Masalimo 85 - Buku Lopatulika

Akumbutsa Mulungu madalitso akale, apempha awabwereze

Kwa Mkulu wa Nyimbo: Salimo la ana a Kora.

¹ Munachita zovomereza dziko lanu, Yehova; munabweza ukapolo wa Yakobo.

² Munachotsa mphulupulu ya anthu anu, munafotsera zolakwa zao zonse.

³ Munabweza kuzaza kwanu konse; munabwerera kumkwiyo wanu wotentha.

⁴ Mutibweze, Mulungu wa chipulumutso chathu, nimuletse udani wanu wa pa ife.

⁵ Kodi mudzatikwiyira nthawi zonse? Kodi mudzakhala chikwiyire mibadwomibadwo?

⁶ Kodi simudzatipatsanso moyo, kuti anthu anu akondwerere ndi Inu?

⁷ Tionetseni chifundo chanu, Yehova, tipatseni chipulumutso chanu.

⁸ Ndidzamva cholankhula Mulungu Yehova; pakuti adzalankhula zamtendere ndi anthu ake, ndi okondedwa ake; koma asabwererenso kuchita zopusa.

⁹ Indedi chipulumutso chake chili pafupi ndi iwo akumuopa Iye; kuti m'dziko mwathu mukhale ulemu.

¹⁰ Chifundo ndi choonadi zakomanizana; chilungamo ndi mtendere zapsompsonana.

¹¹ Choonadi chiphukira m'dziko; ndi chilungamo chasuzumira chili m'mwamba.

¹² Inde Yehova adzapereka zokoma; ndipo dziko lathu lidzapereka zipatso zake.

¹³ Chilungamo chidzamtsogolera; ndipo chidzamkonzera mapazi ake njira.