jepy’amongeta oĩ ñande py’apýpe Ñanderuete rembipotánte katu ojehuva’erã ñande rekovépe.

Upévare ningo umi ohasa asýva Ñanderuete oipotágui, tomoĩ hi’ánga Ñanderuete pópe ha oñemomirĩvo tojapo mba’eporã.

Che katu aiko ku olívo máta rovyũicha Ñanderuete rogaguasúpe, Ñanderuete poriahuvereko rehe ajeroviase opaite árape.

Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.

Peikuaa porã́ke, Ñanderuete resa oñangarekoha umi ichugui okyhyjéva rehe, umi ojeroviáva iporiahuvereko rehe.

Upévare peẽ penderory, tekotevẽ ramo jepe pehasa ñembyasy mbovymi ára pukukue heta jepy’ara’ã rupi ha péva ogueru peẽme ñembyasy. Tojekuaa pende jerovia, ohasáva jepy’ara’ã rupi, iporãve órogui, oñehundikuaáva tatápe. Ha pembopoguy ramo pende jepy’ara’ã, peẽ pemomba’eguasu ha pemboete Ñanderuetépe Hesu Crísto ou jevy ramo g̃uarã.

Nde, che Ruete, rehendu umi oñemomirĩva mba’ejerure; Nde voi remokyre’ỹ jevy ichupekuéra, ha rejapysaka porã hesekuéra,

Upévare avy’a chekangykue rehe, jeja’ópe, temikotevẽme, jehasa asýpe, persecuciónpe, jejopy vaípe, ahasava’ekue Hesu Crísto rehehápe; péicha ningo ojehu, chekangy ramo, chembarete.

Ñanderuete imba’eita, iñarandu ha ikuaapy ipypukuete. Ñande yvyariguakuéra ndaikatúi ñamyesakã ni jaipyguara, ñande yvyarigua arandu rupi, Ñanderuete rapekuéra ni imbojovakekuéra.

Ipy’aguapy umi ohayhúva ne rembipota, ha ha’ekuéra noñepysãngamo’ãi.

Ñanderuete ñandeporavo Hesu Crísto rupi, Ha’e oipotágui jajesalva Ita’ýra rupi; Ñanderuete ojapopa hekópe Ha’e voi oipota háicha.

Ha he’i: Pehendu, opaite Judayguakuéra, ha peẽ Jerusalenguakuéra ha nde, tetã ruvicha, Josafat. Péicha Ñanderuete he’i peẽme: Ani pekyhyjétei ha ani pende py’aryrýitei ko atyguasuete renondépe, kóa ningo ndaha’éi pene ñorãirõrã, Ñanderuete ñorãirõrãnte.

che ahayhu umi cherayhúvape, ha umi cherekáva chejohúta avei katuete,

Che aháta ne renonderãme ambojoja hag̃ua umi tape ojoja’ỹva, ajoka hag̃ua umi okẽ bronceguiguáva, ha amopẽ hag̃ua iñembotyha hierroguiguáva; Peñembyaty ha peju; peñembojapa che rendápe peẽ pekañyva’ekue tetãnguéra apytégui; naiñakã porãietégui umi ogueraháva ijára yvyraguiguáva ha omba’ejeruréva ijára gua’úpe ndohupitymo’ãigui ñepytyvõ añeteguáva avavégui. Peñemboja pemombe’u ha peñemongeta oñondive mávapa omombe’u raẽ ko’ã mba’e ko’ãva oiko mboyve; Chénte, pende Ruete, poikuaaukapáma voi, che ykére ndaiporivéima ambue Jára; Che ykére ndaipóri ambue jára hekojojáva ha oporopytyvõkuaáva añetehápe. Pejerovia cherehe, Chénte posalvakuaa, Che voi ningo pende Ruete, ha che ykére ndaipóri ambue Jára. Chejehénte añe’ẽme’ẽkuaa, che jurúgui osẽ ñe’ẽ hekoite peguáva ha ndopa reimo’ãi araka’eve; Che renondépe oñesũta opaite yvyariguakuéra ha mayma juru chemomba’eguasúta. Ha oje’éta cherehe: Añetehápe, ore Ruete ndive oĩ justícia ha pu’aka; umi oñemoĩmava’ekue hese oupa jevyva’erã tĩndyhápe henondépe, oñemotĩetégui. Ñanderuete rupínte ojejohukuaa justícia (tekojoja) ha opaite Israel ñemoñare omomba’eguasúta Ñanderuete rembiapo porãita. ha Che ame’ẽta ndéve imba’erepyeta, ñemiháme oñeñongatu porãva, reikuaa porã hag̃ua Che ha’eha pende Ruete, Israel Jára, rohenói hague nde réra rupi.

Peẽ pekyhyjéva Ñanderuetégui, pejerovia avei Ñanderuete rehe, Ha’égui pene pytyvõhára ha penemo’ãva.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Nde ndepy’a porã, rehechauka haguére mba’eporã, chembo’emína ne rembipota rehe.

Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme. Upe ojerurévape oñeme’ẽva’erã; upe ohekáva ojohuva’erã; ha upe ombotávape ojepe’ava’erã (pe okẽ).

Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.

