Kasta
98 Mä Segunda Oportunidad tuqit Biblian jiskʼa tʼaqanakapa
Tatitun munasiñapasti, qhuyapayasiñapasa jan tucusquiriraquiwa. Sapärmanthiw machakar tucuraqui, ¡cunja jach'as Tatitun chekapätapajja!
Tatitojj janiw armt'asquiti arunacapar phokhañjja, cunjämtï mayninacajj amuyapqui uqhama, jan ucasti jupajj suma chuymampiw suyt'asquistu; jupasti janiw munquiti qhitin chhakañapsa, jan ucasti muniwa takeninsa Diosar cutcatañapa.
Awquejjan ucaruw cutt'jjä, ucat saraquï: Awquiy, Dios contra, uqhamarac juma contraw juchañchasta. Wawamätwa sañataquejj janiw asquïcjjti, mä irnakerimarjamac catokjjeta’ sasa. Ucatwa fariseonacampi, ley yatichirinacampejj juparojj c'umipjjäna: —Aca jakejj juchararanacaruw catoke, ucanacampiraquiw mank'e —sasaw sapjjäna. Ucatwa sartasin cuttanjjäna awquipan ucaru. “Awquipasti jayancquipanwa juparojj uñjäna, ucatwa jupat qhuyapt'ayasisin jicjjatirejj jali, juparusti khomantasa jamp'att'asaraquiw catokäna. Ucatwa yokapajj jupar aqham säna: ‘Awquiy, Dios contraw juchachasta, uqhamarac juma contra, janiw asquïcjjti wawamätwa sañataquejja.’
¡Jumanacasti Tatitu Diosamar cuttjjapjjam, isinacama ch'iyanokcamayjja, chuymanacamaya ch'iyanokapjjamjja! Tatitojj munasiriwa, qhuyapayasiriraquiwa, paciencia chuymaniwa, munasiñapas jach'araquiwa; cuna mutuyäwetejj utjqui ucsa, jiwasatjja jayar apanucjjañataquisa.
Jichhasti Tatitojj marcaparojj siwa: “Cunatejj wasüru pascän ucjja jan amtcjjamti, janirac juc'ampi cunanacatejj pascän ucanacs amtcjjamti. Nayaw jichhajj take cunsa machak lurä, ucsti jichpacharaquiw uñjäta. Wasaran thaquinacwa jist'arä, jan achuri orakensti jawiranacwa jist'araraquï.
“Janiw yakha Diosajj jumjam utjquiti, jumasti pampachtawa ñankha luratanacapjja, juma contra sayt'asitanacapsa armaractawa, qhitinacatï marcamatjja jilt'apqui uca juc'aniru. Jumaw munasiñamjja uñacht'ayapjjesta, colerasiñamsti janiraquiw wiñayatac catjjäsctati. Nanacatsti wasitatay qhuyapt'ayasipjjeta, ñankha luratanacajjsti jach'a kotar jakontjjam.
camisatejj inti jalsut inti jalantcam wali jayajja, uqhäm jiwasanacat juchanacas jayarst'ayistu.
Tatitojj siwa: “Jutapjjam, uca jan wali luratanacamat parlapjjañäni. Juchanacamajj wila colorar uñtatäcchinisa, nayajj qhunjam jank'ow tucuyäjja; ch'iyar wila isir uñtatäcchinisa, nayajj jank'o t'arwaru uñtata tucuyäjja.
Uqhamasti, qhititï Cristompëjjchi ucajj machak jakëjjewa. Nayra luräwinacasti tucusjjaraquiwa, jichhajj take cunas machakar tucutawa.
Jiwasatejj juchanacas arsusiñänejja, jupajj chekawa, asquiraquiwa juchanacas perdonañataqui, uqhamarac take jan walinacata k'omachañataquisa.
