Provérbios 6 - Kaxinawá Bíblia (BR)

Huni betsã pei biãyukatsis ikai betsã merabewatimakiaki, na hãtxarã

¹ Epaã, nawa anua mĩ haibũ hawẽ pei biãyukatsis ikaya merabewakĩ nawa mĩ yuishuna pei inaĩmashũ txipu nawã hawẽ pei mia yukatiruki, mĩ haibũ pakamawẽ taeshunã.

² Miã yunukĩ mĩ hãtxawẽ yubakĩ ibubis mĩ kaneimawẽ taeshũ mia ma atxiaki.

³ Epaã, haskatũ ma mia atxia kaĩkatsirã, ibubis nawa pakakatsi ikama mĩ haibu eska wawe. Harakirira mĩ haibũ mia hãtxa txakabuwatiru dateama hawaira mĩ haibũ hau pakanũ ha bebũ ka dãti ishũ yukakĩ ea a txakayamawe.

⁴ Ushariama inũ hawa huĩrukuãmahaira

⁵ txashu piayabuki datei pashamis inũ peiyabu birũki datei pashai nuyakaĩmis keska kaĩ mĩ hawaira pewatiruki.

Txikishbu haska yusiãwẽ yusĩtikiaki, na hãtxarã

⁶ Txikishbuũ, ea nĩkakãwẽ. Unanẽ hawẽ piti arumis bushũ uĩtãkãwẽ. Haska wamisbu uĩkĩ shinãkĩ habũ dayakiri tapĩkãwẽ.

⁷ Ha unã shanẽ ibuuma inũ hatũ yununika hayamabia ibubis shinaĩ dayatxayamisbuki.

⁸ Bariã hatũ piti bitã bitãkĩ hatũ kini anu arukĩ mata wamisbuki, yurabũ hatũ yunu tsekashũ arumisbutianã.

⁹ Txikishbuũ, haskaira ana ushayamakãwẽ. Mã usharã, hatiã bestẽtã mã beniai?

¹⁰ Usha paẽ matu atxia tinĩtãtani shuikukui petã besti mã ushakatsis ikai?

¹¹ Txikishi mã hawa dayamawẽ taea hawa hayama mã nuitapakũkaĩshanaii, huni daya hayabumã matũ mabu matu biãbaina keskairã.

Huni txakabubũ hatũ akarã, eskakiaki, na hãtxarã

¹² Huni txakabubũ hatu txakabuwamis pe shinãma txanitxakakĩ txani besti hatu yuibaũmisbuki.

¹³ Hatũ shinã txakabu hatu unãmakĩ hau txakabuwanũbũ beruwẽ hatu yuikĩ hatu shetxiku akĩ inũ hatũ taewẽ hatu timakĩ inũ hatũ metutiwẽ hatu metukĩ hatu unãmamisbuki.

¹⁴ Hatũ shinã txakabuwẽ taea shinã txakabuwakĩ haska shinãkubaĩmisbuki, hau detenamenũbũ hawara huni betsã hakiri txakabu yuishu hatuki txanikĩ hatu sinatamairã.

¹⁵ Haskamisbuwẽ taeshũ habu kupikinã, txakabuhairawẽ hatu bika tenemakĩ hawaira betsupe ika keska wakĩ hatu txakabuwakĩ yamawakĩ keyushanikiki, hawawẽ ana kayatima hatu wakinã.

Eska tibi Senhor Deusũ danãtxakayamamiskiaki, na hãtxarã

¹⁶ Txakabu betsa betsapa akĩ 6 kasmai 7ki amisburã, Senhor Deusũ hatu uĩ betxipaiama danãtxakayamai hatuki sinatahairamiski. Haskakiri matu yuinũ ea nĩkakãwẽ.

¹⁷ Ibubis kẽmisbu inũ, txanitxaka bestimisbu inũ, hawa txakabuwamabiakẽ hatũ mekẽwẽ hatu tenãmisbu inũ,

¹⁸ hawẽ hatu txakabuwanũ ika huni betsaki yubakamisbu inũ, hamapai txakabuwaibu hatu merabewanũ ika kushibaĩmisbu inũ,

¹⁹ huni betsã txakabuwashu hatũ hawa uiãmabia txanitxakai shanẽ ibuki txanimisbu inũ, betsabu hau sinatanamenũbũ hatu txaniwẽ parãmisbu habu dasibirã, hatuki sinatakĩ Senhor Deusũ hatu kupishanikiki.

Aĩbu mĩ aĩma txutakatsi shinãtimakiaki, na hãtxarã

²⁰ Epaã, mĩ ẽ bakewẽ taeshũ mĩ ibu huni inũ mĩ ibu aĩbũ yunuti inũ nemati hãtxa txibãkĩ nukũ yusiã danãyamakubaĩshãwẽ, shinãkubaini hawa hakimamarã.

²¹ Teuti teua keska wakĩ mĩ huĩti anu netãtã hakimayamakũkaĩshãwẽ.

²² Hatunã, hanira mĩ kai mia mekeshũ iyukĩ hanu mĩ ushai anu mia mekea inũ, usha mĩ besteãyã ana mibe hãtxai keskakĩ mia shinãmakubaĩtiruki.

²³ Txanima ha yunuti hãtxa inũ ha yusĩti hãtxarã, mĩ kai anu bĩ ewapa dekua txasha keskaki. Mĩ kaneai nemakĩ mia pewaibu inũ hawẽ shinãmati hãtxa mia yusiaĩbu txibaĩ hiwea kayabi mĩ hayashanaii.

²⁴ Haska inũ, aĩbu betsa txakabu huni tibibe txutanamemisbũ hãtxa hawẽruawẽ mia parãtirububia nukũ yusiã hãtxa shinãtã mĩ hawẽ nematiruki.

²⁵ Ha aĩbu hawẽruatũ mia uĩkĩ mia kemumabiaya hawẽ yurawẽ kemukĩ shinãyamakubaĩshãwẽ.

²⁶ Ha inũ, aĩbu hininipa beneumatunã, txutanamekĩ hawẽ piti besti benai yukamisbuki. Hakia aĩbu beneyatũ hawẽ bene parãtã huni betsa txutamatanã, mĩ hawara mia keyu biãtiruki.

²⁷ Huni betsã txi dekẽ ikuarã, hawaira hawẽ tari menumiski.

²⁸ Ha inũ, huni betsa txi dekẽki paia hawaira hawẽ tae menuriamiski.

²⁹ Habiaskariai huni betsã aĩ beneyabiakẽ habe txutanamemisrã, txanima hawẽ kupiti bishanikiki, txi dekẽ ikua keskairã.

³⁰ Huni betsa bunihairakĩ pinũ, iwanã, piti yumetsutã pikẽ hawa haki sinatatimaki.

³¹ Hakia hune yumetsuaya betxitã atxiabu ha hunĩ hawara hatuna yumetsushurã, hau 7ki hawẽ mabu hau ana ibu inã keyunũwẽ, dasibi hawẽ hiwe anu mabu hawara haya inã keyukinã.

³² Hamẽ unaĩsmapatunã, aĩbu beneya tsuãra txutairã, ibubis hawẽ hiwea txakabuhairawaikiki!

^33-35 Hawẽ benẽ yaushikĩ unãtã haki sinatairã, txi keskaki. Ma txakabuwakenã, hãtxawẽ inũ inãkuĩti itxapawẽ tsuã nemakĩ daewatirumaki. Hawẽ txakabu bene hakimakatsi ikama dete dete akĩ dake watã nitxĩshanikiki.