Apocalipse 14 - Kaxinawá Bíblia (BR)

Nai anushũ nawati benawẽ kẽwaĩ nawanibukiaki, na hãtxarã

¹ Hanushũ ana uĩkĩ Deusũ txashuwã bake Sião mati anu ha yurabu 144.000 habe mapuabu hatibu hawẽ kena inũ hawẽ Epa Deusũ kena ha dabetũ kena hatũ betũkuki kene nea habe mapuabu ẽ uĩshu matu yuinũ nĩkakãwẽ.

² Nai anua hui betsa kaĩaĩ hene diri ikai hui keska inũ, kana tĩ ikainaitũ bana hui keska inũ, yura itxapabũ habũ harpa mimawati mawaibu hui keskawẽ ha mapushũ

³ nawati bena nawaibu ẽ nĩkashuki. Deus shanẽ ibu haki tsauti besuuri inũ ha hiweabu dabe inũ dabebũ besuuri inũ, ha 24 mekenikabũ besuuri hawẽ nawati benawẽ ha 144.000 habu ha yurabu anua katukĩ Deusũ hawenabu hatu wani nawaibu uĩkĩ ẽ nĩkashurã, habũ besti ha nawati bena unãkanikiki, tsua betsã ha tapĩtirubumarã.

⁴ Ha nawakĩ Deus inũ hawẽ bake txashuwã besti duawakĩ kẽwãkubainũbũ Deusũ habu ha dukũ inãkuĩ keska wakĩ habu dukũ katuniki. Haska Deus inãkuĩmisbu keska wakĩ habũ hatũ yura Deus inũ hawẽ bake inãbu hatu mekenibu habũ aĩbu betsabu txutabaunabuma pepa besti Deusũ txashuwã bake hanira kai anu habu hatxũ bushãkanikiki.

⁵ Haburã, habu anua tsuã txani betxitirubuma inũ hawa txakabu hatukiri yuitirubumaki.

Nai tsumabu inũ nukũ Hutxi Kayabi Iuwatũ yurabu kupishãkanikiaki, na hãtxarã

⁶ Hanua ana betsa tashniai ẽ uĩayã nai tsuma betsa nai natukanu nayakaũkĩ Deusũ hãtxa kakape bunikatũ mai anu hiwebaunabu nawã mai pakea tibi anu inũ, yurabu shukuabu tibi anu inũ, hãtxa tibiyabu anu inũ, mae tibi anu hiwebaunabu hãtxa ikibi ika hatu yuinũ ika

⁷ hui kuxipawẽ yuikĩ: “Deusũ nai inũ mai inũ iãnẽwã inũ ũpash txatxa tibi damiwanitũ yura dasibi unãti watã na habiatiã hatu kupikĩ taewaikiki. Haskakẽ menã haki dãti itã Deuski datekĩ kẽwãrikãwẽ”, ikainaya

⁸ hanua ha nai tsuma betsa ha katxukeatũ txibãbaĩkĩ hui kuxipawẽri yuikĩ: “Babilônia maewã kẽ ewa ma yamaikiki. Babilônia anuabũ txakabuhairawakĩ txutawẽ kemukubaĩkĩ nawa betsa betsapabu dasibi habiaskari txakabu atimapa hatu wamakubainaibuwẽ taeshũ habũ mae ewapa Babilônia Deusũ kupikĩ ma yamawaki”, ikainaya

⁹ hanua nai tsuma betsã txibãriabaĩkĩ hui kuxipawẽri yuikĩ: “Tsuabũra yuinaka mese atimapa inũ hawẽ dami kẽwãnũ ika habu heẽ iyamama hatũ betũkuki inũ hatũ mekẽki hawẽ unãti mã hatu netãmamisburã,

¹⁰ Deus ma hawẽ sinata pae hatuki tanani hawẽ hatu kupihairakĩ enxofre paxinipawẽ hatu nuitapawakĩ tsekerẽ imakĩ txiwẽ menukĩ hatu kupihairashanikiki, Deusũ nai tsumabu inũ txashuwã bake bebũshunã.

¹¹ Ha inũ, tsuabũra yuinaka mese atimapa kẽwãkĩ hawẽ dami kẽwãriaibu hawenabu wakĩ hawẽ hatu unãti wai hatu nemama hatũ kena hatu netãmamisbu bariri inũ mexu merã heneama ha kuĩwẽ txi nukaismawẽ dunua nuyai bari tibi hawa huĩrukuãma isĩ tenetxakayamakubaĩshãkanikiki”, ikainaya

¹² hanushũ habũ txanima Jesus ikũwãkĩ habũ hawa xinã betsawama Deusũ hãtxawẽ hiwekĩ hatũ kuxipa hatu uĩmashãkanikiki, ikũwaĩ meribibunã.

¹³ Hanushũ nai anushũ hui betsa tashnikĩ ea yunukĩ: “Na hãtxa keneriwe. Na habia unuri pakea nukũ Shanẽ Ibuki dasitã mawakubaĩshanaiburã, Deusũ hatu benimahairawashanikiki”, ikaya hanushũ Yushĩ Pepatũri ea yuikĩ: “Habiaskaki. Haburã, hatũ daya henetã huĩrukũ bestishãkanikiki. Ha inũ, hamapai xarabu Jesus Cristo ashũkubaĩmisbuwẽ Deusũ hatu manaku bestishanikiki”, ea wai nĩkakĩ haskashanaibu ẽ uĩshuki.

¹⁴ Hanu ana betsa kaĩaĩ uĩkĩ nukũ Hutxi Kayabi Iuwa nai hushupa kuburuki tsauwa shanẽ ibũ ouro maiti maia inũ hawẽ mekẽwẽ beki matxatu txaipa ewapa kenuhaira tsuma ẽ uĩshuki.

¹⁵ Templo nai anua nai tsuma betsa kaĩkirãkĩ ha nai kuburuki tsauwa yunukĩ hui kuxipawẽri yuikĩ: “Yurabu mai anu hiweabu yunu banaimabu keskarã, ma hanu kania tsekati keskaki. Hanũ mĩ beki matxatu txaipa mĩ tsumawẽ shekiwã meshtea keska wakĩ itxawashũ aruriwe”, aka

¹⁶ hanushũ ha nai kuburuki tsauwatũ hawẽ beki matxatu txaipa bekũkĩ Deusunabu mai anuabu meshtea keska wakĩ hatu itxawashuki, mekekinã.

¹⁷ Hanua nai tsuma betsa Templo nai anua beki matxatu txaipa kenuhaira tsuma kaĩriakiranaya

¹⁸ hanua nai tsuma betsã txi dasibi yununika Deus kẽwãkĩ tapu hanu hawẽ inãkuĩti hanamisbu anua kaĩkirãkĩ nai tsumã beki matxatu txaipa tsuma hui kuxipawẽ yunukĩ: “Yurabu txakabu uva bimi ma huxiã keskaki. Kania tibi meshteshũ itxawariwe”, akaya

¹⁹ hanua Deusũ nai tsumã hawẽ beki matxatu txaipa tsumashũ yurabu uva bimi kania keska tibi meshteshũ hawẽ bimi hene biti tsiniti anu mãtxĩshuki, hau habuki sinatakĩ tsinikĩ akawakĩ hatũ txakabuwẽ kupinunã.

²⁰ Hanushũ mae benãta uva bimiki paikĩ hawẽ hene bimisbu keska wakĩ Deusũ habũ himi habamakĩ bai mata keska wakĩ cavalo hawẽ kui anu kesũbaĩkĩ 300 quilômetro habamabaĩshanai ẽ uĩshuki.