Provérbios 5 - Kaxinawá Bíblia (BR)

Aĩbu txakabukiri yusinikiaki, na hãtxarã

¹ Epaã, ẽ unanepa hãtxa nĩkairawe. Haska eã ẽ tapini miari yusinũ pes shũ ea nĩkawe.

² Na habiatiã haska tapĩtã shinã pewai unanepã hãtxa unãtã mĩ hawẽ hãtxashanaii.

³ Eska mia yuinũ ea nĩkawe. Aĩbu hawẽrua beneyabia kemui hawẽ hãtxa kemutapatunã, piti sheni pepa mĩ betxipaimis keskatũ binutiruki.

⁴ Hakia hawẽ hiwea txakabu eskaki. Tsuara ha aĩbu haska parananãmis hawẽ hãtxa ana hawẽruama ni pei mukahaira keska inũ nupe kenu dabeya keskawẽ hatu meshteabu isĩhairamisbu keskaki.

⁵ Ha aĩbũ hatu iyukinã, hau habe mawai kanũ hatu iyumiski, hawa hatu niti akama hanu mawa maiwamisbu anu hatu iyukinã.

⁶ Ha hiwea kayabi baiwẽ kai hawa pe shinãma hawẽ hiwea mestẽmawẽ taea hawẽ nuitiruma inũ hawa unãmaki.

⁷ Haskawẽ taeshũ epaã, ẽ hãtxa ea nĩkatã ẽ yusĩti hãtxa hawa heneyamakubaĩshãwẽ.

⁸ Ha aĩbũ hiwea anu hari mĩ kemashĩkẽ

⁹ haska mĩ hiweawẽ bari itxapa daya txakayamakũkaĩkĩ mĩ mabu itxawakubainaya nawa betsa hawa miwẽ nuiama miki sinatakĩ mia mebĩtiruki.

¹⁰ Haskakẽ dasibi mĩ daya pei inũ hawara mĩ dayaima hau nawa betsã biyamashanũ ha aĩbu txakabu anu hawa hari kemayamashãwẽ.

¹¹ Hakia ẽ hãtxa danaĩ aĩbu txakabu anu mĩ kakũkaĩmis atimas mĩ hiwea keyui mĩ yura unãshubira babukũkaĩkĩ

¹² hanushũ ibubis shinaĩ: “Ea yusĩkĩ nemabiabu haskakĩ hatũ yusiã ẽ danãkubainimamẽ? Ewẽ nuikĩ ea nemabiabu haskakĩ ẽ hatu nĩkama ikũkainimamẽ?

¹³ Huni yusinãbũ ea yusiãbu ẽ hatu nĩkama ikimaki. Hanua ea unãmabiakubainabu ẽ hatu danaĩmaki.

¹⁴ Enabu dasibibũ ea uiaĩbũ txakabu mei ẽ hawẽ benui pemahairashina shinaĩ ẽ dakehairaii”, iwanã, “Aitĩ itxakayamakĩ mĩ yuikubaĩshanaii.”

¹⁵ Hakia ẽ hãtxa nĩkakubaĩwẽ. Haskawẽ taea mĩ ainã, txatxa ũpash pepa habai keskaki. Txutanamekatsi ikĩ mĩ ũpash manuai keskakinã, mĩ aĩ besti txutakubaĩshãwẽ.

¹⁶ Ũpash pepa bai namaki hukakĩ txakabuwa keskakĩ aĩbu betsawẽ kemukĩ mekĩ mĩ hura txaka wama mĩ aĩ besti txutakubaĩshãwẽ.

¹⁷ Mĩ ainã, mina bestiki, betsanamarã. Hau huni betsã mĩ aĩ txutanũ mĩ aĩ yunuama mina besti wakĩ txutakubaĩshãwẽ.

¹⁸ Txatxa ũpash pepawẽ kemukĩ nũ betxipaimiski. Mĩ aĩ berunãtũ mĩ biai Deusũ mia inãni habe mia duaya habe besti benimakũkaĩshãwẽ, ha txatxa ũpash mĩ betxipaimis keskairã.

¹⁹ Txashuwã bake hawẽrua pishta keska mĩ ainĩ yura hawẽrua mĩ betxipaiai mia damãbauna hinĩ bitã benimakĩ ha besti txutakubaĩshãwẽ.

²⁰ Epaã, haskai hawa shinãma aĩbu huni betsanawẽ mĩ kemukũkainai? Haskakĩ aĩbu mĩ aĩma ikutã hawẽ txutxu damãkĩ mĩ mekubainai?

²¹ Huni tibi mapushũ akubainaibu haska akaibu Senhor Deusũ uĩkĩ hawa hakimama shinãkubaĩmiski.

²² Huni txakabũ ibubis hawara txakabuwamisrã, hawẽ yura txakabũ atxitã dispiwẽ neakĩ akawamamisbuki.

²³ Hanua nemati hãtxa tapiãma danãmisbuwẽ taea mawa kayabimisbuki, patapa nĩkaismahaira benuirã.