ဗိမာန်တော်အတွင်းပိုင်း1 ထို့နောက် ငါ့ကို ဗိမာန်တော်သို့ ခေါ်ဆောင်သွား၍ ကိန်းဝပ်တော်မူရာဌာနအဝင်ဝ တစ်ဖက်တစ်ချက်ရှိ တံခါးတိုင်များကိုတိုင်းရာ ထုခြောက်တောင်ရှိ၏။ 2 တံခါးပေါက်မှာ အတောင်တစ်ဆယ်ကျယ်၏။ တစ်ဖက်တစ်ချက်ရှိတံခါးတိုင်၏ထုမှာ ငါးတောင်စီရှိ၏။ ဗိမာန်တော်အပြင်ခန်းကိုတိုင်းရာ အလျားအတောင်လေးဆယ်၊ အနံအတောင်နှစ်ဆယ်ရှိ၏။ 3 ထို့နောက် အတွင်းခန်းသို့ဝင်၍ တံခါးအဝင်ဝတိုင်ကိုတိုင်းရာ ထုနှစ်တောင်ရှိ၏။ တံခါးပေါက်အကျယ်မှာ ခြောက်တောင်ရှိ၏။ အဝင်ဝတစ်ဖက်တစ်ချက်ရှိ နံရံအကျယ်မှာ ခုနစ်တောင်စီရှိ၏။ 4 ဗိမာန်တော်အတွင်းခန်းကိုတိုင်းရာ အလျားအတောင်နှစ်ဆယ်၊ အနံအတောင်နှစ်ဆယ်ရှိ၏။ “ဤအခန်းသည် အသန့်ရှင်းဆုံးဌာနဖြစ်သည်”ဟု ငါ့အား ပြောပြ၏။ ဗိမာန်တော်အပြင်ပိုင်း5 ထို့နောက် အိမ်တော်နံရံကိုတိုင်းရာထုမှာ ခြောက်တောင်ရှိ၏။ အိမ်တော်နှင့်ကပ်လျက် အိမ်တော်ပတ်ပတ်လည်ရှိ အခန်းငယ်များမှာ တစ်ခန်းလျှင်လေးတောင်စီ အကျယ်ရှိ၏။ 6 ထိုအခန်းငယ်တို့သည် အထပ်သုံးထပ်ရှိ၍ တစ်ထပ်လျှင် အခန်းပေါင်းသုံးဆယ်စီရှိ၏။ အိမ်တော်နံရံပတ်ပတ်လည်တွင် ထိုအခန်းငယ်များကို ထောက်ပင့်ထားသောတိုင်များရှိ၏။ ထိုထောက်ပင့်ထားသောတိုင်တို့သည် အိမ်တော်နံရံနှင့် ကပ်မနေပေ။ 7 အိမ်တော်အတွင်းပတ်ပတ်လည်ရှိ အခန်းများသည် အထက်သို့ရောက်လေလေ ပို၍ကျယ်လေလေဖြစ်၏။ အကြောင်းမူကား အိမ်တော်၏ပုံစံသည် အောက်၌ကျဉ်းပြီး အထက်သို့ကျယ်သွားသောကြောင့် အိမ်တော်ပတ်ပတ်လည်ရှိ အခန်းငယ်တို့သည်လည်း အထက်သို့ရောက်လေလေ ပို၍ကျယ်လေလေဖြစ်၏။ အောက်ထပ်မှ အပေါ်ဆုံးထပ်သို့ တက်သွားသောအခါ အလယ်ထပ်ကို ဖြတ်သွားရ၏။ 8 အိမ်တော်ပတ်ပတ်လည်၌ စင်္ကြံရှိသည်ကို ငါတွေ့ရ၏။ ထိုစင်္ကြံမှာ အခန်းငယ်တို့၏အုတ်မြစ်ဖြစ်၍ အမြင့်မှာ ခြောက်တောင်ရှည်သော ကျူချောင်းတစ်ပြန်စာရှိ၏။ 9 အခန်းငယ်များ၏အပြင်ဘက် အုတ်တံတိုင်းအကျယ်မှာ ငါးတောင်ရှိ၏။ အိမ်တော်အခန်းငယ်အပြင်ဘက်တွင် မြေကွက်လပ်တစ်ခုရှိ၏။ 10 အိမ်တော်ပတ်ပတ်လည်တွင် အဆောင်ခန်းများရှိ၏။ အိမ်တော်နှင့် ထိုအခန်းများ၏အကွာအဝေးမှာ အတောင်နှစ်ဆယ်ရှိ၏။ 11 အိမ်တော်အခန်းငယ်များထဲသို့ဝင်ရန် မြောက်ဘက်မြေကွက်လပ်သို့ မျက်နှာမူသော တံခါးပေါက်တစ်ပေါက်၊ တောင်ဘက်မြေကွက်လပ်သို့ မျက်နှာမူသော တံခါးပေါက်တစ်ပေါက်ရှိ၏။ အခန်းပတ်ပတ်လည်ရှိ စင်္ကြံ၏အကျယ်မှာ ငါးတောင်ရှိ၏။ 12 အနောက်ဘက်တွင် မြေကွက်လပ်ဘက်မျက်နှာမူသော အဆောက်အအုံတစ်ခုရှိ၏။ အနံအတောင်ခုနစ်ဆယ်၊ အလျားအတောင်ကိုးဆယ်ရှိ၏။ အဆောင်ပတ်ပတ်လည်ရှိ နံရံ၏အထူမှာ ငါးတောင်ရှိ၏။ 13 ထို့နောက် အိမ်တော်ကိုတိုင်းရာ အရှည်အတောင်တစ်ရာရှိ၏။ မြေကွက်လပ်၊ အဆောက်အအုံနှင့် အဆောက်အအုံနံရံအပါအဝင် အရှည်အတောင်တစ်ရာရှိ၏။ 14 မြေကွက်လပ်အပါအဝင် အိမ်တော်၏အရှေ့မျက်နှာစာအကျယ်မှာ အတောင်တစ်ရာရှိ၏။ အတွင်းပိုင်းကို သစ်သားဖြင့်အလှဆင်ထားခြင်း15 အိမ်တော်၏အနောက်ဘက် မြေကွက်လပ်ကို မျက်နှာမူထားသော အဆောက်အအုံ၏အလျားနှင့် အိမ်တော်တစ်ဖက်တစ်ချက်ရှိ လျှောက်လမ်းကိုတိုင်းရာ အတောင်တစ်ရာစီရှိ၏။ ဗိမာန်တော်အပြင်ခန်း၊ အတွင်းခန်းနှင့် ဗိမာန်တော်ဆင်ဝင်တို့ကိုလည်း တိုင်း၏။ 16 တံခါးခုံများ၊ ရာဇမတ်ကွက်ပြတင်းပေါက်ငယ်များနှင့် တံခါးခုံရှေ့ရှိ သုံးဘက်သုံးတန်မှလျှောက်လမ်းများကို သစ်သားဖြင့် အလှဆင်ထား၏။ ကြမ်းပြင်မှပြတင်းပေါက်အထိနံရံများ၊ ပြတင်းပေါက်များကိုလည်း သစ်သားဖြင့် အလှဆင်ထား၏။ 17 တံခါးဝ၏အပေါ်ဘက်၊ အိမ်တော်၏အတွင်းခန်း၊ အပြင်ခန်းအပေါ်ဘက်နှင့် အတွင်းခန်း၊ အပြင်ခန်းပတ်ပတ်လည်ရှိနံရံတို့တွင် 18 ခေရုဗိမ်ပုံနှင့် စွန်ပလွံပင်ပုံတို့ကို ထွင်းထုထား၏။ ခေရုဗိမ်ပုံတစ်ပုံနှင့်တစ်ပုံကြားတွင် စွန်ပလွံပင်ပုံတစ်ပုံရှိ၏။ ခေရုဗိမ်တစ်ပါးစီတွင် မျက်နှာနှစ်ဖက်ပါ၏။ 19 ထိုမျက်နှာနှစ်ဖက်မှာ လူမျက်နှာပုံပါသောဘက်သည် တစ်ဖက်ရှိ စွန်ပလွံပင်ပုံဘက်သို့ လှည့်ထား၍ ခြင်္သေ့ပျိုမျက်နှာပုံပါသောဘက်သည် အခြားတစ်ဖက်ရှိ စွန်ပလွံပင်ပုံဘက်သို့ လှည့်ထား၏။ အိမ်တော်တစ်ခုလုံးရှိ နံရံပတ်ပတ်လည်တွင် ထိုသို့ပုံဖော်ထား၏။ 20 ကြမ်းပြင်မှ တံခါးဝအပေါ်ဘက်အထိ ခေရုဗိမ်ပုံနှင့် စွန်ပလွံပင်ပုံများ ထွင်းထုထား၏။ ဗိမာန်တော်အပြင်ခန်းနံရံတွင်လည်း ထိုသို့ထွင်းထုထား၏။ 21 ဗိမာန်တော်အပြင်ခန်းရှိတံခါးတိုင်သည် စတုရန်းပုံရှိ၍ သန့်ရှင်းရာဌာနရှေ့ရှိတံခါးတိုင်နှင့် ပုံသဏ္ဌာန်ချင်းတူ၏။ 22 ယဇ်ပလ္လင်ကို သစ်သားနှင့်ပြုလုပ်ထားပြီး အမြင့်သုံးတောင်၊ အလျားနှစ်တောင်ရှိ၏။ ပလ္လင်၏ထောင့်ချိုးများ၊ အောက်ခြေနှင့် ဘေးနံရံတို့ကို သစ်သားနှင့်ပြုလုပ်ထား၏။ ထိုသူက “ဤသည်ကား ထာဝရဘုရား၏ ရှေ့တော်စားပွဲဖြစ်၏”ဟု ပြောပြ၏။ 23 ဗိမာန်တော်အပြင်ခန်းနှင့် သန့်ရှင်းရာဌာနတို့တွင် တံခါးပေါက်နှစ်ပေါက်ရှိ၏။ 24 တံခါးပေါက်တစ်ပေါက်တွင် တံခါးရွက်နှစ်ရွက်၊ နောက်တစ်ပေါက်တွင် တံခါးရွက်နှစ်ရွက်ပါ၏။ 25 ဗိမာန်တော်တံခါးတို့တွင် ဗိမာန်တော်နံရံများကဲ့သို့ ခေရုဗိမ်ပုံနှင့် စွန်ပလွံပင်ပုံတို့ကို ထွင်းထုထား၏။ မျက်နှာစာဆင်ဝင်ပေါက်တွင် သစ်သားအမိုးပါရှိ၏။ 26 ဆင်ဝင်ရှိနံရံများတွင်လည်းကောင်း၊ အိမ်တော်အခန်းငယ်များတွင်လည်းကောင်း၊ အမိုးများတွင်လည်းကောင်း ပြတင်းပေါက်ငယ်များနှင့် စွန်ပလွံပင်ပုံများပါရှိ၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative