João 8 - Kaxinawá Bíblia (BR)

Hawẽ taeshũ unãti wanũ, iwanã, aĩbu txutanamei atxitã Jesus anu iyunibukiaki, na hãtxarã

^1-2 Oliveiras Mati anu ka hari ushaxini penaya Templo hemaĩtĩ anu Jesus ana ka tsaukẽ haki itxabirãbiranaibu yurabu hatu yusĩkĩ taewatanaya

³ aĩbu betsa beneyabia huni hawẽ benemabe txutanameai txitetã atxishũ Deusũ hãtxa kenenibu yusĩnanãmisbu inũ fariseubũ iweshũ mapubaunabu namakis aĩbu naxui akĩ Jesusũ besuuri nitxĩtã

⁴ Jesus yuikĩ: —Yusĩnaã, na aĩbunã, txakabukĩ huni betsa txutamaya atxiabu mianu nũ iweshuki.

⁵ Aĩbu haskashukenã: “Mixki turewẽ tsaka tsaka akĩ hau tenãnũbũwẽ”, akĩ Moisés nukũ shenipabu yununiki. Haska wanikenã, mianã, haskara hakiri mĩ yunuai?— iwanã,

⁶ ha akatsi unãti wakĩ yukabu hakia hatũ beparameti hãtxa unaĩ hãtxama tinishũ Jesusũ metutiwẽ mai kenekĩ taewaya

⁷ haki sinatakĩ ana habias yukarãwãbu bewenikitã hatu yuikĩ: —Tsuara Deuskiri txakabu mã hayamatũ ha dukũtũ mixki turewẽ tsakakĩ taewarikãwẽ— hatu watã

⁸ ana tinishũ ana mekenẽ mai keneaya

⁹ Jesusũ hãtxa nĩkatã habũ iwea bestibu bui anibubu bui taei txipu hatiri bukĩ itxabu namakis aĩbu nitxiãbu besti henebainabu

¹⁰ ana beweninatã Jesusũ aĩbu yukakĩ: —Aĩbuũ, habũ mia tenãnũ, iwanã, iweaburã, hania? Tsuã mia tsakama ishumẽ, kupikinã?— aka

¹¹ —Shanẽ ibuũ, tsuã ea haska wamabĩ!— aka —Peki. Hau mia kupinũbũ, iwanã, eãri ẽ yunuamaki. Hakia ana txĩtũkaina txakabukũkainama ishũ inũ kariwe— aka aĩbu kaya

Jesus dasibitũ bĩ txashahaira keskakiri hatu yusĩnikiaki, na hãtxarã

¹² Templo hemaĩtĩ anushũ Jesusũ yurabu uĩkĩ mapuabu hatu yuikĩ: —Earã, mai hirabi ẽ bĩ txashahaira keskaki, hatu tapĩmanikarã. Tsuabũra ea nĩkatã txibaĩburã, ha bĩki nukui hiwea bena hayakanikiki. Haskawẽ taea hawa mexu merã ana biũma niama keska ishãkanikiki— hatu waya

¹³ hanua fariseubũ haskai nĩkai haki sinatakĩ yuikĩ: —Mimebi keĩ mĩ pepairã, hawa kuxipa mĩ hayamaki— akaibu

¹⁴ —Emebi ẽ dayuikibiakĩ hanua ẽ huni inũ hanu ẽ kashanai ẽ unaĩwẽ taea ẽ dayuikiairã, harã, kuxipaki. Hakia hanua ẽ huni inũ hanu ẽ kashanai mã unãbumawẽ taeshũ mã kaneaii.

¹⁵ Yurabũ xinãmiswẽ mã ea unãti waii. Hakia eãnã, haskawẽ ẽ matu unãti wamaki.

¹⁶ Hakia haska ẽ Epã ea yununibetã xinãkĩ txanima ẽ mesti ẽ akamaki, hawa kaneama eã unãti wakinã.

¹⁷ Hanushũ Deusũ Moisés yuia matu keneshunirã, ha uĩkĩ hawara hakiri huni dabe habias hãtxa txaniaibu hawẽ hãtxa mã ikũwãtiruki, ikũkenã.

¹⁸ Haskakẽ emebi ekiri ẽ pe yuiaii. Ẽ haskaya ẽ Epa hatũ ea yununiri habiaskari ekiri pe yuikiki. Ha nuku dabetã habiaskas txanikĩ nũ yuitiruki, hau mã nuku ikũwanũbunã— hatu wa

¹⁹ —Mĩ Epa mikiri txaniai nũ nĩkanũ, hani mĩ Eparã?— akabu Jesusũ hatu kemakĩ: —Matunã, mã ea unãmaki. Ẽ Epa mã unãmariki. Ea unãkĩ ẽ Epari mã unãkeanaii— akĩ

²⁰ Templo hemaĩtĩ anushũ na haska yusĩkinã, bau haki nuitapaibu inãkuĩkĩ pei mistumisbu dapishũ Jesusũ yusĩayã hanu mawashanai kemariamawẽ taeshũ tsuã mekĩ atxiyuama inibuki.

