Ñemohenda
117 Umi versíkulo bíblico oñeʼẽva Confianza rehe
Oĩta araka’e ñande rekovépe ñanembovy’átava ñane ánga, ha oĩta avei araka’e ñanembohasa’asýtava ñane korasõme. Iñimportanteterei jajerovia Ñandejárare opaichagua árape, iporãvape ha ivaihape, ha’e oguereko pe ñambohováiva ñane mba’ejerurére ha ha’e añoite ikatu ome’ẽ seguridad ñande rekove. Jajeroviáramo hese, yvyporakuéra renondépe, jaikuaáta peteĩ py’aguapy ñande resape’ỹva.
Jaguerekoramo jepe peteĩ mba’e ñane’apesýiva, ñande py’aite guive jaikuaáta peteĩ py’aguapy tuicháva, ha’e añoite ikatu ome’ẽ ñandéve pe pytu’u jajapo’okáva. Ikatu reñembo’e chupe ára ha ára, ha’e araka’eve nderejapomo’ãi. Mborayhu reheve omyanyhẽta opa nde vy’a’ỹ ha nepytyvõta reñemopu’ã jey hag̃ua.
Upévare, ani rekyhyje, eme’ẽ opa nde remikotevẽ Ñandejárape, nde Ru yvágapegua oñangareko nderehe ha opa nde rogayguáre. “Salmos” 9:10 he’i: “Nde rérape ojeroviáta umi oikuaáva ne réra; nde niko, che Jára, nderehejáiva umi ne’rasirývape”.
Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe. Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.
Upévare umi oikuaáva nde réra ojerovia nderehe, Nde, ore Ruete, nderepoírigui umi nderekávagui.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Pepoi yvyariguakuéragui, oguerekóva yvytúnte itĩme, mba’érehe piko pembotuicha ichupekuéra.
Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.
Ñande ningo umi oñekytĩ’óva añetehápe, ñande jajeroviágui Ñanderuete Pytu Porãite rupi ha ñamomba’eguasúgui Hesu Crísto rembiapo porã ikurusureguare, ha ndajajeroviái kuimba’e rete rembiapóre, ojejapóva kuimba’e rete apérente.
Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.
Peẽ katu peñotỹ tembiapo vai upévare pemono’õ jevyva’erã jehasa asy ha pe’uva’erã japu hi’áva, pejerovia haguére pene mbaretekuére ha pende soldádo atyguasu rehe.
Iporãve jajerovia Ñanderuete rehe jajerovia rãngue yvyarigua rehe. Iporãve jajerovia Ñanderuete rehe jajerovia rãngue mburuvichakuéra rehe.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Anive hag̃ua rerovia nde rapicha he’íva ha anive hag̃ua pejerovia pene mburuvicha rehe. Eñangarekóke ne rembireko rehe oñenóva nde ykére, ha emboty nde juru henondépe.
Peẽ pekyhyjéva Ñanderuetégui, pejerovia avei Ñanderuete rehe, Ha’égui pene pytyvõhára ha penemo’ãva.
Ha che irũ iporãvéva oikóva chendive py’aguapypópe, hese che ajeroviáva, ha’e ho’u che rembi’u, ha ha’e jepeve oñemoĩma cherehe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Ha ñemotĩ reheve reju jevýta Egíptogui, pende Ruete voi omboykégui nde rejeroviahápe ha upévagui nosẽ porãmo’ãi mba’eve ndéve g̃uarã.
Upe okyhyjéva yvyariguakuéragui ho’ava’erã ñuhãme ha Ñanderuete rehe ojeroviáva oñemoĩ porãva’erã.
Ha Gaal, Ebed ra’y, ou ityvyrakuéra ndive ha oiko hikuái Siquémpe, ha umi Siquemgua ojerovia hese.
Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.
Che añe’ẽ sakãite penendive ha poguerohoryete avei. Cherenyhẽ angapyhýgui, ha cheroryeterei avei ahasa asy ramojepe.
Pyharevépe tañandu ne mborayhu, nderehe ajeroviágui, ehechaukamína chéve che raperã aguata porã hag̃ua, che ánga nderehénte ojerovia.
Ore rojerovia Ñanderuete rehe Ha’e penemomandu’a ha ojapoukapataha iñe’ẽ ore rombohasamava’ekue peẽme ha peẽ pejapomapeína avei.
Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra.
