Yona 2 - Buku Lopatulika

Pemphero la Yona ali m'mimba mwa chinsomba

¹ Pamenepo Yona anapemphera kwa Yehova Mulungu wake ali m'mimba mwa nsombayo.

² Ndipo anati, Ndinaitana Yehova m'nsautso wanga, ndipo anandiyankha ine; ndinafuula ndili m'mimba ya manda, ndipo munamva mau anga.

³ Pakuti munandiponya mwakuya m'kati mwa nyanja, ndipo madzi anandizinga; mafunde anu onse a nyondonyondo anandimiza.

⁴ Ndipo ndinati, Ndatayika ndichoke pamaso panu; koma ndidzapenyanso Kachisi wanu wopatulika.

⁵ Madzi anandizinga mpaka moyo wanga, madzi akuya anandizungulira, kayandeyande wa m'nyanja anandikulunga mutu.

⁶ Ndinatsikira kumatsinde a mapiri, mipingiridzo ya dziko inanditsekereza kosatha; koma munandikwezera moyo wanga kuuchotsa kuchionongeko, Yehova Mulungu wanga.

⁷ Pokomoka moyo wanga m'kati mwanga ndinakumbukira Yehova; ndi pemphero langa linafikira Inu mu Kachisi wanu wopatulika.

⁸ Iwo osamalira mabodza opanda pake ataya chifundo chaochao.

⁹ Koma ine ndidzakupherani Inu nsembe ndi mau akuyamika, ndidzakwaniritsa chowinda changa. Chipulumutso ncha Yehova.

¹⁰ Pamenepo Yehova analankhula ndi nsombayo, ndipo inamsanzira Yona kumtunda.