Hanira ẽ kai anurã, mã katirumaki, akĩ Jesusũ hatu unãtimaska wanikiaki, na hãtxarã

²¹ Habianushũri Jesusũ mapuabu hatu ana yuikĩ: —Ea ẽ hanira kakenã, ea benai matũ txakabuwẽ taea mã mawashanaii. Hanu ẽ kashanai anu mã katirumaki— hatu wa

²² nĩkai judeu shanẽ ibubu yuinamei: —Ha haska yuiairã, hamebi tenãmepai ikimẽkaĩ: “Ha ẽ hanu kashanai anu mã katirumaki”, ikairã— ikaibũ

²³ Jesusũ ana hatu yuikĩ: —Maturã, mã nenuabu bestiki. Hakia earã, ẽ manaũriaki. Haskawẽ taea mai anua besti mã baki. Hakia earã, na mai anua ẽ bamaki.

²⁴ Haskakẽ matu yuikĩ: “Matũ txakabu hakimama mã mawashanaii”, akĩ ẽ matu yuishuki. Nĩkakãwẽ. Txanima ẽ hiwei ikibi ini mã ea ikũwãkatsi ikama matũ txakabuwẽ besti mã mawashanaii— hatu wa

²⁵ e itã betsabũ yukakĩ: —Miarã, mĩ tsua iki ikai? —akeakeabu —Haskai hamẽraka ẽ matu hãtxa txakawai ikai? Habia ẽ matu yuikĩ taewashuki.

²⁶ Ẽ matukiri itxapa unãti wakĩ ẽ yuitirubia hatũ ea yununitũ txanima hãtxa ea yuia nĩkatã habiaskari yurabu ẽ yuikubainaii— hatu wa

²⁷ hawẽ Epa Deuskiri Jesusũ yuiai hawẽ hãtxa nĩkabiai hawa tapiãbumakẽ

²⁸ haskawẽ taeshũ Jesusũ ana hatu yuikĩ: —Matunã, matũ Hutxi Kayabi Iuwa ea binikĩ benimashũ hanu mã ea unãshanaii. Natianã, haska ẽ xinaĩwẽ ẽ akamaki. Hakia haska ẽ Epã ea yusĩni besti ẽ yuimiski.

²⁹ Ha inũ, ea yununi eskatiã ebekẽ hamapai betsa betsapa wakĩ abumakĩ ẽ benimawamiswẽ taeshũ ẽ Epã ea besti henebainamaki—

³⁰ hatu wai shanẽ ibu itxapabũ ikũwãkĩ taewaibũ

Deusũ bakebu inũ diabo Satanásã tsumabukiri yusĩnikiaki, na hãtxarã

^31-32 hanushũ ha shanẽ ibubũ ikũwãkĩ taewaibu Jesusũ hatu unãti wanũ ishũ hatu yuikĩ: —Tsuabũra ẽ hãtxa nĩkatã txanima uke merã mestẽwãtã mã txĩtuãmarã, mã ẽ tsuma kayabi itirubuki. Haskawẽ taeshũ txanima hãtxa unãkĩ mã tapiãyã txakabũ matu ana tsuma wama ishanikiki— hatu wa

³³ habũ kemakĩ yuikĩ: —Nukurã, nũ Abraãonẽ enabuki. Nukũ yura tsuma wabiashũ nukũ xinã tsuã nuku biãtirumaki. Haskakẽ haskakĩ: “Matu ana tsuã tsuma wama ishanikiki”, ikĩ mĩ nuku yuiai?— akabu

^34-36 Jesusũ ana hatu yuikĩ: —Txanima ẽ matu yuiaii. Deusũ hãtxa kanekĩ dasibibũ txakabu xinaĩbu hatũ txakabũ hatu yabumiski, hawẽ dayaru keska wakinã. Haska inũ, huni betsã huni betsa bikĩ hawẽ dayaru waimakenã, ana hawenabube hiwetiruma xinãkĩ nitxĩmisbuki. Hakia huni betsã bakerã, hawẽ bake kayabi hani nitxiãma habe ikũkaĩmiski. Haskakẽ eãnã, haska keska wakĩ Deusũ huni bake kayabitũ matũ hawara txakabu mã devea keska hakimawakĩ ẽ matu mekeaya txakabũ matu ana yabutirumaki.

^37-38 Hakia ẽ hãtxa nĩkama mã Abraãonẽ enabubia eki sinatakĩ mã hatiritũ ea detekatsis ikaii. Ea hãtxairã, ẽ Epã hawara akai uĩtã ẽ matu yuimiski. Hakia matunã, matũ ibuã akai uĩkĩ nĩkatã mã mawamiski— hatu wa

³⁹ —Hamaki. Deusũ katuni Abraãonẽ enaburã, nũ nukuki— ikaibũ Jesusũ ana hatu yuikĩ: —Matu txanima mã Abraãonẽ enaburã, haska Abraãonẽ ani mã ariakeanaii.