Che añembokurusúmagui Hesu Crísto ndive, ndaikovéima che, Hesu Crísto oikógui chepype. Che aikove ramojepe che ro’ópe, aikove che jerovia rupi Ñanderuete Ra’y rehe, Ha’e cherayhúgui ha oñeme’ẽmava’ekue che aikove hag̃ua Ha’érupi.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Ejerovia katu Ñanderuete rehe, ha ejapo mba’eporã, epyta ne retãme ha eñeha’ãmba reiko porã hag̃ua.
Ovy’aite upe kuimba’e ojeroviáva Ñanderuete rehe, ha noma’ẽiva umi oñembotuicháva rehe, térã umi ijapúva rehe.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.
Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.
Nderekyhyjemo’ãi pe jehasa asýgui, ni mba’evaiguasúgui oúva tekove iñañáva ári. Ñanderuete ningo oñangarekóta nderehe ha Ha’e ndohejamo’ãi re’a peteĩ ñuhãme.
Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.
Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.
Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Toñemboete ore Jára, ore Ruetépe, Ha’e ñandereraha ijapére, Ñanderuete voínte ñanepytyvõta ñane rembiapópe. Selah
Ani ndepochy, rema’ẽ jave iñañáva rehe ha ani reipota iñañáva po’a. Ndahi’aremo’ãvéima ha umi iñañáva ndoikomo’ãvéi, ha rema’ẽ jevy ramo ha’ekuéra oiko haguépe ndaiporimo’ãvéima avave. Umi oñemomirĩvape oñeme’ẽta ko yvy imba’erã ramo ha ovy’aitéta ohasa porãtaháre. Umi iñañáva ojepy’amongeta mba’evai rehe ojapo hag̃ua heko potĩva rehe ha omopururũ hese hãinguéra. Ñandruete katu opukáta hesekuéra, oikuaa porãgui hi’ára paha og̃uahẽtaha. Umi iñañáva oguenohẽma ikyse puku hyrúgui ha oipysóma iguyrapa sã opoi hag̃ua ihu’y imboriahúvare, ojuka hag̃ua umi oñemomirĩvape ha hekopotĩvape. Ikyse puku katu ojasurúta ipy’atee rehe, ha iguyrapakuéra oñemopẽmbáta. Hekopotĩva mba’e pokãmi reheve iporãve, umi mba’eita iñañáva oguerekóvagui. Oñemopẽmbáta umi iñañáva jyva, ha umi hekopotĩva rehe Ñanderuete oñangarekohína. Ñanderuete oikuaa umi heko potĩva arakuéra, ha imba’eitéva noñehundimo’ãi araka’eve. Umía notĩmo’ãi og̃uahẽ vove pe ára vaiete, ha umi ñembyahyiha árape hyg̃uatãmbava’erã hikuái. Pya’e oñekytĩmba ku ñanáicha, ha kapi’i hovy asývaicha ipirupáta hikuái avei.
Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,
Ore Ruete, Nde ningo reha’ãma ha reipyguara che rekove ha chekuaa porã voi. upépe nde po chesãmbyhýta avei, ha nde po akatúa chejokóta. Ha ha’e ramo: Pe pytũ tachemo’ã, ha pe pyhare jepeve opyta che jerekuévo, pytũ jepeve nomoypytũmo’ãi mba’eve ndehegui, ha pe pyhare ojajái ramo ku arakuéicha, ndéve g̃uarã pytũ ha tesakã peteĩchaite. Nde voi che rekove apohare, Nde cheapova’ekue che sy ryépe. Che romomba’eguasu Nde cheapo porãitégui, ne rembiapokuéra mba’e techapyrãva, ha che ánga oikuaa porã voi ko’ã mba’e. Ndehegui che reko noñemíri, Nde rejapo jave ñemiháme che rekove pe yvy ruguaitépe (nde tallérpe). Nde resakuéra ohecháma che rekove oñepyrũ porã mboyve, ha ne kuatiañe’ẽme ojehaipáma opaite che rekove ararã oñepyrũ mboyve che ára peteĩha. Nde, ore Ruete, ne pensamientokuéra ningo tuichaiterei mba’e chéve g̃uarã. Ndaikatúi ñambyatypa jaipota ramojepe. Aipapa ramo oñemboheta hetave yvyku’i ra’ỹigui, ha apáy ramo añepyrũkuaa jevy hemby hetavégui. Nde, ore Ruete, terejuka pe iñañávape; ha peẽ tekove tuguy ñohẽha, peñemboyke chehegui. Nde reikuaapa aguapy térã apu’ã ramo, mombyry guive reikuaa porã che ajepy’amongeta jave rehe.
