Gênesis 49 - Kaxinawá Bíblia (BR)

Haskanũbariaibu hawẽ henekĩ Jacó hawẽ bakebu hatu hãtxa wanikiaki, na hãtxarã

¹ hanushũ ana betsatiã Jacó hawẽ huni bake dasibi kenashũ hatu yuikĩ: “Ea anu itxakãwẽ. Mã haskanũbariai matu bebũkiri yuinũ ea nĩkai bekãwẽ”, hatu wa itxabu

² hanushũ hatũ epã hatu yuikĩ: “Ẽ bakebuũ, ẽ matũ epa Jacóki. Ẽ Israelrã, ea dapi itxashũ ea nĩkakãwẽ”, ikĩ,

³ ha dukũ hawẽ bake iyua Rúben yuikĩ: “Epaã, mĩ ẽ bake iyuaki. Ha dukũ miki dukũ dayai taekĩ ẽ kushipa berunãtũ mia bawai ẽ miki hinĩ taeniki. Haskawẽ taeshũ mia kushipawakĩ mia mekebaũ ẽ mia hatu binumaniki.

⁴ Hakia mĩ ana hatu binui haskatirumaki. Mia ikirã, eskatiã mĩ hene bai matatã kushipamis keskaki, tsuã mia nemapainũ haska shinãma ẽ ainĩ dayaru escravabe ẽubi txutakĩ mĩ ea dakehairawaniwẽ taearã”, atã

^5-6 hanushũ Simeão inũ Levi ha dabe hatu yuikĩ: “Maturã, mã habias shãkĩki naneaki. Matũ detetiya mapua shinã txakakĩ mã hatu itimaska wabaũmiski. Pubeĩ hatuki sinatakĩ hunibu hatu tenãtã hatũ ina awa mã hatu bishtẽ bishtẽ akaniki, mã hatu haska waĩ pe dabanenã. Mã haska waniwẽ taea matunabube mã itxashũ shinaĩ anu ẽ matube nashui itirumaki, dabinã”, iwanã,

⁷ “Mã txakabu pubẽ sinatapabuki. Haskawẽ taeshũ matunabu ẽ sa ashanaii, matũ betsabu manibaunabube matu husikinã. Matũ txakabuwẽ taeshũ hau Deusũ matu yupukĩ manakushanũwẽ”, hatu atã

^8-12 hanushũri Judá yuikĩ: “Epaã, miarã, mĩ ẽ bakeki. Mĩ betsabũ mia duawakĩ mia kẽwãshãkanikiki. Miki sinataibu maemanũ ishũ mĩ hatu temus shanaii. Inu leãonẽ bakẽ mibikĩ atxishũ pia keska wai inũ, ana hawa bika teneama yani wa inu betsa leão ewapa keska mĩ dakayushanaii, tsuã mia txikishwamarã. Judáã, tsuã taska mĩ kushipa minabu Siló anua hatu mebĩtirubumaki. Mĩ mekẽwẽ mĩ shanẽ ibũ mane mestẽti mĩ hayayukũkaĩshanaii. Hakia ha mestẽti ibu kayabi hushũ minabu anua hatu mebĩkẽ ha mae anuabũ ha shanẽ ibu washũ kẽwãkĩ txibãkubaĩshãkanikiki. Uva tashuki hawẽ jumento bake teneshtã hawẽ tari uva bimi tsinia tashipa buspuaiwẽ txukashanikiki. Hawẽ beru hawẽrua uva hene keska meshupa inũ, hawẽ sheta awa txutxu keska hushupahaira inũbarishanikiki”, atã

¹³ hanushũ Zebulom yuikĩ: “Epaã, miarã, ianẽwã kesha minabu hiweshãkanikiki, hanu shashu ewapabu keti ikai anurã. Minabũ mai pakea kesuarã, mae ewapa Sidom anu inũbarikiki”, atã

¹⁴ hanushũ Issacar yuikĩ: “Epaã, miarã, mĩ dayakapaki, yuinakapã shãkama bumis keskarã.

¹⁵ Mae hawẽrua betxitã hanu dayai hanu huĩrukũkatsi mabu shãkama peubirãkĩ minabu hatu escravo tsuma watã hatu yunua hawa yuiama minabũ hatu dayashũkubaĩshanikiki”, atã

¹⁶ hanushũ Dã yuikĩ: “Epaã, minabu ikirã, hanubi hawenabu shanẽ ibushũshãkanikiki, Israelĩ enabu shukua bestirã.

