Provérbios 14:32 - Kaxinawá Bíblia (BR)

Huni txakabu hatũ txakabuwẽ txakabuwai di imisbuki. Hakia huni pepabu duapakubaini hawẽ pepawẽ hawa dateama unanuma mawatirubuki.

Provérbios 14:32 Referencias Cruzadas

Gênesis 49:18

hawẽ mekenika Deus datã akĩ: “Senhor Deusuũ, mĩ ea mekekubaĩshanai ẽ mia manahairaii”, itã

Salmos 16:11

Mĩ hiwekuiã kati bai mĩ ea unãmakubainaii. Mibe nia ẽ benimahairaya mĩ ea duawakubainaii.

Salmos 23:4

Hawara bika tenei napãpa meshuhaira keska merã ẽ nibiakainaya mĩ ebe kaiwẽ taea hawa mesei ẽ dateismaki. Mĩ ẽ mekenã ebe kakĩ mĩ mestẽti inũ mĩ txashuwã hawẽ atxikĩ betãti tsumabaĩkĩ ea benimawakĩ mĩ ea shinã txakawãmiski.

Salmos 37:37

Huni hakiri txakabu yuikĩ metuisbumarã, haskakiri uĩkĩ shinãkãwẽ. Ha huni peparã, unanuma hiwenũbarikiki.

Salmos 73:24

Mĩ yusiã pepawẽ mĩ ea tapĩmakubaĩmiski. Txipu mĩ kushipawẽ nai anu ea benimawakĩ mĩ ea ishanaii.

Provérbios 11:5

Huni pepabũ kaneaibũ ha yunuti pepatũ hatũ shinã hatu kayatapĩmakubaĩmiski. Hakia huni txakabubũ kanekĩ hatũ txakabuwẽ ibubis ana pikumisbuki.

Provérbios 14:33

Tsuabũra bebũkiri pe shinãkubaĩmisburã, hatũ shinã merã unanepa hãtxa hayabuki. Hakia unaĩsmapabũ unanepati hãtxa hawa tapĩtirubumaki.

Provérbios 5:22

Huni txakabũ ibubis hawara txakabuwamisrã, hawẽ yura txakabũ atxitã dispiwẽ neakĩ akawamamisbuki.

Provérbios 6:15

Haskamisbuwẽ taeshũ habu kupikinã, txakabuhairawẽ hatu bika tenemakĩ hawaira betsupe ika keska wakĩ hatu txakabuwakĩ yamawakĩ keyushanikiki, hawawẽ ana kayatima hatu wakinã.

Lucas 2:29

“Shanẽ Ibu kuxipatuũ, natiã ea duawakĩ haska mĩ ea yubaima mĩ ma akaki. Haskawẽ taea hawa dateama unãnuma benima paewẽ ẽ mawashanai ea ana nemayamashãwẽ.

João 8:21

Habianushũri Jesusũ mapuabu hatu ana yuikĩ: —Ea ẽ hanira kakenã, ea benai matũ txakabuwẽ taea mã mawashanaii. Hanu ẽ kashanai anu mã katirumaki— hatu wa

João 8:24

Haskakẽ matu yuikĩ: “Matũ txakabu hakimama mã mawashanaii”, akĩ ẽ matu yuishuki. Nĩkakãwẽ. Txanima ẽ hiwei ikibi ini mã ea ikũwãkatsi ikama matũ txakabuwẽ besti mã mawashanaii— hatu wa

Romanos 9:22

Haska yurabũ hatũ txakabuwẽ Deus danaĩbu Deus hatuki sinatakĩ mawa kayabiwẽ hatu kupishanai inũ, ha besti kuxipahaira Deusũ yurabu unãmakatsi ikĩ haska hawẽ kuxipawẽ hawaira akama teneshũ manayukubainikiki.

2 Coríntios 1:9

xinaĩ: “Natiã daki nuku ma tenãkanikiki”, ikĩ hawara nukũmebi nũ atiruma ibubis nũ xinãbiaya Deusũ nuku yusĩkĩ haska hatũ mawabu bestẽwãshanaitũ nukũ hamapai tibi nuku ashũtiru nũ ikũwãtirubu Deusũ nuku haska binumakubaĩyamaki.

2 Coríntios 5:8

Na nukũ yura nũ henebaĩshanaii, nukũ Shanẽ Ibube hiwei kakinã. Hawa dateama punu nukama nũ hiweyukũkainaii.

Filipenses 1:21

Natiã ẽ hiweyuarã, Cristo ẽ hiweshũyukũkainaii. Hakia hawẽ taea ẽ mawarã, ẽ nenu hiwemis binuaki.

Filipenses 1:23

Eã ibubis haska dabe ẽ katuarã, bikahairaki. Ẽ xinãnã, mawatã ẽ Cristobe ma hiwei kai pehairaki, enarã.

1 Tesalonicenses 5:3

Haskakẽ ana hawaki yurabu dateama yuikĩ: “Unanuma hiwei hawaki mesei dateama hiwekubainãkãwẽ”, ikubaini ana hawaki mesei dateabumakẽ Jesus ana niti ikama hawairakirã hatu kupishanikiki, aĩbu bake kaĩnũ ika isĩ berukutã ana maiãma kaĩmis keskairã.

2 Timóteo 4:18

Txakabu dasibi nukũ Shanẽ Ibũ ea binumakubaĩkĩ hanu shanẽ ibuai pepa hawẽrua nai anu ea pashawatã ea mekeshanai ẽ unaiĩ. Haskakẽ niti ikama ha duawakĩ kẽwanãkãwẽ. Haskakirã.

Apocalipse 14:13

Hanushũ nai anushũ hui betsa tashnikĩ ea yunukĩ: “Na hãtxa keneriwe. Na habia unuri pakea nukũ Shanẽ Ibuki dasitã mawakubaĩshanaiburã, Deusũ hatu benimahairawashanikiki”, ikaya hanushũ Yushĩ Pepatũri ea yuikĩ: “Habiaskaki. Haburã, hatũ daya henetã huĩrukũ bestishãkanikiki. Ha inũ, hamapai xarabu Jesus Cristo ashũkubaĩmisbuwẽ Deusũ hatu manaku bestishanikiki”, ea wai nĩkakĩ haskashanaibu ẽ uĩshuki.