Ne rendápe, che Ruete, amog̃uahẽ che ánga. Opaite Ñanderuete rapekuéra ohechauka iporiahuvereko ha imborayhu, umi oñongatúva ha ojapóvape g̃uarã iñe’ẽ. Nde réra rehehápe, Nde, che Ruete, eperdona che rembiapo vai, heta ramo jepe. Mba’épa ojehúta upe kuimba’e okyhyjéva Ñanderuetégui, Ha’e ohekombo’éta ichupe oiporavokuaa hag̃ua haperã. Ha’e oiko porãitéta ha iñemoñarenguérape g̃uarã opytáta ko yvy kóva imba’etee ramo. Ñanderuete ohayhuhína umi okyhyjévape ichugui ha umi mba’e ha’ekuéra oikuaa’ỹva Ha’e omoarandúta ichupekuéra omoirũ porã guive ichupe. Ajesareko Ñanderuete rehénte, Ha’émante oguenohẽta che pykuéra che ñuhãgui. Ema’ẽmína cherehe ha cheporiahuverekomína, aimégui che año ha jejopy vaípe. Ajepy’apyeterei ningo, cheguenohẽmína che jehasa asýgui. Ema’ẽmína che jepy’apy asy ha che jehasa asy rehe, ha cheperdonami opaite che rembiapo vaíre. Ema’ẽmína umi cherehe ija’e’ỹvare, mba’eichaitépa oñemboheta hetave hikuái ha pochy vaipópe chejukase. Che Jaratee, nderehe ajerovia, anítei chemotĩ umi cherehe ija’e’ỹva térã umi cherehe oñembohorýva renondépe.
Peñeñangarekóke! Pepyta hatãkena pende jeroviápe, peñomokyre’ỹ ha peñomombaretéke.
Ñanderuete chemombarete ha upévare aropurahéita ichupe, Ha’émante cheguenohẽ che jejopy vaígui.
Noñeme’ẽipa mokõi guyra’i média hóra tembiapo repy rehe, ha peteĩ jepe ndo’amo’ãi pende Ruete oikuaa’ỹre. Felípe ha Bartolome, Tomas ha Matéo, pe impuésto mbyatyhára; Jacóbo, Alféo ra’y, ha Tadéo; Pene akã rague jepeve ojepapáma. Upévarupi ani pekyhyje. Peẽ, mba’eguasueteve heta guyra’ígui.
Opaite árape pejerovia hese, peẽ che retãyguakuéra, henondépe peguenohẽ pende py’apýpe oĩva guive, Ñanderuete ningo ñane mo’ãhára. Selah
Hesu Crísto ojapopágui Ñanderuete promésa (néi), Hesu Crísto oiko avei Ñanderuete amen (péva he’ise ojapopa hague Ha’e oprometemava’ekue), oñemomba’eguasu hag̃ua orérupi Ñanderuetépe.
Ñanderuete nomoambuemo’ãi iñe’ẽ, ha opaite ñe’ẽ Ha’e oprometemava’ekue katuete oikóta avei pende rekovépe, Ha’e voi penerenóigui.
Umi ñe’ẽ he’íva guive che juru ha heñóiva che py’apýpe tahorýkena ne renondépe, che Ruete, Nde voi chemo’ã ha chesalváva.
Che katu aiko ku olívo máta rovyũicha Ñanderuete rogaguasúpe, Ñanderuete poriahuvereko rehe ajeroviase opaite árape.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Ñanderuete che rerekua, Ha’e ome’ẽmba chéve aikotevẽva guive. Umi kapi’ipe kyrỹiha rupi chegueraha, umi y sakã rembe’ýpe chemombytu’u.
pe oikóva teko porãme ndokyhyjemo’ãi, ha pe oikóva tape ikarẽvare katu iñangekõiva’erã;
Upéicha Ñanderuete omo’ã umi ojejopývape, Ha’e ningo iñemo’ãha renda jepy’apy vaiha árape g̃uarã.
Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.
Pe heko potĩva heta jepy’apy asy ohasa, opaite ijehasa vaígui katu Ñanderuete oguenohẽ ichupe.
Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia,
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi. Ñande ñañemoĩva’ekue ramojepe Ñanderuete rehe, Hesu Crísto ñanemoĩ porãma iñemano rupi Itúva ndive. Ha Ñanderuete omoingove jevy haguére Hesu Crístope omanova’ekue apytégui, Ha’e ñanemoingove jevýta avei omanova’ekue apytégui. Ha’e ñanemopotĩva’ekue jaikove hag̃ua tapia Hesu Crísto ha Ñanderuete ndive yvágape. Ndaupévai año, jarovy’aite avei Ñanderuetépe, Ñandejára Hesu Crísto rupi. Hesu Crísto rupínte jaiko porã jevýma avei ñande apohare, Ñanderuete ndive. Peteĩ kuimba’e, Adan rupi oike pe angaipa opavave rekovépe, ha pe angaipa rupi opavavete omanova’erã katuete avei, opavavete oñemboheko vai haguére avei. Pe angaipa oikóma ko yvy ári, Ñanderuete ome’ẽ mboyve Moiséspe hembiapoukapykuéra, ndojehechakuaái katu pe angaipa, og̃uahẽ meve Moises rembiapoukapykuéra. Opáichavo Adan guive Moises peve, pe ñemano ipu’akava’ekue umi oñemboheko vaiva’ekue rehe. Noñemoangaipa vaíri ramojepe hikuái, Adan oñemoangaipa vaiete haguéicha, Adan ningo ojoguava’ekue pe oútavape uperire. Ñanderuete poriahuvereko me’ẽmby ningo Hesu Crísto kuave’ẽmby ha kóva ndojoguaiete katu Adan ñe’ẽrendu’ỹme; Adan ñe’ẽrendu’ỹ ogueru opavavévape ñemano, Hesu Crísto kuave’ẽmby katu ogueru pe tekove añeteguáva hetápe g̃uarã. Hesu Crísto ningo Ñanderuete jopói ndetuicháva opavavévape g̃uarã. Pe angaipa ou peteĩ kuimba’e rupi, ndaupéichai Ñanderuete poriahuvereko me’ẽmby rehe, ouva’ekue hetaiterei tembiapo vaípe g̃uarã. Ñanderuete jehavira oumava’ekue ñandéve peteĩ angaipa rupi ha ogueru pe ñemano, Hesu Crísto kuave’ẽmby katu ñanemboheko potĩ ñane angaipágui. Upéicha, peteĩ kuimba’e, Adan, rembiapo vaikue rupi opavave opyta pe ñemano pu’aka poguýpe. Pe ambue kuimba’e, Hesu Crísto rupi katu opavave ohupitýva guive Ñanderuete jopói ha oñembohekopotĩva opyta pe tekove añetegua pu’aka poguýpe ha oisãmbyhýta Hesu Crísto ndive ko yvy tuichakue. Peteĩ kuimba’e, Adan, angaipa rupi opavave ho’a ñemano pu’aka poguýpe; ambue kuimba’e, Hesu Crísto rupi, opavave ohupity pe salvacion, péva ningo pe tekove tapia g̃uarãva. Peteĩ kuimba’e iñe’ẽrendu’ỹva’ekue rupi opavave oñemboheko vaíma, ha ambue kuimba’e iñe’ẽrenduva’ekue rupi opavave oñemboheko potĩ jevyva’erã ojeroviáma guive. Hesu Crísto rupi ñande jahupitýma Ñanderuete poriahuvereko jopói, jajeroviágui hese, ha ñaime hatã ipype, ha javy’a jahupitytaha rehe avei Ñanderuete reko jajaipa.
Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.
Tetã ruvichakuéra oñangarekóta ne membykuéra rehe, ha tetã ruvicha rembirekokuéra ningo herekuarã; tĩndyhápe nemomba’eguasúta ndéve, ha oheréita pe yvy timbo oĩva nde py rehe; ha reikuaáta Che ha’eha nde Ruete, ha umi cherehe ojeroviáva noñemotĩriva’erãha araka’eve.
Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.
Upéicharamo ndapeikovéima angaipa rembiguái ramo, peẽ ndapeikovéiguima Moises rembiapoukapy poguýpe, Ñanderuete mborayhu ha iporiahuvereko poguýpema uvei peikopeína ko’ág̃a.
Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.
Ko’ã mba’e rehe voi che ahasa asy’aína. Natĩri katu, aikuaa porãgui mávarehepa che ajerovia ha che aikuaa porã avei Hesu Crísto pu’aka rupi ahupitytaha pe tekove tapia g̃uarãva Ha’e ou jevýrõ g̃uarã ára.
