Masalimo 65 - Buku Lopatulika

Davide alemekeza Mulungu pa madalitso ochuluka

Kwa Mkulu wa Nyimbo: Salimo la Davide. Nyimbo.

¹ Mu Ziyoni akulemekezani Inu mwachete, Mulungu, adzakuchitirani Inu chowindachi.

² Wakumva pemphero Inu, zamoyo zonse zidzadza kwa Inu.

³ Mphulupulu zinandipambana; koma mudzafafaniza zolakwa zathu.

⁴ Wodala munthuyo mumsankha, ndi kumyandikizitsa, akhale m'mabwalo anu. Tidzakhuta nazo zokoma za m'nyumba yanu, za m'malo oyera a Kachisi wanu.

⁵ Mudzatiyankha nazo zoopsa m'chilungamo, Mulungu wa chipulumutso chathu; ndinu chikhulupiriko cha malekezero onse a dziko lapansi, ndi cha iwo okhala kutali kunyanja.

⁶ Ndinu amene mukhazikitsa mapiri ndi mphamvu yanu; pozingidwa nacho chilimbiko.

⁷ Amene atontholetsa kukuntha kwa nyanja, kukuntha kwa mafunde ake, ndi phokoso la mitundu ya anthu.

⁸ Ndipo iwo akukhala kumalekezero adzachita mantha chifukwa cha zizindikiro zanu; mukondweretsa apo patulukira dzuwa, ndi apo lilowera.

⁹ Mucheza nalo dziko lapansi, mulithirira, mulilemeretsa kwambiri; mtsinje wa Mulungu udzala nao madzi, muwameretsera tirigu m'mene munakonzera nthaka.

¹⁰ Mukhutitsa nthaka yake yolima; mufafaniza nthumbira zake; muiolowetsa ndi mvumbi; mudalitsa mmera wake.

¹¹ Muveka chakachi ndi ukoma wanu; ndipo mabande anu akukha zakucha.

¹² Akukha pa mabusa a m'chipululu; ndipo mapiri azingika nacho chimwemwe.

¹³ Podyetsa mpodzaza ndi zoweta; ndipo zigwa zakutidwa ndi tirigu; zifuula mokondwera, inde ziimbira.