“Tatitun ajayupajj nayjjanquiwa, Tatituraquiw nayarojj yakhachasitu; pobrenacaru suma yatiyäwinac yatiyiriw qhitanitu, llact'atanacaru chuymachañataqui, preso catuntatanacaru khespiyat sarnakasiñ yatiyiri, carcelanquirinacarusti khespiyat sarnakasiñ chuririraqui,
Diosan munasiñapatwa jumanacajj khespiyatäpjjtajja iyawsañ laycu. Acasti janiw jumanacan luräwinacamäquiti, jan ucasti Diosaw jumanacar churapjjtam. Janiraquiw cuna luräw tokëquisa, uqhamat jan qhitis jach'achasiscañapataqui.
ucampis sutejja apqui uca marcajjatejj jisc'ar tucusina nayat mayisitani, thaktaraquitani, uqhamarac jan wali sarnakäwinacapsa apanucuni ucajja, nayajj alajjpachatpachwa ist'äjja, juchanacapsa pampacharaquïwa, ucatsti marcapan nayrakatar sartañapsa cuttayjjaraquïwa.
Janejjay nayajj qhitin jiwañapsa muncstejja. Ñankha luräwinacamatjja jithektjjapjjam, ucapachaquiw jacapjjäta. Naya Tatituw ucjja arsta.
“T'ijut'ijunac jumanac contra qhitancta ejercitor uñtata jumanacar tucjañataqui uca maranacatjja, nayaw cuttayjjapjjäma.
Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.
Sarnakäwipjja uñjtwa, ucampis nayajj kolljjatäwa, samarañ churaraquï, chekpachansa samarataraquiw uñjasjjanejja. Llaquitanacarusti nayaw chuymachäjja,
Tatitojj qhitirutejj munqui ucarojj chekachiwa. Qhitinacarutejj wawapatjam catokqui ucarojj mutuyaraquiwa” sasa.
Munat wawanacajja, acanacwa kellkanipjjsma juch jan lurapjjañamataqui. Ucampis cawquïritejj juchañchasqui ucataquejj, utjistuwa mä arjjatirisa alajjpach Awquisan nayrakatapana, ucasti Jesucristowa, jupajj chekawa.
Janiraquiw p'aquit sokosarus p'acjcaniti, janiraquiw phust'canisa niya jiwirjam akasquir mecharusa, cunürutejj jupajj cheka cancañan apnakaña utt'aycani ucürcama.
Jupanacarusti mä suma amuyu churaraquï nayan Tatitütajja yatipjjañapataqui; jupanacasti marcajjäniwa, nayasti jupanacan Diosaparaquïyäwa, nayaru take chuymampi cuttanjjapjjatapata.
janiquiy jucha luratanacajjat amtasimti, janirac wayna cancañajjan ñankha luratanacajjat amtasimti; Tatay, qhuyapayasiñam laycuy nayat amtasita, munasiñam laycurac amtasita.
Uqhamaraquiw Cristojj mä cutiqui sacrificionjj loktasïna waljanin juchapa apakañataqui. Ucatsti khepïrinjja uñstaniraquiniwa, janiw juchanac apakeriti, jan ucasti jupar suyt'irinacar khespiyañataqui.
Ucampis impuesto cobrirejj jayaruwa kheparjjäna, janiraquiw alajjpachar uñtañs muncänti, jan ucasti jupapachaquiw chuymap lek'esïna, saraquïnwa: ‘Oh Dios, naya juchararat qhuyapayasita’ sasa. Sapjjsmawa, aca impuesto cobririw Diosan perdonata utaparojj cuttawayjjäna; fariseosti janiwa. Qhititejj jach'a jach'a tucqui ucajja, jisc'ar tucuyatäniwa, jisc'ar tucqui ucasti jach'ar aptatäniwa.”
Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.
Take profetanacaraquiw uca Jesusjjat parlapjjäna: Take qhitinacatejj jupar iyawsapqui ucanacajj jupan sutip laycuw juchanacapat perdón catokapjjani —sasa.
Jumanacatjja yakhepanacajj uqhamäpjjaraquïyätawa, ucampis jichhajj k'omachatäjjapjjtawa, Diosarus catuyatäjjapjjaractawa, Tatit Jesucriston sutiparu, uqhamarac Diosan Kollan Ajayup tokeraqui.
Take ch'amani Tatitusti ucatwa sistjja, jichhajj nayan partejjat sam marcaru: ‘Nayaru cutt'anjjapjjam, nayasti jumanacaru cutt'anjjaraquïwa. Naya, Tatituw arstjja.
Yupaychañäni Diosaru, Jesucristo Tatitun Awquiparu, jupasti jach'a qhuyapayasiñap laycuwa jiwasarojj machakat naciyistu, Jesucriston jiwatanac taypit jactatap toke. Ucasti jiwasanacarojj suyt'añanwa jacayaraquistu,
Ucampis Diosajj munasiñapwa uñacht'ayistu, cunapachatejj jiwasanacajj juchanïscäyätan ucapachaw Cristojj jiwasanac laycu jiwawayi.
Jilatanaca, jumanacatejj mayniru jucharu tincut jicjjatapjjsta ucajja, jumanacajj Diosanquirinacjamajj yanapt'apjjañamaw jupan sayt'asiñapataquejja. Ucsti llamp'u chuymampi lurapjjañamawa, take amuyumpi, jan jumapachpa juchar jalantañamataqui.
Alajjpachanquiristi, qhititejj wiñayatac jacqui, sutipasti kollanaraqui, ucajj aqham siwa: “Nayajj mä alto kollan chekanwa jacta, ucampisa qhititejj alt'at chuymani, llact'ata sarnakaraqui ucanacarusti ch'amañcharactwa.
Reyisti uqham achict'asipanjja qhuyapt'ayasïnwa, take uca manupjja perdonänwa, jupasti sarawayjjänwa.
Davidasti Natán nayrakatanjja juchanïtapwa amuyasïna: —Tatitu contraw juch lurta —sasa. Natanasti saraquïnwa: —Tatitojj janiw jumarojj juchamat mutuycätamti, janiw jiwcaraquïtasa.
Jichhasti jupanacarojj saraquim: Naya Tatituw juramentompi arsta, janiw nayajj khoru jaken jiwañapjja muncti, jan ucasti uca khoru jacañapjja apanucpan ucatsti jacaracpan. Israel, jumajj uca jan wali sarnakäwim apanucum. ¿Cunataraqui jiwascätasti?’
Mank'añ tucuyatatsti Jesusajj Simón Pedroruw jisct'äna: —Simón, Jonasan yokapa, ¿acanacat sipansa juc'ampit munista? —sasa. Pedrosti sänwa: —Jïsa, Tata, jumaw yatta nayajj jumar munatajja —sasa. Jesusasti saraquïnwa: —Uqhamajj ovejanacajja awatim —sasa. Payïrinjja wasitampiw jisct'i: —Simón, Jonasan yokapa, ¿nayaru munasistati? —sasa. Pedrosti ucjjarojj saraquïnwa: —Jïs, Tata, jumaw yatta nayajj jumaru munatajj-jja —sasa. Jesusasti siwa: —Uqhamajj ovejanacajja awatim —sasa. Quimsïri cutinjja jisct'äscaquïnwa: —Simón, Jonasan yokapa, ¿munistati? —sasa. Pedrojj llacthapisïnwa quimsa cuti: “Munistati” sas jisct'atapata. Jupasti sänwa: —Tata, jumaw take cuns yatta. Jumaw yatta nayajj jumaru munatajj-jja —sasa. Jesusasti sänwa: —Uqhamajj ovejanacajj awatim.
Janiw asqui jakenacar jawsir jutcti, jan ucasti juchararanacar jawsiriw jutta, jupanacajj juchanacapat arrepientisipjjañapataqui —sasa.
Diosajj nayra jaquir jakenacan pisi amuyump jacatanacapjja janis cunäcaspa uqhamwa imantäna. Jichhasti takeniruw take token yatiyi, uca jan wali sarnakäwinac apanucupjjañapataqui.
Ucampis Tatitojj jumanacat qhuyapayasiñataquiw suyasipctam, jupasti walipuniw munasiñapjja uñacht'ayañ munapjjtam, Tatitusti qhuyapayasiri chekapa Diosaraquiwa. ¡Cusisiñanïpjjew jupar suyt'irinacajja!
Tatitojj munasiriwa, qhuyapayasiriraquiwa, k'apisiñapajj c'achhaquiwa, munasiñapasti jilarquiriwa. Tatitojj takenir munasiriwa, takpach luratanacaparojj munasiñampiw uñji.
Diosaw suma amtäwinac churapjjtam, jupa pachparaquiw yanapasipctamjja uca lurañanac phokhañanjja jupan munañaparjama.
T'akhesiñancasinsti Tatitut art'asipjjäna, jupasti t'akhesïwit waysüna. Ch'amac lajja taypit apsüna, cadenanacamp chinuntatat jaranucüna.