Ñanderuete ohayhuhína umi okyhyjévape ichugui ha umi mba’e ha’ekuéra oikuaa’ỹva Ha’e omoarandúta ichupekuéra omoirũ porã guive ichupe.

Añetehápe che apyta rire ne rendaguépe aporanduva’erãmo’ã Ñanderuetépe ko chéve ojehúva rehe ha amoĩva’erãmo’ã opaite mba’e ipópe. Ha’e ojapo tembiapo tuichaitereíva ikatu’ỹva ojekuaapa, ha hembiapo techapyrãva (milagrokuéra) ndojepapakuaái.

Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.

Hesaráinepa peteĩ kuña imemby kambúvagui, ndoiporiahuverekovéi hag̃ua imemby hyégui osẽva’ekuépe. Ha pe sy hesarái ramojepe, Che araka’eve ndacheresaraimo’ãi ndehegui. Peikuaa porãke, che po pytépe ahai ne ra’ãnga; ha nde korapyjere yvate tapiaite oĩ che resa renondépe.

Hesu Crísto chéve g̃uarã che rekove, ha che amanóta ramojepe hetave ahupitýta.

Pe yvyarigua opensa haperã rehe, Ñanderuete katu omboguata ichupe.

upeichavéramo jepe che aĩ tapiaite nendive, Nde chejoko porãgui che po akatúagui. Nde chemboguata porã ne rekombo’e rupi, ha ipahápe chemog̃uahẽ porãta ne rendápe.

Hesu he’i jevy ichupekuéra: Che ningo ko múndo resape. Upe oúva che rapykuéri ndoikomo’ãvéima pytũnguýpe, oguerekóma uvei pe tekove resape.

Ha aisãmbyhýta umi hesatũvape tape oikuaa’ỹva rupi, amboguatáta ichupekuéra tape oikuaa’ỹva rehe ha pe ypytũ oĩva henonderãme amyesakãmbáta ha aguenohẽta umi ita oĩva hapépe oguata hag̃ua tape potĩ rehe. Ko’ã mba’e katuete ajapóta ichupekuéra g̃uarã, ha ndapoimo’ãi che ñe’ẽgui ajapopa peve.

Pe Pytu Porãmbáva oikuaauka ñande pytu porãme ñande ha’eha Ñanderuete ra’y ha itajyraha. Ha ñande ramo Ñanderuete ra’y ha itajyrakuéra, Ñanderuete ome’ẽta ko yvy kóva ñandéve g̃uarã ñane mba’erã ramo, Hesu Crísto poguýpe katu. Ñande jahasa asy ramo Hesu Crísto rehehápe, uperire jaikóta avei hendive Ñanderuete reko jajaipápe.

Ñanderuete voi ningo omoheñoihína pendepype hembipota porã ha Ha’e omongakuaa hembipota pende rekovépe pejapopa peve Ha’e oipotáva guive.

Umi yvy perõ ijyvateveha rupi Che amoheñóita ysyrykuéra, ha ñu rupi yvukuéra; pe yvy perõme oĩta y, ha yvy ikãvape oĩta yvu porãita.

Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe). Oñeme’ẽta kyse puku rãimbekuépe ha oikóta hikuái aguaraguasu rembi’urã ramo. Ha pe tetã ruvicha ipy’a rorýta Ñanderuete ndive, oñemomba’eguasuva’erã katuete oimeraẽ he’íva guive pe añetegua Ñanderuete renondépe, ha oñembotýta katuete umi ijapúva juru. Upeichaite chey’uhéi avei che Jára rogaguasu rehe, ahecha hag̃ua nde pu’aka ha nde reko jajaipa. Ne mborayhu iporãve jeikovégui, che juru nemomba’eguasu manteva’erã.

Opaite mba’e pejeruréva guive pene ñembo’épe, pejerovia ramo, pehupityva’erã katuete.

Umi ha’enteséva ha oikóva ipy’apy rembipota vai poguýpe oheka ohupity hag̃ua umi mba’e ombovy’áva ipy’apy rembipota vai; umi oikóva Pytu Porãmbáva poguýpe katu oheka ombohory hag̃ua ijapohare, Ñanderuetépe. Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Evy’aite Ñanderuete ndive, Ha’e tome’ẽ ndéve nde py’apy ojeruréva.

Nde katu, che ra’y, eñemombarete Hesu Crísto jeporiahuverekópe.

Che, Che voi ningo, pomoangapyhýva. Mba’érehepa rekyhyje yvyarigua omanótavagui, iñemoñarẽnguéra ojogua umi kapi’ípe. Ha nderesarái Ñanderuete, nde apoharégui, omyasãiva’ekue umi yvága ha omohenda ko yvy tuicháva; opaite ára rekyhyje pe ndejopy asýva pochýgui, nehundi hag̃uáicha. Ha mamo piko oime pe oporojopy asýva pochykue.

Hesu katu he’i ichupekuéra: Kuimba’e ha kuñakuéra ndaikatúiva ojapo, Ñanderuete ikatu ojapo.

Rehechaukáta chéve pe tekove rape, nde ypýpe oĩ vy’a añetetéva, ha péva ndopamo’ãi araka’eve.