Masalimo 47 - Buku Lopatulika

Mau a kulemekeza Mulungu mwini dziko lonse lapansi

Kwa Mkulu wa Nyimbo. Salimo la ana a Kora.

¹ Ombani m'manja, mitundu yonse ya anthu; fuulirani kwa Mulungu ndi liu la kuimbitsa.

² Pakuti Yehova Wam'mwambamwamba ndiye woopsa; ndiye mfumu yaikulu padziko lonse lapansi.

³ Atigonjetsera anthu, naika amitundu pansi pa mapazi athu.

⁴ Atisankhira cholowa chathu, chokometsetsa cha Yakobo amene anamkonda.

⁵ Mulungu wakwera ndi mfuu, Yehova ndi liu la lipenga.

⁶ Imbirani Mulungu, imbirani; imbirani mfumu yathu, imbirani.

⁷ Pakuti Mulungu ndiye mfumu ya dziko lonse lapansi; imbirani ndi chilangizo.

⁸ Mulungu ndiye mfumu ya amitundu, Mulungu akhala pa mpando wachifumu wake woyera.

⁹ Akulu a anthu asonkhana akhale anthu a Mulungu wa Abrahamu, pakuti zikopa za dziko lapansi nza Mulungu; akwezeka kwakukulu Iyeyo.