¹⁷ Dunu pianã bai kesha manishũ cavalo tae txipũ meshtea keska wakĩ ha huni haki tsaua buaibu minabũ hatu pakeshanikiki, hatu maemakinã”, akĩ

¹⁸ hawẽ mekenika Deus datã akĩ: “Senhor Deusuũ, mĩ ea mekekubaĩshanai ẽ mia manahairaii”, itã

¹⁹ hanushũ Gade yuikĩ: “Epaã, minaburã, nawa kushipabu beshũ hatũ mae anushũ yumetsukĩ minabu hatu detebaĩshãkanikiki. Hakia hatu manakukĩ minabũ hatu txibãbaĩshanikiki, hatu maemai bukinã”, atã

²⁰ hanushũ Aser yuikĩ: “Epaã, mianã, misi betsa betsapa kemutapa itxapa minabu hayashãkanikiki. Shanẽ ibũ piti pepa hawẽrua haya haska besti bawatã pi minabu hiweshãkanikiki”, atã

²¹ hanushũ Naftali yuikĩ: “Epaã, miarã, txashu betsa cerva tsuã atxitiruma keskai hawama nishũ bake pepa hawẽrua bawai minabu hiweshãkanikiki’, atã

²² hanushũ José yuikĩ: “Epaã, miarã, mibã hene kesha nia mĩ bimi paipaimaya keska mĩ pũyã bukũ ha kenekaunaki mĩ puea bimi shãkama dunua keskawẽ taea minabu pahairashãkanikiki.

²³ Piayabũ hatu danãkĩ betxipaiama minabuki pia bishkukĩ bikawabiabũ

²⁴ hakia hatũ pũyã pũshukuama kushipakĩ minabũ hatu maemakubaĩshãkanikiki. Jacó Deus kushiparã, pehairaki! Israelĩ mekenika kushipa ẽ kẽwaiĩ.

²⁵ Ẽ mekenika Deusũ mia ea merabewashũmis ẽ kẽwaiĩ. Deus kushipahaira dasibi binuatũ hau mia inũ minabu duawakubaĩshanũwẽ. Nai anua minabu hamapai inãkĩ hene meranua hatu inãriakĩ bake itxapa hatu bawamakĩ txutxu mirima hatũ bakebu amakĩ hau minabu duawapakeshanũwẽ”, akĩ

²⁶ “Eanã, mia duawakinã, ẽ ibubũ ea duawani keskama hatu binumakĩ ẽ mia pepawakĩ duahairawaii. Mĩ betsabu anua mia katutã Deusũ mati hawa niti ikama bawanitũ mia inũ minabu pakubainaibu hau matu duawakubaĩshanũwẽ”, atã

²⁷ hanushũ Benjamimri hawẽ henekĩ yuikĩ: “Epaã, miarã, mĩ pubẽki, kamã inu keskarã. Haskai hatuki sinataibu penaya hatube detenamekĩ hatu maematã bari kaya hatũ mabu itxawatã minabũ pashkakubaĩshãkainikiki”, akĩ haska hatu hãtxa wanikiaki.

²⁸ Hatibuki, Israelĩ 12 huni bakebu shukua tibi hatũ ibuã habu tibi hau haskanũbarinũbũ hatu hãtxa tibi yuikĩ yunua akeakenirã.

Jacó mawashina mai wanibukiaki, na hãtxarã

^29-32 Ana betsatiã Jacó hawẽ bakebu hãtxa wakĩ hatu yunukĩ: “Matu shunubaini ma enabuki ẽ nukui kakatsi ikaii. Ẽ mawaya mishki kini tãpe merã ẽ epabe ea mai wai bushãkãwẽ. Canaã mai pakea anu Manre dapi Macpela bai depi mishki kini tãpe merã ea mai wai bushãkãwẽ, mai wati bai bikatsi ikĩ peiwẽ taeshũ Heteu nawa Efrom anua ẽ hutxi Abraão bini anurã, hanu hawenabu mawa mai wapaketi bini anurã. Ha mai bikĩ taewashũ hanu dukũ hawẽ aĩ Sara mawa mai waniki. Hanua hari mawa habianuri mai warianibuki. Hanushũ ẽ ibubu Isaque inũ Rebeca mawa habianuri ẽ hatu mai waniki. Eãri ẽ aĩ Léia mawa habianuri ẽ mai warianiki. Ha mai wati anurã, habianuri hatube ea mai wai bushãkãwẽ”, hatu watã

³³ hanua Jacó hawẽ bakebu hãtxa wakĩ menetã ana dakai petã mawaya