Tatituw takpach juchanacajjat pampachitu, jupaw take usunacajjat c'umarachitu; jupaw amay imäwit khespiyitu, juparaquiw munasiñamp qhuyapayasiñamp phokt'itu;
¡Take acanacjja nayaw amparajjampi lurta, uqhamatwa utjañjja kalltapjjaraqui! Naya Tatituw ucjja arsta. “Cawquïr jaktejj nayajj uñtascta ucajj qhititejj pobre, llact'ata sarnakqui, arunacajjsa suma ist'caraqui, phokcaraqui ucawa.
Warmisti saraquïnwa: —Janiw qhitis, Tata —sasa. Jesusasti ucjjarojj saraquïnwa: —Uqhamasti janiw nayas juchañchcaracsmati; jichhajj sarjjam, janiraqui juc'amp juch lurcjjamti —sasa.]
Take yant'anactï jumanacajj t'akhesipcta ucanacajja, cunjämtï mayninacajj t'akhesipqui uqhamaraquiquiwa. Jumanacajj Diosaruw catuyasipjjañamajja, jupasti janiw jumanacarojj jach'a jan atipcaya yant'anacjja churapcätamti. Cunapachatï yant'ajj jutcani ucqhajja, Diosajj cunjämatsa uca yant'ar atipjañjja yanapapjjaraquïtamwa, uqhamatwa atipjapjjäta.
jiwañ p'iyat waysusitu, mic'ayar jalantquiriruw khespiyitu; karka patjjaruw cayunac tact'ayitu, tact'añajjaruw ch'amañchi.
Samuelosti saraquïnwa: —Jan ajjsarapjjamti. Chekpachansa jumanacajj sinti jan wali lurapjjatätajja; ucampisa jichhajj jan Tatitutjja sarakapjjamti, jan ucasti take chuymampi jupar yupaychapjjam.
Tatitojj wasitatwa Jonás chacharojj parläna, saraquïnwa: Diosasti uñjänwa Nínive marcanquir jakenacarojj uqham lurasquiri, jan wali sarnakäwinacapsa apanucusquiri, uqham uñjasinwa Diosajj jupanacat qhuyapt'ayasjjäna, janiraquiw cuna castigotejj jutañapäcana ucsa apayancjjänti.
Qhititejj juchap imantascani ucajja, janiw nayrar sarcaniti, ucampis qhititejj juchap arsusisina jaytanucjjani, ucasti perdonatäjjaniwa.
Nayar jutapjjam take karjatanaca jatjatanaca, nayaw samarayapjjäma. Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta. jisct'añataqui —¿Jumätati jutañapäquis uca Cristojja, jan ucajj yakharuch suyapjjäjja? —sasa. Nayan yugojjasti jasa apañaquiwa, qhumojjasti sinti phisnaquiraquiwa.”
Jilatanaca, janiw nayajj ucampejj sañ munapcsmati niyas jicjjatquirista uqhama, jan ucasti cunatejj khepancqui ucjja, armanuctwa, nayrancquis uc jicjjatañcamaw ch'amañchasiscta, cawqharutejj puriñasäqui, ucar puriñataqui, alajjpachan chürawi catokañataqui, cunataquitejj Diosajj Cristo Jesús tokejj jawsquistu uc catokañataqui.
Diosajj jach'a munasiñapatwa Yokapan jiwäwipa toke khespiyistu, juchanacassa perdonasaraqui.
Chekpachansa Cristompi chicaw bautismo toke jiwasanacajj imantatäjjtanjja, ucatsti jiwatäjjaractanwa, ucat jactasina mä machak jacañan jacañataqui, cunjämtejj Cristojj jactawaycäna Dios Awquin jach'a ch'amap laycu uqhama.
janiw cuna asqui luratas laycuti, jan ucasti qhuyapayasiñap laycuwa khespiyistu jarekäwi toke. Kollan Ajayu toke machakat naciyaraquistu machak jacañ churasa.
k'apisiñapajj mä juc'ataquiquiwa, munasiñapasti wiñayataquiwa; jayp'u tokerutejj jachañajj puristanejja, willjta tokerojj cusisiñaw utj- jjestani.
Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.