Ñanderuete oipytyvõ heko potĩvape, ha Ha’e oñangarekóta hesekuéra ojejopy vai jave. Evy’aite Ñanderuete ndive, Ha’e tome’ẽ ndéve nde py’apy ojeruréva. Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Ejevýna, nde che ánga rejohu haguépe nde pytu’u, Ñanderuete katu ojapo ndéve g̃uarã mba’e iporãva.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve.
Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe. Nde justícia katu omimbi kuarahýicha ha nde reko potĩ ku ára asaje pytéicha.
Aiko ramo jepy’apy vaípe, Nde chemoangapyhy jevy, Nde chepytyvõ umi cherehe ija’e’ỹvagui ha Nde voi reipyso nde po akatúa chepytyvõ hag̃ua.
upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
Che katu aikuaa Ñanderuete chepytyvõtaha, Ha’e katuete oñangarekohína che rekove rehe.
Péicha tohesape avei pende resape pende rapichakuéra apytépe, ohecha hag̃ua hikuái pene rembiapo porã ha omomba’eguasu hag̃ua pende Ruetépe oĩva yvagakuérape.
Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Upévare he’i avei Ñanderuete ñe’ẽ: Peikuaa porãke, Che voi amohendáma Jerusalénpe pe itaguasu tenondegua poravopyréva peteĩ itaguasu esquína pegua, ha hi’ári amopu’ã che iglésia ha upe ohejáva ojeporu hekove oñemopu’ã hag̃ua ko ita oikovéva ári, noñemotĩmo’ãi araka’eve, (Isaías 28,16).
Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Umi ojeroviáva Ñanderuete rehe ojoguaite Jerusalen cérrope, ndoku’éiva, opyta hatã uvei opaite ára oĩháme.
Upe ojeroviáva iñakã porã rehe, itavy ha upe oikóva arandupópe katu ojesalvava’erã.
Ambue pyharevete opu’ãvo osẽ hikuái Técoa desiértope. Ha ha’ekuéra osẽ aja, Josafat, oñembo’yha guive, he’i: Cherendumi peẽ Juda ha Jerusalenguakuéra. Pejerovia Ñanderuete, pende Járare, ha peime kyhyje’ỹre; peguerovia iprofétape ha osẽ porãmbáta peẽme opaite mba’e peipotáva.
Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy. Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe. Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe. Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre. Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua. Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva. Toñemotĩ ha toñemondyipa umi oñembohorýva cherehe, ha chehundiséva. Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi. Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui. Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua. Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.
Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme. Upe ojerurévape oñeme’ẽva’erã; upe ohekáva ojohuva’erã; ha upe ombotávape ojepe’ava’erã (pe okẽ).
Ha ñande jaikuaa porã ha jaguerovia Ñanderuete ñanderayhuha. Ñanderuete ningo mborayhu añeteguáva ha pe opytáva koichagua mborayhu añeteguáva poguýpe, opyta Ñanderuetepype ha Ha’e opyta ñandepype.
Nde po cheapo ha chemongakuaa chéve, cherekombo’e che aikuaa porã hag̃ua ne rembiapoukapy.
Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.
Ha upe cherendúva katu, oikova’erã kyhyje’ỹme ha oikoveva’erã py’aguapýpe okyhyje’ỹre mba’evégui.
Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Nde ningo yvága atykuéra Jára, nde py’a porã ha reiporiahuvereko opaite nerenóivape.
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Aníke pejerovia mburuvichakuéra rehe, ha’égui yvyarigua ra’y voínte, umía ndaikatúi ñaneguenohẽ jejopy vaígui.
Péicha he’i Ñanderuete: Maldíto upe tetãygua ojeroviáva hapicha térã ipu’aka rehe, ha upe omopu’ãva ijára gua’u ra’ãnga ha ipy’apýpe opoíma chehegui, he’i pende Ruete.
Angái, angái umi ohóva Egíptope ñepytyvõ rekávo, ha ojerovia hikuái kavaju, kavaju arigua ha heta cárro rehe; ha ndojeroviái Israel Jára pu’aka rehe, ni ndohekái ichupe.
Ema’ẽ porãke, rejerovia ningo Egípto pegua takuapi opẽ rei reíva rehe, upe ojejokoséva itakuapi rehe ojekutúta, oikepáta ipo rehe ohasapa peve. Péicha ningo ojehu upe ojeroviáva faraon, Egípto retã ruvicha rehe.