⁴⁰ Hakia Deus anua nĩkatã txanima hãtxa ẽ matu yuibia danãkĩ mã ea detepai ikaii. Deusũ hãtxa txanima Abraãonẽ nĩkatã mã ikai keska ikama iniki, danainã.

⁴¹ Haskakẽ matunã, matũ ibuã amis keska xinaĩ mã ikaii— hatu wa haki sinatakĩ yuikĩ: —Nukurã, nũ husi bakemaki. Nukũ ibu kayabi bestitxairã, nũ hayaki, Deusrã— akabu

⁴² —Deus anua ẽ huniwẽ taeshũ Deus matũ ibu kayabikenã, haska xinãkĩ mã ea aburiakeanaii. Earã, ẽ xinãnẽ aki ẽ huamaki. Hakia hawẽ xinãnẽ Deusũ ea yununi aki matube hiwei ẽ huniki.

⁴³ Haskakĩ mã ea nĩkakĩ pewakatsi ikabumamẽ? Matu yuinũ nĩkakãwẽ. Ẽ hãtxarã, pata keskatũ ẽ hãtxa mã tapĩ pewabumaki.

⁴⁴ Mã haskawẽ taearã, matũ iburã, diabo Satanáski. Haska xinaĩ keska ashũkĩ mã abumamiski. Haska inũ, bai taeni anua diabo Satanás pubẽ detenã kaĩ taeni ikũkaĩmiski. Ha inũ, txanima hãtxa hayamawẽ taea txani txakakũkaĩriamiski. Ha inũ, txani txakanikawẽ taea txanĩ epaki.

⁴⁵ Hakia txanima hãtxa ẽ matu yuibia mã ikũwãkatsi ikabumaki.

⁴⁶ Haratutũ berubi ẽ hawa txakabu akai mã ea uĩxĩshũ ea txitetirumẽ? Eãnã, ẽ txanima hãtxa yuibiaya haskakĩ mã ea ikũwãma txitekubaĩkanai?

⁴⁷ Haska inũ, Deusunabũ Deusũ hãtxa nĩkamisbuki. Hakia mã Deusunabumawẽ taeshũ mã nĩkakatsi ikabumaki— hatu waya

Abraão hayariama Cristo dukũ hiwea ipaunikiaki, na hãtxarã

⁴⁸ hanushũ judeu shanẽ ibubũ Jesus yuikĩ: —Eska nũ mia yuiaii. Mĩ yushĩ txakabu haya dikabia mĩ Samarianawaki, unaĩsmaparã— akabu

⁴⁹ Jesusũ hatu kemakĩ yuikĩ: —Ẽ hawa yushĩ txakabu hayamaki. Ẽ Epa ẽ kẽwãbiaya mã ea danaiĩ.

⁵⁰ Emebi ẽ keãmaki. Haska inũ, “Ea kẽwãkãwẽ”, iwanã, ẽ matu yuiamaki. Hakia hatũ matu unãti washanaitũ matu ea kẽwãmakatsis ikikiki.

⁵¹ Haskakẽ habũ ẽ hãtxa nĩkakĩ heneama mawabia mawa kayabiama ishãkanikiki— hatu wa

^52-53 hanua habu Jesuski sinatakĩ yuikĩ: —Txanima mĩ yushĩ txakabu hayaki. Nukũ shenipabu pepa Abraão inũ Deus hãtxashunika dasibiburi mawakubainibuki. Hakia: “Tsuãra ẽ hãtxa nĩkai mawama ishãkanikiki”, ikĩ mĩ yuiairã, shanẽ ibukĩ mĩ hatu binũkĩ keyua iki ikai? Miarã mĩ tsua iki ikai, haska xinaĩ ibubis keĩnã?— akabu

^54-55 —Emebi ẽ keaĩnã, pemaki. Hakia ẽ Epã ea kẽwãmiski. Unãmabia: “Nukũ Deuski”, ikĩ ẽ Epakiri mã yuimiski. “Eari ẽ Deus unãmaki”, iki ẽ txani txakakeanaii, matu keskairã. Hakia ẽ Epa Deus unãkĩ hawẽ yunua ẽ txibãmiski.

⁵⁶ Yurabube hiwei ẽ huai uĩkatsi manakai ikũwaĩ matũ shenipabu Abraão benimaniki. Atimas ea uĩtã xinã txãkaĩ benimahairaniki— hatu wa

⁵⁷ nĩkai e itã yuikĩ: —Mĩ anibui 50 bari kariamabia, haskatã nukũ shenipabu Abraão mĩ uĩnimẽ?— akabu

⁵⁸ —Txanima ẽ matu yuiaii. Abraão hayariama ea dukũ ẽ ikibi ini ẽ ikũkainaii— hatu waiwẽ taeshũ

⁵⁹ detekatsi ikĩ mixki ture biake biaketã tsakapanãbũ mapubaunabu anu hunei naxui itã Templo anua kaĩkaini