Ucjjarusti Pedrojj jupanacarojj sänwa: —Sapa mayni jumanacajja cutiquipstapjjam, uqhamarac bautisasipjjam Jesucriston sutiparu, juchanacamata perdonatäpjjañamataqui. Ucatwa Diosajj Kollan Ajayu churapjjätam.
Jesusajj juparojj saraquïnwa: —Chekpachawa sisma, jichhürpachaw jumajj nayampi chica paraisoncjjäta —sasa.
Ucampis uca mä juc'a urunacana t'akhesipjjatama pasjjepansti, Diosajj jumanacarojj sumwa tucuyapjjätam, sum sayt'ayapjjaraquïtam. Uca Diosasti qhititejj take bendicionanac churquistu ucawa, uqhamarus Jesucristompi chicäñasataquiraquiwa jawsistu wiñayataqui.
Nayar uñt'añataquejja janiraquiw waquiscjjaniti, yatichasipjjañanacapajj maynit maynicama amigonacaparusa, uqhamarac familianacaparusa, takeniraquiwa jisc'at jach'acama nayarojj uñt'apjjetani. Nayasti jupanacarojj ñankha luratanacapatjja perdonaraquïwa, jucha luratanacapatsti janiw mayampsa amtascjjaraquïti. Naya Tatituw ucjja arsta” sasa.
Jichhasti janiw cuna juchañchäwis utjquiti Cristo Jesusanquirinacataquejja, qhitinacatejj jan jacapqui janchin munañaparjama [jan ucasti Ajayun apnakata jacapqui ucanacataquejja].
Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.
Tatay, jumajj munasiñanïtawa, juch pampachiriraquïtawa, jumar art'asirinacataquejj qhuyapayasirïtawa.
Khoru jakejj sarnakäwipjja apanucpan, ñankha amtañan jakesti amtañanacapjja apanucpan; Tatitun ucar cuttanjjapjjam, jupasti jumanacatjja qhuyapayasipjjätamwa; Diosasar maqhatjjapjjam, jupasti perdonañataquejj janc'aquiwa.
“Jumanacatejj jan wali luratanacapat masinacamarojj perdonapjjäta ucqhajja, alajjpachanquir Awquimajj jumanacarojj perdonapjjaraquïtamwa. Masinacamar jan perdonapcäta ucasti, jumanacan Awquimasti janiraquiw cuna juchanacamatsa perdonapcaraquïtamti.
Uqhamasti jan wali lurañanacjja apanucupjjam, ucatsti arrepientisipjjam juchanacamajj perdonatäñapataqui. Ucatwa Diosajj jumanacar cusiscañ urunac churapjjätam,
ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.
Cunjämatejj marcajjajj t'akhesïnjja, pä ucqha p'enkachata, jisc'achataraqui, ucat jichhajj pä ucqha kamir cancañjja catokapjjaraquini, wiñay cusisiñampiw cusisiraquini.
Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.
Ucatwa sismajja, walja juchanacapat perdonatäsinwa, walja munasiñapajj uñacht'ayasejja. Ucampis qhititejj juc'aqui perdonatäqui ucajj juc'a munasiñaniquiraquiwa.
“Cusisiñanïpjjew qhitinacatejj qhuyapayasirïpqui ucanacajja, Diosasti jupanacatjja qhuyapt'ayasiraquiniwa.
Jumanacarusti mä machak chuyma, mä machak ajayu uscjjapjjaraquïma. Jumanacatsti uca kala chuymjja apakjjapjjaraquïmawa, mä llamp'u chuyma churjjapjjaraquïma.
Cunapachatejj jupanacajj iyawsañampi orapjjanejja, uca usutajj khespitäjjaniwa. Tatitusti juparojj sartayjjaraquiniwa, juchanïchi ucqhasti perdonataraquïniwa.
Take qhitinactejj Awquejj churquitu ucanacajja nayaruw juti; qhititejj nayaru jutqui ucarojja janiw ankaru alisnuccti.
Juparutejj jan take chuyma arccañäni ucas, jupajj janiw armasquistaniti, Diosajj janiw jupapachpa armascaspati.
Ucampis jucha luratajjaw utjäna, uc amuyasta, ucat jucha luratanacajj jan imt'csmati; juchanacajj jumar arsusiñataquiw amtta, Tatay, jumasti juchanacajjat pampachista.
