Salm 139 - An Bíobla Naofa 1981

Uile-Eolas

1 Do stiúrthóir an chóir. Salm le Dáiví.

¹ Do stiúrthóir an chóir. Salm le Dáiví. 1 Scrúdaíonn tú mé, a Thiarna, agus is eol duit mé,

² más luí dom, más suí dom, is eol duit é; is eol duit mo rún is mé i bhfad uait.

³ Más siúl dom, más suan dom, feiceann tú; is eol duit mo shlite go léir.

⁴ Sula gcluintear focal ar mo theanga, a Thiarna, is eol duit ar fad é.

⁵ Imdhruideann tú ar chúl is ar bhéal mé; agus leagann tú do lámh orm de shíor.

⁶ Is ró-iontach, ró-uasal liom an t‑eolas seo; agus téann sé thar m'acmhainn a thuiscint.

⁷ Cá háit a rachaidh mé ó do spiorad? ná cá háit a dteithfidh mé ó do láthair?

⁸ Má ghabhaim in airde neimhe beidh tú ann romham; má luím san uaigh, beidh tú ansin romham freisin.

⁹ Má ghabhaim umam sciatháin na maidine, agus cónaí i gcríocha imchiana na farraige,

¹⁰ ansin féin beidh do lámh do mo sheoladh; agus béarfaidh tú orm le do dheasláimh.

¹¹ Má deirim go bhfolóidh an dorchacht mé, agus go mbeidh solas an lae ina oíche umam,

¹² ní dorcha leatsa an dorchacht: is comhsholas duit lá agus oíche.

¹³ Óir is tú a dheilbhigh go hiomlán mé; agus a d'fhuaigh i mbroinn mo mháthar mé.

¹⁴ Tugaim buíochas duit de bharr iontas mo dhéantúis; de bhrí gurb éachtach iad d'oibreacha. B'eol duit go hiomlán m'anamsa;

¹⁵ níor ceileadh ort fiú amháin mo chreat, nuair a cumadh os íseal mé, gur múnlaíodh i mbroinn na talún mé.

¹⁶ Chonaic do shúile mo ghníomhartha; óir scríobhadh iad uile i do leabhar; agus cinneadh dom mo laethanta go léir, sular tháinig ceann amháin acu ann.

¹⁷ Nach diamhrach liom do chomhairlí, a Thiarna; má dhéanaim a gcomhaireamh ní thig liom a n‑áireamh;

¹⁸ ní lia gaineamh na trá ná iad; dá mbeinn réidh leo bheinn farat go fóill.

¹⁹ Is mairg, a Dhia, nach scriosann tú na hurchóidigh; is mairg nach n‑imíonn uaim fir na fola.

²⁰ Óir déanann siad ceannairc i d'aghaidh go fealltach; agus tugann do naimhde mionna éithigh.

²¹ Nach fuath liom, do lucht fuatha, a Thiarna; nach déistin liom a n‑éiríonn i d'éadan?

²² Is amhlaidh atá an ghráin shaolta agam orthu; dar liomsa is deargnaimhde dom iad.

²³ Scrúdaigh mé, a Dhia, agus féach mo chroí; déan mo thástáil, agus féach mo smaointe.

²⁴ Féach an bhfuil drochslí á siúl agam; agus seol mé ar shlí na síoraíochta.