ЁВА 8 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ЁВА 8

¹ У адказ Балдад Сугіт сказаў:

² «Як доўга ты будзеш так гаварыць? А словы вуснаў тваіх — вецер навальнічны!

³ Ці ж Бог скажае прысуд або Усемагутны перакручвае тое, што справядліва?

⁴ І, калі сыны твае зграшылі супраць Яго і пакінуў Ён іх у руцэ правіннасці іх,

⁵ ты, калі на світанні ўздымешся да Бога і будзеш маліцца Усемагутнаму,

⁶ калі падыдзеш [да Яго] чысты і справядлівы, зараз устане Ён да цябе і дасць супакойнае жытло справядлівасці тваёй;

⁷ настолькі, што, калі пачаткі твае былі малыя, то рэшткі твае памножацца значна.

⁸ Спытай у даўнейшага пакалення і спасцігні глыбока ўспаміны бацькоў.

⁹ Мы — учарашнія і нічога не ведаем, бо дні нашыя на зямлі, быццам цень.

¹⁰ Хіба ж яны не навучаць цябе, не пагавораць з табою і ад шчырага сэрца не прамовяць слова?

¹¹ Ці ж можа зелянець трыснёг без вільгаці або чарот расці без вады?

¹² Нават калі ён у квецені і не вырываецца рукою, то засыхае раней за ўсе травы.

¹³ Такія дарогі ўсіх, што забываюцца пра Бога, і надзея бязбожнага загіне.

¹⁴ Спадзяванне яго — тонкая нітка, а надзея яго — быццам павуцінне.

¹⁵ Абапрэцца ён на дом свой, але той не ўстаіць, падапрэ яго, але ён не ўздымецца.

¹⁶ Здаецца ён вільготным да таго, як узыдзе сонца, і ў садзе яго праб’ецца парастак яго;

¹⁷ на кучы камянёў скопяцца карані яго, і застанецца жыць ён сярод камянёў.

¹⁸ Калі выкараняць яго з месца яго, яно адмовіцца ад яго і скажа: “Не ведаю цябе”.

¹⁹ Гэта вось радасць дарогі яго, каб ізноў з зямлі вырасталі іншыя.

²⁰ Бог не адкіне шчырага і не падасць рукі ліхадзеям,

²¹ яшчэ напоўняцца вусны твае смехам і рот твой — радасным ускліканнем.

²² Тыя, што ненавідзяць цябе, агорнуцца сорамам, і не выстаіць палатка бязбожных».