Nayaw juchanacamsa, pantasitanacamsa chhaktaytjja, cunjämatejj kenayanacajj chhaktapjje uqhama. Nayan ucar cuttanjjam, nayajjay jumarojj khespiysmajja.”
Acajj chekawa, takeniw acjj iyawsapjjañapa: Cristo Jesusajj aca orakerojj juchararanacar khespiyiriw juti, ucanacatsti nayaw nayrïrïtjja.
Leyisti churatänwa juchajj juc'amp uñstañapataqui, ucampis cunapachatejj juchajj juc'ampi utjänjja juc'ampiraquiw Diosan qhuyapayasiñapajj utjaraquïna.
ucampis Tatitojj situwa: “Munasiñajjaquiw jumataquejj waquichatajja, nayan ch'amajjasti juc'ampi sumaw uñsti cunapachatï jakejj t'uqha jicjjatasqui ucqha” sasa. Uqhamajj nayajj cusistwa, Criston ch'amapajj nayan t'uqhasiñajjan uñstañapataqui.
Diosaw jiwasarojj ch'amacanacan munañapat khespiyanistu, Jesucristo Yokapan apnakatäñataquiw uchasiraquistu. Uca Yokapasti jiwäwipampiw khespiyaraquistu, juchanacasat pampachasa.
Ucapachaw Pedrojj sartasina Jesusarojj jisct'äna: —Tata, cunapachatejj jilajjajj cuna jan walsa luritan ucajja, ¿kawkha cutis nayajj uca juchapatjja perdonäjja? ¿Pakallk cutcamati? sasa. Jesusasti saraquïnwa: —Janiw pakallk cuti siscsmati, jan ucasti, pakallk tunca pakallko cuti sismawa —sasa.
Diosajjay, munasiñam laycuy qhuyapt'ayasita, qhuyapayasirïtam laycuy juchanacajjat pampachita. Diosay, k'oma chuymay utjayita, machak asqui ajay churaraquita; nayrakatamat jan apanucusistati, janirac kollan ajayums irpakasistati; khespiyäw cusisiñam wasitat churjjeta, ch'aman ajayumamp thurt'ayita. Jucharar jakenacaruw thaquimat yatiyä, juchaninacasti jumaruw maqhatjjapjjätam. ¡Diosay, wila wartañat khespiyita, Diosajjay, Khespiyirejjay! Lajjrajjasti asqui cancañamat k'ochuni. Tatay, lacajjay jist'arita, lacajjampisti jach'añchasaw k'ochüma. Janiw jumajj loktanac munctati; nayajj ucanac loktirismawa, ucampis janiw loktanacajj cusisiyctamti. Diosatac chekpach loktäwejj cutiquipstat chuym loktañawa. Diosay, llamp'uptat chuymarojj janiw jumajj jisc'achctati. Tatay, munasiñam laycuy Sión marcarojj asc luram, Jerusalenan perkanacap wasitat sayt'ayam. Ucapachaw loktäwinac catokasjjäta: churäwinacamp, wilañchanacampi, ucapachaw altaramjjarojj vaca kallunac loktasjjani. Ñankha luratanacajjat jarekt'ita, jucha luratanacajjat k'omacht'ita.
ucatsti takeni jucha lurapjjatap laycusti Diosampejj janiw catokatäpquiti. Ucampis Diosajj jupan jach'a munasiñapanjja ina ch'usatacwa catokestu, Jesucristo tokwa jiwasanacarojj khespiyaraquistu.
“Diosajj acapachar wal munatap laycuw mä sapa Yokapar qhitani, take qhitinacatejj jupar iyawsapqui ucanacajj jan chhakañapataqui, jan ucasti wiñay jacañanïñapataqui.
Nayasti yatiractwa cuna amtäwinacatejj jumanacataqui utjquitu ucanacjja, uca amtäwinacasti jumanacan asquinacamataquiwa, janiw jumanacan jan walt'apjjañanacamataquïquiti, uqhamat khepa urunacanjja wali suma jacasipjjañanacamataqui, suyt'añanacansa phokhantataraqui. Naya Tatituw ucjja arsta.
asqui jakejj pakallk cutis aynacht'canejja, cutjtascaquiniwa, ucampis jucharar jakejj jan walt'añapanjja k'alawa aynacht'ani.